Te Kawai ae Kororaoi nakon te Kukurei

Tariu ao mwaneu aika tangiraki, n te Tienta ni Maungatabu ao ni kabuta te aonaaba, I rang kukurei ibukin te tai aei n tibwa au iango ma ngkami n te ingabong aei.

Nimabwi ma uoua te ririki n nako, inanon Turai 1964, iai tibwangau ni kaawan Niu Ioki ngke e karaoaki te Kamataku ikekei. Ni karangainan te ingabong teuana, I kawara te Moomon Pavilion n te tabo ni kamataku. I roko raoi imwain otin Tamnein te Ekaretia Man’s Search for Happiness, Tamnein te babaire ni kamaiu are e a rang n ataaki n te aro. I tekateka irarikin te mwane ae tao 35 ana ririki. Ti taetae teutana. Bon tiaki kain ara Ekaretia. Imwiina e a uarereke otan te taura, ao e a oti te tamnei.

Ti kakauongo nakon bwanaan te tia karaki ngke e taekinna te titiraki ae moan te kakaawaki are e kaineti nakoia aomata ni kabane. I roko mai ia? Tera bukin rokou ikai? N na nakea ngkana I kiitana te maiu aei? Ni kabane taan mataku a ingainga ni kan ongo te kaeka. Ni kabane a bane ni katokai mataia iaon te tikuriin. Kabwarabwaraan te maiu imwain te maiu aei e a kaotaki, n airi ma kabwarabwaraan bukin rokora n te aonaaba. Ti kakoaua te Tamnei ae riingi nanora ni maten te tibu ao kaitiboona ae mimitong ma naake e tangiriia ake a kaman roko n te aonaaba n Tamnei.

Ni banen te Tamnei ae Tamaroa aio n ana baire Tamara are i karawa ibukira, aomata a karaurau n otinako, a mwaiti aika a tang n te rongorongo n te Tamnei. Te iruwa ae kairake are e tekateka irarikiu e aki teirake. I titiraki ngkana e kukurei n te Tamnei ae nooria. Ana kaeka ae korakora: “Aio bon te koaua!”

Ana baire Tamara ibukin Kukureira ao kamaiuara e tibwaaki irouia ara mitinare ni kabuta te aonaaba. Tiaki ni kabane ake a ongo te rongorongo mai karawa aei a butimwaia ao ni kakaitau iai. E ngae n anne, mwane ao aine n tabonako, n ai aron raraou ae kairake n te Kamataku i Niu Ioki, e ata koauana, ao a matoatoa n rineia bwa a na ira te kawai are e kairiia ni kamanoia nakon mweengaia. Maiuiia a bitaki n aki toki.

Iesu Kristo, ara Tia Kamaiu e bon kakaawaki n te baire aei. N akean ana anganano ni kamaiu, ni kabane aomata a na bane ni bua n tamneia. E bon aki tau, e ngae n anne, ti kakoauana ao Ana mition. Ti riai ni mwakuri ao n reirei, ni kakae ao n tataro, n rairannano ao ni kekeiaki. Ti riai n ataa ana tua te Atua ao ni maiuakin. Ti riai ni karekei Ana otenanti ni kamaiu. Ti man karaoan aei ti na karekea te kukurei ae koaua, n akea tokina.

Ti kakabwaiaki ni karekea te koaua. Iai tibwangara n tibwa te koaua. Ti na maiuakina te koaua bwa ti na kona ni karekei ni kabane ake e katauraoi ibukira ni kabane Tamara. Bwaai ni kabane ake e karaoi bon ibukira, E tuangiira bwa ana mwakuri ao mimitongina bwa e na uota te aki Mamate ao te maiu are akea tokina nakoia aomata”.¹

Mai kabin nanou, ao au nanorinano ni kabane, I kakoaua te bwaintangira ae korakora are bon ana baire Tamara ibukira. Bon teuana te kawai ae kororaoi nakon te rau ao te kukurei n te aonaaba aei ao ae e na roko.

Tariu ao mwaneu, I katoka iaomi au tangira ao au kakabwaia ngkai I kainna, ao I karaoia n aran ara Tia Kamaiu ao te Tia Kabooira, are bon Iesu Kristo, amen.