Li loq’laj wa’ak naru toxtenq’a chi santob’resiik
Tz’il rix oob’ li na’leb’ re xtamresinkil xwankilal li qatz’aqonik rajlal sa’ li loq’laj k’anjel re li loq’laj wa’ak.
Jun na’leb’ li jultik we toj chalen chaq junxil, a’an xb’aanunkil li loq’laj wa’ak sa’ qatenamit, Warrnambool, Australia. Laajeb’ maare o’laju neke’wulak sa’ qateep, ut lin yuwa’, jun reheb’ oxib’eb’ laj tijonelil, k’iila sut naxjek’i li loq’laj wa’ak. Jultik we li k’a’ru naweek’a naq a’an naxyaab’asi raatinul li tij re li loq’laj wa’ak chi tuulan xch’ool. K’iila sut nasiksot xyaab’ xkux naq nareek’a li Musiq’ej. Wan naq naxkanab’ aatinak junpaataq re tixtuqub’ reek’ahom xch’ool.
Jo’ jun aj oob’ chihab’, ink’a’ naru tintaw ru chixjunil xyaalalil li k’a’ru yoo chi b’aanumank; a’b’anan, xinnaw naq yoo li k’a’ru loq’. Naru naweek’a xq’unal toch’om li Santil Musiq’ej aj k’ojob’anel ch’oolej naq lin yuwa’ naxk’oxla xrahom li Kolonel choq’ qe.
Li Kolonel kixye: “A’in junelik teeb’aanu reheb’ li neke’xjal xk’a’uxl ut neke’kub’e xha’ sa’ lin k’ab’a’; ut teeb’aanu re xjultikankil lin kik’el, li kihoye’ choq’ eere, re naq teek’ut xyaalal chiru li Yuwa’b’ej naq junelik ninjultiko’ eere. Ut wi junelik ninjultiko’ eere, taawanq inmusiq’ eerik’in” (3 Nefi 18:11).
Ninb’oqok qe chiqajunil naq taqatz’il rix oob’ li na’leb’ re xtamresinkil xwankilal li qatz’aqonik rajlal sa’ li loq’laj k’anjel re li loq’laj wa’ak, a’an jun li k’anjel li naru toxtenq’a chi santob’resiik.
1. Tijok chi rub’elaj
Naru taqatikib’ xkawresinkil qib’ choq’ re li loq’laj wa’ak toj rub’elaj li ch’utam chi us. Sa’ li sabado naru xtz’ilb’al rix chanru wanko sa’ qamusiq’ejil b’eenik.
Li yu’am a’in, a’an jun maatan aajel ru sa’ qab’eenik toj toowulaq jo’ li qaYuwa’. Tento naq naxk’e xyalb’al qix ut qach’a’ajkilal re toxtenq’a chixjalb’al qib’ ut chi ninqanq. Li Rey aj Benjamin kixye naq “li ruchich’och’il winq wan choq’ aj xik’ ilonel re li Dios, … ut toj taawanq chi junelik q’e kutan, wi ink’a’ naxkanab’ rib’ chi q’unb’esiik xch’ool xb’aan li Loq’laj Musiq’ej, ut narisi li ruchich’och’il winq chirix, ut na’ok choq’ aj santil paab’anel sa’ xk’ab’a’ lix tojb’al rix li maak xb’aan li Kristo li Qaawa’ ” (Mosiah 3:19). Li tz’aqonk sa’ li loq’laj wa’ak nokoxtenq’a chixq’unb’esinkil qach’ool ut li qaam choq’ re li Dios.
Sa’ xkawresinkil qib’, nayot’e’ qach’ool naq naqab’antioxi lix tojb’al rix li maak xb’aan li Kristo, naq naqajal qak’a’uxl chirix li qamaak, ut naq naqatz’aama xtenq’ li Yuwa’b’ej sa’ qab’eenik chi wulak jo’ chanru a’an. Aran, naru taqayo’oni li hoonal naxk’e li loq’laj wa’ak choq’ re xjultikankil lix mayej ut xq’axtesinkil qib’ wi’chik sa’ chixjunil li qasumwank.
2. Wulak chi rub’elaj
Chaab’ilaq wi’chik li loq’laj wa’ak wi nokowulak sa’ jun hoonal naq maji’ natikla li ch’utam ut naqab’i li b’ich sa’ xyaalal.
Li Awa’b’ej Boyd K. Packer kixye: “Li b’ich naq maji’ natikla li ch’utam naxch’olani li qaam. Naxb’oq li Musiq’ej.”1 “Maawa’ jun hoonal,” chan li Awa’b’ej Russell M. Nelson, “choq’ re li aatinak malaj xtz’iib’ankil li mensaje, a’b’an choq’ re li tijok sa’ k’a’uxlej naq eb’ li jolominel ut li komon neke’xkawresi rib’ choq’ re li loq’laj wa’ak.”2
3. B’ichank ut tzolok li na’leb’ rik’in li b’ich re li loq’laj wa’ak
Li b’ich re li loq’laj wa’ak, a’an jwal aajel ru sa’ li k’a’ru naqak’ul sa’ li k’anjel a’an. Li b’ich naxwaklesi li qak’oxlahom ut li qeek’ahom. Li b’ich re li loq’laj wa’ak naniman xwankil naq naqak’oxla li xnimal ru tzol’leb’ li naxk’ut. Naab’al li naqatzol rik’in li aatin a’in: “Ra kattene’ choq’ qe,”3 “Chi saq qach’ool chiqab’aanu, ut chi ch’ajb’il li quq’ chiru.” 4 ut “Raqleb’ aatin, rahok, uxtaan, tz’aqal sa’ junajil.”5
Naq naqab’icha jun li b’ich re xkawresinkil qib’ choq’ re li eetalil, naru taak’anjelaq jo’ li naqaye laa’o sa’ li qasumwank. K’e reetal li aatin a’in: “Nakatqara, xnujak li qaam; Taawanq laa b’e chiqu.”6
4. Tz’aqonk sa’ musiq’ej sa’ li tij re li loq’laj wa’ak (Chi’ilmanq Moroni 4–5)
Wi ink’a’ naqaram rab’inkil li aatin li ak’ naqanaw sa’ xtij li loq’laj wa’ak, naru taqatzol naab’al ut taqeek’a naab’al wi’chik wi tootz’aqonq sa’ musiq’ej rik’in xk’oxlankil li k’anjel ut li osob’tesiik yeeb’ileb’ resil sa’eb’ li tij a’in.
Li wa ut li ha’ neke’osob’tesiik ut neke’santob’resiik choq’ re li qaam. Neke’xjultika qe lix mayej li Kolonel ut naq a’an naru toxtenq’a chi santob’resiik.
Eb’ li tij neke’xch’olob’ naq naqak’ul li wa sa’ xjultikankil lix tib’el li Alalb’ej, li kixk’e jo’ jun tojok-ix re qawaklesinkil chiqajunil wi’chik chi yo’yo, ut naquk’ li ha’ sa’ xjultikankil lix kik’el li Alalb’ej, li kixk’e chi moko ramb’il ta re naq taaruuq taatoje’q qix wi naqab’aanu li jalb’a-k’a’uxlej.
Eb’ li tij neke’xtikib’ li sumwank rik’in xyeeb’al “naq wankeb’ xch’ool” (Moroni 4:3). Li kok’ aatin a’in wan xnimal ru wankilal choq’ qe. Ma wan qach’ool chi k’anjelak ut chi tz’aqonk? Ma wan qach’ool chixjalb’al qak’a’uxl? Chirilb’al li qamajelal? Ma wan qach’ool chixtawb’al ut chirosob’tesinkileb’ jalan? Ma wan qach’ool chixpaab’ankil li Kolonel?
Naq nayeeman li yeechi’ink ut naq nokotz’aqonk, naqaye sa’ qaam naq wan qach’ool:
-
Chixk’ulb’al sa’ qab’een lix k’ab’a’ li Kristo.
-
Chixyalb’al qaq’e sa’ xtaaqenkileb’ lix taqlahom.
-
Chixk’oxlankil li Kristo rajlal.
Li tij naraqe’ rik’in jun choxahil b’oqok ut yeechi’ink: “re taaruuq taawanq junelik lix Musiq’ rik’ineb’”(Moroni 4:3).
Laj Pablo kixye, “Li naruuchin li Musiq’ej a’an li rahok, sahil ch’oolej, tuqtuukilal, kuyuk, chaab’ilal, usilal, paab’ank, tuulanil, [ut] kuyuk-ib’” (Galatas 5:22–23). Chaq’al ru li maatan choq’ qe naq naqapaab’ li qasumwank.
5. Xk’oxlankil li Kristo naq li eetalil sa’ li loq’laj wa’ak neke’jek’iman
Li loq’laj hoonal naq najek’iman li loq’laj wa’ak naru taa’ok chi sant choq’ qe.
Naq najek’iman li wa, naru naqak’oxla naq sa’ xnimal xrahom choq’ qe, li Kolonel kixk’ul “li kamk sa’ xb’een, re naq taaruuq tixhit lix b’ak’leb’ li kamk li b’ak’b’ookeb’ wi’ lix tenamit” (Alma 7:12).
Naru naqak’e reetal li osob’tesiik re li waklesiik chi yo’yo, li “taachalq re chixjunil, … jo’ moos jo’ ach’ab’anb’il, jo’ winq jo’ ixq, jo’ aj maak jo’ li tiik xch’ool; ut moko taasachmanq ta yal ta jun rismal xjolomeb’; chixjunil b’an taak’ojob’amanq wi’chik sa’ xxaqalil chi tz’aqal re ru” (Alma 11:44).
Naq najek’iman li ha’, naru taqak’oxla lix tz’aam li Kolonel:
“K’e reetal, laa’in, li Dios, kinnumsi li k’a’aq re ru a’in choq’ re chixjunileb’, re naq ink’a’ te’xnumsi rahilal wi te’xjal xk’a’uxl; …
“Ut a’ rahilal a’an kinixk’e laa’in, li Dios ajwi’, li q’axal nim wi’chik chiru chixjunil, chi siksotk xb’aan xrahil ut chi elk inkik’el ruuchil tiqob’, ut chixnumsinkil xrahil li tz’ejwalej jo’ ajwi’ li musiq’ej—ut chirajb’al naq ink’a’ raj tinwuk’ li k’ahil sek’, ut tinka’ch’inob’resi raj wib’ ” (Tz. ut S. 19:16, 18).
Najultiko’ qe naq kixk’ul “sa’ xb’een lix majelal [li qakawilal], re naq lix sa’ xch’ool nujenaqaq chi uxtaan, jo’ chanru li tz’ejwalej, re taaruuq tixnaw sa’ li tz’ejwalej chanru xk’eeb’al xtenq’ankileb’ lix tenamit jo’ chanru xmajelal [li qakawilal]” (Alma 7:12).
Naq naqatz’il rix chanru naqak’ul li loq’laj wa’ak, maare taqapatz’:
-
K’a’ru tinb’aanu sa’ li xamaan a’in re xkawresinkil wib’ choq’ re li loq’laj wa’ak?
-
Ma taaruuq tintenq’a li oxloq’ink ut li musiq’anb’il k’oxlak li naru taawanq sa’ xtiklajik li ch’utam re li loq’laj wa’ak?
-
K’a’ru chi tzol’leb’ xk’utman sa’ li b’ich re li loq’laj wa’ak?
-
K’a’ru xwab’i ut xweek’a naq xwab’iheb’ li tij re li loq’laj wa’ak?
-
K’a’ru xink’oxla naq li loq’laj wa’ak xjek’iman?
Li Elder David A. Bednar kixye: “Li k’ojob’anb’il k’anjel re li loq’laj wa’ak, a’an jun qab’oqb’al k’iilasutinb’il naq taqajal qak’a’uxl ut too’ak’ob’resiiq sa’ musiq’ej. Li xketb’al li loq’laj wa’ak, yal xjunes, ink’a’ narisi li maak. A’b’anan naq naqakawresi qib’ chi tz’aqonk sa’ li loq’laj k’ojob’anb’il k’anjel a’in chi yotb’il qach’ool ut chi tuulan qamusiq’, aran wan li yeechi’ihom naq junelik taawanq lix Musiq’ li Qaawa’ qik’in. Ut rik’in li wankilal aj santob’resinel re li Santil Musiq’ej jo’ qochb’een rajlal, naru naq junelik taakanaaq qik’in li risinkil qamaak.”7
Ninch’olob’ xyaalal lix naab’alileb’ li osob’tesink li wankeb’ choq’ qe wi naqakawresi qib’ ut wi nokotz’aqonk sa’ musiq’ej sa’ li loq’laj wa’ak. Ninch’olob’ ajwi’ xyaalal naq wankeb’ li osob’tesink a’in b’antiox re lix rahom li qaYuwa’ ut li junelikil mayej aj tojol-ix re lix Raarookil Alal, li Jesukristo. Sa’ lix loq’laj k’a’b’a’, a’an ajwi’ li Jesukristo, amen.