Deseo Sinsero di e Alma
Kada momentu di orashon balioso por ta un tempu pasá santu ku e Tata, den e nòmber di e Yu, mediante e poder di e Spiritu Santu.
Durante di lucha di mortalidat. Nunka nos no ta lagá nos so pa kumpli ku nos trabou, pa bringa nos batayanan, pa enfrentá atversidat òf kontestá preguntanan. Jesucristu a siña ku un parabel “ku hende mester hasi orashon semper, i no deskurashá.” El a bisa tokante un hues kende no tabata teme Dios i no tabata preokupá su kabes ku niun hende. Kada biaha, un biuda tabata bini su dilanti, roga pa haña su derecho kontra di su kontrinkante. Durante largu tempu, e hues a nenga di yud’é. Pero komo resultado di su petishon fiel i konstante, finalmente e hues a pensa, “Pasobra e biuda aki ta fèrfelá mi hopi, mi ta yud’é haña su derecho, sino e ta keda molestiá mi te kaba ku mi.”
Despues Jesus a splika:
“... Akaso Dios lo duna su eskohidonan ku ta sklama na dje di dia i anochi …? ”
“Mi ta bisa boso ku e lo husga nan na nan fabor.”
I despues Señor a hasi e pregunta aki: “Ma ora e Yu di hende bini bèk, lo e haña hende ku fe riba mundu?” 1
Orashon ta esensial pa desaroyá fe. Ora Señor bolbe, lo E haña un pueblo ku sa kon pa hasi orashon ku fe i ku ta prepará pa risibí salbashon? “Pasobra tur ku invoká nòmber di Señor lo ta salbá.”2 Nos ta yunan di un Tata Selestial amoroso, i nos por disfrutá di komunikashon personal ku n’e ora nos hasi orashon “ku un kurason sinsero, ku intenshon bèrdadero, teniendo fe den Cristu”3 i despues aktua di akuerdo ku e kontestanan ku nos ta haña dor dje inspirashonnan di e Spiritu Santu. Ku fe nos ta hasi orashon, skucha, i obedesé pa nos por siña pa bira un ku e Tata i e Yu.4
Un orashon di fe ta habri e kaminda pa risibí bendishonnan glorioso mandá di shelu. E Salbador a siña:
“Pidi, i boso lo risibí; buska, i boso lo haña; bati na porta, i lo wòrdu habrí pa boso:
“Pasobra ken ku pidi, lo risibí; i e ku buska lo haña; i na e ku bati, porta lo habri p’e.”5
Si nos ta spera pa risibí, nos mester puntra, buska, i bati. Den su búskeda di bèrdat, José Smith a lesa for di e skrituranan: “Si kualke un di boso falta sabiduria,hasi orashon pidi Dios i lo E duna bo e, pasobra Dios ta gusta duna tur hende sin límite, sin tira nada na nan kara.”6 Den su orashon di fe, e shelunan a habri. Dios e Tata i su Yu, Jesucristu, a baha den gloria i a papia ku José Smith, kuminsando e dispensashon di e kumplimentu di tempunan. Pa nos, kuramentu maravioso, protekshon poderoso, konosementu dibino, pordonamentu ku ta libra, i pas balioso ta entre e kontestanan ku ta bini ora nos ofresé deseo sinsero di un alma den fe.7
Nos ta hasi orashon na nos Tata, den e nòmber di Jesucristu, pa e poder di e Spiritu Santu, asina envolví tur tres miembro di e deidat den nos orashonnan.
Nos ta hasi orashon na nos Tata Selestial i na Dje so pasobra E ta Dios den shelu, ku ta infinito i eterno, di eternidat pa eternidat… , e organisadó di e shelu i tera, i tur kos ku ta den nan. Komo nos Kreador, El a duna mandamentunan pa nos por stim’é i sirbi E, e úniko Dios berdadero i bibu, i ku E ta e úniko ser ku nos mester adorá.8
Ora boso ta hasi orashon ku fe na Tata Selestial, E lo konsolá boso den boso aflikshonnan i boso lo deleitá den su amor. 9 Presidente Henry B. Eyring a kompartí ku su tata su orashonnan durante pèrdèmentu di lucha kontra kanser a siñ’é e relashon profundo entre Dios i Su yunan:
“Ora e doló a bira mas intenso, nos a hañ’é mainta na rudia banda di kama;. E tabata asina debil ku e no por a subi bèk den kama. El a bisa nos ku el a hasi orashon pa puntra Tata Selestial di kon e mester a sufri asina tantu ora ku semper el a purba di ta bon hende. El a bisa ku un kontesta amabel a bini: ‘Dios mester di yunan balente.’
“Di moda ku el a perseverá balente te fin, konfiando ku Dios tabata stim’é, i lo elev’é. El a haña e bendishon di sa for di un edat yòn pa no lubidá nunka ku tin un Dios amoroso mes serka ku un orashon.”10
Nos ta hasi orashon den e nòmber di Jesucristu pasobra nos salbashon ta den Cristu, i no tin niun otro nòmber duná na hende, kua nos por wòrdu salbá.”11 Nos ta bini na e Tata den e sagrado nòmber di Jesucristu12 pasobra E ta nos Abogado na e Tata i E ta pleita nos kaso.13 El a sufri, sangra, i a muri pa glorifiká Su Tata, i Su petishon di miserikòrdia na nos fabor ta habri kaminda pa kada un di nos haña pas den e bida aki i bida eterno den e mundu benidero. E no ke pa nos sufri mas òf soportá mas prueba ku ta nesesario. E ke pa nos bira na Dje i pèrmití E pa aliviá nos karga, pa kura nos kurason, i pa limpia nos alma mediante Su poder purifikadó. Nos no ke tuma su nòmber nunka pòrnada ku palabranan memorisá i ripití kada biaha. Orashonnan sinsero ofresé den e nòmber di Jesucristu ta un ekspreshon di nos amor deboto, nos gratitut eterno, i nos deseo firme pa hasi orashon manera El a hasi i bira manera ku E ta.
Nos ta hasi orashon pa medio di e poder di e Spiritu Santu pasobra e persona ku ta pidi den e Spiritu ta hasié segun e boluntat di Dios.14 Ora nos ta hasi orashon ku fe, e Spiritu Santu por guia nos pensamentunan p’asina nos palabranan ta den harmonia ku e boluntat di Dios. No pidi, pa boso konsumié riba boso deseonan, pero pidi ku un firmesa inmovibel, ku boso lo no entregá na ningun tentashon, pero ku boso lo sirbi e Dios berdadero i bibu.15
“No ta solamente importante pa nos sa kon pa hasi orashon, pero tambe ta importante pa nos por sa kon pa risibí e kontesta na nos orashon, pa distinguí, pa ta alerta, i kapas pa mira ku bista kla i komprondé ku intenshon klaro Dios su boluntat i propósito pa nos.”16
Presidente Eyring a kompartí : Mi a haña mi orashonnan kontestá. E kontestanan ei tabata mas klaro ora lokual mi tabata ke a wòrdu ignorá pa motibu di un nesesidat abrumador pa sa kiko Dios ke. Ta e ora ei e kontesta di un Tata Selestial amoroso por papia den e mente pa e stèm ketu, i chikitu, i por wòrdu skibi riba nos kurason.”17
Ora e Salbador a drenta e Hòfi di Getsémani, Su alma tabata ekstremadamente tristu, hasta te na morto. Den agonia, e úniko persona ku E por a bira na dje tabata Su Tata. El a roga, “Si ta posibel, laga e kopa aki pasa bai for di mi.” Pero El a añadí , “Pero no loke ami ke, pero loke abo ke.”18 Ounke sin piká, e Salbador a wòrdu yamá pa [sufri ]dolónan[,] aflikshonnan, i tentashonnan di tur tipo, inkluso e enfermedatnan i debilidatnan di Su pueblo. [El ]ta sufri segun e karni pa E por tuma riba Dje e pikánan di su pueblo, pa e por kita nan transgreshonnan segun e poder di Su liberashon.19 Tres biaha El a hasi orashon, “Tata, bo boluntat sea hasí.”20 E kopa no a wòrdu kitá. Den orashon humilde, ku fe El a wòrdu fortalesé pa sigui dilanti i kumpli ku Su mishon dibino pa prepará pa nos salbashon, pa nos por arepentí, kere, obedesé i optené e bendishonnan di eternidat.
E kontestanan ku nos ta haña den orashon kisas lo no ta loke nos ta deseá. Pero den tempu di problema, nos orashonnan ta bira un sosten di amor i miserikòrdia tierno. Den nos ora di roga, nos por ta fortalesé pa sigui dilanti i kumpli ku tur kos ku nos a wòrdu ordená a hasi. Na Su Santunan ku ta biba den tempunan peligroso , Señor a bisa ku nos tin ku laga nos kurason sea konsolá … ; pasobra tur karni ta den Su mannan. Nos mester para ketu i sa ku e ta Dios.21
Sea nos orashonnan ta hasí den privá, den famia, na iglesia, òf den tèmpel; sea ku nos ta hasi orashon ku kurason kibrá i spiritu kontrito pa buska sabiduria selestial òf fortalesa pa perseverá, nos ta hasi orashon semper ku kurasonnan yen, entregá kontinuamente na Dios pa nos bienestar i esun di tur ku ta rònt di nos. Deseonan sinsero ofresé den spiritu di gratitut pa bendishonnan abundante i gratitut pa e lèsnan di bida ta inkulká den nos kurason fe firme den Cristu, un brio di speransa, un amor pa Dios i pa tur hende.22
Orashon ta un don di Dios. Nos no mester sinti nos nunka pèrdí òf so. Mi ta testifiká ku kada momentu di orashon balioso por ta un tempu pasá santu ku nos Tata, den e nòmber di e Yu, mediante e poder di e Spiritu Santu. Den e nòmber sagrado di Jesucristu, amèn.