Kwan Tɔɔtsen no a Ogya kɔ Enyigye mu

Mo nuanom na me nkyerɛbaa, hom a hom wɔ Conference Center ha nye hom a hom wɔ wiadze yi mu nyina no, mbrɛ osi yɛ me enyisɔ dɛ menya kwan nye hom rebɛkyɛ m’adwendwen anapa yi.

Mfe eduonum ebien a abasen kɔ no, wɔ Ayɛwoho 1964 mu no, nna mowɔ dwumadzi wɔ New York City, ber a nna wɔrehyɛ Wiadze Guadzi Fa wɔ hɔ no. Anapa biara nna mekɛsera Mormon Ntamadan no a ɔwɔ guadzi ase no. Mukodurii no annkyɛr na wɔhyɛɛ ase dɛ woriyi Asɔr no ne sene Man’s Search for Happiness a wɔda nkwagye ho nhyehyɛɛ no edzi, a ɔabɛyɛ Asɔr no n’atsenkãdze. Metsenaa aberantsɛ bi a oedzi mfe bɛyɛ 35 nkyɛn. Yɛkɛsaa ber kakra ara. Nna ɔnnyɛ hɛn Asɔrba. Nkyii wɔbrɛɛ nkandzea no adze, na sene no hyɛɛ ase.

Yetsie onyia ɔrekɛsa no ne ndze ber a obisaa nsɛmbisa a no mu yɛ dur na ohia ma obiara no. Henfa na mifi bae? Dɛn ntsi na mowɔ ha? Mifi abrabɔ yi mu a, henfa na morokɔ? Obiara yɛɛ n’asowa pɛnn dɛ wɔbɛtse mbuae no, na nna enyiwa nyina tsim mfonyin no a woriyi no do. Wɔkyerɛɛ hɛn abrabɔ a ansaana nyimpa reba asaase do no mu, nye hɛn siantsir a yɛwɔ asaase yi do ha. Yɛhwɛɛ nanabanyin bi a n’enyi efir a orifi mu wɔ asaase yi do a nna ɔyɛ awɔse, na mbrɛ ɔnye adɔfo a nna woedzi no kan kɔ sunsum wiadze mu no hɔn nhyiamu enyimnyam mu.

Wowiee hɛn Ɔsor Egya ne nhyɛhyɛɛ a Ɔwɔ ma hɛn no ɔyɛkyerɛ fɛɛfɛw yi, dɔm no puei dzinn, a dodow noara sene no mu asɛm no atɔ hɔn do. Aberantsɛba ɔserafo no a ɔtsena me nkyɛn no annsoɛr. Mibisaa no dɛ sɛ n’enyigyee ɔyɛkyerɛ no ho a. Otsĩi mu maa me no mbuae: “Iyi nye nokwar no!”

Asɛmpasomafo no kyɛ hɛn Ɔsor Egya ne nhyehyɛɛ a Ɔwɔ ma hɛn enyigye na hɛn nkwagye no wɔ wiadze nyina mu. Naaso nnyɛ biara a ɔtse asɛm yi a ofi sor yi na ɔgye to mu na ofua. Naaso, mbanyin na mbaa a wɔwɔ beebiara, tse dɛ me nyɛnko aberantsɛba yi wɔ New York Wiadze Guadzi Fa ase no, sɛ wohu no nokwar no a, na wɔdze hɔn anan si kwan no a obegya hɔn a akɔ fie dwudwoodwo no. Hɔn abrabɔ sesã koraa daapem.

Jesus Christ hɛn Agyenkwa no, Noho hia papaapa wɔ nhyehyɛɛ no mu. Ɔnnyɛ No werdam afɔrbɔ no a, nkyɛ obiara ayew. Naaso, onnwie payɛ ara dɛ yɛbɛgye No edzi nye No dwuma no. Ohia dɛ yɛyɛ edwuma na yesũa, yɛhwehwɛ na yɛbɔ mpaa, yenu hɛn ho na yetu mpon. Ohia dɛ yebohu Nyankopɔn Ne mbra na yɛdze bɔ bra. Ohia dɛ yɛgye No nkwagye ayɛdze horow no. Dɛm saso ne nyɛe no nko na yebotum enya onnyiewiei nokwar, egyigye no.

Wɔayɛ nhyira ama hɛn dɛ yenya nokwar no. Yɛwɔ asɛdze dɛ yɛnye binom kyɛ nokwar no. Hom mma yɛnfa nokwar no mbɔ bra ama yɛaafata dza Egya No wɔ ma hɛn nyina no. Ɔnnyɛ hwee gyedɛ dza ɔbɛyɛ mfaso ama hɛn. Ɔakã akyerɛ hɛn dɛ, “Iyi nye m’edwuma na m’enyimnyam—dɛ medze nyimpa ne bɛkyebo na onnyiewiei nkwa bɔbɔ adze.”¹

Fi me kra no bun mu na medze ahobrɛadze nyina no, megye dase wɔ akyɛdze kɛse a ɔyɛ Egya Ne nhyehyɛɛ ma hɛn no. Ɔno nye kwan tɔɔtsen kortsee no a ogya kɔ asomdwee na enyigye mu no wɔ ha nye wiadze no ɔbɛba nyina mu no.

Mo nuanom na me nkyerɛbaa, medze modɔ nye me nhyira gya hom ber a medze kasa yi ba ewiei no, na meyɛ dɛm wɔ hɛn Agyenkwa na Pomfo Jesus Christ no mpo dzin mu, amen.