Na Sala Vinaka Sara ni Bulamarau

Kemuni na taciqu kei na ganequ lomani, eke ena Vale ni Koniferedi vakakina ena vuravura taucoko, au sa vakavinavinaka vakalevu ena madigi meu wasea na noqu nanuma vei kemuni ena mataka nikua.

Ena limasagavulu karua na yabaki sa oti, ena Julai ni 1964, a dua na noqu ilesilesi ki na Siti ko New York ena gauna a caka kina mai kea na Vakaraitaki ka ni Vuravura. Ena dua na mataka lailai au a gade ki na Vakatunuloa ni Momani ena vanua ni vakaraitaki ka. Au yaco yani ni sa vakarau vakaraitaki tiko na yaloyalo ni Lotu Man’s Search for Happiness, dua na ivakatayaloyalo ni ituvatuva ni veivakabulai ka sa yaco me dua na iyau talei ni Lotu. Au dabe volekata e dua na cauravou rairai sa yabaki 35 beka. Keirau veitalanoa vakalailai. E sega ni lewe ni noda Lotu. Oti sa vakalailai na cina, ka tekivu na yaloyalo.

Keimami vakarorogo ki na domona na daukacikacivaki ena nona taroga na taro vakadodonu ka raraba: Au lako mai vei? Na cava au mai cakava eke? Au na lako i vei ni sa oti na bula eke? E wawa na daliga kece me ra rogoca na kena isau, ka coba na mata kece ena iyaloyalo e vakaraitaki mai. A soli e dua na ivakamacala ni noda bula taumada, salavata kei na dua na ivakamacala ni inaki ni noda mai bula e vuravura. Keimami sarava e dua na ivakaraitaki momona ni nona takali yani mai na bula oqo e dua na kena tukanigone qase sara kei na nona laki duavata kei ira na nona daulomani era a liu vua kina vuravura ni yalo.

Ena itinitini ni iyaloyalo totoka oqo ni nona ituvatuva na Tamada Vakalomalagi ena vukuda, era a yatuni galugalu yani ituba na tamata, e levu e rawa ni da raica na kena tarai ira na itukutuku ena iyaloyalo. A sega ni tucake na cauravou e yasaqu. Au taroga kevaka a marautaka na iyaloyalo. E bibi na kena isau mai vua: “Oqo na ka dina!”

Na nona ituvatva na Tamada me baleta noda bulamarau kei na noda vakabulai era dau wasea na noda daukaulotu ki vuravura taucoko. E sega ni o ira kece era dau rogoca na itukutuku vakalou oqo era dau ciqoma ka maroroya. Ia, o ira na turaga kei na marama ena veivanua kecega, me vaka na noqu itokani gone ena vakaraitaki ka ni Vuravura mai New York, era dau vakadinadinataka na kena dina, ka ra biuta na yavadra ena sala ka na kauti ira yani vakavinaka ki vale. Sa veisau vakadua na nodra bula.

Sa tiki bibi sara ni ituvatuva na noda iVakabula, o Jisu Karisito. Kevaka e sega na Nona isoro ni veivakaduavatataki, ena maumau na ka kecega. E sega ni sa tei rauta me da vakabauti Koya walega kei na Nona itavi. Eda gadreva me da cakacaka ka vuli, vakasaqaqara ka masu, veivutuni ka vinaka cake. Eda gadreva me da kila na lawa ni Kalou ka bulataka. E dodonu meda ciqoma na Nona cakacaka vakalotu ni veivakabulai. Ni da sa cakava ga vakakina eda na qai rawata na bulamarau dina.

Eda kalougata ni sa tu vei keda na dina. Sa noda ilesilesi me da waseana dina. Me dabulataka na dina, me ganiti keda kina na veika kece e tu vei Tamada me baleti keda. E sega ni dua na ka e cakava o Koya e sega ni baleti keda. Sa tukuna vei keda o Koya, “Oqo na inaki kei na lagilagi ni noqu cakacaka—me ra tucake tale mai na mate na tamata kecega ka rawata na bula tawamudu.”¹

Mai vuniyaloqu ena yalomalumalumu, au vakadinadinataka na isolisoli cecere ka nona ituvatuva me baleti keda na Tamada. Sai koya na sala vinaka sara ki na sautu kei na bulamarau eke kei na vuravura sa bera mai.

Kemuni na taciqu kei na ganequ, au laiva vei kemuni na noqu loloma kei na noqu veivakalougatataki niu tinia, kau vakayacora vakakina ena yaca ni noda iVakabula ka noda Dauveivueti, io ko Jisu Karisito, emeni.