Jaj Ia We I Stret mo Gud
I gat wan rod nomo blong givim ol jajmen we i stret mo gud, olsem we Jisas Kraes i stap mekem, mo hemia i blong gat fasin blong Hem.
Long laef blong Hem long wol ia, Jisas Kraes hem i wan jaj we i gat lav, i waes mo gat fasin blong wet longtaem bitim evri narawan. Skripja i tokbaot hem se “jaj we i stret mo gud” (2 Timoti 4:8; Moses 6:57), mo Hem i stap givim kaonsel long yumi tu blong “givim ol jajmen we i stret mo gud” (luk Josef Smit Translesen, Matiu 7:12 [insaed long Matiu 7:1, futnot a]) mo blong “blong putum tras blong yu long Spirit ia we i lid i go long ol gud samting … [mo] mo jajem man long stret mo gud fasin’ (D&C 11:12).
Kaonsel we i go long ol Twelef Man Blong Nifae bae i helpem yumi blong jajem man semak olsem we Lod i stap mekem: “Mo yufala i save se yufala i mas kam ol jaj blong ol pipol ia, folem jajmen we bae mi givim long yufala, we bae i stret. Taswe, ?yufala i mas kam ol wanem kaen man? I tru mi talem long yufala, i olsem mi stap (3 Nifae 27:27; oli ademap italik). Samtaem yumi foget se taem Hem i givim kaonsel ia blong stap olsem Hem, hem i long saed blong olsem wanem blong givim ol stret mo gud jajmen.
Ol Jajmen we i No Stret
Wan eksampol blong jajmen we i no stret; we i mekem man i sem; i kam long parabol blong sipsip we i lus; hem i taem we ol Farasi mo ol tija blong loa oli jajem nogud Sevya mo olgeta we Hem i stap kakae wetem olgeta, oli talem se, “Man ia hem i glad blong luk ol man nogud, mo blong go kakae wetem olgeta.” (Luk 15:2)─oli no luksave se olgeta tu oli gat sin. Oli fulap wetem ol hat we i agens oltaem, ol tija blong loa ia mo ol Farasi oli neva save glad ia blong faenem sipsip ya we i bin lus.
Hem i ol semak “tija blong loa mo ol Farasi” (Jon 8:3) ia we oli bin tekem “wan woman we i bin silip wetem wan man we i no man blong hem” i kam long Sevya blong luk sapos bae Hem i jajem hem folem loa blong Moses (luk long vas 5). Yu save nara haf blong stori, olsem wanem Hem i mekem tingting blong olgeta i go daon taem hem i poenemaot se jajmen blong olgeta i no stret, mo olsem wanem ol “tingting blong olgetawan i mekem olgeta nao i gilti” mo oli “go wanwan” (vas 9; oli ademap italik). Afta Hem i talem long woman ia, “Mi tu mi no save jajem yu. Be i gud yu go hom, mo yu no moa mekem sin bakegen. Mo woman ia i givim glori long God stat long taem ia, mo i biliv long nem blong hem” (Josef Smit Translesen, Jon 8:11 [long Jon 8:11, futnot c]).
Man o woman we Tabu Spirit i no stap long hem i gat fasin ia blong lukluk long rong blong ol narafala man mo givim jajmen we i no stret, o blong leftemap olgetawan. Semak samting ia i bin hapen long Jon mo Jemes, tufala Aposol blong Sevya. Tufala i kros tumas taem ol pipol long wan vilej blong Samaria we oli no soem respek long Sevya (luk long Luk 9:51–54):
Nao taem tufala man ya i luk samting ya, tufala i talem se, Masta, ?Yu wantem mitufala i singaotem faea i aot long heven. I kam daon i kakae olgeta, olsem we Elias i bin mekem bifo?
“Be Jisas i tanemraon i tok strong long tufala, i blokem tufala, Yutufala i no save gud spirit ia we i rul long laef blong yutufala.
“Mi, mi Pikinini blong Man mo mi no kam blong kilim man i ded, mi kam blong sevem man” ((ol vas 54–56().
Tedei “[ol] man ia nomo we i gat raet blong jaj” (D&C 107:74) oli no mas gat semak fasin ia blong agens, olsem Jemes mo Jon i bin mekem long taem ia. Wan stret mo gud jaj bae i ansa long ol konfesen wetem sore mo andastaning. Eksampol, wan yut we i mekem wan mistek, taem hem i aot long ofis blong bisop, bisop i mas helpem hem blong filim lav blong Sevya mo hem i mas fulap wetem glad mo hiling paoa blong Atonmen─hem i no mas sem mo fil gilti from wanem we hem i mekem. Sapos no bae bisop ia bae i mestem sipsip ia i go lus long medel blong drae ples ia (luk long Luk 15:4).
Disiplin
Be i no mata long hemia, sore i no krosem aot nid blong kasem disiplin. Toktok ia disiplin i kamaot long Latin toktok ia discere─we i minim blong lanem, or discipulus”man we i stap lanem”, i mekem se wan disaepol i wan studen mo wan we i stap folem.1 Blong disiplin long wei blong Lod hem i blong tij wetem lav mo tingting we i save wet long taem. Insaed long ol skripja, fulap taem Lod i yusum toktok ia chasten taem hem i stap tokbaot disiplin (luk long, eksampol, Mosaea 23:21; D&C 95:1). Toktok ia chasten i kam long Latin toktok ia castus we i minim stret o klin, mo blong stretem i minim se “blong klinim.” 2
Long wol ia, i gat wan jaj we i jajem wan man mo i sarem hem long kalabus. Be, Buk blong Momon i tijim yumi se taem yumi wantem blong mekem sin, yumi kam “jaj blong yumiwan” (Alma 41:7) mo sarem yumiwan long kalabus blong saed blong spirit. Sori tumas, be man we i gat raet blong givim jajmen long ol situesen olsem, hem nomo i holem ki blong openem ol get blong kalabus ia; “from se folem fasin blong stretem rong ia, Mi rere long wan rod blong karemaot olgeta long evri samting we bae i traem olgeta” (D&C 95:1; oli ademap italik). Ol aksen blong wan lida we i stret mo gud i soemaot se hem i gat sore, lav, mo hem i wantem sevem man, be i no blong spolem man.
Yangfala Josef Smit i bin kasem wan fo yia disiplin bifo hem i bin kasem ol plet blong gol, “from se yu no bin kipim ol komanmen blong Lod.”3 Afta taem we Josef i bin lusum 116 peij blong translesen, hem i bin kasem disiplin bakegen. I no mata we Josef i harem nogud tumas from samting ya, Lod i karemaot ol raet blong hem blong wan sot taem, from se bae “mi stretem olgeta we mi lavem tu blong oli save kasem fogivnes from ol sin blong olgeta” (D&C 95:1).
Josef i bin talem se, “Enjel i bin glad tumas taem hem i givim bak Yurim mo Tumim long mi mo hem i talem se God i glad long fet blong mi mo fasin we mi putum tingting blong mi i stap daon, mo hem i lavem we mi harem nogud mo sakemaot sin mo prea wetem wan tru hat.” 4 From se Lod i wantem tijim Josef wan lesen we bae i jenisim hat blong hem, Hem i nidim Josef blong mekem wan sakrifaes we i soemaot se hat blong hem i so tumas─sakrifaes hem i wan impoten pat blong disiplin.
Sakrifaes
“Long ol taem blong bifo, mining blong sakrifaes i blong mekem wan samting o wan man i kam tabu,” 5 long wan fasin se tingting ia dipen long wan samting, joenem tingting ia wetem mining blong toktok ia chasten─ “blong mekem i kam klin.”. Semak olsem Isrel bifo, fogivnes i kam taem yu givim wan ofring from wan nogud fasin o sakrifaes. 6 Sakrifaes i no “poen i go long bigfala mo las sakrifaes” (Alma 34:14) nomo, be i help blong krietem wan bigfala filing blong glad long Atonmen blong Sevya. Wan fasin blong no wantem mekem sakrifaes from ol rabis fasin we yumi mas sakemaot i jikim o mekem bigfala sakrifaes blong Kraes i nogat mining mo i mekem safaring blong hem i nogat mining─wan saen se yu no kea blong talem tangkyu.
Be, tru long sakrifaes, yumi rili kasem wan samting we praes blong hem i no save finis─sore mo fogivnes blong Hem mo long en “evri samting we Papa i gat” (D&C 84:38). Olsem pat blong fasin blong sakem sin, sakrifaes tu i stap olsem pomad blong hilim mo karemaot soa blong “harem nogud tumas long save blong gud mo nogud” (Alma 42:18) wetem “pis long tingting” (Mosaea 4:3). Sapos i nogat sakrifaes, bae i had tumas blong fogivim yuwan, from bae yu save se yu stap haedem wan samting. 7
Ol Papa mo Mama olsem ol Stret mo Gud Jaj
Bae oli singaotem samfala long yumi blong kam ol jaj, be ol stamba tingting blong ol stret mo gud jajmen hem i blong yumi evriwan, speseli ol papa mo mama we oli gat janis evri dei blong yusum ol stamba tingting ia wetem ol pikinini blong olgeta. Blong tijim gud wan pikinini hem i stamba blong kam wan gud papa o mama, mo blong givim disiplin wetem lav hem i stamba blong kam wan stret mo gud jaj.
Presiden Josef F. Smit hem i bin tijim, “Sapos ol pikinini oli strong hed mo i had blong kontrolem olgeta, gat fasin blong wet long taem wetem olgeta kasem we yu save winim olgeta wetem lav, …mo afta yu save [jenisim] ol fasin blong olgeta olsem we yu wantem.” 8
Hem i klia se taem oli stap tijim olsem wanem blong givim disiplin, oltaem ol profet oli tokbaot ol fasin olsem blong Kraes. Doktrin mo Kavenan i givim wan advaes we yumi save gud long hem long saed blong disiplin:
“I nogat wan paoa o wan samting we i save jenisim ol gudfala fasin blong prishud, hem i tru nomo long fasin blong winim tingting, fasin blong save wet long taem, kaen fasin mo tingting we i stap daon, mo tru mo stret lav;
“Tru long kaen fasin, mo klin tingting, we bae i leftemap sol mo bae i nogat tu tingting long hem, mo i nogat toti long hem─
“Samtaem talemaot strong se yu no agri, wetem paoa blong Tabu Spirit, mo afta soemaot bigfala lav” (D&C 121:41–43).
Skripja ia i tijim yumi blong no agri “wetem paoa blong tabu Spirit,” i no wetem kros. Tabu Spirit mo fasin blong kros i no save wok tugeta from “hem we i gat spirit blong rao i no blong mi, be hem i blong devel, we i papa blong rao, mo hem i tanem ol hat blong ol man blong rao wetem kros, wan wetem narawan” (3 Nifae 11:29). Presiden Joj Albet Smit i bin tijim se “ol toktok we i no stret i no kam long insperesen blong Lod. Spirit blong Lod hem i kaen; hem i wan spirit we i gat fasin blong wet longtaem, hem i wan spirit we i gat klin lav mo fasin blong gat kontrol long hemwan mo save wet longtaem. …
“… Be sapos yumi gat spirit blong lukaotem nomo ol rong…long wan fasin we i spolem man, hemia i neva kam wetem Spirit blong Papa blong yumi long Heven mo oltaem hem i mekem man i harem nogud…
“… Fasin blong stap kaen hem i paoa we God i givim blong openem ol hat we i strong mo winim ol sol we i no wantem jenis.”9
Stret Aedentiti blong ol Pikinini Blong Yumi
Taem we Sevya i visitim ol man blong Nifae, Hem i bin mekem wan spesel samting wetem ol pikinini:
“Mo i bin hapen se hem i bin tijim mo givhan long ol grup blong pipol ia we mi bin tokbaot … mo hem i bin mekem se ol tang blong olgeta i save toktok, mo oli bin talem long ol papa blong olgeta ol bigfala mo gudfala samting. …
“… Mo oli bin lukim mo harem ol pikinini ia, yes ol bebi tu i bin openem ol maot blong olgeta mo talemaot ol gudfala samting” (3 Nifae 26:14, 16).
Maet i no blong openem ol maot blong ol bebi, be Lod i stap openem ol ae mo ol sorae blong ol papa mo mama blong olgeta. Ol papa mo mama ia oli bin kasem wan spesel presen blong save luksave wanem nao hem i stret mo impoten mo luk stret aedentiti mo huia ol pikinini ia bifo oli bin kam long wol ia. ?Bambae hemia i save jenisim fasin we ol papa mo mama i stap lukluk mo tritim ol pikinini blong olgeta? Mi laekem kwot blong Goethe: “Lukluk we yu gat long [wan pikinini] hem i fasin we yu stap tritim hem, mo fasin we yu stap tritim hem, hem i huia hem.”10 Blong tingbaot stret aedentiti blong wan pikinini hem i wan spesel fasin blong save luk save wanem we bae i hapen mo hemia i kam tru long insperesen blong Lod long ol stret mo gud jaj.
En
Presiden Tomas S. Monson i bin tijim yumi, “Neva letem wan problem we yu mas stretem i kam moa impoten bitim wan man we i nidim lav.”11 Stamba tingting ia i impoten tumas blong stap olsem wan stret mo gud jaj, speseli wetem ol pikinini blong yumi.
I gat wan rod nomo blong save givim ol stret mo gud jajmen, olsem we Jisas Kraes i bin mekem, mo hemi i blong kam olsem Hem. Taswe, ?yufala i mas kam ol wanem kaen man? I tru mi talem long yufala, i olsem mi stap” (3 Nifae 27:27). Long nem blong Jisas Kraes, amen.