មានអំណាចនៅក្នុងព្រះគម្ពីរនេះ
អំណាចដ៏មហិមានៃព្រះគម្ពីរមរមន គឺជាឥទ្ធិពលរបស់វានៅក្នុងការនាំយើងខិតទៅកាន់តែជិតព្រះយេស៊ូវគ្រីស្ទ ។
នៅ ថ្ងៃទី ១៤ ខែ មិថុនា ឆ្នាំ ១៩៨៩ ដោយសារព័ត៌មានមិនពិតខ្លះៗអំពីសាសនាចក្រ រដ្ឋាភិបាលប្រទេសហ្គាណា បានបិទទ្វារសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយក្នុងប្រទេសអាហ្វ្រិក ។ រដ្ឋាភិបាលបានដកហូតទ្រព្យសម្បត្តិសាសនាចក្រ ហើយអ្នកផ្សព្វផ្សាយសាសនាទាំងអស់ត្រូវបានបញ្ឈប់ ។ សមាជិកសាសនាចក្រដែលបានចាត់ទុកអំឡុងពេលនោះថាជា « ការជាប់គាំង » បានប្រឹងប្រែងអស់ពីសមត្ថភាពដើម្បីរស់នៅតាមដំណឹងល្អ ដោយគ្មានការប្រជុំក្នុងសាខា ឬ ជំនួយអ្នកផ្សព្វផ្សាយសាសនាឡើយ ។ មានរឿងបំផុសគំនិតជាច្រើនអំពីរបៀបដែលសមាជិកបានរក្សាពន្លឺនៃដំណឹងល្អឲ្យនៅភ្លឺ តាមរយៈការថ្វាយបង្គំក្នុងផ្ទះ និង ការមើលថែគ្នាទៅវិញទៅមកក្នុងនាមជាគ្រូបង្រៀនតាមផ្ទះ និង គ្រូបង្រៀនសួរសុខទុក្ខ ។
ទីបំផុត ការយល់ច្រឡំត្រូវបានដោះស្រាយ ហើយនៅ ថ្ងៃទី 30 ខែ វិច្ឆិកា ឆ្នាំ ១៩៩០ ការជាប់គាំងត្រូវបានបញ្ចប់ ហើយសាសនាចក្របានបើកទ្វារវិញ ។១ ចាប់ពីពេលនោះមក សាសនាចក្រមានទំនាក់ទំនងយ៉ាងស្អិតរមួតជាមួយរដ្ឋាភិបាលប្រទេសហ្គាណា ។
សមាជិកជាច្រើនដែលបានរស់នៅក្នុងពេលជាប់គាំង បានលើកឡើងពីពរជ័យដែលកើតមានក្នុងគ្រាមិនធម្មតានេះ ។ សេចក្ដីជំនឿនៃសមាជិកជាច្រើនបានរឹងមាំ តាមរយៈទុក្ខលំបាកដែលពួកគេជួប ។ ប៉ុន្តែពរជ័យមួយនៃការជាប់គាំងនេះបានកើតឡើងយ៉ាងអស្ចារ្យ ។
នីកូឡាស អូហ្វូស៊ូ ហ៊ែន គឺជានគរបាលដែលត្រូវបានចាត់ឲ្យយាមសាលាប្រជុំ អិល.ឌី.អេស មួយកន្លែងក្នុងពេលជាប់គាំងនេះ ។ គាត់មានតួនាទីយាមអគារនោះនៅពេលយប់ ។ ពេល នីកូឡាស មកដល់អគារនោះលើកដំបូង គាត់បានឃើញរបស់របរដូចជាក្រដាស សៀវភៅ និង គ្រឿងសង្ហារិមនៅរប៉ាត់រប៉ាយ ។ គាត់ប្រទះឃើញព្រះគម្ពីរមរមនមួយក្បាល នៅក្នុងគំនររបស់របរទាំងនោះ ។ ដោយសារគាត់ធ្លាប់ឮថាព្រះគម្ពីរនោះគឺជាសៀវភៅមិនល្អ នោះគាត់បានព្យាយាមមិនយកចិត្តទុកដាក់លើវាទេ ។ ប៉ុន្តែវាបានទាក់ទាញអារម្មណ៍គាត់យ៉ាងចម្លែក ។ ទីបំផុត នីកូឡាស មិនអាចមិនយកចិត្តទុកដាក់លើវាទេ ។ គាត់បានរើសវាឡើងមក ។ ហើយគាត់មានអារម្មណ៍ជម្រុញចិត្តឲ្យអានព្រះគម្ពីរនោះ ។ គាត់បានអានពេញមួយយប់ ទាំងស្រក់ទឹកភ្នែកផង ។
កាលគាត់រើសវាមកលើកដំបូង គាត់បានអានចប់គម្ពីរនីហ្វៃទី១ ។ លើកទីពីរ គាត់បានអានចប់គម្ពីរនីហ្វៃទី២ ។ កាលគាត់បានអានដល់នីហ្វៃទី២ ជំពូកទី ២៥ ដែលចែងដូចនេះ ៖ « ហើយយើងនិយាយអំពីព្រះគ្រីស្ទ យើងអររីករាយក្នុងព្រះគ្រីស្ទ យើងផ្សាយអំពីព្រះគ្រីស្ទ យើងព្យាករអំពីព្រះគ្រីស្ទ ហើយយើងសរសេរ ស្របតាមពាក្យព្យាករណ៍ទាំងឡាយរបស់យើង ដើម្បីឲ្យកូនចៅយើងអាចដឹងថា តើត្រូវស្វែងរកប្រភពណាមួយ ដើម្បីឲ្យបានផ្ដាច់បាបរបស់ពួកគេ » ។២
នៅត្រង់ចំណុចនេះ នីកូឡាស មានអារម្មណ៍ពីព្រះវិញ្ញាណយ៉ាងខ្លាំងដែលបានធ្វើឲ្យគាត់ទ្រហោយំ ។ គាត់បានទទួលស្គាល់ថា ពេលគាត់អាន គាត់ទទួលបានការបំផុសគំនិតខាងវិញ្ញាណពីរបីដងថា សៀវភៅនេះគឺជាព្រះគម្ពីរ ដែលត្រឹមត្រូវបំផុត ។ គាត់បានទទួលស្គាល់ថា ពួកបរិសុទ្ធថ្ងៃចុងក្រោយជឿយ៉ាងខ្លាំងទៅលើ ព្រះយេស៊ូវគ្រីស្ទ ដែលការណ៍នោះខុសពីអ្វីដែលគាត់ធ្លាប់ឮពីមុនមក ។ បន្ទាប់ពីការជាប់គាំងបានបញ្ចប់ទៅ ហើយអ្នកផ្សព្វផ្សាយសាសនាបានត្រឡប់មកកាន់ប្រទេសហ្គាណាវិញ នីកូឡាស និង ភរិយាគាត់ ព្រមទាំងកូនៗរបស់គាត់បានចូលរួមក្នុងសាសនាចក្រ ។ កាលខ្ញុំបានជួបគាត់នៅឆ្នាំមុន គាត់គឺជាមេបញ្ជាការនគរបាល ហើយកំពុងបម្រើជាប្រធានមណ្ឌលតាម៉ាលី ហ្គាណា ។ គាត់បានពោលថា ៖ « សាសនាចក្របានកែប្រែជីវិតរបស់ខ្ញុំ ។ … ខ្ញុំមានអំណុរគុណចំពោះព្រះដ៏មានមហិទ្ធិឫទ្ធិដែលបាននាំខ្ញុំឲ្យស្គាល់ដំណឹងល្អនេះ » ។៣
អាលីប៊ើត ដេវីស គឺជាជនជាតិហ្គាណាមួយរូបទៀតដែលបានទៅសាលាប្រជុំជាមួយមិត្តគាត់ ជាទីដែលមិត្តនោះមានការប្រជុំគណៈប្រធាន ។ កាលគាត់កំពុងរង់ចាំមិត្តគាត់ អាលីប៊ើត បានអានសៀវភៅមួយក្បាលដែលទុកនៅក្បែរគាត់ ។ ពេលការប្រជុំបានបញ្ចប់ អាលីប៊ើត បានចង់យកសៀវភៅនោះទៅផ្ទះ ។ គាត់មិនត្រឹមតែត្រូវបានអនុញ្ញាតឲ្យយកសៀវភៅទៅប៉ុណ្ណោះទេ ថែមទាំងទទួលបានព្រះគម្ពីរមរមនមួយក្បាលផងដែរ ។ កាលគាត់ទៅដល់ផ្ទះ គាត់បានចាប់ផ្ដើមអានព្រះគម្ពីរមរមន ។ គាត់មិនចង់ឈប់អានទាល់តែសោះ ។ គាត់អានក្រោមពន្លឺភ្លើងទៀនរហូតដល់ម៉ោង ៣:០០ព្រឹក ។ គាត់បានធ្វើដូចនោះអស់រយៈពេលពីរបីយប់ ដោយមានចិត្តរំភើបដ៏លើសលុបពីអ្វីដែលគាត់បានអាន និង អ្វីដែលគាត់បានទទួលអារម្មណ៍ ។ សព្វថ្ងៃនេះ អាលីប៊ើត គឺជាសមាជិកសាសនាចក្រ ។
អាន់ជែឡូ ស្កាពូឡា បានចាប់ផ្ដើមសិក្សាអំពីសាសនានៅអ៊ីតាលីជាមាតុប្រទេសរបស់គាត់កាលអាយុ ១០ឆ្នាំ ។ ទីបំផុត គាត់បានក្លាយជាសង្ឃ ហើយបានបម្រើក្នុងព្រះវិហាររបស់គាត់ដោយការលះបង់ ។ ពេលខ្លះ គាត់សង្ស័យលើសេចក្ដីជំនឿរបស់គាត់ ហើយគាត់បានស្វែងរក ហើយទទួលបានឱកាសសិក្សាបន្ថែម ។ ប៉ុន្តែដរាបណាគាត់សិក្សាកាន់តែច្រើន ដរាបនោះគាត់មានកង្វល់កាន់តែខ្លាំង ។ អ្វីដែលគាត់បានអាន និងអារម្មណ៍ដែលគាត់ទទួលបាននោះ បានធ្វើឲ្យគាត់ជឿថា មានការក្បត់សាសនាទូទៅមួយចេញពីគោលលទ្ធិដែលបានបង្រៀនដោយព្រះយេស៊ូវ និង ដោយពួកសាវកពីបូរាណ ។ អាន់ជែឡូ បានស្វែងរកសាសនាដ៏ពិតរបស់ព្រះក្នុងជំនឿជាច្រើន ប៉ុន្តែរកមិនឃើញសោះអស់ពេលច្រើនឆ្នាំ ។
ថ្ងៃមួយគាត់បានជួបនឹងសមាជិកសាសនាចក្រពីរនាក់ ដែលកំពុងជួយអ្នកផ្សព្វផ្សាយសាសនាស្វែងរកមនុស្សដើម្បីបង្រៀន ។ គាត់បានចាប់អារម្មណ៍លើពួកគេ ហើយបានស្ដាប់សារលិខិតរបស់ពួកគេដោយអំណរ ។ អាន់ជែឡូ បានទទួលព្រះគម្ពីរមរមនដោយរីករាយ ។
គាត់បានចាប់ផ្ដើមអានព្រះគម្ពីរនៅល្ងាចនោះ ។ គាត់មានអារម្មណ៍ពេញដោយអំណរ ។ ព្រះបានប្រទានអារម្មណ៍អះអាងដល់ អាន់ជែឡូ ថា នៅក្នុងព្រះគម្ពីរមរមន គាត់នឹងរកឃើញសេចក្ដីពិតដែលគាត់បានស្វែងរកអស់ជាច្រើនឆ្នាំមកហើយនោះ ។ គាត់ទទួលបានអារម្មណ៍ដ៏ផ្អែមល្ហែម ។ អ្វីដែលគាត់បានអាន និង អ្វីដែលគាត់បានរៀនពីអ្នកផ្សព្វផ្សាយសាសនា បានបញ្ជាក់ដល់ការសន្និដ្ឋានរបស់គាត់ថាពិតជាមានការក្បត់សាសនាទូទៅមែន ប៉ុន្តែគាត់ក៏រៀនដែរថា សាសនាចក្រដ៏ពិតរបស់ព្រះត្រូវបានស្ដារឡើងវិញលើផែនដីដែរ ។ មិនយូរប៉ុន្មាន អាន់ជែឡូ បានទទួលបុណ្យុជ្រមុជទឹក ។៤ កាលខ្ញុំបានជួបគាត់ គាត់គឺជាប្រធានសាខារីមីនីរបស់សាសនាចក្រនៅប្រទេស អ៊ីតាលី ។
អ្វីដែល នីកូឡាស អាលីប៊ើត និង អាន់ជែឡូ បានមានបទពិសោធន៍ជាមួយព្រះគម្ពីរមរមន គឺស្រដៀងនឹងបទពិសោធន៍របស់ ប៉ាលី ភី ប្រាត្ត ដូចនេះ ៖
« ខ្ញុំបានបើកព្រះគម្ពីរនោះដោយចិត្តរំភើប ។ … ខ្ញុំបានអានពេញមួយថ្ងៃ ទោះដល់ពេលទទួលទានអាហារ ក៏ខ្ញុំគ្មានបំណងទទួលទានដែរ ... ទោះពេលយប់មកដល់ ក៏ខ្ញុំចង់អានជាងការដេកទៅទៀត ។
« ពេលខ្ញុំអាន ព្រះវិញ្ញាណនៃព្រះអម្ចាស់សណ្ឋិតលើខ្ញុំ ហើយខ្ញុំដឹង ថែមទាំងយល់ថា ព្រះគម្ពីរនេះពិត ច្បាស់ និង ជាក់ស្ដែងដូចមនុស្សម្នាក់យល់ ហើយដឹងថាគាត់មានជីវិតដូច្នោះដែរ ។ ឥឡូវខ្ញុំពេញដោយអំណរដូចកាលពីមុនដែរ ហើយខ្ញុំរីករាយល្មមនឹងបំភ្លេចរាល់ទុក្ខព្រួយ ការបូជា និង ការលំបាកក្នុងជីវិតខ្ញុំ » ។៥
មនុស្សខ្លះមានបទពិសោធន៍អស្ចារ្យជាមួយព្រះគម្ពីរមរមននៅលើកដំបូងដែលពួកគេបើកវាអាន ប៉ុន្តែមនុស្សខ្លះទៀត សាក្សីនៃភាពពោរពេញនៃសេចក្ដីពិតកើតមានបន្តិចម្ដងៗនៅពេលពួកគេអាន ហើយអធិស្ឋានអំពីវា ។ វាកើតឡើងចំពោះខ្ញុំដូចនោះដែរ ។ ខ្ញុំបានអានព្រះគម្ពីរមរមនលើកដំបូងជាសិស្សជំទង់ក្នុងថ្នាក់សិក្ខាសាលា ។ នេះគឺជាព្រះគម្ពីរមរមនដែលខ្ញុំបានអានជាលើកដំបូងនោះ ។ ខ្ញុំភ្លេចពីពេលវេលា និង ទីកន្លែងដែលវាបានកើតឡើង ប៉ុន្តែពេលខ្ញុំអានវា ខ្ញុំបានទទួលអារម្មណ៍មួយ ។ រាល់ដងដែលខ្ញុំចាប់បើកព្រះគម្ពីរ នោះខ្ញុំតែងមានភាពកក់ក្ដៅ និង ព្រះវិញ្ញាណជានិច្ច ។ កាលខ្ញុំបន្តអាន អារម្មណ៍នោះមានកាន់តែខ្លាំងឡើង ។ អារម្មណ៍នោះបន្តមានដល់សព្វថ្ងៃនេះ ។ រាល់ដងដែលខ្ញុំបើកព្រះគម្ពីរមរមន វាប្រៀបដូចជាការបើកកុងតាក់ភ្លើងដែរ—ហើយព្រះវិញ្ញាណបានយាងចូលមកក្នុងចិត្ត និងព្រលឹងខ្ញុំ ។
ចំពោះមនុស្សដទៃទៀត ទីបន្ទាល់អំពីព្រះគម្ពីរមរមនកើតមានយឺតៗ បន្ទាប់ពីបានសិក្សា ហើយអធិស្ឋានយ៉ាងច្រើន ។ ខ្ញុំមានមិត្តម្នាក់ដែលបានអានព្រះគម្ពីរមរមន ដោយព្យាយាមដឹងថាតើវាពិតឬទេ ។ គាត់បានអនុវត្តតាមការអញ្ជើញរបស់មរ៉ូណៃដើម្បីទូលសួរព្រះដោយចិត្តស្មោះ និង ចេតនាពិត និង សេចក្ដីជំនឿលើព្រះគ្រីស្ទ ថាតើព្រះគម្ពីរមរមនពិតឬទេ ។៦ ប៉ុន្តែគាត់ពុំមានទទួលចម្លើយខាងវិញ្ញាណដែលបានសន្យានោះ ភ្លាមៗទេ ។ ប៉ុន្តែថ្ងៃមួយ គាត់បានពិចារណាច្រើន នៅពេលកំពុងបើករថយន្ត ព្រះវិញ្ញាណបានថ្លែងទីបន្ទាល់ប្រាប់គាត់អំពីសេចក្ដីពិតនៃព្រះគម្ពីរមរមន ។ ដោយសប្បាយ និង រំភើបពេក គាត់បានបើកបង្អួចរថយន្ត ហើយបានស្រែកប្រាប់មនុស្សគ្រប់គ្នា និងដល់ពិភពលោកថា « វាពិត ! » ។
ទោះជាទីបន្ទាល់យើងអំពីព្រះគម្ពីរមរមនកើតមាននៅពេលយើងបើកវាលើកដំបូង ឬត្រូវការពេលច្រើនក្ដី ក៏វានឹងមានឥទ្ធិពលពេញមួយជីវិតយើងដែរ បើយើងបន្តអាន ហើយអនុវត្តតាមការបង្រៀនរបស់វានោះ ។ ប្រធាន អ៊ែសរ៉ា ថាហ្វ ប៊ែនសឹន បង្រៀនដូចនេះ ៖ « មានអំណាចមួយនៅក្នុងព្រះគម្ពីរនេះ ដែលនឹងចាប់ផ្ដើមហូរចូលទៅក្នុងជីវិតរបស់អ្នកក្នុងវិនាទី ដែលអ្នកចាប់ផ្ដើមសិក្សាដោយប្រាកដប្រជាអំពីព្រះគម្ពីរនេះ ។ អ្នកនឹងរកឃើញអំណាចកាន់តែមហិមា ដើម្បីទប់ទល់នឹងការល្បួង ។ អ្នកនឹងរកឃើញអំណាច ដើម្បីចៀសផុតពីការបញ្ឆោត ។ អ្នកនឹងរកឃើញអំណាចដើម្បីបន្តនៅលើផ្លូវតូច និង ចង្អៀត » ។៧
ខ្ញុំលើកទឹកចិត្តមនុស្សគ្រប់គ្នាដែលស្ដាប់សារលិខិតនេះ រួមទាំងអ្នកកាន់បព្វជិតភាពដែលប្រជុំគ្នានាល្ងាចនេះ ឲ្យស្វែងរកអំណាចនៃព្រះគម្ពីរមរមន ។ ប្រធាន ថូម៉ាស អេស ម៉នសុនបានលើកទឹកចិត្តថា « សូមអានព្រះគម្ពីរមរមន ។ សូមពិចារណាលើការបង្រៀនរបស់វា ។ សូមទូលសួរព្រះវរបិតាសួគ៌ថាតើវាពិតឬទេ » ។៨ ពេលបងប្អូនធ្វើដូចនោះ អ្នកនឹងទទួលអារម្មណ៍ពីព្រះវិញ្ញាណក្នុងជីវិតបងប្អូន ។ ព្រះវិញ្ញាណនោះនឹងជាផ្នែកមួយនៃទីបន្ទាល់បងប្អូនថា ព្រះគម្ពីរមរមនពិត ថាយ៉ូសែប ស្ម៊ីធ គឺជាព្យាការីរបស់ព្រះ ហើយថា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាសាសនាចក្រដ៏ពិតរបស់ព្រះលើផែនដីសព្វថ្ងៃនេះ ។ ទីបន្ទាល់នោះនឹងជួយអ្នកចៀសផុតពីការល្បួង ។៩ វានឹងរៀបចំបងប្អូនសម្រាប់ « ការហៅមនុស្សឲ្យមានចិត្តព្យាយាមដ៏ខ្លាំង … ដើម្បីធ្វើការនៅក្នុងចម្ការទំពាំងបាយជូរនៃព្រះអម្ចាស់ » ។១០ វានឹងជាយុថ្កាមួយដ៏រឹងមាំនៅពេលការចោទប្រកាន់ ឬ ការថ្លែងបង្ខូចត្រូវបានប្រើដើម្បីសាកល្បងសេចក្ដីជំនឿរបស់បងប្អូន ហើយនឹងជាគ្រឹះមួយដ៏រឹងមាំនៅពេលបងប្អូនត្រូវគេចោទសំណួរដែលអ្នកមិនអាចឆ្លើយបានភ្លាមៗ ។ បងប្អូននឹងមានសមត្ថភាពយល់សេចក្ដីពិតចេញពីសេចក្ដីមិនពិត ហើយបងប្អូននឹងមានអារម្មណ៍អះអាងពីព្រះវិញ្ញាណបរិសុទ្ធ បញ្ជាក់ទីបន្ទាល់របស់អ្នកម្ដងហើយម្ដងទៀត នៅពេលបងប្អូនបន្តអានព្រះគម្ពីរមរមនពេញមួយជីវិត ។
ខ្ញុំក៏លើកទឹកចិត្តឪពុកម្ដាយទាំងអស់ដែលស្ដាប់ ឬអានសារលិខិតនេះ ឲ្យទុកព្រះគម្ពីរមរមនជាផ្នែកសំខាន់មួយក្នុងគេហដ្ឋាន ។ កាលកូនៗយើងធំឡើង យើងអានព្រះគម្ពីរមរមនដូចយើងទទួលទានអាហារពេលព្រឹកដែរ ។ នេះជាវត្ថុស៊កចំណាំព្រះគម្ពីរដែលយើងបានប្រើ ។ នៅខាងមុខមានប្រសាសន៍ប្រធាន ប៊ែនសឹន ដែលសន្យាថា ព្រះនឹងចាក់ព្រះពរមកលើយើងនៅពេលយើងអានព្រះគម្ពីរមរមន ។១១ នៅខាងក្រោយមានការសន្យាពីប្រធាន ម៉ារ៉ុន ជី រ៉មនី ជាអតីតទីប្រឹក្សាក្នុងគណៈប្រធានទីមួយ ៖ « ខ្ញុំជឿជាក់ថា ក្នុងគេហដ្ឋានយើង បើឪពុកម្ដាយនឹងអានព្រះគម្ពីរមរមនប្រកបដោយការអធិស្ឋាន ហើយទៀងទាត់ ទាំងអានដោយខ្លួនឯង និង ជាមួយកូនៗពួកគេ នោះវិញ្ញាណនៃព្រះគម្ពីរដ៏អស្ចារ្យនោះនឹងចាប់ផ្ដើមមានពេញគេហដ្ឋានយើង ថែមទាំងមនុស្សដែលរស់នៅក្នុងគេហដ្ឋាននោះផងដែរ ។ … វិញ្ញាណនៃការទាស់ទែងគ្នានឹងចេញឆ្ងាយទៅ ។ ឪពុកម្ដាយនឹងទូន្មានកូនខ្លួនដោយសេចក្តីស្រឡាញ់ និង ប្រាជ្ញាដ៏មុត ។ កូនៗនឹងស្ដាប់បង្គាប់កាន់តែច្រើនចំពោះការទូន្មានរបស់ឪពុកម្ដាយខ្លួន ។ សេចក្តីសុចរិតនឹងកើនឡើង ។ សេចក្ដីជំនឿ សេចក្ដីសង្ឃឹម និងសេចក្ដីសប្បុរស—ដែលជាសេចក្ដីស្រឡាញ់ដ៏សុទ្ធសាធនៃព្រះគ្រីស្ទ—នឹងមានពាសពេញគេហដ្ឋាន និង ជីវិតយើង ដោយនាំមកជាមួយនូវសេចក្ដីសុខសាន្ត អំណរ និង សុភមង្គល » ។១២
ឥឡូវ ច្រើនឆ្នាំបន្ទាប់ពីកូនៗរបស់យើងបានចាកចេញពីផ្ទះទៅចិញ្ចឹមបីបាច់គ្រួសារផ្ទាល់ខ្លួន យើងអាចឃើញយ៉ាងច្បាស់អំពីការសន្យារបស់ប្រធាន រ៉មនី ត្រូវបានបំពេញ ។ គ្រួសារខ្ញុំមិនល្អឥតខ្ចោះទេ ប៉ុន្តែយើងអាចថ្លែងទីបន្ទាល់អំពីអំណាចនៃព្រះគម្ពីរមរមន និង ពរជ័យដែលការអានវា អាចនាំឲ្យមាន ហើយបន្តនាំឲ្យមានក្នុងជីវិតគ្រួសារយើងទាំងមូល ។
អំណាចដ៏មហិមានៃព្រះគម្ពីរមរមន គឺជាឥទ្ធិពលរបស់វានៅក្នុងការនាំយើងខិតកាន់តែជិតព្រះយេស៊ូវគ្រីស្ទ ។ អំណាចនេះគឺជាទីបន្ទាល់រឹងមាំអំពីទ្រង់ និង អំពីបេសកកម្មប្រោសលោះរបស់ទ្រង់ ។១៣ យើងយល់អំពីភាពអស្ចារ្យ និង អំណាចនៃដង្វាយធួនទ្រង់តាមរយៈអំណាចនេះ ។១៤ វាបង្រៀនអំពីគោលលទ្ធិយ៉ាងច្បាស់ ។១៥ ហើយដោយសារតែជំពូកដ៏អស្ចារ្យដែលពិពណ៌នាអំពីការយាងមកជួបរបស់ព្រះគ្រីស្ទក្រោយមានព្រះជន្មរស់ឡើងវិញដល់សាសន៍នីហ្វៃ នោះយើងឃើញទ្រង់ស្រឡាញ់ ប្រទានពរ ហើយបង្រៀនប្រជាជនទាំងនោះ ហើយយល់ថា ទ្រង់នឹងធ្វើដូចគ្នានេះចំពោះយើង បើយើងមករកទ្រង់តាមរយៈការរស់នៅតាមដំណឹងល្អ ។១៦
បងប្អូនប្រុសខ្ញុំសូមថ្លែងទីបន្ទាល់អំពីអំណាចនៃព្រះគម្ពីរមរមន ។ ទោះជាខ្ញុំអានជាភាសាអង់គ្លេស អ៊ីតាលី ឬ បារាំង ជាក្រដាស ឬលើឧបករណ៍អេឡិចត្រូនិកក្តី ខ្ញុំទទួលបានវិញ្ញាណដ៏អស្ចារ្យដូចគ្នាចេញពីជំពូក និង ខគម្ពីរទាំងនេះទៅក្នុងជីវិតខ្ញុំ ។ ខ្ញុំសូមថ្លែងទីបន្ទាល់អំពីលទ្ធភាពរបស់វាក្នុងការជួយយើងឲ្យខិតកាន់តែជិតព្រះគ្រីស្ទ ។ ខ្ញុំអធិស្ឋានសូមឲ្យយើងម្នាក់ៗនឹងបានប្រយោជន៍ទាំងស្រុងពីអំណាចដែលមានក្នុងព្រះគម្ពីរនេះ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។