Iai te Mwaaka inanon ana Boki Moomon

N Tuun 14, 1989, n tokin mwiin kaburean rongorongon te Ekaretia, ana tautaeka Ghana e a bane ni katoki ana waaki ni kakukurei ana Ekaretia Iesu Kristo ibukiia aika Itiaki ni Boong aika Kaitira inanon aban Aberika. Te tautaeka e rawebwai ana bwai te Ekaretia, ao a bane ni katokaki aia waaki ni kakukurei mitinare. Kaain te Ekaretia, ake a mena n te tai anne ae “te tai ae rang kaangaanga,” a karaoa aia kabanea ni konaa ni maiu ni kaineti ma reirein te euangkerio n akea bootakin te mwaanga ke boutokakiia mitinare. A mwaiti karaki n anainano bwa a kanga kaain te aro ni kateimatoa mwaakan te euangkerio man aia taromauri inanon mweengaia ao n tararuaiia i bon imarenaia n aroia taan reirei n te mweenga ao n te reirei ni kakawari.

N tokina e a reke angan katokan te aki oota raoi, ao n Nobembwa 30, 1990, e a toki te tai ae rang kaangaanga ao e a okira arona te Ekaretia ni manga moana ana waaki ni kakukurei¹ Man te tai anne, iai te reitaki ae nakoraoi imarenan te Ekaretia ao ana tautaeka Ghana.

Kaain te aro ake a maeka rinanon te tai ae rang kaangaanga a waekoa ni karekei kakabwaia ake a roko man te tai ane aki taneiai iai. E kakorakoraaki aia onimaki aika mwaiti rinanon te kakatai are a rinanona. Ma teuana te kakabwaia man te tai ae rang kaangaanga e kaoti n te kawai ae aki taneiai te aba iai.

Nicholas Ofosu-Hene bon te bureitiman n ataei are e mwiokoaki bwa e na tararua ana autinibootaki te LDS n tain te kaangaanga anne. Tabena bwa e na tararuai taian kateitei n te bong. Ngke e moan roko Nicholas n te autinibootaki, e nooria bwa a bane ni bunrae bwaai n aki akaaka, ma beeba, booki, ao bwain te auti a teimangaoia n aki barongaaki raoi. Ribuakon te mangao aei, e a noora ana Boki Moomon. E baka n aki noora te boki ibukina e a kaman kaongoaki bwa e buakaka. Ma e katikaki nanona nako iai. N tokina, e a anaa te boki Nicholas. E namakinna bwa e riai ni moana ana wareware iai. E wareware ni karokoa te bong, ma raninmatana aika waanako iaon tabana ngke e wareware.

N te moan tai ngke e anaia, e wareka ni kabane te 1 Nibwaai. Te kauoua n tai, e wareka ni kabane te ka 2 Nibwaai. Ngke e a roko n te ka 2 Nibwaai mwakoro 25, e wareka ane imwiina: “Ao ti kaakarabakauakina Kristo, ti kimwareirei iroun Kristo, ti tataekina Kristo, ti taetae ni burabeti ibukin Kristo, ao ti koroi kanoan ara taetae ni burabeti bwa antai ake a na kawaria ibukin kamaunan aia bure.”²

N te tai anne e namakina korakoran te Tamnei Nicholas are e a moanna n tang. E ataia bwa ngke e wareware e karekei tabeua wirikiri n te tamnei bwa te boki aei bon te boki ae tabu, te kabanea n eti are e a tia ni warekia n te tai teuana ma teuana. E ataia bwa Aomata aika Itiaki, ni kaitaraa te bwai are e a tia n ongo, e korakora kakoauan Iesu Kristo irouna. Ngke e a toki te tai ae rang kaangaanga a oki mitinare nako Ghana, Nicholas, buna, ao natina a kaaina te Ekaretia. Ngke I nooria n te ririki ae nako, e a riki ngaia bwa te kamwaanta ni bureitiman ao e beku bwa te beretitenti n te mwakoro ae Tamale Ghana ibukin te Ekaretia. E taku: “E bita maiu te Ekaretia. … I karabwa Teuare Moan te Rietaata ibukin kairau nakon te euangkerio.”³

Alibert Davies, temanna tei Ghana, e nako ma temanna raoraona nakon teuana ara autinibootaki ike iai ana boowi raoraona ibukiia beretitentii. Ngke e tataninga raoraona, e wareka te boki Alibert are e kunea ae uaakan. Ngke e toki te boowi, e tangiria Alibert ni uota te boki nakon mweengana. E anganaki te kariaiakaki n aki uota tii te boki arei ma e na uota naba kaobiin ana Boki Moomon. Ngke e roko ni mweengana, e moana warekan ana Boki Moomon. E aki kona ni katikua iaontano. E wareware n te taura te nenea ni karokoa te aoa 3:00 n te karangaina. E karaoa anne ibukin tabeua te tairiki, ni kakukureiaki n te bwai are e warekia ao n namakinna. E a kaaina ngkai te Ekaretia Alibert.

E moana ana kamatebwai iaon te aro Angelo Scarpulla n ana taetae n Itare ngke 10 ana ririki. N te kabane e a riki bwa te ibonga ao ni beku n ana aro ma te kakaonimaki. N te tai anne e a moanna n nanououa n ana onimaki, ao e ukoukora ao n reke ana tai n reitanako ana kamatebwai. Ngkana e mwaiti ana tai ni kamatebwai, e ngae n anne, e a mwaiti riki tabeaiangana. Te bwai are e warekia ao n namakinna e anaaki nanona bwa e a kaman tabangaki kitanan te koaua man reirei aika koaua ake a reiakinaki iroun Iesu ao Abotoro ake ngkoa. Angelo e ukoukora ana aro te Atua ae koaua inanon aro aika mwaiti ma e tiku ma te aki kukurei n ririki aika mwaiti.

N te bong teuana e kaitibo ma uoman kaain te Ekaretia ake a buokiia mitinare ni kakaiia riki aomata ake a na reireinaki. E katikaki nanona nakoiia ao ni kukurei n ongora n aia rongorongo. E butimwaea kaobiin ana Boki Moomon Angelo.

Te tairiki anne e a moana ana wareware n te boki. E namakina te kimwareirei. Rinanon te Tamnei, te Atua e angan Angelo te namakin ae koaua inanona bwa inanon ana Boki Moomon e na bae ni kunea te koaua are e a kaman ukoukoria inanon ririki aika mwaiti. E kanoaaki ma namakin aika kaunganano. Te bwai are e warekia ao are e reiakinna mairouia mitinare e kamatoa ana moti n taeka bwa e a kaman tabangaki kitanan te koaua, ma e reiakinaki naba bwa ana Ekaretia te Atua ae koaua e a kaman kaokaki nakon te aonaaba. Teutana te tai imwiina e a bwabetitoaki Angelo nakon te Ekaretia.⁴ Ngke I moan kaitibo ma ngaia, bon te beretitenti ngaia n te Mwaanga ae Rimini ibukin ara Ekaretia iaon Itare.

Te bwai are a rinanona Nicholas, Alibert, ao Angelo ma ana Boki Moomon bon titebo ma are e rinanona Parley P. Pratt:

“I kauka [te boki] ma te ingainga. … I wareware ni kabongnga; te amwarake bon te karawawata, akea nanou ni kan amwarake; te matu bon te karawawata ngkana e kaoti te bong, bwa I kataua te wareware ni karokoa I matu.

“Ngke I wareware, e mena iaou tamnein te Uea, ao I ataia ao n oota bwa e koaua te boki, n aron ae kamataataki ao ni kaotaki n aron te aomata ae e oota ao n ataia bwa e maiu. Ngkai e bwanin kimwareireiu, n aron are mai imwaaina, ao I kimwareirei n ae tau nakon are e kabooai ibukin karawawataki, anganano, kaangaanga ni kabane ibukin maiu.”⁵

Tabeman aomata iai aia taneiai ae mwaakaroiroi ma ana Boki Moomon te moantai are a kaukia, ma ibukiia tabeman aia kakoaua ibukin koauana e roko n ae mwaiti ngkai a wareware ao n tataroakinna. Anne ae riki nakoiu. I moan wareka ana Boki Moomon ngke ataein te reirei ngai n te tieminari. Aio kaobiin ana Boki Moomon are I warekia. I aki kona n tuangko te tai raoi ke te tabo are e riki iai, ma te tabo are e riki n tain te wareware, I a moanna n namakin bwaai tabeua. Iai te abuue ao te tamnei ake a kaoti ni katoa tai are I kauka iai ana Boki Moomon. E rikirake te namakin ngkai I reitinako ni wareware. Te namakin anne e reitinako nakon te bong aei. Ni katoa tai are I kauka ana Boki Moomon, titebo ma kanga ai aron kamaiuan te iti—te Tamnei e bwaroa nanou ao tamneiu.

Ao ibukiia tabeman, kakoauan ana Boki Moomon e kaoti ni karaurau, imwiin te kamatebwai ae mwaiti ao te tataro. Iai raoraou ae wareka ana Boki Moomon n ukoukoria ni kan ataia ngkana e koaua. E mwakuria te kakao are inanon Moronaai ni butia te Atua ma nanona raoi, ma te nano ae koaua ao onimakinan Kristo, ngkana e koaua ana Boki Moomon.⁶ Ma e aki waekoa ni karekea te kaeka n tamnei are e beritanaki. E ngae n anne, n te bongina, ngke e rang iango mwaaka, ni butina inanon te kawai, e kaotia nakoina te Tamnei bwa e koaua ana Boki Moomon. Ngaia ni kukureina ao n rootakina e a kauka mataroan wintoon te kaa ao n takarua, tiaki nakon temanna n onoti ao riki nakon aonaaba ni kabane, “E bon koaua!”

Ngkana ara kakoaua n ana Boki Moomon e roko te moantai are ti kaukia iai ke inanon te tai ae bati, e na uaana ibukira rinanon maiura ngkana ti reitinako ni warekia ao ni maiuakin ana reirei. E taku Beretitenti Ezra Taft Benson: “Iai mwaakan te boki are e na moanna ni bwaro nako nanon maium n te tai are ko taua ma nanom ni kamatebwaia te boki. Ko na karekea te mwaaka ae korakora n totokoa te kairiiri. Ko na kunea te mwaaka n totokoa te mwamwanaaki. Ko na kunea te mwaaka n tiku iaon te kawai ae eti man irariki.”⁷

I kaungai ngkami ni kabane ni karekean te rongorongo aei, n raonaki ma kaain te Nakoanibonga ae te Aaron akea a ikotaki n te boowi n te tairiki aei, ni kunea mwaakan ana Boki Moomon. N aron are e kaungaira Beretitenti Thomas S. Monson: “Wareka ana Boki Moomon. Iangoi ana reirei. Butia te Tama are i Karawa ngkana e koaua.”⁸ N tain te waaki anne kam na namakina Tamnein te Atua inanon maiumi. Te Tamnei anne e na riki bwa mwakoron am kakoaua bwa ana Boki Moomon e bon koaua, bwa Iotebwa Timiti bon ana burabeti te Atua, ao ana Ekaretia Iesu Kristo ibukiia aika Itiaki ni Boong aika Kaitira bon ana Ekaretia te Atua ae koaua iaon te aba n te bong aei. Te kakoaua anne e na buoki ngkami n totokoa te kariiri.⁹ E na katauraoi ngkami ibukin “te wewete n nanomwaaka … ni mwakuri n ana o ni kurebe te Uea.”¹⁰ E na tei bwa te ati n roo ngkana taian bukibuki ke rongorongo aika kewe a kamanenaaki ni kataakin ami onimaki, ao e riki bwa kamatoaan aami ngkana kam kaewenakoaki ma titiraki ake kam aki kona ni kaekai, tao n te aro ae ngkai naba. Kam na kona ni kinaa te koaua man te kairua, ao kam na namakina ana kakoaua te Tamnei ae Raoiroi ni kamatoai ami koaua n ae okioki ngkai kam reitinako ni wareka ana Boki Moomon rinanon maiumi.

I kaungaia naba kaaro ni kabane ake a ongo ke ni wareka te rongorongo aei ni karaoa ana Boki Moomon bwa te mwakoro ae kakawaki ibukin mweengami. Ngkai a rikirake natira, ti wareka ana Boki Moomon ngkana ti kana ara kaingabong. Aio te boki ae ti kamanena. Iaon baana mai imoa bon ana taeka Beretitenti Monson n ana berita bwa te Atua e na urakin kakabwaia nako aora ngkana ti wareka ana Boki Moomon.¹¹ Mai bukin te boki bon te berita mairoun Beretitenti Marion G. Romney, te kauntira ngkoa n te Moan Beretitentii: “I namakina te koaua bwa ngkana, inanon mweengara, kaaro a na wareware man ana Boki Moomon ma te tataromwaaka ao ni katoa tai, ngaiia ma natiia, tamnein te boki anne e na roko n kaona mweengara ao ni kabane ake a maeka inanona. … Tamnein te kakauntaeka e na bua. Kaaro a na reireiniia natiia inanon te tangira ae korakora ao te wanawana. Ataei a na mwanei riki taeka ao ni kai ongo nakon aia reirei aia karo. E na rikirake te tamaroa. Te onimaki, kantaninga ao te tangira ae kororaoi—ana tangira Kristo ae itiaki—a na iai inanon mweengara ao ni maiura, ni uota te rau, te kimwareirei, ao te kukurei mai iai.”¹²

Ngkai, ririki aika mwaiti imwiin kitanan te mweenga irouia natira ao ni katei oin aia utu, ti kona n nooria ma te Itiaki kakoroan nanon ana berita Beretitenti Romney. Ara utu e raroa nako ma te kororaoi, ma ti kona n kakoaua mwaakan ana Boki Moomon ao kakabwaia are a roko man warekana ao n reitinako ni uotia nako nanon maiuia ara utu ae bwanin.

Korakoran mwaakan ana Boki Moomon iai mwiina are e uotiira ni kaniira nakon Iesu Kristo. Bon te kakoaua ae onoti Ibukina ao Ana mwakuri ni kabooa maiura.¹³ Rinanon aei ti a mataata ni mimitongin ao mwaakan Ana Mwakuri ni Kamaiu.¹⁴ E reireia Ana tua n ae mataata.¹⁵ Ao ibukin kamimiin mwakoro ake a kabwarabwara rokon Kristo are e a tia n uti nakoia Nibwaite, ti noora ao n namakina ana tangira, kakabwaia, ao n reireiniia aomata akanne ao ni kamataataki bwa E na karaoa ae ti te arona ibukira ngkana ti Nakoina man maiuakinan Ana euangkerio.¹⁶

Taari, I kakoaua mwaakan ana Boki Moomon. Ngkana ti warekia n te taetae n Imatang, n Itare, ni Buranti, n ae boreetiaki ke are iaon te iti, I kunea naba te tamnei ae kamiimi are e raanganako man mwakorona ao kibuna inanon maiu. I kakoaua ana konabwai ni kaniira nakon Kristo. I tataro bwa ngaira ni kabane ti na karekei rakara man te mwaaka are inanon te boki ae tabu ae kamiimi aei. N aran Iesu Kristo, amen.