Ko e Hala Haohaoa ki he Fiefiá

Siʻi kāinga ʻofeina ʻi he Senitā Konifelenisí ni pea mo e funga ʻo e māmaní, ʻoku ou houngaʻia he faingamālie ke vahevahe atu ʻeku fakakaukaú he pongipongí ni.

ʻI he taʻu ʻe nimangofulu mā ua kuohilí ʻi Siulai 1964, ne vahe mai ha ngāue ke u fai ʻi Niu ʻIoke Siti, lolotonga hono fai ai e Worldʻs Fair. ʻI ha pongipongi ʻe taha ne u ʻaʻahi ai ki he Mormon Pavilion lolotonga e fakaʻaliʻalí. Ne u aʻu atu kimuʻa pea huluʻi e faiva ʻa e Siasí ko e Man’s Search for Happiness, ʻoku fakatātaaʻi ai e palani ʻo e fakamoʻuí ka kuo hoko ia ko ha faiva motuʻa ʻa e Siasí. Ne u tangutu he tafaʻaki ʻo ha talavou mahalo naʻe taʻu 35. Naʻá ma talanoa nounou. Naʻe ʻikai kau ia ki he Siasí. Naʻe fakapōpōʻuli hifo e māmá pea kamata e faivá.

Ne ma fakafanongo ki he leʻo ʻo e taha fakamatalá ʻi heʻene fai e ngaahi fehuʻi fakaʻofa mo fakalūkufua ko ʻení: Ko ʻeku haʻú mei fē? Ko e hā ʻoku ou ʻi heni aí? Te u ʻalu nai ki fē hili ʻa e moʻuí ni?” Naʻe tuku telinga e taha kotoa ke ongoʻi pe ko e hā e talí, pea sio fakamamaʻu e mata kotoa ki he fakatātaá. Naʻe fakamatalaʻi mai ʻetau ʻi he maama fakalaumālié, pea fakamatalaʻi mai mo ʻetau taumuʻa ʻi he māmaní. Ne mau sio ai ki ha fakamatala ongo moʻoni ki he mavahe atu mei he maama ko ʻení ha kui tangata kae pehē ki heʻene fakataha fiefia he tafaʻaki ʻe tahá mo hono ngaahi ʻofaʻangá, ne nau muʻomuʻa ki he maama tataliʻanga ʻo e ngaahi laumālié.

ʻI he fakaʻosinga ʻo hono fakaʻaliʻali fakaʻofoʻofa mai e palani ʻetau Tamai Hēvaní maʻatautolú, naʻe hū fakalongolongo atu ki tuʻa e kakaí, kuo ongo ki he tokolahi e pōpoaki ʻo e faivá. Naʻe ʻikai tuʻu ki ʻolunga e talavou ia hoku tafaʻakí. Ne u ʻeke ange pe naʻe saiʻia he faivá. Naʻá ne tali mahino mai: “Ta ko e moʻoní ʻeni!”

ʻOku vahevahe atu ʻe heʻetau kau faifekaú he funga ʻo e māmaní ʻa e palani ʻetau Tamaí ʻo kau ki heʻetau fiefiá mo hotau fakamoʻuí. ʻOku ʻikai tali lelei ia ʻe he taha kotoa pē ʻoku fanongo ki he pōpoaki fakalangí ni. Ka ʻoku hanga ʻe he kakai tangata mo fafine he feituʻu kotoa pē, hangē ko hoku kaungāmeʻa kei talavou ʻi he Worldʻs Fair ʻi Niu ʻIoké, ʻo ʻiloʻi ʻa hono moʻoní, pea ʻoku nau fokotuʻu leva honau vaʻé ʻi he hala te nau foki ʻo hao lelei ai ki ʻapí. ʻOku liliu ʻo taʻengata ai ʻenau moʻuí.

Ko e ʻelito ʻo e palaní ʻa hotau Fakamoʻui ko Sīsū Kalaisí. Naʻe mei mole ʻa e meʻa kotoa pē, ka ne ʻikai ʻEne feilaulau fakaleleí. Ka ʻoku ʻikai feʻunga ia ke tau tui pē kiate Ia mo Hono misioná. ʻOku fie maʻu ke tau ngāue mo ako, fekumi mo lotu pea fakatomala mo fakalakalaka. ʻOku fie maʻu ke tau ʻiloʻi e ngaahi fono ʻa e ʻOtuá pea moʻuiʻaki kinautolu. ʻOku tau fie maʻu ʻEne ngaahi ouau fakamoʻuí. ʻI heʻetau fai iá, te tau toki maʻu ai ʻa e fiefia moʻoni mo taʻengatá.

ʻOku tau monūʻia ke maʻu ʻa e moʻoní. ʻOku ʻi ai hotau tufakanga ke vahevahe atu ʻa e moʻoní. Tau moʻuiʻaki muʻa e moʻoní, ka tau lava ʻo maʻu ʻa ia kotoa kuo teuteu ʻe he Tamaí maʻatautolú. ʻOkú Ne fai e meʻa kotoa pē ke tau lelei ai. Kuó Ne fakahā mai, “He vakai, ko ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá.”¹

ʻOku ou fakamoʻoni ʻaki hoku lotó kotoa pea ʻi he loto fakatōkilalo moʻoni, ki he meʻaʻofa maʻongoʻonga ko ia ko e palani ʻa ʻetau Tamaí maʻatautolú. Ko e hala haohaoa pē ia ʻe taha ki he nongá mo e fiefiá ʻi he māmani ko ʻení pea mo e maama ka hoko maí.

Siʻoku kāinga, ʻoku ou ʻoatu hoku ʻofa mo ha tāpuaki ʻi heʻeku fakaʻosi ʻeku leá, pea ʻoku ou fai ia ʻi he huafa ʻo hotau Fakamoʻui mo e Huhuʻi ko Sīsū Kalaisí, ʻēmeni.