Lub Siab Xav Tau Tiag Tiag
Txhua lub sij hawm yus thov Vajtswv yog ib lub sij hawm dawb huv nrog peb Leej Txiv, los ntawm Leej Tub lub npe, los ntawm tus Vaj Ntsuj Plig Dawb Huv lub hwj chim.
Thaum peb raug teeb meem nyob hauv lub ntiaj teb no, peb yeej tsis nyob peb ib leeg thaum ua hauj lwm, ntaus tsov rog, raug kev sim siab los yog thaum muaj lus nug uas peb tsis paub teb. Yexus Khetos hais ib zaj lus piv txwv qhia tias peb yuav tsum, “niaj hnub thov Vajtswv tsis txhob qaug zog.” Nws hais txog ib tug txiav txim uas tsis tau hwm Vajtswv thiab tsis muaj siab hlub tib neeg. Txhua hnub, ib tug poj ntsuam tuaj thov nws, thov kom nws pab hais rooj plaub uas nws tus yeeb ncuab kom nws. Tau ib ntus, tus txiav txim tsis kam pab nws. Tiam sis vim nws pheej rau siab thov tsis tu tsis tseg, tus txiav txim xav hais tias, “Tus poj ntsuam no pheej tuaj txob kuv, kuv yuav tau pab nws hais kom tas, nws thiaj yuav tsis niaj hnub tuaj txob kuv kom kuv ntxhov siab.”
Ces Yexus piav hais tias:
“Vajtswv haiv neeg uas niaj hnub niaj hmo thov Vajtswv pab, Vajtswv yuav tsis pab hais lawv zaj los … ?
“Kuv qhia rau nej hais tias, Vajtswv yeej yuav pab hais lawv zaj sai sai.”
Ces tus Tswv nug lo lus no hais tias: “Thaum Neeg Leej Tub los, cov neeg uas nyob hauv ntiaj teb no puas yuav muaj tus uas ntseeg nws lawm?”1
Yuav tsum thov Vajtswv kom muaj kev ntseeg loj tuaj. Thaum tus Tswv rov qab los, Nws puas yuav muaj ib co neeg uas paub muaj kev ntseeg thov Vajtswv thiab npaj siab txais kev cawm seej? “Txhua tus uas thov tus Tswv pab yuav dim.”2 Peb yog Leej Txiv Saum Ntuj Ceeb Tsheej cov me nyuam uas Nws hlub, peb thiaj muaj cib fim nrog Nws sib txuas lus thaum peb thov Vajtswv “nrog txoj kev thov tiag tiag, muaj txoj kev ntseeg Khetos”3 ces ua raws li tej yam uas Nws teb los ntawm tus Vaj Ntsuj Plig Dawb Huv tej kev tshoov siab. Peb muaj kev ntseeg thov Vajtswv, mloog, thiab ua raws li Nws hais xwv kom peb yuav kawm koom siab koom ntsws nrog Leej Txiv thiab Leej Tub.4
Kev ntseeg thov Vajtswv yeej qhib kev kom txais tau cov koob hmoov uas los saum ntuj los. Tus Cawm Seej qhia hais tias:
“Nej thov, nej thiaj yuav tau; nej nrhiav, nej thiaj yuav ntsib; nej khob, Vajtswv thiaj yuav qhib qhov rooj rau nej:
“Rau qhov txhua tus uas thov yeej yuav tau, txhua tus uas nrhiav yeej ntsib, thiab txhua tus uas khob, Vajtswv yeej yuav qhib qhov rooj rau nws.”5
Yog peb xav tias peb yuav txais tau cov koob hmoov, peb yuav tsum thov, nrhiav, thiab khob qhov rooj. Thaum nws nrhiav qhov tseeb, Yauxej Xamiv nyeem los ntawm phau Yakaunpaus hais tias: “Yog nej leej twg tsis muaj tswv yim, kom nws cia li thov ntawm Vajtswv, Vajtswv yuav pub tswv yim rau nws, rau qhov Vajtswv yog tus muaj siab dawb siab zoo pub ib puas tsav yam rau sawv daws, nws tsis khuv xim li.”6 Thaum nws muaj kev ntseeg thov Vajtswv, ces rooj ntug ceeb tsheej thiaj li qhib. Vajtswv Leej Txiv thiab Nws Leej Tub, Yexus Khetos, tau nqis los hais lus rau Yauxej Xamiv, thiab qhib lub caij nyoog uas muaj txhij txhua. Kev kho mob, kev pov hwm, kev txawj ntse, kev zam txim, thiab kev nyob kaj siab lug yeej yog tej yam uas Vajtswv muab rau peb thaum peb muaj kev ntseeg thov Vajtswv kawg siab kawg ntsws.7
Peb thov peb Leej Txiv, los ntawm Yexus Khetos lub npe, los ntawm tus Vaj Ntsuj Plig Dawb Huv lub hwj chim, peb thiaj li hais rau tag nrho peb tug ntawm Pawg Vajtswv thaum peb thov.
Peb thov peb Leej Txiv Saum Ntuj Ceeb Tsheej thiab thov Nws ib leeg xwb vim Nws yog Vajtswv nyob saum ntuj ceeb tsheej, tus uas tsis muaj qhov kawg thiab nyob mus ib txhis li, kav ib txhiab mus kav ib txhis, tus txhim teeb lub ntuj thiab lub teb, thiab txhua yam uas muaj nyob haud. Vim Nws yog tus uas tsim peb, Nws muab tej lus txib kom peb yuav tsum hlub nws thiab ua hauj lwm rau nws, tib tug Vajtswv tseeb thiab muaj sia zees nyob, thiab hais tias tsim nyog peb yuav tau teev tiam nws tib leeg xwb.8
Thaum nej muaj kev ntseeg thov Leej Txiv Saum Ntuj Ceeb Tsheej, “nws yuav nplij nej thaum nej raug kev txom nyem, … [thiab nej yuav] nco ntsoov khaws nws txoj kev hlub.”9 Thawj Tswj Hwm Henry B. Eyring hais txog nws txiv tej lus thov Vajtswv thaum qhov uas nws txiv muaj mob cancer qhia nws txog Vajtswv thiab Nws cov me nyuam txoj kev sib raug zoo:
“Thaum mob mob heev, peb nrhiav tau nws txhos caug ze rau nws lub txaj. Nws sab dhau lawm nws thiaj nce tsis tau saum txaj. Nws qhia peb tias nws tau thov nws Leej Txiv Saum Ntuj Ceeb Tsheej nug seb vim li cas nws yuav tsum raug mob npaum li no thaum nws yeej siv zog ua ib tug neeg zoo. Nws hais tias Vajtswv ua siab zoo teb hais tias: ‘Vajtswv xav tau cov tub uas ua siab loj.’
“Yog li ntawd nws thiaj li nyiaj mus kom txog thaum kawg, ntseeg tias Vajtswv hlub nws, mloog nws, thiab yuav txhawb nqa nws. Nws tau koob hmoov vim nws paub thaum ntxov thiab yeej nco ntsoov tias Vajtswv nyob ze thaum yus thov Vajtswv.”10
Peb thov los ntawm Yexus Khetos lub npe vim Khetos yog tus uas muab cawm seej rau peb, thiab “tsis muaj dua lwm tus uas Vajtswv tso los cawm peb neeg ntiaj teb kom peb dim peb lub txim.”11 Peb los cuag Leej Txiv los ntawm Yexus Khetos lub npe dawb ceev12 vim Nws yog tus uas tuaj peb tog thov Leej Txiv thiab Nws yeej daws peb zaj.13 Nws raug txom nyem, los ntshav, thiab tuag kom muab yeeb koob rau Nws Leej Txiv, thiab Nws tej lus thov kom pab peb qhib kev rau peb txhua tus nyob kaj siab lug nyob hauv lub neej no thiab muaj txoj sia nyob mus ib txhis hauv lub neej tom ntej. Nws tsis xav kom peb raug txom nyem los yog nyiaj tej kev sim siab ntev dua li yuav tsum nyiaj. Nws xav kom peb tig los rau Nws thiab cia Nws ris peb lub nra, kho peb lub siab, thiab ntxuav peb sab ntsuj plig dhau los ntawm Nws lub hwj chim dawb huv. Peb yeej tsis xav hais lus saib tsis taus Nws lub npe thaum pheej hais thiab lam hais. Kev thov Vajtswv tiag tiag uas hais los ntawm Yexus Khetos lub npe dawb huv yeej qhia tias peb hlub Nws, peb ris Nws txiaj, thiab peb xav thov Vajtswv ib yam li Nws tau thov, ua li Nws tau ua, thiab rais los ua neeg zoo li Nws.
Peb thov los ntawm tus Vaj Ntsuj Plig Dawb Huv lub hwj chim vim tus uas thov los ntawm tus Ntsuj Plig thov raws Vajtswv lub siab nyiam.14 Thaum peb muaj kev ntseeg thov Vajtswv, tus Vaj Ntsuj Plig Dawb Huv yuav coj peb tej kev xav kom peb tej lus thiab Vajtswv lub siab nyiam yuav sib haum. “Tsis txhob thov, tej uas nej yuav coj mus siv raws li nej tej siab, tiam sis thov nrog txoj kev ruaj khov kho yam tsis co, xwv kom nej yuav tsis zam rau txoj kev dag ntxias, tiam sis kom nej yuav txhawb pe Vajtswv tus tseeb thiab tus tseem muaj txoj sia nyob.”15
“Qhov uas peb paub thov Vajtswv yeej tseem ceeb heev, tiam sis qhov uas tseem ceeb ib yam yog qhov uas peb yuav paub txais lus teb rau peb tej lus thov, paub qhov phem qhov zoo, paub ceev faj, thiab txawj pom meej thiab to taub Vajtswv lub siab nyiam thiab lub siab xav txog peb.”16
Thawj Tswj Hwm Eyring qhia hais tias: “Vajtswv tau teb kuv tej lus thov. Tej lus teb meej tshaj plaws tau los rau kuv thaum kuv xav paub Vajtswv lub siab xav tshaj kuv xav tau lwm yam. Thaum peb ua li ntawd ces Leej Txiv Saum Ntuj Ceeb Tsheej yuav teb peb tej lus thov dhau los ntawm lub suab yau yau thiab yuav muab tej lus ntawd sau cia rau hauv peb lub siab lub ntsws.”17
Thaum tus Cawm Seej mus rau hauv lub Vaj Khexemanes, ua rau Nws nyuaj siab kawg nkaus. Nws sab kawg, tib tug uas Nws thov tau yog Nws Leej Txiv xwb. Nws thov hais tias, “Kuv Txiv, yog koj pom zoo, thov koj tshem lub khob no ntawm kuv mus.” Tiam sis Nws hais ntxiv hais tias, “Txawm yog li cas los thov koj tsis txhob ua raws li kuv lub siab nyiam, tiam sis cia ua raws li koj lub siab nyiam xwb.”18 Txawm tus Cawm Seej tsis tau ua txhaum, Vajtswv hu Nws los “raug tej kev mob nkeeg thiab tej kev txom nyem thiab tej kev dag ntxias txhua yam,” xws li tej kev mob kev nkeeg ntawm Nws cov neeg. “[Nws] yuav raug raws li ntawm cev nqaij daim tawv kom nws yuav ris tau nws cov neeg tej kev txog kev txhaum, xwv kom nws yuav tshem tau lawv tej kev txhaum tawm raws li lub hwj chim ntawm nws txoj kev txhiv dim.”19 Nws tau thov peb zaug hais tias, “Leej Txiv, ua raws li koj lub siab nyiam.”20 Tsis tau muab lub khob ntawd tshem. Vim nws txo hwj chim rau siab thov Vajtswv, Nws thiaj li txais kev dag zog kom ua Nws txoj hauj lwm kom npaj kev cawm seej, xwv kom cov uas hloov siab lees txim, ntseeg, thiab mloog lus yuav txais cov koob hmoov nyob mus ib txhis.
Tej zaum Vajtswv yuav teb peb tej lus thov tsis yog raws li peb lub siab xav. Tiam sis thaum peb raug teeb meem, peb tej kev thov Vajtswv pab peb txais tau kev hlub thiab kev hlub tshua. Thaum peb thov Vajtswv, tej zaum peb yuav txais dag zog mus tom ntej thiab ua raws li txhua yam uas Vajtswv tsa kom peb ua. Tus Tswv hais rau Nws Haiv Neeg Ntseeg uas nyob hauv lub caij nyoog txaus ntshai hais tias, nej cia li txais kev nplij siab, vim txhua tus tib neeg twb nyob hauv kuv txhais tes; cia li ua siab tus thiab paub hais tias kuv yog Vajtswv.21
Thaum peb thov Vajtswv nyob peb tus kheej, hauv peb tsev neeg, los sis nyob hauv lub koom txoos los yog nyob hauv lub tuam tsev; txawm peb muaj lub siab mob thiab lub siab xav ua zoo thov kom nrhiav tswv yim saum ntuj ceeb tsheej los yog thov kom muaj dag zog nyiaj mus, peb yeej yuav tsum thov Vajtswv kawg siab kawg ntsws kom pab peb thiab pab cov uas nyob ib puag ncig peb. Thaum peb ris Vajtswv txiaj tiag tiag rau cov koob hmoov ntau nplua mias thiab ris Nws txiaj rau tej yam uas peb kawm los ntawm lub neej no, ua rau peb muaj kev ntseeg ruaj khov, kev cia siab, thiab ua rau peb hlub Vajtswv thiab hlub txhua tus neeg.22
Kev thov Vajtswv yog ib lub txiaj ntsim uas Nws pub rau peb. Peb tsis tas xav hais tias peb nyob peb ib leeg xwb. Kuv ua tim khawv tias txhua lub sij hawm yus thov Vajtswv yog ib lub sij hawm dawb huv nrog peb Leej Txiv, los ntawm Leej Tub lub npe, los ntawm tus Vaj Ntsuj Plig Dawb Huv lub hwj chim. Los ntawm Yexus Khetos lub npe dawb ceev, amees.