Ahl Unsek ohng Peren

Riei ohl oh lih kempoake kan, iangahki kumwailteikan me iang towehda Wasahn Tiepen wet oh wasa teikan nan sampah, I inenen kapingki ahi ansou mwahu en ehukiheng kumwail ahi madamadau kan menseng wet.

Sounpar limeisek-riau samwalahro, nan sulai 1964, kapwukoah ieu kohiengie nan Kahnihmw en New York nan ansou me Kapokon en Sampah wiawi mwo. Ehu nihmensehngo I pwarala ni Mormon Pavilion, wasahn kapwar dipwisou mihieo. I lella mwohnte kasansal en kasdohn Mwomwohdiso me ede Man’s Search for Happiness,me pidada duen pilahn en komouro me udahn kesemwpwal ohng mwomwohdiso. I mwohd limwahn ohl pwulopwul men me ele mahki sounpar 35. Se mwur koasoaipene. E sohte wia tohn Mwowohdiso wet. Dengki ko eri kundi, oh kasdohu eri tep.

Kiht eri rong ngilen lahp koasoakoasoaio eh wia kalelapak kesempwal kei: Ia wasa I kohsangie? Ia kahrepen ei mihmi met? Ia wasa I pahn kohlaie mwurin mour wet? Emen emen tohn pokono inenen men rong pasapeng kan, oh mesen koaros inenen duwaralahng soahng ko me wie pwarapwarada nan kilelo. Ehu kawehwehpen mouro mwohn met wiawi iangahki kawehwehpen kahrepen atail mihmi pohn sampah. Kawehwe koapwuriamwei me pid pahpa kahlap mah men eh pahn sipalasang mour wet oh eh pahn patehng irail kan me e poakohng me tienglahr mwowe nan sahpwen ngehno.

Ni keimwseklahn kilel kaselel me pid duwen Sapwellimen Samatailo Nanleng koasoandi ong kitail, pokono sohte mwesei ansou re aluhieio, kidalap irail padahk en nan kilelo inenen sair. Me pwulopwul me iang pwarala oh mwohd limwahi sohte kesihnenda. I idek ma e mwahuki dahme kasansaladao. Ah pasapeng idipeko dene: “Met iei me mehlelo!”

Padahk en Sapwellimen Samatailo koasoandi ong atail peren oh atail mour soutukkohsang rehn neitail misineri kan nan sampah. Kaidehn koaros me rongehr kaweid sarawi wet aledahr oh piladahr ren idawehn. Ahpw, ohl oh lih wasa koaros, duwehte kempoakepahi me pwulopwulo nan New York World’s Fair, kin diarada mehlel en padahk wet, oh kin pilada ren idawehn ahl me pwungo me pahn kahlwairail ohng arail wasahn kousoan rehn koht. Arail mour wekideklahr kohkohlahte.

Atail Sounkomouro, Sises Krais, ahneki pwukoah kesempwal nan koasoandio. Ma sohte Sapwellime tomw en tohnmeteio, koaruhsie pahn salongala. E sohte itar, ansouet, en kamehlelehte Ih oh Sapwellime kapwukoah me kohiengo. Kitail anahne loaloapwoatieng oh wehwehkihla, rapahki oh kapakap, koluhla oh mwahula. Kitail anahne ese kosonned en Koht akan oh momourki. Kitail anahne alehdi Sapwellime tiahk sarawih kan. Ma kitail pahn wia mepwukat koaros kitail pahn alehdi peren mehlel oh peren poatoapoat.

Kitail ahneki kapai pwehki atail kolokol mehlelo. Kitail ahniki kapwukoah en ehukiheng mehteikan dahme mehlel. Kitail momourki dahme mehlelo pwe kitail en kak alehdi mehkoaros me Sahmo sapwelimaniki ong kitail. E sohte kin ketin wia mehkot ihte ma e wia kamwahupatail. E mahsanihong kitailehr, “me Sapwellime doadoahk oh lingan iei en ketin kapwaiala mour kohkohlahte oh mour soutuk en aramas.”¹

Ni karakarahk mehlel oh mpahi, I kadehdehki kisakis kesempwal me wia Sapwellimen Samatailo koasoandi ong kitail. E wia ehu wiepen mour kaselel ong meleilei oh peren en koaros ansou wet oh pil mour mwurin mour wet.

Riei ohl oh lih akan, I pwilikihdiong kumwail ahi limpoak oh kiheng kumwail ahi kapai ni ahi kaimwsakala, oh I wia ni mwaren Sounkomouro oh Soundoaro, mehlel Jesus Christ, amen.