O Le Ala Atoatoa i le Fiafia

Ou uso e ma tuafafine pele, iinei uma i le Maota Autu mo Konafesi ma le lalolagi atoa, ou te faafetai lava mo le avanoa e faasoa atu ai ou manatu ia te outou i lenei taeao.

I le limasefulu lua tausaga talu ai ia Iulai 1964, sa i ai so’u tofiga i le Aai o Niu Ioka i le taimi sa faia ai le Faaliga a le Lalolagi iina. I se tasi taeao po sa ou asiasi atu ai i le Mormon Pavilion i le faaaliga. Sa ou taunuu atu ae o le a amata le faaaliga o le atatifaga a le Ekalesia le Man’s Search for Happiness, o se faatinoga o le ata o le faaolataga lea ua avea ma se ata lauiloa a le Ekalesia talu mai lena taimi. Sa ou nofo i tala ane o se alii talavou e masalo sa 35 tausaga le matua. Sa puupuu le ma talanoaga. Sa le o ia o se tagata o lo tatou faatuatuaga. Ona pe lea o moli, ma amata loa le ata.

Sa matou faalogo i le leo o le tagata faamatalaupu a o ia fai maia ni fesili anoa e faatatau i tagata uma: O fea na ou sau ai? Aisea ua ou i ai iinei? O fea ou te alu i ai pe a uma lenei olaga?” Sa faalologo uma taliga e fia faalogo i tali, ma sa pulato’a uma mata i ata na faaali. Sa tuu mai se faamatalaga o lo tatou olaga i le muai olaga, faatasi ai ma se faamalamalamaga o lo tatou faamoemoega i le lalolagi. Sa matou molimauina se vaega ootia o le maliu o se tamā matua lava mai lenei olaga faapea ai ma lona toe feiloai atu ma le mamalu i ē pele ia te ia na muamua atu ia te ia i le lalolagi o agaga.

I le faaiuga o lenei ata matagofie o le fuafuaga a lo tatou Tama Faalelagi mo i tatou, sa savavali ese atu tagata ma le filemu, e toatele sa vaaia le ootia i le savali o le ata. Sa lei tu i luga le tagata asiasi talavou lea sa i o’u tala ane. Sa ou fesili atu i ai pe na fiafia i le ata. O lana tali malosi: “O le mea moni lenei!”

O le fuafuaga a le Tama mo lo tatou fiafia ma lo tatou faaolataga o loo faasoaina atu e a tatou faifeautalai i le lalolagi atoa. Ae le o tagata uma e faafofoga i lenei savali paia e taliaina ma opomauina. Peitai, o alii ma tamaitai i soo se mea, e pei lava o la’u uo talavou i le Faaaliga a le Lalolagi i Niu Ioka, e iloaina ona upumoni, ma latou filifili ma le mausali e ui i le ala lea o le a taitai atu ai i latou ma le saogalemu i le aiga. E suia o latou olaga e faavavau.

E taua i le fuafuaga, o lo tatou Faaola, o Iesu Keriso. Ana le aunoa ma Lana taulaga togiola, semanu e leiloloa tagata uma. Peitai, e le lava le tau na ona talitonu ia te Ia ma Lana misiona. E manaomia ona tatou galulue ma aoao, saili ma tatalo, salamo, ma faaleleia. E manaomia ona tatou iloa tulafono a le Atua ma ola ai. E manaomia ona tatou mauaina Ana sauniga faaola. E na o le faia lava o lena mea o le a tatou maua ai le fiafia moni e faavavau.

Ua faamanuiaina i tatou i le i ai o le upumoni. Ua i ai so tatou tiute e faasoa atu le upumoni. Ia tatou ola i le upumoni ina ia tatou mauaina mea uma ua i ai i le Tama mo i tatou. E leai ma se mea Na te faia vagana ai o mea mo lo tatou manuia. Na Ia ta’u mai ia i tatou, “O la’u galuega ma lo’u mamalu lenei—ia aumaia le tino ola pea ma le ola faavavau o le tagata.”¹

Mai le taele o lo’u agaga, ma i le lotomaualalo atoa, ou te molimau atu ai i le meaalofa sili, o le fuafuaga lea a lo tatou Tama mo i tatou. O le ala atoatoa lea e tasi i le filemu ma le fiafia iinei ma i le lalolagi a sau.

Ou uso e ma tuafafine, ou te tuua ia te outou lo’u alofa ma la’u faamanuiaga a o ou faai’u ai, ma ou te faia ai i le suafa o lo tatou Faaola ma le Togiola, o Iesu Keriso, amene.