Sel Meral Losiik er Ngii a Reng
A bek el mekreos el nglunguuch a sebechel chedaol taem lobengkel a Chedam, el ngara ngklel a Jesus Kristo, lokiu a klisichel Chedaol Reng.
Chelsel a mondai er a klechad, e ng diak de cheloit er a ikel kedmeklel a urered, a odechelakl el mei er kid, me a mo obengelii a cherarou me a diak el monger el ker. A Jesus Kristo a ulsisechakl lousbech er a olachitnger “el kmo a chad a kirel blechoel meluluuch, e diak bol mesaul a rengul.” Ng millekoi el kirel a chad er a kerkeriil el ngii a dimlak longull er a Dios me a dimlak chubechub el kirel a chad. Bek el sils, e a mla melakl el dil a mlei er ngii, lolengit er ngii a llemalt el kirel a ringel le bla er ngii. Ng mle telkib el taem, el ngika el chad er a kerkeriil a dimlak el ngeseuir. E ng di blak el reng me a blelekl el ongtil, e ngika el chad er a kerkeriil omdesuang, “Ngika el mla melakl el dil a kmal mengesang er ngak, me a kongei ongtil, le lolemolem el uaisei e ng rulak el mo mesaul a renguk.”
E a Jesus a silodii el kmo:
“A Dios ng diak el ungil kongei er a rechedal, el tir olengit a ngeso er ngii … ?
“Ak dmu er kemiu el kmo ng kmal di mereched el ngosuterir.
E a Rubak a mo oker el kmo: “A Ngelekel a chad a lemei, e ng locha metik er a roumerang el ngara beluulechad?”1
A nglunguuch a klou a ututelel el meleketek era klaumerang. Sel Rubak a luut el mei, e ng locha mo metik er a rechad el meduch el meluluuch loba klaumerang e kldmokl el mo suobel? “Le ngike el omekedong er a ngklel a Rubak a mo suobel.”2 Kid a rengelkel a betik er a rengud el Demad er a Babeluades, el doutkeu er a deluill lobengkel sel doluluuch “loba blak el reng, el ngarengii er a rengum, loba a klaumerang er a Kristo”3 e mo meruul loba nger el dengilu sera doltirakl er a Chedaol Reng. Loba klaumerang e kid a meluluuch, e orenges, e oltirakl meng kede mo messub el mo tang lobengkel a Chedam ma Ngelekel Sechal.4
A nglunguuch loba klaumerang a mekengii a rael el mo melai a klebokl el klengeltengat el mlara babeluades. A Osobel a ulsisechakl:
“Molengit, me bom ngai; mosiik, me bo betik; molengod, me lobok el kiriu:
“Le tirkel lolengit a mo ngmai; e tirkel losiik a mo metik; e ngike el melengod a mo obok el kirel.”5
Alsekum e kede mengerchir el mo ngmai, e ng kired lolengit, osiik , e melengod. Chelsel a skel kirel a klemerang, e a Joseph Smith a mlenguiu: “A le ngarngii ousbech a llomes, e lolengit er a Dios, el mimokl el mesterir a rokui el chad, e diak longreos; me bo lengai.”6 Ngokiu a klemerang el nglunguchel, e a babeluades a ulebok. A Dios el Chedam me a Ngelekel, el Jesus Kristo, a mle metengel lolab a klebkellir e milngedecheduch er a Joseph Smith, e milchelii olutel a rokui el tekoi er chelechal taem. Ongasireng a dilubech, mesisiich el ucheliu a mlo er ngii, chedaol klemedengei a mlocholt, odersel a klausubes, me a mekreos el budech a uldimukl er a nger el mer kid sel kid a “oldars a rengud”7 loba klaumerang.
Kede meluluuch el mo er a Demad, el ngara a ngklel a Jesus Kristo, e okiu a klisichel a Chedaol Reng, me luchul e bo dultuil er tirkal tedei el chedal a Kledios er a nglunguched.
Kede meluluuch el mo er a Demad er a Babeluades el di Ngii el tang le Ngii el “Dios er a babeluades, el diak a ulebengelel, er a uchelel el mo er a ulebongel… , el milebii a eanged me a chutem, me a rokui el tekoi el ngara chelsel.” Ngii a Ulemeob er kid, e Ngii a milskid a llach el kired el mo betik a rengud e mesiou er Ngii, ngii el di chimong el ngar e meral Dios, e Ngii a di chimol Chad el dongull er ngii.”8
Sel moluluuch el mo er a Chedam er a Babeluades lultuil er a klaumerang, e “ngii a mo sobecheklau er a ongarm, … [me ko mo bang a beltik el reng er ngii.”9 A President Henry B. Eyring a ulechais el kmo a nglunguchel a demal er a le secher er a kasinoma a ulsisecheklii el kirel a dmolech el deleuill er a Dios me a Rengelekel:
“Sel sal kmal mo meringel, e ki mesang sel tutau el outubaruach er a dukellel. Ng kmal mlo mechitechut el diak el sebechel muut el ngmasech er a dukellel. Ng ulechais er kemam el kmo ng mla ngara nglunguuch lolengit er a Demal er a Babeluades el kmo ngera uchul meng kmal ngara ringel sel sal kmal mla melasm el meruul a ungil. Ng millekoi el kmo a klebokel el nger a mlei er ngii: ‘A Dios ousbech er a remisiich a rengrir ngalek el sechal.’
“Me ng ultekangel el mo er a ulebongel, el ulumerang el kmo a Dios a betik a rengul er ngii, e ulerrenges er ngii, e silbecheklii. Ng mle ngeltengat el di mle uchelel e ng mo medengei e dimlak lobes el kmo a oubeltik el reng el Dios a sebeched el mo er ngii lokiu a nglunguuch.”10
Kede meluluuch el ngara ngklel a Jesus Kristo le osobeled a okiu a Kristo, e “diak a ngii di el ngakl er cheungel babeluades loungakl er ngii, el uchul e kede mo suobel.”11 Kede mo er a Chedam lokiu chedaol ngklel a Jesus Kristo12 le Ngii a mesebechakl er kid er medal a Chedam e olengit el kired.13Ngii a mlo er a ringel, mengerngars a rsechel, e mlad el mo kobkelii a Demal, e a chubechub el Ongtil el kired a mekengii a rael el mo er a dertsa er kid el mo nguu a budech er tial klengar me a diak a ulebengelel klengar er medad el taem. Ngii a diak el soal a de kemanget el ngara ringel malechub e de ngara ongarm el kuk kmal chengelakl er sel sebeched. Ngii a soal kid a dobult el mo er a Ngii e mecherei meng ngmai a chelngeled, e omekungil a rengud, e kmikiid a rengud lokiu a mengikiid el Klisichel. Ng diak el soad el torkeklii a ngklel lolab a blelekl el tekoi. A meral ngara rengud el nglunguuch el ngara chedaol ngklel a Jesus Kristo a olchotel a beltkil a rengud, diak a ulebengelel omereng el saul, me a blak el reng er kid el meluluuch el uai Ngii er a loluluuch, el mo meruul aikel Ngii a mirruul, e mo uai Ngii.
Kede meluluuch lokiu a klisichel Chedaol Reng le chad “lolengit lokiu a Reng a olengit lultuil er a soal a Dios.”14Sel doluluuch loba klaumerang, e a Chedaol Reng a sebechel omekrael a uldesued me a tekinged bo lultuil er sel soal a Dios. “Lak molengit el kuk di mo klungiolem, e bai molengit loba blak el reng, e lak mechetakl er a ongetikaik, e bo mosiou er a meral ngar el Dios.”15
“Ng diak di el klou a belkul bo demeduch el meluluuch, ng dirrek el kmal klou a belkul a bo demeduch el melai a nger er a nglunguched, el mo meduch lomtab, me klekar, e sebeched el ungil lomes e medengei loba ungil moktek er sel ngii a soal me a moktek er a Dios el kired.”16
A President Eyring a ulechais: “Ngar ngii a nglunguchek el bla monger. Aikel nger a kmal mle bleketakl el sel ngii a mle soak a dimlak bo el taut lokiu a mesisiich el klemedengei el kmo ngera soal a Dios. Seikid e a nger er a oubeltik el reng el Chedam er a Babeluades a sebechel medung er a uldesuek lokiu a chelellakl, e kekerei el ngor e sebechel mekedmokl er a reng.”17
A Osobel er a le siseb er a Sers er a Gethsemane, e a Rengul a kmal mla er a klengit el reng el mocha er a kodall. Ngara ringel, e a di mle chimol chad el Ngii a ulebult el mo er ngii a Demal. Ng ulengit, “A le sebechel, e mgnuu tial ringel er ngak.” E ng di Ngii a dilchelii el kmo, “Ng diak el sel soak, ng bai sel soam.”18 Ng uaisei el dimlak a kengtil, eng di a Osobel a mlokedong el mo otekau a bek el bedengel a “[ringel] me a ongarm me a ongetikaik,” luldimukl a secher me a kngterir a Rechedal. “[Ngii] a mlora ringel a bedengel me bol sebechel ngmai a kngterir a rechedal, me bol suld a rokui el chelitecheterir lultuil er a klisichel el melubet er tir.”19Ng edei el taem loluluuch, “Chedam sel soam bol mekedmokl.”20A ringel a dimlak bol cheroid er ngii. Sel medemdemk, e mesisiich el nglunguchel a uchul e Ngii a mlo meisiich loutekangel el kudmeklii a chedaol Urerel el kudmeklii osobelid, me kid a sebeched el ouchel a rengrir, e oumerang, e oltirakl bol sebechir el nguu a klengeltengat er a diak a ulebengelel klengar.
A nger er a nglunguched el dengai a locha diak el soad. E ng di chelsel aikel meringel el taem, e a nglunguched a mo sobecheklid er a beltik el reng me a chubechub. Aikel taem el dolengit, e kede locha mo mesiich el mo mekiis el mo dechor, lomakes el bedul uchei e kudmokl aikel ngii a bla de moterekokl el kired el meruul. Tirkel Santo el kiei er a chelsel a meringel el taem e a Rubak a mla dmu el kmo, “a rengud bol chelellakl… ; el rokui el chad a ngara chereuel Chimal e mo medengei el kmo ngii a Dios.”21
A nglunguched a le berrotel el medung, me a le ngara telungalek, ikelesia, templo, malechub e ngidil basio; mal ta doluluuch loba delemdemek el reng me a ngariou el reng losiik a llomes er a babeluades malechub a klisiich loutekangel, e kid a meluluuchloba rengud el rokir, locholt a ngara rengud el mo er a Dios el kirel a klechad er kid me a klechad er a rebebil. A meral ngar rengud el tekoi el medung lokiu a reng er a omereng el saul er a betok el klengeltengat me a omereng el saul er a klubelel a klechad a locha er a rengud a mesisiich el klaumerang, el “llomes er a urunguled, me a beltik el reng er a Dios me a rechad el rokui.”22
A nglunguuch a sengk el mla er a Dios. Ng diak el kired el mo omelchesiu el cheloit malechub eng di kid el tang. Ak ouchais el kmo a bek el mekreos el nglunguuch a sebechel chedaol taem lobengkel a Chedam, el ngara ngklel a Jesus Kristo, lokiu a klisichel Chedaol Reng. El ngara chedaol ngklel a Jesus Kristo, amen.