Kena Pwacye luhn Nguhna
Kais sie pacl in pruhe sacohk uh kuh in sie pacl muhtahl yurin Pahpah tuhmasr, ke inen Wen, ke kuh luhn Nguhn Muhtahl.
Ke ma upac luhn moul uh, kuht tiacna fihliyucki in muhkwena oruh orekma lasr, in muhkwena acnwuck, in muhkwena sun ma upac kuh kihsen siyuck soenna toplac uh. Jisus Kraist El luti ke puhpuhlyuck se “lah [mwet uh] enenu in pre pacl nukewa ac tia fuhleak.” El sruhmuhn ke sie mwet nuhnuhnkuh suc tiac kaksakihn God ac tiac ahkfuhlwactye kuhtwena mwet. Kalweni na, sie katinmas tuhkuh nuh yohrohl, kwacfe sel elan ahksuwohsye lokoalok ma orek nuh sel. Ke kihtin pacl se, mwet nuhnuhnkuh el tiacna kahsruh ke kuhtwena ohiyac. Tuhsruhk ke srihpen el oaru, kalweni na kwacfe, mwet nuhnuhnkuh sac el muh, “ke lupan lokoalok mutan se inge oru nu sik, nga ac kasrel elan eis suwohs ma el suk uh. Nga fin tia, na el ac sifil pacna fahsriyu nwe ke na nga totola na sel!”
Na Jisus El ahkuhtweyac:
“… Ya God El ac tia oru pac nununku lal in wo nu sin mwet lal su pang nu sel … ?
“Nga fahk nu suwos, El ac fah sa na in oru kasru lal nu selos.”
Na Leum el siyuck kihsen siyuck inge: “Tusruktu, ke Wen nutin Mwet el tuku, ya el ac konauk lulalfongi fin faclu?”1
Pruhe uh yohk srihpac in ahkfokokoye luhlahlfongi. Ke Leum Elac sifil tuhkuh, yac Elac konwacack mwet suc etuh pruhe ke luhlahlfongi ac suc ahkolah ohinge in moliyucklac? “Elos nukewa su pang nu sin Leum fah moliyukla.”2 Kuht tuhlihk nuhtin sie Pahpah luhngse Inkuhsrao, ac kuht ac kuh in engankihn aetuhi fototo sifacna lasr Yohrohl ke kuht pruhe “ke inse pwacye, kena in etuh ma pwacye, luhlahlfongi Kraist”3 ac na mukwikwi fal nuh ke top kuht eis ke mokleyuck luhn Nguhn Muhtahl. Ke luhlahlfongi kuht pruhe, kuht porongo, ac kuht ahkos tuh kuht in lotwelah in eklac ma sefanna yurin Pahpah ac Wen.4
Sie pruhe ke luhlahlfongi uh oruh kuht in kuh in eis mwe insewowo wolacna inkuhsrao uh. Mwet Lahngo El luti:
“Siyuk, na kowos fah eis; suk, na kowos fah konauk; towolak na srungul uh ac fah ikakla nu suwos.
“Tuh elos nukewa su siyuk elos ac fah eis; ac elos su suk fah konauk, ac srungul uh ac fah ikakla nu selos su towolak.”5
Kuht fin kena eis, kuht enenuh siyuck, suk, ac tongtong. Ke suk lal ke ma pwacye uh, Joseph Smith el riti ke ma suhmuhslah uh, “Kutena suwos fin enenu in akyokye lalmwetmet lal, enenu elan pre nu sin God, su ac fah sang nu sel.”6 Ke top nuh ke pruhe in luhlahlfongi lal ah, inkuhsrao ah ikack. God Pahpah ac Wen Nahtuhl, Jisus Kraist, elos puhtati ke wolacna ac sramsram nuh sel Joseph Smith, suc ma muhtwacwacack fihlin pacl ke fohnlahiyacn ma uh. Nuh sesr, mwe usrnguck in onwelah mwet, loangwelah na kuh, etwacack muhtahl, ahksukohsohkyacn nuhnak muhnahs, ac mihs sacohk uh pa inmahsrlon top ma tuhkuh ke kuht sang “kena pwacye luhn nguhna”7 nuh ke luhlahlfongi.
Kuht pruhe nuh sin Pahpah, ke inen Jisus Kraist, ke kuh luhn Nguhn Muhtahl, ac ohinge mempucr tolu nuh kwewa ke Sifacn God uh wi ke pruhe lasr uh.
Kuht pruhe nuh sin God Pahpah ac El muhkwena ke srihpen El pa God inkuhsrao, suc pa nwe tok ac ma pahtpaht, e met ah me ac nwe tok , mwet oraclah kuhsrao ac facluh, ac ma nuh kwewa ma oasr loac. Mweyen El pa Mwet Oraclah lasr uh, El acse nuh sesr ma sap tuh kuht in luhngse ac kuhlwacnsapwacl, suc muhkwena pa God moul ac pwacye, ac tuh Elan pa mwet sefanna suc kuht alu nuh se.8
Ke kom pruhe nuh sin Pahpah Lucng ke luhlahlfongi, “El fah ahkwoye kom ke ma upac lom, … [ac kom fah] ipeis ke luhngse Lal.”9 Prestuhn Henry B. Eyring el sruhmuhn lah pruhe luhn pahpah tuhmwacl ke el kutongyucki ke mihsen cancer ah lotwel ke kuhpahsr na loal ac sifacna inmahsrlon God ac tuhlihk nahtuhl:
Ke ngal uh upaclah, kuht konwaclwack ke lututacng sikuck muhtuhn te sisken mwe oan kiyacl ah. El muhnahslaclac in fanyak fohlohk nuh in bed lal. El fahk nuh sesr muh el pruhe siyuck sin Pahpah tuhmwacl Inkuhsrao lah efuh el enenuh kweok yohk ohinge ke el nuh srihke pacl nuh kwewa in wo. El fahk muh sie top mihs tuhkuh nuh sel: ‘God El enenuh wen puhlaik.’
“Na oruh el kampare na nuh ke sahflah, luhlahlfongi muh God El luhngse el, porongohl, ac fah sruhkuhlwack. El ahkinsewowoyeyuck in sa etwaclah ac in tiac muhlkuhnlah muh God suc luhngse uh El fototo na oacna sie pruhe.”10
Kuht pruhe ke inen Jisus Kraist ke srihpen molwelah lasr uh ma ke Kraist, ac “wangin sie ine saya su God El sang ku nu se in molikutlac.”11 Kuht tuhkuh nuh yurin Pahpah ke ine muhtahl luhn Jisus Kraist12 mweyen El pa Mwet Iwe lasr yurin Pahpah ac El kwacfe Sel ke srihpacsr13 El kweok, srahsrah, ac misac in ahkfuhlwactye Pahpah Tuhmwacl, ac kwacfe pahkotwen Lal ke srihpacsr uh ikacslah inkacnek sac tuh kuht in eis mihs ke moul se inge ac moul ma pahtpaht ke facl fahsruh uh. El tiac ke kuht in kweok paht kuh in muhtweng ma upac liki ma fal. El kena kuht in foracng nuh Sel ac lwelah Elan ahkfihsrwacsrye ma toasr lasr uh, onwelah insiacsr, ac in ahknwacsnwacsye nguhnasr ke kuh in ahksuwohs Lal uh. Kuht tiacna ke ahklusrohngtwenye inel ke fahk na ke wacngihn srihpac. Pruhe pwacye ma ke ine muhtahl luhn Jisus Kraist uh pa sie mwe fahkwack ke luhngse oaru lasr uh, srui ma pahtpaht lasr uh, ac kena kalweniyuck lasr in pruhe oacna El pruhe, in oruh oacna El oruh, ac in eklac oacna El.
Kuht pruhe ke kuh luhn Nguhn Muhtahl mweyen el suc siyuck ke Nguhn uh el siyuck oacna kena luhn God.14 Ke kuht pruhe ke luhlahlfongi, Nguhn Muhtahl El kuh in kol nuhnak lasr kahs lasr uh in muh oacna sie nuh ke kena luhn God. Nimet siyuck, tuh kowos in kuh in orekmakuhnlah nuh ke pwacr lowos, tuhsruhk siyuck ke kuh yohk, tuh kowos in fah tiac puhtatyang nuh ke mwe sruhf, tuhsruhk tuh kowos in fah kuhlwacnsapuh God pwacye ac moul.”15
“Tiac yohk srihpac kuht in etuh muhkwena lah kuht ac pruhe fuhkah, tuh yohk pacna srihpac kuht in etuh lah kuht ac eis fuhkah top nuh ke pruhe lasr uh, in etuh akihlen, in porongo, in kuh in liye suwohs ac kahlwem suwohs ke kena ac srihpac luhn God kacsr uh.”16
Prestuhn Eyring el fahk: “Oasr pruhe luhk ma toplac. Top inge kahlwem nuh pwacye ke pacl ma kena luhk uh tiac mwe elyah se sihk ke srihpen enenuh yohk se luhk in etuh lah meac God El luhngse. Pa ke pacl sacn ma top sin Pahpah luhngse Inkuhsrao uh kuh in sruhmuhnyuck nuh insifac ke puhsra mihs, srihsrihk se ac kuh in sihmlac ke insiyac.”17
Ke Mwet Lahngo El ilyak nuh in Imac Gethsemane, Nguhnal ahsor nuh upac, finne nuh ke misac. Ke kweok Lal uh, mwet sefanna suc El kuh in foracng nuh se uh pa Pahpah Tuhmwacl. El siyuck, “Fin ku, nga siyuk kom in eisla cup in keok se inge likiyu.” Tuhsruhk El fahk pac, “Tusruktu in tia ou lungse luk, a in ou lungse lom.”18 Finne wacngihn ma koluk Lal, Mwet Lahngo El pahngonyuck in “kweok ke kain in waek ac ongaiyac ac mwe sruhf nuhkwewa,” weacng pac mas ac muhnahs luhn mwet Lal. “El kweok fal nuh ke mahno tuh Elan kuh in eis nuh Facl ma koluk luhn Mwet Lal, tuh Elan kuh in elah tahfonglac lalos fal nuh ke kuh luhn molwelah Lal.”19 Pacl tolu el pruhe, “Papa, … ma lungse lom in orek.”20 Cup sac tiac itucklac. Ke pruhe puhsisacl, luhlahlfongitwen El ahkkweyeyuck in fahsr nuh met ac ahksahfyelah orekma muhtahl Lal in ahkoelah molwelah lasr, tuh kuht in kuh in auliyak, luhlahlfongi, ahkos ac eis mwe insewowo luhn pacl ma pahtpaht uh.
Top ma kuht eis ke pruhe uh sahp ac tiac ma kuht kena. Tuhsruhk ke pacl upac uh, pruhe lasr uh mwe ahkkuh ke luhngse ac pahkotwen. Ke siyuck lasr uh, kuht kuh in ahkkweyeyuck in fahsr nuh met ac ahksahfyelah ma nuh kwewa ma kuht kuneyucki in oruh uh. Nuh sin Mwet Luhlahlfongi Lal suc moul ke pacl ongaiyac uh, Leum El fahk lah kuht in lwelah insiyacsr in mihs mweyen mwet nuh kwewa oasr in pahol. Kuht kuh in mihs ac etuh na lah El pa God.21
Lah kuht pruhe in lukmac, yurin sucu lasr, in lohm alu, lun tempuhl, kuh oacna sie acn kuht oasr we, finne kuht pruhe ke inse muhnahs ac toasr in nguhn in suk nuhnak muhnahs, lahlmwetmwet inkuhsrao me, kuh kena ke kampare, kuht pruhe pacl nuh kwewa ke inse nwacnwaclah, in sikalweni na in pruhe nuh sin God, pacl nuh kwewa nuh ke ohiyac wo lasr ac oacyacpac nuh ke ohiyac wo luhn mwet raunikuhtlac. Kena pwacye ma fwack ke sie ohiyacn srui ke mwe insewowo puhs ac srui ke mwe luti in moul uh ahkkweye ke insiacsr luhlahlfongi kalweniyuck nuh sin Kraist, sie “kahlwem ke finsrak, ac sie luhngse luhn God ac luhn mwet nuh kwewa.”22
Pruhe el sie mwe sang sin God. Kuht tiac enenuh in puhla tuhlac kuh muhkahimtacl. Nga fahkwack lah pacl nuh kwewa ke pruhe sacohk uh kuh in sie pacl muhtahl yurin Pahpah tuhmasr, ke inen Wen, ke kuh luhn Nguhn Muhtahl. Ke ine muhtahl luhn Jisus Kraist, amen.