Txoj Kev Taug Kev uas Zoo Tag Nrho Kom Tau Kev Zoo Siab

Kuv cov kwv tij cov muam, hais rau cov uas nyob hauv lub Tsev rau Rooj Sab Laj no thiab thoob plaws ntiaj teb no, kuv zoo siab ua Vajtswv tsaug vim tag kis no kuv muaj cib fim los hais ob peb lo lus.

Tsib caug ob xyoos tas los lawm, thaum lub Xya Hli Ntuj xyoo 1964, kuv raug txib mus ua hauj lwm hauv lub nroog New York lub sij hawm ntawd lawv tab tom ua qhov Kev Ua Si Tim Tshav Pob. Muaj ib tag kis sawv ntxov kuv tau mus xyuas lub Rooj rau Neeg Maumoos tim tshav pob. Kuv tuaj txog ua ntej lawv yuav qhib lub Koom Txoos ib daim vis dis aus hu ua Tib Neeg Nrhiav Kom Tau Kev Zoo Siab, uas piav txog txoj kev cawm seej uas txij thaum ntawd los tau ua lub Koom Txoos ib zaj yeeb yam uas nto moo. Kuv zaum ze ib tug txiv neej hluas uas kab hais tias muaj li 35 xyoos. Wb sib tham me ntsis. Nws tsis yog ib tug neeg uas ua mej zeej hauv peb lub Koom Txoos. Ces lawv txawm tua teeb, thiab tau qhib zaj vidi-aus ntawd.

Peb tau mloog tus neeg hais cov lus thaum nws nug lo lus teb hais tias: Kuv tuaj qhov twg tuaj? Vim li cas kuv los nyob no? Kuv yuav mus qhov twg tom qab kuv ncaim lub neej no mus? Txhua tus yeej xav hnov cov lus teb, thiab txhua tus tau ntsia ntsoov cov duab hauv zaj vidi-aus ntawd. Lawv piav txog lub neej ua ntej yug los, thiab qhia seb lub ntsiab rau lub neej hauv ntiaj teb no yog dab tsi. Peb pom lawv qhia ib zaj dab neeg txog ib tug yawg laus uas tau tso lub ntiaj teb no tseg thiab nws muaj kev zoo siab npaum li cas thaum nws rov qab ntsib cov neeg uas nws hlub uas xub mus nyob hauv lub ntuj ntsuj plig ntawd.

Thaum yuav xaus zaj uas qhia txog peb Leej Txiv Saum Ntuj Ceeb Tshej txoj hau kev rau peb no, pab neeg coob coob tau pib sawv kev, yus pom tau hais tias zaj vidi-aus twb raug lawv coob leej lub siab. Tus txiv neej hluas uas zaum ntawm kuv ib sab tsis tau sawv. Kuv nug nws seb nws puas nyiam zaj ntawd. Nws teb hais tias: “Qhov no muaj tseeb tiag!”

Peb Leej Txiv txoj hau kev uas pab kom peb yuav zoo siab thiab tau txoj kev cawm dim yog zaj xov uas peb cov tub txib tshaj tawm thoob plaws ntiaj teb no. Tsis yog txhua tus neeg uas hnov zaj xov no yuav kam txais thiab ua raws. Tiam sis, cov txiv neej thiab poj niam txhua qhov txhia chaw, zoo li kuv tus phooj ywg hauv New York Tshav Pob no, pom tau qhov tseeb no, thiab lawv pib taug txoj kev uas yuav coj lawv mus tsev tsis raug xwm txheej li cas. Lawv lub neej raug hloov hlo tas mus ib txhis.

Lub hauv paus rau txoj hau kev no yog peb tus Cawm Seej, Yexus Khetos. Yog tsis muaj Nws txoj kev theej txhoj, ces txhua yam tsav yuav plam mus. Tiam sis, txoj kev ntseeg Nws thiab Nws tej hauj lwm, yeej yuav tsis txaus. Peb yuav tsum ua hauj lwm thiab kawm, tshawb nrhiav thiab thov Vajtswv, hloov siab lees txim thiab ua neeg zoo dua. Peb yuav tsum paub Vajtswv tej kev cai thiab ua raws li tej ntawd. Peb yuav tsum txais Nws tej kab ke uas cawm tau neeg. Tsuas yog thaum peb ua tej no peb thiaj yuav tau kev zoo siab tiag tiag, uas kav mus ib txhis.

Peb muaj hmoov vim peb muaj qhov tseeb. Peb raug txib kom mus faib qhov tseeb. Cia peb ua neej nyob raws li qhov tseeb xwv kom peb thiaj tau txhua yam uas Leej Txiv tau npaj tseg rau peb. Txhua yam uas Nws ua yeej yuav pab peb. Nws twb qhia peb hais tias, “Nov yog kuv txoj hauj lwm thiab kuv lub yeeb koob—ua kom tib neeg tsis txawj tuag thiab tau txoj sia nyob mus ib txhis.”¹

Kuv txo hwj chim, ua tim khawv tag siab tag ntsws, hais tias lub txiaj ntsim zoo tshaj plaws uas Leej Txiv muab rau peb yeej yog Nws txoj hau kev. Nws txoj hau kev yog tib txoj kev uas zoo tag nrho kom tau kev kaj siab lug thiab kev zoo siab hauv ntiaj teb no thiab hauv lub neej tom ntej no.

Kuv cov kwv tij thiab cov muam, kuv tso kuv txoj kev hlub thiab kuv txoj koob hmoov rau nej thaum uas kuv xaus kuv cov lus, thiab kuv ua li no los ntawm tus Cawm Seej thiab tus Txhiv Dim, uas yog Yexus Khetos, lub npe, amees.