Mastang er a Omekungil

A tara kot el ungil techall sel kumais a beluu—el mesuub er tirkel rodos er ngak el meliuekl er a beluulechad, Ng diak a ngodech el uasiei de dmak loureor, kaseues, e oubeltik el reng lobengkemiu.

Mlara ta er a okesiu, ea meredel er a Relief Society a uleker, “Ngar ngii a tokubets el omeruul el redil a kirir el omedasu el kirel?”

Ak ulenger, “Choi!” sel cheldechedechal a President Russell M. Nelson el uasei “A Plea to My Sisters” a mlera uldesuek. A President Nelson a ulisechakl, “Kid a ousbech er a redil el mesisiich a klaumodengei er tir era osisecheklel a Kristo.”¹

A Nephi a uluchais er sel osisecheklel a Kristo el ua tiakid:

“Le sel siseball el bom siseb er ngii a ouuchel reng el kirel a klengit me a techolbechelid er a ralm; e ngii a mochu mengubet a kngtemiu, er a ngau me a Edaol Reng. …

“Me chelechang … Ng soak loker el kmo ngmla moungil a rokui, ngdiak; e leng dimlak komei er chouaitiang a le mlak a tekingel a Kristo me a mesisiichel klaumerang er kau el mo er ngii, meng di mlo ultuir re ngii el ngarngii a klisiichel lolsobel.

“Misei a uchul eng kiriu el loutekangel di merael mo ruchei el mla tibir a rengum el kirel a Kristo, e bleketakl ongilem, me a beltikelreng el mo er a rokui el chad. Mal sekum e ko moutekangel merael mo ruchei el di urrekodel er a tekingel a Kristo, e outekangel mo er a ulebongel, ea Edam a dilung el kmo: ko mo nguu a diak a ulebengelel klengar.

“… Tiakid a rael; ng diak a ngodech el rael me a lechub eng ngakl ngarngii er cheungel babeluades, el mo uchul ea chad a sebechel mo suboel er a rengedel a Dios. Di urrekodel, er a tekingel a Kristo.”²

Ngera uchul meke de ousbech a mesisiich el klaumodengei er aikal osisechakl?

Ak blechoel mesterir tirkel redil er a Uriur-klebesei Santo el kmal lousbech a ngeseu, eng di diak lobult el mo er ngkel Chimol el sebechel mesterir a diak a ulbengelel ngeseu. Te bai blechoel losiik a klaumodengei er a “tekoi er a beluulechad.”³

Mesel donglou a klaumedengei er a osisecheklel a Kristo, e kid a mocha ngar ngii a klou e mesisiich a klaumodengei er kid el kirel “uldasou er a deureng.”⁴ Kede dirrek el mo medengei el kmo a Osobeled, el Jesus Kristo, a uchul tial moktel.

Sel dosuub el kmo mekerang a doruul aikal osisecheklel a Kristo el mera teletael el de ngar ngii, ea beltkil a rengud el mora Osobel a mo klou. E kid a mo medengei el kmo “kid a kakerous, engdi kid rokui a ousbech er sel klou el Tngakireng.”⁵ Kid a medengei el kmo Ngii a uchetemed—“el ngii a Osobled, … el mesisiich el uchetemed … el alsekum [kid] a dechor er ngii e[kid] a diak demukel.”⁶

Ng mekerang tial osisechakl e omekngeltengat er kid sel dosiik a budech ma klaumedengei e blak a rengud el melemolm el ngara deureng er tial klengar er kid?

Me kulengit me domuchel, el ua Nephi sera lolekoi, “le mlak a tekingel a [Kristo] me a mesisiich el klaumerang er kau el mo er ngii, meng di mlo ultuir re ngii el ngarngii a klisiichellolsobel.”⁷ A klaumerang er kid er a Jesus Kristo a ngosukid el mo mesisiich er a ngidi el omelasm.

Kid, a uaisei, blechoel mesa klaumerang er kid el mo mesisiich ma deluill er kid el mo er a Demad er a Babeluades ma Ngelekel a mo mesisiich er a cherarou. Soak louchais a edei el okesiu.

Kot, a Osobel, el Mastang er a Omekungil, a ngar ngii a klisichel el mo omult a rengud e ngosukid el mo duobes er a klengit el reng el uchul a kengtid. Sera Osobel lolsisechakl er ngkel redil er a Samaria sera le ngara chido, eng mle medengei a kengtil. Engdi, a Rubak omes era rengul a chad,”⁸ e Ngii a mle medengei el kmo ngii a mo ungil orrengs.

Sera ngikal redil mera chido, a Jesus—el olechotel a ngar el ralm—a dilu, “Beskak a imelek.”A Osobled a di osisiu mesel longedecheduch er kid loba ngor el ngii a dodengelii sel de bo er Ngii—eleng Ngii a medengelkid. Ngii a olngeseu er kid er a ikel doruul. Eleng Ngii el uaisei ma aikel blaruul el merkid, Ngii a medengei. Eleng medengei a ringel el ngar kid, Ngii a sebechel meskid sel ngar el ralm el dosiik er ngii. Ngii a ululsisechakl er tiang el mo er ngikel redil ra Samaria sera ledung, “ke medengei a ngat ra Dios, e dirrek el medengelii ngikel dmu er kau el kmo, Beskak a imelek, e kolengit er ngii, me ngmeskau a dingar el ralm.” Meng mocha medengei, ngikal redil a ulenger loba klaumerang e ulengit, “Rubak, beskak itial ralm, me lak bo le meched a renguk.”

Uriur el ngikal redil ra Samaria a blor ngar ngii tial okesiul lobengkel a Osobel, ngil dil “milecherei cholmelel e merael elmora chelsel a beluu,e melekoi rar chad el kmo,

“Mei mesa talchad el melekoi er ngak a ikel bek el bla kruul el tekoi, el kmo nglocha ngii a Kristo?”

Ngkal redil a mla mo sioning—ngii a mocha melai er sel ngar el ralm—ng mlo semeriar el mo ouchais el kirel a chedaol Kristo el mo ra rebebil.⁹

Sel debera Kristo loba ngariou el reng ma reng ra omesuub—malta mengkit a rengud el kirel tekoi deriruul, klengit, ma mekngit teletael—Ngii a sebechel lomult er kid, “le ngii a oba klisiich el mo olsobel.”¹⁰ Mesel lobult a reng, eng sebeched, el uai ngkel redil ra Samaria, el mora beluu— re keblid, skuul, ma ureor—el mo sioning er a Kristo.

Ongerung, a Mastang er a Omekungil a sebechel meruul a rengud el mo ungil e smisichid sel dechau a ringel eleng uchul a diak el lemalt el teletelir a rebebil. Mla mo betok el kungedecheduch er a redil el oltekau a meringel el berraod. Aikel telbiil el luruul er a templo a mocha meringel sel lomekungil. A ringel el ngar ngii aikel telbiil a mla metemall, klengit el reng, e mla mo diak a loumerang er a rebebil. Betok el tirkal dil a chemau a ringel eleng delboes lomeruul ra becherir, ma mekngit el tekoi, teletael, telmall el reng, ele luchul a blekerdelil a rebebil.

A aikal okesiu a dimlak el teletelir, a bai mla rulterir el mo mekngit a rengrir e merur. Meng diak lodengei el kmo te mekerang aikal rengrir, ea betok er tir a melasm loumechad er tir, e melasm el lobes.

Oureng ma omekungil a diak debetik sel domart ng bai sel llomes ma beltik el reng er a Osobeled, el Jesus Kristo.¹¹ Elder Richard G. Scott a ulsisechakl: “Alsekum kau diak a meringel el kengtim, elak mngara ringel el kekka ra kengterir a rebebil. … Ng sebechem el mo melechesuar a beltik el reng. … Engdi lak momdasu el kmo ngerchelem. … Mesel bla mruul aikel sebechel ngosukii a chad el betik a rengum er ngii, e mngai aikel berraod el lodars er a ochil a Osobel. … Sel omoruul er tiang, eng diak dim betik era budech ke dirrek lolecholt er a klaumerang er kau er sel klisichel a Osobel el mo ngmai a berraod er a klengit el ngara ngkel betik ra rengum lokiu a ouuchel el reng ma keldung.”

Ng milemolm el kmu: “A cherungel el omekungil a mei lokiu a klaumerang er kau er a Jesus Kristo ma Klisichel ma ultikillel, lokiu a Tngakireng er Ngii, el mo omekungil aikel ultil a telemall el ngii a diak lungil e diak kirel ngar kau.”¹²

Alsekum ke metik er a kau el ngar tial teletael, ea omekungil a locha mo kemanget. Ng kau a kirem el mo meluluuch losiik el kmo ke mo mekerang e mai a ngeseu, e dirrek el bor  tirkel mechedaol el loba priesthood. Mesel mongedecheduch, bol ngar ngii telekael, e bo mosiik a ngeseu er tirkel brobesong er a counseling. A tekoi er edaol a klou a belkul er tial teletael! Molatk aikel chedaol ngar kau: el demam me a delam er a Babeluades a betik a rengrir er kau. Moumerang er sel Moktel a Chedam el mo er kau. Molemolm er a bek el sils el mesisiich a klaumodengei ra osisecheklel a Jesus Kristo. Bo moumerang ra bek el sils e mosuub aikel tekingel a Osobel er sel chido er a ngar el ralm. Multuill er sel omelisiich el merkid lokiu a ruoll er a templo ma telbiil. Becherei sel omekungil el klisichel a Osobel ma Tngakireng er Ngii mel tuu er a chelsel a klengar e kau.

Ongedei, a Mastang er a Omekungil a sebechel meruul a rengud el mo ungil e smisichid sel dechau a ringel era “meral tekoi er a tech,”¹³ el ua kerior, secherel a uldasu, rakt, meklou el ringel, ma kodall. Ak dirk mlo medengelii a ngeasek el redil el ngklel a Josie el ngar ngii a biopolar disorder er ngii. Tiakid a kekerei el omsodel a omerolel bedul a omekungil el luluchais er ngak:

“Sel kot el mle meringel el taem, el ngak ma telungalek er ngak a omekedong er ngii a sel ‘dimechiuaiu er a ulaul.’ A dimechiuaiu er a ulaul a omuchel sel betok a ngidil ngerang el lomelchesuar e meringel e diak soal ngidil ngor, omerutech, ma llomes. Meral klou el ringel el mera btelul. Ngar ngii chimol dimechiuaiu el diak el sebechel lobes er ngii.

“Sera kot el bolo melchesiu er ngii el bipolar, el rirelii tial okesiu el mo kdekudel. Ng mle medengei el lilangel, a iuechel a medal a merberebet er a medal e lolasm el louteliil. Engdi sel meringel el ringel el ngii a diak longaisisiu er sel ringel el uliak kuriur serak kisa a dektelel a delak, el meral soal mo olngeseu er ngak.

“Meral mlo mekngit a rengul sera lesekak el ngar tial ringel. Dimlak ki modengei alta meral mla mo mekngit tial ringel, eng di kmedang a okesiu el mo ongasireng.

“Mellemolm el kemanget el taem, ea delak milngelulau e di ulmelekl, e lemuut el lomelekl, ‘Meral soak el rulii a ngidil ngerang meng mo diak kom uaisei.’

“Meng uaisei, ea ilkolk a mesisichang, e sera kumedasu el kmo mla mo diak el sebechek el chemau tiang, ea ongasireng a mlo er ngii.

A ungil e klebokel el klisiich a mler tial bedengek. Maluaisei, ea ‘klisiich el klou er a klisichek,’¹⁴ eak dilu er delak loba klaumerang e dilung a euid el tekoi el longer sel teltael el mle soal mo chemol a ringel el kngar ngii. Ak dilung, ‘Kau diak kirem el uaisei; Ngarngii a chad a mla rulii.’”

Mla er tial milekolk e kdekudel el secherel a uldasu, ea Josie miltik a klisichel el ouchais el kirel a Jesus Kristo ma Tngakireng er Ngii.

Ngdimlak el bol cherrungel el lomekungil er sel sils, engdi ngiluu a llomes er a oureng sel taem er a ringel. Chelechal sils, lolngeseu lokiu sel mesisiich el klaumodengei er a osisecheklel a Kristo e ngar ngii a klisichel ra bek el sils lokiu sel ngar ralm er a Osobel, ea Josie a melemolm er a omerolel bedul a omekungil e olecholt er sel mesisiich el klaumerang er a Mastang er a Omekungil. Ngii a olngeseu er a rebebil. E dilung, “Sel kumelchesuar er a ilkolk el blechoel ngar ngii, eak kultuil er sel uldesuel er a klechubechub er Ngii. Ngii a omekllomes er a rael el ngak a chemau a meringel el ringel.”¹⁵

Rodos, Ak ouchais—

Kau a diak el kirem el melemolm el oltekau er sel berraod er a klengit el reng eleng uchul a klengit—el di kau el tang.

Kau a diak el kirem el oltekau er a ringel eleng uchul a diak el melemalt el teletelir a rebebil—el di kau el tang.

Kau a diak el kirem el mo chemau a ringel er a teletael er a tech—el di kau el tang.

A Osobel a ulengit:

Kau ngdiak kom luut el mer ngak, e bo mouuchel a kengtim, e bo lobult a rengum, me bo kumkungil er kau?

“… Alsekum e ke mer ngak eng mo er ngii a diak a ulebengellel klengar er kau. Maluaisei, ea klechubechub er ngak a kudersii el bedul kau, e ngidil chad el mei … Ngak a mo nguu.”¹⁶

“[Ngii] a sebechel rulii ngidil ngerang el mo choridii tiang er kau.” Meng klemerang “[Ngii] a mla rulii. ” Loba ngklel a Jesus Kristo, el Mastang er a Omekungil, amen.