Li xtz’aqalil ru b’e re li sahil ch’oolejil

Ex was wiitz’in raarookex inb’aan, jo’ li wankex sa’ li Ch’utamil Kab’l a’in jo’ sa’ chixjunil li ruchich’och’, k’a’jo’ ninb’antioxi naq wan inhoonal re xwotzb’al lin k’a’uxl eerik’in sa’li eq’la a’in.

Kab’laju roxk’aal chihab’chaq anajwan, sa’ li po julio re 1964, kiwan jun intaqlanb’il k’anjel sa’li tenamit Nueva York chiru li hoonal naq na’ux li Exposición Universal aran. Sa’jun kutan, toja’ eq’la, kiwula’ani li Pabellón Mormón aran. Tz’aqal kiwulak naq ok re chixk’utb’esinkil sa’ li nimla kaxlan mu li kaxlan mu re li Iglees El hombre en su búsqueda de la felicidad, jun xk’utb’esinkil li k’uub’anb’il na’leb’ re li kolb’a-ib’ li okenaq sa’ xyanqeb’ li kaxlan mu jwal nawb’ileb’ ru sa’ li Iglees. Kinchunla chixk’atq jun li winq toj saaj, maare 35 chihab’ wan re. Koo’aatinak b’ayaq. A’an moko komon ta re li qaIglees. Toja’ naq eb’ li kaxlan xam ke’chup ut kitikla li kaxlan mu.

Kiqab’i lix yaab’ xkux laj ch’olob’anel naq kixpatz’ li q’unil ut nawb’il patz’om a’in: B’ar xinchal chaq? K’a’ut naq wankin aarin? B’ar tinxik chirix li yu’am a’in? Chixijunil li xikeb’ q’es ru chirab’inkil lix sumenkil li patz’om a’an, ut chixjunil li xnaq’ uhej tiikeb’ chirilb’al li kaxlan mu. Kich’olob’aman rix li qayu’am naq toj maji’ nokoyo’la chaq, rochb’en jun ch’olob’ahom chirix k’a’ru aj-e wanko sa’ li ruchich’och’ a’in. Koowan chaq choq’ aj yehol nawom chirix jun li k’utb’esink natoch’ok ch’oolej chirix lix kamik jun li tiixil yuwa’chinb’ej ut lix ch’utub’ankil rib’ rik’ineb’ lix raarookil komon li ak ke’kam chaq chiru naq kiwulak chaq sa’ li ruchich’och’ reheb’ li musiq’ej.

Sa’ xraqik li chaq’al ru k’utb’esink chirix li k’uub’anb’il na’leb’ re li qaChoxahil Yuwa’ choq’ qe, li kristiaan ke’ok chi elk sa’ ch’anch’ookilal, naab’aleb’ re toch’enaqeb’xch’ool xb’aan li esil wan chaq chirix li k’utb’esink. Li saaj ula’ wan chink’atq moko kiwakli ta. Kinpatz’re ma xwulak chiru li k’utb’esink. Sa’ junpaat kixsume: “A’in li yaal!”

Eb’ li misioneer neke’xwotz sa’ chixjunil li ruchich’och’ lix k’uub’anb’il na’leb’re li qaYuwa’ choq’ re xsahilal qach’ool ut li qakolb’al. Moko chixjunileb’ ta li neke’ab’ink re li choxahilal esil a’in neke’xk’ul ut neke’xtaaqe. A’b’an , winq ut ixq sa’ chixjunil na’ajej, jo’ lin saajil amiiw re li Exposición Universal aran Nueva York, neke’xk’e reetal li yaal ut neke’xk’e li roqeb’ sa’ li b’e li tixk’ameb’ xb’e chi kolb’ileb’ rix sa’ ochoch. Neke’jala lix yu’ameb’ chi junelik.

Jun eechej aajel ru sa’ li k’uub’anb’il na’leb,’ a’an aj Kolol qe, li Jesukristo. Wi ta ink’a’ kixmayeja chaq rib’ re xtojb’al rix li qamaak , chixjunil sachenaq raj. A’b’an moko tz’aqal ta yal xpaab’ankil a’an ut lix k’anjel. Tento took’anjelaq ut tootzoloq, toosik’oq ut tootijoq’, taqajal qak’a’uxl ut toochaab’ilo’q. Tento taqanaweb’ ru lix chaq’rab’ li Dios ut taqayu’amiheb’. Tento taqak’ul lix k’ojob’anb’il k’anjel re li kolb’a-ib’. Ka’ajwi’ rik’in xb’aanunkil chi kama’an taqak’ul li sahil ch’oolejil li tz’aqal ut maak’a’aq roso’jik.

Osob’tesinb’ilo rik’in naq wan qe li yaal. Taqlanb’ilo chixwotzb’al li yaal. Qayu’amihaq li yaal, re naq kulub’ejaqo re xk’ulb’al chixjunil li wan re li Yuwa’b’ej choq’qe. A’an maak’a’ naxb’aanu, ka’ajwi’ wi taawanq choqʼ re li qachaabʼilal. A’an kixye qe: “Aʼin lin kʼanjel ut lin  loqʼal—xkʼeebʼal chi uxmank lix kolbʼal chiru li kamk ut lix  yuʼam chi junelik li winq.”¹

Sa’ xchamal li waan ut chi tuulan inch’ool chi tz’aqal, ninch’olob’ xyaalal li xnimal ru xmaatan lix k’uub’anb’il na’leb’ li qaYuwa’ choq’qe laa’o. A’an li junaj chi tz’aqal b’e re li tuqtuukilal ut li sahil ch’oolejil arin jo’ ajwi’ sa’ li yu’am chalel.

Ex was wiitz’in , sa’ xraqb’al li waatin, ninkanab’ eere lin rahom ut li wosob’tesihom, ut ninb’aanu sa’ xk’ab’a’ laj Kolol qe ut laj Tojol qix, a’ li Jesukristo, amen.