Sackracmacn uh Kuh in Kahsrwe Kuht in Eklac Muhtahl
Nuhnkuh ke ohiyac limekohsr in ahkyohkye eklac ac kuh ke kwacna wi lasr ke akwuck muhtahl luhn sackracmacn.
Sie ma nga esam met pa miting ke sackracmacn ma ahkfahsryeyuck in lohm sesr fin acn Warrnambool, Australia. Oasr inmahsrlon mwet 10 ac 15 wi pracns lasr, ac pahpah tuhmuhk, sie sin pristut tolu, ma kwacna eis pacl wo la in ahkinsewowoye sackracmacn. Nga esam puhla luhk ke elac efahllah riti ahkwoye kahs ke pruhe luhn sackracmacn. Puhsrwacl kwacna rarrar ke el ac puhla Nguhn Muhtahl. Kuhtuh pacl uh el ac tui in kutong puhla lal met liki el ahksahfyelah pruhe sac.
Ekihn yac limekohsr se, nga tiac kuh in kahlwem ke kalmeyacn ma fwack kuh orek ah; tuhsruhk, nga etuh muh oasr ma yohk srihpac sikyak. Nga kuh in puhla mihslac ac moklweyuck luhn Nguhn Muhtahl ke pahpah tuhmuhk el nuhnkuh ke luhngse luhn Mwet Lahngo nuh sesr.
Mwet Lahngo el luti: “Ac ma se inge kowos fah oruh pacl nuhkwewa nuh selos suc auliyak ac pacptaislac ke Inek; ac kowos fah oruh ma se inge in esam srah Luhk, ma kahklah Keik keiwos, tuh kowos in kuh in ahklohye nuh sin Pahpah lah kowos esamyuc pacl nuhkwewa. Ac kowos fin esamyuc pacl nuhkwewa kowos fah eis Nguhnihk in wi kowos” (3 Nephi 18:11).
Nga suli kowos kwewa in nuhnkuh ke ohiyac limekohsr in ahkyohkye eklac ac kuh ke kwacna wi lasr ke akwuck muhtahl luhn sackracmacn, akwuck se ma kuh in kahsrwe kuht in eklac muhtahl.
1. Ahkolah met liki ipeis ke Sackracmacn
Kuht kuh in oruh ahkolah lasr nuh ke sackracmacn met liki na muhtwacwacack luhn miting ke sackracmacn. Sactte pa pacl wowo se in nuhnkuh ke kapkapwack luhn nguhnasr ac ahkolah.
Moul fin facluh el mwe sang yohk srihpac se ke fuhfahsryucsr lasr in eklac oacna Pahpah Tuhmasr Inkuhsrao. Enenweyuck se in oasr ma upac ac elyah in muh use pacl wo lasr in eklac ac kapkapwack. Tohkohsrah Benjamin el luti lah “tuh mwet suc ma luhngse ma luhn facluh el sie mwet lokoalok nuh sin God … ac e fah, ne tok ac ma pahtpaht, sahyacn el lohacng nuh ke kolyuck luhn Nguhn Muhtahl, ac sislah ma luhn mwet luhngse facluh ac eklac sie mwet luhlahlfongi ke iwaclah luhn Leum Kraist” (Mosiah 3:19). Wi ke akwuck muhtahl luhn sackracmacn uh use pacl wowo se in sang nohfohn insiyacsr ac moul lasr nuh sin God.
Ke ahkolah lasr, insiyacsr eklac koluklac ke kuht ahkkahlwemye srui lasr ke Iwaclah luhn Kraist, auliyak ke tahfonglac ac sofo lasr, ac siyuck ke kahsruh luhn Pahpah ke tuhtahflah luhn fuhfahsryucsr lasr in eklac oacna El. Na kuht kuh in ngwet nuh met nuh ke pacl wo ma sackracmacn use in esam kihsaclah Lal ac ahksasucye otwelah nuh ke olwelah nuh kwewa ma kuht orwaclah.
2. Sa Tuhkuh
Puhlah lasr ke sackracmacn kuh in ahkyohkyeyuck ke pacl kuht tuhkuh met liki miting ac nuhnak ke pacl mwe on uh sritaclkihnyuck met liki muhtwacwacack.
Prestuhn Boyd K. Packer el luti: “Ikacslah ke on, ahkmuhtahlye on, el sritaclkihnyuck in ahkkweye nguhn muhtahl. El suli kolyuck.”1 “Pacl se inge tiac ma,” Prestuhn Russell M. Nelson el ahkuhtweyac, “nuh ke sramsram kuh suhpweyuck pweng tuhsruhk pacl nuh ke nuhnak in pruhe ke mwet kol ac mempucr ac ahkolah ma luhn nguhn nuh ke sackracmacn.”2
3. On ac Lutlut ke Kahs ke On in Sackracmacn
On in sackracmacn el sie ip yohk srihpac nuh ke puhla lasr ke sackracmacn uh. Puhsren on uh ahkyohkye nuhnak ac puhla lasr uh. On in sackracmacn uh yohk orekma la ke kuht ac lohacng nuh ke kahs ac mwe luti kac uh. Kuht lutlut ke kain in kahs inge “Futunlac, muhsahllah, mihsacsac uh ke srihpacsr,”3 “Kuht enenuh in esam (iwaclah luhn Mwet Lahngo) ac in ahklohye ke inse nwacsnwacs ac paho nwacsnwacs,”4 ac “Acn wolacna suc suwohs, luhngse, ac pahkotwen tuhkweni we!”5
Ke kuht onkackihn on in ahkolah in ipeis ke sackracmacn, kahs kac an ac kuh in ipin sulaclah ke olwelah lasr uh. Nuhnkuh, fin pa, “Kuht luhngse kom, Leum; insiyacsr sesseslah. Kuht ac fahsr ke inkacnek lom.”6
4. Eis komyang ke Nguhn in Wi Pruhe in Sackracmacn (Liye Moroni 4–5)
In sislah tiac lohacng lasr nuh ke kahs ke pruhe in sackracmacn, kuht kuh in lutlut yohk, ac puhla yohk, ke kuht eiskuhtyang in wi ke nguhn ke kuht nuhnkuh ke otwelah ac mwe insewowo ma oasr ke pruhe muhtahl inge.
Puhret ac kof uh ahkinsewowoyeyuck ac ahkmuhtahlyeyuck nuh ke nguhnasr. Ma inge ahkacsmakihnye kuht ke kihsaclah luhn Mwet Lahngo ac lah El kuh in kahsrwe kuht in eklac muhtahl.
Pruhe inge ahkuhtweyac lah kuht ipeis ke puhret in esam ke monun Wen, suc El kihsackuhnlah in oruh mwet nuh kwewa in kuh in sifil moulyak, ac kuht nihm ke kof in esam ke srahn Wen, suc ma El oruh kahklah tuh kuht in moliyucklac fin kuht ac auliyak.
Pruhe inge ikacslah ke olwelah ke pohloh kahs “Tuh elos insese.” (Moroni 4:3) Pohloh kahs fihsrwacsr se inge arlac yohk kuh la facsr. Kuh kuht insese in kuhlwacnsap ac wi? Kuh kuht insese in eklac? Kuh kuht insese in orekma ke mwe muhnahs lasr? Kuh kuht insese in ahsrwelah pahosr ac ahkinsewowoye mwet sahyac? Kuh kuht insese in luhlahlfongi Mwet Lahngo?
Ke olwelah uh fwackyuck ac ke kuht ipeis, kuht ahkkweyelah ke insiyacsr lah kuht insese in:
-
Eis nuh facsr inen Jisus Kraist.
-
Insacnweacng in liyacacng masap nuh kwewa Lal.
-
Esamuhl pacl nuh kwewa.
Pruhe sac ahksahfye ke sie solsol na oa ac olwelah: “Tuh Nguhn Lal in kuh in weluhlos pacl nuhkwewa” (Moroni 4:3).
Paul el suhmuhslah, “Fahko luhn Ngun pa lungse, engan, mislac, mongfihsrwasr, kuhlwacng, orekma wo, oaru, puhsisacl, [ac] sifacna leum fac” (Galatia 5:22–23). Mwe ahkinsewowo kahto ac mwe sang uh kuh in ma lasr ke kuht liyacacng olwelah lasr.
5. Nuhnkuh ac Esamuhl ke Sackracmacn uh Pahsiyuck
Pacl luhn ahkfuhlwact ke mwet sruok pristut pahsi sackracmacn kuh in eklac muhtahl nuh sesr.
Ke puhret uh pahsiyuck, kuht ac nuhnkuh lah, ke mukwikwi yohk ke luhngse lal nuh sesr, Mwet Lahngo el eis “nuh Facl misac, tuh Elan kuh in tuhlahlihk mwe kapihr luhn misac ma kapriyac mwet Lal” (Alma 7:12).
Kuht ac esam mwe insewowo wolacna ke Sifil Moulyak lah “fah tuhkuh nuh sin mwet nuhkwewa, … kwewana mwet srohoh ac mwet sukohsohk, kwewana mukul ac muhtwacn, kwewana mwet koluk ac mwet suwohswohs; ac finne tiac sie aunsifaclos fah wacngihnlac; tuhsruhk ma nuhkwewa fah fohlohklac nuh ke luhmah suwohs la” (Alma 11:44).
Ke kof uh pahsiyuck, kuht ac esam ke nguhsr luhn Mwet Lahngo:
Mwet Lahngo el fahk lah el kweok ke ma inge ke mwet nuh kwewa, tuh elos in tiac kweok fin elos auliyak; …
Kweok se inge oruh tuh El, suc fuhlwact emet, in rarrar ke waek, ac in kahk ke srah ke pat nuh kwewa, ac in kweok ke kwewana mahno ac nguhn. El siyuck tuh elan tiac nihm kuhp mwen sac, ac lokweni (Liye D&C 19:16, 18).
Kuht esam lah El eis “nuh Facl mas [lasr], tuh insiacl in sesseslah ke pahkotwen, fal nuh ke mahno, tuh Elan kuh in etuh fal nuh ke mahno lah El ac kahsruh fuhkah mwet Lal fal nuh ke mas [lasr]” (Alma 7:12).
Ke kuht nuhnkuh ke puhla lasr ke sackracmacn, kuht ac siyuck sesr sifacna:
-
Meac nga ac oruh ke wik inge in ahkolah wo in ipeis ke sackracmacn?
-
Kuh nga kuh in kahsruh yohk nuh ke muhtahliyacn ac fwackyuck ma kuh in oasr ke muhtwacwacack luhn sackracmacn miting?
-
Meac mwe luti ma lutiyuck ke on in sackracmacn?
-
Meac nga lohng ac puhla ke nga lohng pruhe in sackracmacn?
-
Meac nga nuhnkuh ke sackracmacn pahsiyuck?
Elder David A. Bednar el luti: “Akwuck luhn sackracmacn uh muhtahl ac kalweni suli in auliyak ke pwacye ac in ahksasucye nguhn. Mukwikwi ke ipeis ke sackracmacn, kac muhkwena, tiac eslah ma koluk. Tuhsruhk ke kuht nuhnkuh ahkolah ac wi ke akwuck muhtahl se inge ke inse muhsahl ac toasr in nguhn, na olwelah uh pa tuh Nguhn luhn Leum in kuh in wi kuht pacl nuh kwewa. Ac ke kuh luhn Nguhn Muhtahl el kwacna wi kuht, kuht kuh in eis nuhnakmuhnahs nuh ke ma koluk lasr pacl nuhkwewa.”7
Nga fahkwack ke mwe insewowo pucspucs ma ikacklah nuh sesr ke kuht ahkyohkye ahkolah ac wi ke nguhn lasr ke akwuck luhn sackracmacn. Nga ahkkohnye fahkwack lah mwe insewowo inge ikacklah nuh sesr ke srihpen luhngse luhn Pahpah Tuhmasr Inkuhsrao ac iwaclah kihsac yohk luhn Wen Kuloh Nahtuhl, Jisus Kraist. Ke ine muhtahl Lal, Jisus Kraist, amen.