May Gahum nga Ara sa Libro

Sang June 14, 1989, tungod sang mga binutig parte sa Simbahan, ang gobyerno sang Ghana nagdumili sa tanan nga aktibidades sang Simbahan sa sulod sinang pungsod sa Africa. Ginkonpiskar sang gobyerno ang tanan nga propriedad sang Simbahan, kag ang tanan nga buluhaton misyonero nag-untat. Ang mga miyembro sang Simbahan, nga nagtawag sining panahon bilang “the freeze,” nagtinguha sing labing maayo sa pagtuman sang ebanghelyo nga wala sang mga miting ukon suporta sang mga misyonero. Madamo sang inspiradong mga istorya kon paano ang mga miyembro nagpabilin sa kasanag sang ebanghelyo nga nagasiga paagi sa pagsimba sa ila mga puluy-an kag pagbinuligay bilang mga home teacher kag mga visiting teacher.

Sang ulihi ang di-paghangpanay naresolbar, kag sang November 30, 1990, ang “freeze” natapos kag ang kinaandan nga aktibidades sang Simbahan nagbalik.¹ Sugod sadto labing maayo ang nangin relasyon sa tunga sang Simbahan kag sang gobyerno sang Ghana.

Ang mga miyembro nga nag-agi sa freeze maabtik magtudlo sang mga bugay nga nag-abot sa sinang di-kinaandan nga panahon. Ang pagtuo sang madamo ginpabakod paagi sa kabudlady nga ila gin-atubang. Apang isa ka bugay sang freeze ang nag-abot sa di-kinaandan nga paagi.

Si Nicholas Ofosu-Hene isa ka opisyal sang pulis nga ginpabantay sang LDS meetinghouse sa panahon sang freeze. Katungdanan niya ang magbantay sang bilding sa gab-i. Sang una niya nga abot sa meetinghouse, madamo nga butang ang naglinapta, mga papel, mga libro, kag mga kasangkapan. Sa mga ini nakit-an niya ang Libro ni Mormon. Gintinguha niya nga indi pagsapakon ang libro kay ginhambalan sia nga ini malain. Apang makatilingala nga nagbuyok ini sa iya. Sang ulihi, indi na sia makapugong. Gindampot niya ini. Nabatyagan niya nga dapat basahon niya ini. Ginbasa niya sa bilog nga gab-i, nagahibi sia samtang nagbasa.

Sang una niya nga gindampot ini, nabasa niya ang bilog nga 1 Nephi. Sa ikaduha nga tion, nabasa niya ang bilog nga 2 Nephi. Sang ara na sia sa 2 Nephi chapter 25, nabasa niya ang mga masunod: “Kag nagahambal kami parte kay Cristo, nagakalipay kami parte kay Cristo, nagawali kami parte kay Cristo, nagapanagna kami parte kay Cristo, kag nagasulat kami suno sa amon mga panagna, nga ang amon mga anak makabalo kon sa diin sila maglantaw para sa kapatawaran sang ila mga sala.”²

Sadto nga tion, nabatyagan sang mabaskog ni Nicholas ang Espiritu kag nagsugod sia sa pagngoyngoy. Nabal-an niya nga sa pagbasa sining libro nakabaton sia sang pila ka mga pagpabatyag nga ining libro isa ka kasulatan, pinakahusto sa mga nabasa niya. Nabal-an niya nga ang mga Ulihing Santos, batok sa iya nabatian, mabaskog nga nagapati kay JesuCristo. Pagkatapos sang freeze kag ang mga misyonero nagbalik sa Ghana, si Nicholas, kag ang iya asawa, kag mga anak niya nagbuylog sa Simbahan. Sang nakit-an ko sia sa nagligad nga tuig, sia isa ka kumander sang mga pulis kag nag-alagad nga presidente sang Tamale Ghana District sang Simbahan. Siling niya: “Ang Simbahan nagpabag-o sang akon kabuhi. … Nagapasalamat ako sa Makagagahum nga Dios nga gintuytoyan Niya ako padulong sa sining ebanghelyo.”³

Si Alibert Davies, isa pa ka Ghanaian, nag-upod sa abyan padulong sa isa naton ka meetinghouse, kon diin ang abyan may presidency meeting. Samtang nagahulat, nagbasa si Alibert sang isa ka libro nga iya nasapwan. Sang natapos ang miting, luyag ni Alibert nga dalhon ang libro. Ginhatag sa iya ang libro, kag ginhatagan man sia sang isa ka Libro ni Mormon. Sang nakapauli na, nagsugod sia sa pagbasa sang Libro ni Mormon. Indi niya mauntatan ini. Nagbasa sia sa kasanag sang kandila tubtob alas tres sang aga. Ginhimo niya ini sa pila ka gab-i, natandog gid sia parte sa iya nabasa kag nabatyagan. Si Alibert karon isa na ka miyembro sang Simbahan.

Si Angelo Scarpulla nagsugod sa iya pagtuon agud mangin pari sa Italy sa edad nga pulo. Nangin pari sia kag nag-alagad nga may debosyon sa iya simbahan. May tion sa iya kabuhi nga ang iya pagtuo nagduda, kag gindugangan pa gid niya ang iya pagtuon. Apang sa dugang nga pagtuon, dugang pa gid nga sia nagduda. Ang nabasa kag nabatyagan niya nagkumbinsi sa iya nga may kabilogan nga apostasya halin sa doktrina nga gintudlo ni Jesus kag sang mga unang Apostoles. Si Angelo nagpangita sang matuod nga relihiyon sang Dios sa nanarisari nga mga pagtuo apang wala sia nagmadinalag-on sa madamo nga tuig.

Isa ka adlaw nasugata niya ang duha ka miyembro sang Simbahan nga nagabulig sa mga misyonero nga makasapo sang mas madamo nga tudloan. Nabuyok sia sa ila kag nagpamati sing malipayon sa ila mensahi. Ginbaton ni Angelo sing maluyagon ang Libro ni Mormon.

Sinang gab-i nagsugod sia sa pagbasa. Lubos gid sia nga nalipay. Paagi sa Espiritu, ang Dios nagpasalig kay Angelo nga sa Libro ni Mormon makit-an niya ang kamatuoran nga ginapangita niya sa madamo na nga tuig. Maayo nga mga balatyagon ang nag-abot sa iya. Ang iya nabasa kag ang natun-an niya sa mga misyonero nagkumpirma sa iya nga may kabilogan nga apostasya, apang nabal-an man niya nga ang matuod nga Simbahan sang Dios ginpanumbalik sa duta. Wala madugay, si Angelo ginbunyagan pasulod sa Simbahan.⁴ Sang una ko sia nga nakit-an, sia ang presidente sang Rimini Branch sang aton Simbahan sa Italy.

Ang mga inagihan nanday Nicholas, Alibert, kag Angelo parte sa Libro ni Mormon nagapadumdom sa aton sang inagihan ni Parley P. Pratt:

“Ginbuksan ko [ang libro] nga may kakunyag. … bilog nga adlaw ako nagbasa; wala ako sing luyag, kag gana nga magkaon; wala ako gintuyo sang … ang gab-i nag-abot, kay mas luyag ko ang magbasa sangsa magtulog.

“Samtang nagabasa ako, ang espiritu sang Ginuo ara sa akon, kag nabal-an kag nahangpan ko nga ang libro matuod, subong kaathag nga nabal-an kag nahangpan sang tawo nga siya buhi. Ang kalipay ko karon puno, subong sadto, kag nagkalipay ako sing kapin sangsa bayad sa tanan ko nga mga kalisud, sakripisyo kag pangabudlay sa akon kabuhi.”⁵

Ang pila ka tawo may ara sang gamhanan nga inagihan parte sa Libro ni Mormon sang una nga ginbuksan nila ini, apang sa iban ang saksi sang pagkamatuod nag-abot sing mas inanay samtang sila nagbasa kag nagpangamuyo parte sini. Ina ang natabo sa akon. Una ko nga ginbasa ang Libro ni Mormon bilang isa ka tinedyer nga estudyante sa seminary. Ini ang kopya sang Libro ni Mormon nga akon ginbasa. Indi ko mahambal ang husto nga tion ukon lugar nga ini natabo, apang sa isa ka bahin sinang pagbasa, may nabatyagan ako. May kainit kag espiritu nga nag-abot sa kada pagbasa ko. Naglambo ang pagpabatyag samtang nagpadayon ako sa pagbasa. Ina nga pagpabatyag nagapadayon tubtob karon nga adlaw. Sa kada pagbasa ko sa Libro ni Mormon, kasubong ini sang pagpasiga sang suga—ang Espiritu nagailig padulong sa akon tagipusuon kag kalag.

Sa iban pa, ang pagpamatuod sang Libro ni Mormon inanay nga nagaabot, pagkatapos sang tuman nga pagtuon kag pangamuyo. May abyan ako nga nagbasa sang Libro ni Mormon nagapangusisa kon bala ini matuod. Gingamit niya ang pagdapit ni Moroni nga magpamangkot sa Dios nga may sinsero nga tagipusuon, tunay nga tinutuyo kag pagtuo kay Cristo, kon ang libro matuod.⁶ Apang wala sia sa gilayon makabaton sa ginpromisa nga sabat paagi sa Espiritu. Apang, isa ka adlaw samtang madalum ang iya isip, nagamaneho sa karsada, ang Espiritu nagpamatuod sa iya parte sa kamatuoran sang Libro ni Mormon. Tuman gid sia ka malipayon nga ginbuksan niya ang bintana sang kotse kag nagsinggit, wala sing iban nga tawo apang sa bilog kalibutan, “Matuod ini!”

Bisan ang pagpamatuod naton parte sa Libro ni Mormon nag-abot sa unang pagbasa naton ukon sa kalaba sang panahon, ini magaimpluwensya sa aton kon kita magpadayon sa pagbasa sini kag sa pagtuman sang mga panudlo sini. Si Presidente Ezra Taft Benson nagtudlo: “May ara gahum sa libro nga magasugod sa pagsulod sa inyo mga kabuhi sa higayon nga kamo magtuon sing seryoso parte sa libro. Masapwan ninyo ang mas dakong gahum sa pagpamatok sa pagsulay. Masapwan ninyo ang gahum nga likawan ang pagtiplang. Masapwan ninyo ang gahum nga magpabilin sa alagyan nga makitid kag masipot.”⁷

Ginapadasig ko ang tanan nga makabati sini, kalakip ang mga nagaangkon sang Aaronic Priesthood nga nagtililipon sining gab-i, nga tukibon ang gahum sang Libro ni Mormon. Subong sa pagpadasig sa aton ni Presidente Thomas S. Monson: “Basaha ang Libro ni Mormon. Binagbinaga ang mga panudlo sini. Pamangkota ang Langitnon nga Amay kon matuod ini.”⁸ Sa paghimo sina mabatyagan ninyo ang Espiritu sang Dios sa inyo mga kabuhi. Ina nga Espiritu mangin bahin sang inyo pagpamatuod nga ang Libro ni Mormon matuod, nga si Joseph Smith propeta sang Dios, kag Ang Simbahan ni JesuCristo sang Mga Santos sa Ulihing Mga Adlaw amo ang matuod sang Simbahan sang Dios sa duta karon nga adlaw. Ina nga pagpamatuod magabulig sa inyo nga magpamatok sa pagsulay.⁹ Magahanda ini sa inyo para “sa dakong tawag sang pagkamaukod … nga magtrabaho sa mga ulubasan sang Ginuo.”¹⁰ Ini mangin pat-ud nga giya sa tion kon ang mga pag-akusar ukon malain nga mga hambal gamiton agud tilawan ang inyo pagtuo, kag ini mangin batong sadsaran kon kamo tilawan sang mga pamangkot nga indi ninyo gilayon masabat. Makilal-an ninyo ang kamatuoran sangsa sayup, kag mabatyagan ninyo ang pagpasalig sang Balaan nga Espiritu nga nagakumpirma liwat sang inyo pagpamatuod paliwatliwat samtang nagapadayon kamo sa pagbasa sang Libro ni Mormon sa bug-os ninyo nga mga kabuhi.

Ginapadasig ko man ang mga ginikanan nga nakabalo sining mensahi nga himuon ang Libro ni Mormon nga importanteng bahin sang inyo pamilya. Samtang nagadalagko ang amon mga anak, nagbasa kami sang Libro ni Mormon samtang nagapamahaw. Ini ang bookmark nga amon gingamit. Sa atubang amo ang kutlo ni Presidente Benson, nagapromisa nga ang Dios magabubo sang bugay sa aton samtang ginabasa naton ang libro.¹¹ Sa likod sini amo ang promisa ni Presidente Marion G. Romney, nagligad nga manuglaygay sa Unang Pangulohan: “Pat-ud ako nga kon, sa mga puluy-an naton, ang mga ginikanan magbasa halin sa Libro ni Mormon nga may pangamuyo kag dalayon, angay nga sila lamang kag upod ang ila mga anak, ang espiritu sinang dakong libro magapuno sa aton mga puluy-an kag sa tanan nga nagaistar dira. … Ang espiritu sang pag-ilinaway madula. Ang mga ginikanan magalaygay sa ila mga anak sa mas dakong gugma kag kaalam. Ang mga anak mangin mas masunuron kag magapamati sa laygay sang ila mga ginikanan. Ang pagkamatarong magadugang. Pagtuo, paglaum, kag putli nga gugma ni Cristo mangin bugana sa aton mga puluy-an kag mga kabuhi, nga magabunga sang paghidaet, kasadya, kag kalipayan.”¹²

Karon, madamo na nga tuig pagkatapos nga ang amon mga anak naglalakat kag may ara sang ila mga pamilya, makit-an namon sing maathag ang katumanan sang promisa ni Presidente Romney. Indi perpekto ang amon pamilya, apang makasaksi kami parte sa gahum sang Libro ni Mormon kag sa mga bugay halin sa pagbasa sini nga gindala kag padayon nga ginadala sa amon mga kabuhi kag sa bug-os nga pamilya.

Ang pinakadakong gahum sang Libro ni Mormon amo ang impluwensya sini nga magdala sa aton nga mas malapit kay JesuCristo. Mabaskog nga saksi ini parte sa Iya kag sa nagatubos Niya nga misyon.¹³ Paagi sini nahangpan naton ang pagkahalangdon kag gahum sang Iya Pagpasag-uli.¹⁴ Ini nagatudlo sang Iya doktrina nga maathag.¹⁵ Kag bangud sang matahum nga mga kapitulo nga nagalaragway sang pagbisita sang nabanhaw nga Cristo sa mga Nephites, makit-an kag mabatyagan naton nga Siya nagapalangga, nagabugay, kag nagatudlo sa yadtong katawhan kag makahangop kita nga Siya makahimo sang amo man sa aton kon magkari kita sa Iya paagi sa pagtuman sang Iya ebanghelyo.¹⁶

Mga kautoran, nagasaksi ako sa gahum sang Libro ni Mormon. Bisan sa ano nga linggwahe ukon porma nakon basahon, masapwan ko ang amo gihapon nga matahum nga espiritu halin sa mga kapitulo kag mga bersikulo sini nga nagasulod sa akon kabuhi. Nagasaksi ako sa abilidad sini nga magdala sa aton nga mas malapit kay Cristo. Ginapangamuyo ko nga kita tanan lubos nga maggamit sining matahum nga libro sang kasulatan. Sa ngalan ni JesuCristo, amen.