Anahn Mehlel en Mour
Ansoun kapakap koaros kak wia ansou sarawi ni ahm pahn ehukihong Sahmo, ni mwaren Sapwellimeo, sang ni manaman en Ngehn Sarawi.
Nan kahpwal kan en mour wet, kitail sohte kin kelehpw kanekehla atail doadoahk, peiki atail mwahwin kan, sohpai peliatail de rapahki pasapengpen peidek kan. Sises Krais ketin padahngki karasaras ehu “me aramas en kin poaden kapakap, oh dehr tokedihsang.” E mahsani duwen sounkopwung men me sohte wahuniki Koht oh sohte kesempwaliki aramas. Pak tohto, liohdi men kin pwurepwure, reperepenpwungki en pelian ah imwintihti. Erein ansou kis, sounkopwungo sohte sewese. Ahpw pwehki ahn liho pwoson, oh ngidingidki ah pekipek, sounkopwungo eri uhd medewehda, “Pwehki lihohdi menet eh kin kihengie kahpwal, I pahn sewese pwe en dehr kin kohdo kedirepweie.”
Sises eri ketin kawehwe:
“Koht sohte pahn ketin sewese pein sapwellime aramas, me kin pekipeki sawas nirahn oh nihpwong … ?
“Kumwail en ese pwe e pahn ketin mwadang seweseirail.”
Oh Kauno eri keinemwe: “Eri ni Nein-Aramas eh pahn ketido, e pahn ketin diar pwoson pohn sampah?”1
Kapakap kesempwal ong kakairada pwoson. Ni ansou me Kauno pahn ketin sapahldo, E pahn ketin diar aramas me ese kapakap ni pwoson oh onopadahr en ale komour? “Sohte lipilipil ihs ih me pahn likweriong mwaren Kauno, e pahn komourla.”2 Kitail wia Sapwellimen Sahm limpoako Nanleng seri kei, oh kitail kak nsenamwahuki pein atail koasoiong Ih ni ansou me kitail kin kapakap “ni mohngiong mehlel, ni ineng mehlel, ahniki pwoson rehn Krais”3 oh eri kapwaiada pasapeng kan me kin alehdi sang ni pepehm en Ngehn Sarawio. Ni pwoson kitail kin kapakap, kitail kin rong, oh kitail kin peikiong, pwe kitail en kak esehla ehuong Sahmo oh Sapwellimeo.4
Kapakap en pwoson kin ritingada ahl en alehdi kapai lingan me kin pekederdo sang nanleng. Sounkomouro ketin padahngki:
“Peki, a ke pahn ale; rapahki, a ke pahn diar; letelet, a e pahn ritida:
“Pwe koaros me kin peki pahn ale; oh me kin rapahki pahn diar; oh me kin letelet, e pahn ritida.”5
Ma kitail kasik kitail en alehdi, kitail anahne peki, rapahki, oh letelet. Ni ah rapahki me mehlelo, Joseph Smith wadek nan pwuhk sarawi kan: “Ma mie rehmwail me sohte eripit reh, a en peki rehn Koht, me kin ketikihong aramas koaros saledek, oh sohte kin kapwokohni emen mehkot; oh Koht me ketin kupwusapan.6 Nan pasapeng ong ah kapakap en pwosono, nanleng ahpw ritidahr. Koht Sahm oh Sapwellime Ieroso, Sises Krais, ketidihdo nan lingan oh mahsenieng Joseph Smith, kahre nan keimwseklahn mwehi wet. Ong ktail, manaman en kakehlail, perehre kehlail, eripit sarawi, mahk, oh meleilei wia kisehn pasapeng kan me kin kohdo ni ansou me kitail kin peikikihdahla kihla atail “ineng mehlel”7 ni pwoson.
Kitail kin kapakap ong Sahmo ni mwaren Sises Krais, sang ni manaman en Ngehn Sarawio, eri pohnesehki irail koaros me wia Koht Sahm, Koht Nah, oh Koht Ngehn Sarawi nan atail kapakap kan.
Kitail kin pakapak ong Samatail Nanleng oh Ih kelehpw pwehki Ih me “Koht nanleng, me sohte imwi oh poatoapoat, sang ni tapio oh kohkohlahte … , me ketin kapikada nanleng oh sampah, oh audepara kan koaros.” Ni eh ketin wia atail Sounkapikipik, E ketkihdo kosonned kei me kitail “uhdahn pahn poakohng oh papah Ih, ihte Koht me mehlel oh ieias, oh me Ih kelepw me [kitail] uhdahn pahn pwongih.”8
Ni amwail kin kapakap ong Koht Sahm ni pwoson, “e pahn ketin kapitkumwail sang nan amwail kahpwal kan. …[oh kumwail kak] paieki sapwallime limpoak.”9 Presiden Henry B. Eyring ehukihda duwen ahn ah pahpao kapakap ni ansou me e kohkohwahki soumwahu en kanser me kahrehda eh wehwehkihla mehlel duwen nan pwungen Koht oh Sapwellime seri kan.
“Ni ansou me weireko inenen uklahro, se diar nmensengo eh kelepwkidier pwikie ko limwahn ah pehto. E inenen luwetalahr oh solahr kak pwurada pohn pehto. E ndahing kiht me e wie kapakap pwe en kalelapak rehn Sahm Nanleng dahme kahrehda eh nohn lokolongki ni eh kin kalap songosong en kin mwahu. E nda me pasapeng mwahu ieu kolahng: ‘Koht kupwurki sapwellime pwutak kan ren dehr kommwad.’
“Oh ih eri dadaurete lel ni imwi, likih me Koht ketin poakohng ih, kin ketin karonge ih, oh pahn ketin sewesehda ih ni imwio. Ohlo kapaida ni eh mwadang esehda oh sohte manokehla Koht me ketin limpoako kin ketin keren duwehte ehu kapakap.10
Kitail kin kapakap ni mwaren Sises Krais pwehki atail komourla mihmirehn Krais, oh “sohte pil ehu ahd pahn lahng me kodohng aramas, me kitail kak komourkihla.”11 Kitail kin kohdo rehn Sahmo ni mwar sarawi en Sises Krais12 pwehki Ih me ketin wia Weliepetail rehn Sahmo oh E kin ketin uhki atail mour.13 E ketin lokolongkiher, kakerehdier nta, oh pwoulahr pwehn kalinganahda Semeo, oh Sapwellime kalahngan pwehki kitail langahdahng kitail en kak ale meleilei nan mour wet oh mour soutuk nan mour me kohkohdoht. E sohte kupwurki kitail en lokolok ansou reirei de lohdieng nan kahpwal akan me laudsang dahme kak powehdi. E kupwurki kitail en sohpeilahng Ih oh mweidehng Ih en kamarahda atail katoutou kan, kamwahula mohngiongatail kan, oh kamwakeleikitailda sang ni Sapwellime manaman. Kitail sohte anahne kahukihla mwahl Mwareo. Kapakap mehlel kan me kin wiawi ni lengileng sarawi en Sises Krais kin kasalehda atail limpoak mwuledek, atail kalahngan soutuk, oh atail inengieng mehlel kapakap duwehte Ah ketin kapakapo, wia dahme E ketin wiahiero, oh duwehla Ih.
Kitail kin kapakap sang ni manaman en Ngehn Sarawio pwehki “mehmen me kin peki ni Ngehno kin peki ni duwen kupwuren Koht.”14 Ni Atail kin kapakapki pwoson, Ngehn Sarawio kak kaweid atail madmadau kan pwe atail koasoai en kin peian kupwuren Koht. “Dehr peki mee kumwail pahn doadoahngki ong amwail ineng kan, ahpw peki ni kehlail tengeteng, kumwail en dehr lohdieng nan kasongosong kan, ahpw me kumwail pahn papah Koht me ketin mehlel oh ieias.”15
“E sohte kesempwal kitail en esehte duwen kapakap, ahpw e pil kesempwal kitail en kak ese duwen ale pasapeng ong atail kapakap, kak marainki, kak mwasamwasahn, kak kilang mwahu oh wehwehki ni mehlel kupwuren Koht oh kahrepe me pid kitail.”16
Presiden Eyring sawasiki: “Ahi kapakap kan pasapenglahr. Pasapeng pwuko kin inenen sansal ma dahme I anahneo meleileidi sang ni anahn laud en esehla dahme Koht ketin kupwurki. Iei ansouo me pasapeng sang Sahm Nanleng limpoako kak ketin mahsenlahng nan lamalam sang ni kisin ngihl malamal, tikitik oh kak sair mohngiong.”17
Ansou me Sounkomouro ketila nan Mwetuwel en Kedsemani, Kahlapeo inenen pahtou, kerenieng pwoula. Nan Sapwellime pahtou mwuledeko, ihte me E kak ketin weriong iei Semeo. E ketin peki ni ngidingid “Ma e kak, a komw ketikihweisangie dahl en lokolok wet.” Ahpw E pil ketin doula, “Eri soh, kaidehkin nseneiet, pwe kupwuromwihte en pweida.” 18 Tehn sohte dipe, Sounkomouro ketido pwe en ketin“[lokolongki] weirek kan oh dihp akan oh kasongsong kan en soahng koaros,” iangahki soumwahu oh souitar akan en sapwellime aramas akan. “E ketin lokolok ni duwen uduk pwe en kak ketin sapwellimankihda dihpen sapwellime aramas akan, pwe en kak ketin kapitirail sang nan arail kahpwal kan nin duwen sapwellime manaman en sapwellime komour.”19 Pak siluh E ketin loulou, “Semei, kupwuromwi en pweida.”20 Dahlo sohte kemwekidsang. Ni karakarahk, loulou en pwoson E ketin rosonda pwe en kak ketin doula oh kapwaiahda Sapwellime pwukoah sarawio pwe en ketin kaunopada ong komourpatail, pwe kitail en kak koluhla, kamehlele, peik, oh ale kapai kan en mour soutuk.
Pasapeng kan me kitail kin alehdi sang ni kapakap kakete kaidehng dahme kitail kin anahne. Ahpw nan ansou apwal kan, atail kapakap akan kin wiahla ehu sawasepen limpoak oh mahk ni meleilei. Nan atail pekipek, kitail kak kehlailda pwe kitail en wenla mwohtail oh apwaliala pwukoah kan me kitail kasarawihongehr. Ong Sapwellime Souleng kan me momour nan ansou apwal pwukat, Kauno kin mahsani, “Amwail mohngiong kan en perenda … ; pwe mehkoaros miher rehi, kumwail meleilei oh wehwehki me ngehi amwail Koht.”21
Ma kitail kin kapakap ni rir, patehng atail peneinei kan, nan sarawi, nan tehnpas sarawi, de sohte liipilipil wasa kitail mihmie; ma kitail kin kapakapki ni nsensuwed oh karakarahk, raparapahki mahk, erepit en nanleng, de ni mengei, roson en powehdi, kitail kin kalap kapakap ni mohngiongitail unsek, dokehki Koht ansou koaros ong kamwahupatail oh kamwahupen mehn mpatail kan. Ineng mehlel kan me kin wiawi ni kaping kalahngan pwehki kapai tohto kan oh kaping kalahngan pwehki kasukuhl kan en mour me poadokedier nan mohngiongitail kan pwoson kehlail rehn Krais, ehu “marain en koapworopwor, oh limpoak en Koht oh aramas koaros.”22
Kapakap wia kisakis ehu sang Koht. Kitail sohte anahne pehm me kitail salongala de kelehpwla. I kadehdehki me ansoun kapakap koaros kak wia ansou sarawi me kitail patehng Samatailo, ni mwaren Sapellimeo, sang ni manaman en Ngehn Sarawio. Ni lengileng sarawi en Sises Krais, ahmen.