ມີພະລັງຢູ່ໃນພຣະຄຳພີມໍມອນ
ພະລັງທີ່ຍິ່ງໃຫຍ່ທີ່ສຸດຂອງພຣະຄຳພີມໍມອນ ແມ່ນຜົນກະທົບຂອງມັນ ໃນການເຮັດໃຫ້ເຮົາເຂົ້າໃກ້ພຣະເຢຊູຄຣິດຫລາຍຂຶ້ນ.
ໃນວັນທີ 14 ເດືອນມິຖຸນາ, ປີ 1989, ອີງຕາມຂ່າວທີ່ບໍ່ຖືກຕ້ອງກ່ຽວກັບສາດສະໜາຈັກ, ລັດຖະບານຂອງປະເທດການາ ຈຶ່ງໄດ້ສັ່ງຫ້າມກິດຈະກຳທັງໝົດຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ພາຍໃນເຂດອາຟຣິການັ້ນ. ລັດຖະບານໄດ້ຍຶດເອົາຊັບສິນທັງໝົດຂອງສາດສະໜາຈັກ, ແລະ ກໍໄດ້ຢຸດການສອນສາດສະໜາ. ສະມາຊິກຂອງສາດສະໜາຈັກ, ຜູ້ອ້າງເຖິງໄລຍະນັ້ນວ່າເປັນ “ຊ່ວງຢຸດສະງັກ,” ໄດ້ດຳລົງຊີວິດຕາມພຣະກິດຕິຄຸນ ໃນວິທີທີ່ເຂົາເຈົ້າສາມາດ ປາດສະຈາກການປະຊຸມຂອງສາຂາ ແລະ ປາດສະຈາກຄວາມຊ່ວຍເຫລືອຂອງຜູ້ສອນສາດສະໜາ. ມີຫລາຍເລື່ອງທີ່ດົນໃຈ ກ່ຽວກັບວິທີທີ່ສະມາຊິກໄດ້ຮັກສາຄວາມສະຫວ່າງຂອງພຣະກິດຕິຄຸນໃຫ້ຮຸ່ງເຫລື້ອມ ໂດຍການນະມັດສະການຢູ່ໃນບ້ານເຮືອນຂອງຕົນ ແລະ ໂດຍການດູແລກັນ ຜ່ານທາງການເປັນຄູສອນປະຈຳບ້ານ ແລະ ຜູ້ຢ້ຽມສອນ.
ໃນທີ່ສຸດ ຄວາມບໍ່ເຂົ້າໃຈກັນ ກໍໄດ້ຖືກແກ້ໄຂ, ແລະ ໃນວັນທີ 30 ເດືອນພະຈິກ, ປີ 1990, ຊ່ວງຢຸດສະງັກ ກໍໄດ້ສິ້ນສຸດລົງ ແລະ ກິດຈະກຳທີ່ປົກກະຕິຂອງສາດສະໜາຈັກກໍໄດ້ດຳເນີນຕໍ່.1 ນັບແຕ່ນັ້ນມາ, ກໍໄດ້ມີຄວາມສຳພັນທີ່ດີງາມລະຫວ່າງສາດສະໜາຈັກ ແລະ ລັດຖະບານຂອງປະເທດການາ.
ສະມາຊິກຜູ້ໄດ້ມີຊີວິດຢູ່ຜ່ານຊ່ວງຢຸດສະງັກນັ້ນ ກໍໄດ້ຊີ້ບອກເຖິງພອນທີ່ມາຈາກໄລຍະທີ່ຜິດປົກກະຕິດັ່ງກ່າວ. ສັດທາຂອງຫລາຍຄົນໄດ້ເຂັ້ມແຂງຂຶ້ນ ຜ່ານຄວາມຍາກລຳບາກ ທີ່ເຂົາເຈົ້າໄດ້ປະເຊີນ. ແຕ່ພອນຢ່າງໜຶ່ງຂອງຊ່ວງຢຸດສະງັກ ໄດ້ມາເຖິງໃນວິທີທີ່ຜິດປົກກະຕິ.
ທ້າວນິໂກລັສ ໂອໂຟຊູ-ເຮເນ ເປັນຕຳຫລວດໜຸ່ມຄົນໜຶ່ງ ຜູ້ໄດ້ຖືກມອບໝາຍໃຫ້ໄປຍາມຕຶກໂບດຂອງຊາວມໍມອນ ໃນຊ່ວງຢຸດສະງັກ. ໜ້າທີ່ຂອງລາວແມ່ນ ລາວຕ້ອງຍາມຕຶກໂບດໃນຕອນກາງຄືນ. ເມື່ອ ທ້າວນິໂກລັສ ໄດ້ໄປເຖິງຕຶກໂບດ ເປັນເທື່ອທຳອິດ, ລາວໄດ້ເຫັນສິ່ງຂອງກະຈັດກະຈາຍຢູ່, ທັງເຈ້ຍ, ປຶ້ມ, ແລະ ເຄື່ອງໃຊ້ກໍບໍ່ເປັນລະບຽບ. ໃນບັນດາສິ່ງຂອງເຫລົ່ານັ້ນ, ລາວໄດ້ເຫັນປຶ້ມພຣະຄຳພີມໍມອນເຫລັ້ມໜຶ່ງ. ລາວພະຍາຍາມບໍ່ສົນໃຈກັບມັນ ເພາະລາວໄດ້ຖືກບອກວ່າ ມັນເປັນສິ່ງຊົ່ວຮ້າຍ. ແຕ່ລາວຮູ້ສຶກຖືກດຶງດູດໄປຫາມັນແບບແປກປະຫລາດ. ໃນທີ່ສຸດ, ທ້າວນິໂກລັສ ບໍ່ສາມາດເມີນເສີຍຈາກພຣະຄຳພີອີກຕໍ່ໄປ. ລາວໄດ້ຈັບມັນຂຶ້ນມາ. ລາວຮູ້ສຶກວ່າ ລາວຄວນອ່ານມັນ. ລາວໄດ້ອ່ານມັນໝົດຄືນ, ນ້ຳຕາໄຫລລົງອາບແກ້ມ ໃນຂະນະທີ່ລາວອ່ານມັນ.
ເທື່ອທຳອິດທີ່ລາວໄດ້ຈັບມັນຂຶ້ນມາ ລາວໄດ້ອ່ານຈົບ 1 ນີໄຟ. ເທື່ອທີສອງ, ລາວໄດ້ອ່ານຈົບ 2 ນີໄຟ. ເມື່ອລາວອ່ານເຖິງ 2 ນີໄຟ ບົດທີ 25, ລາວໄດ້ອ່ານ ຂໍ້ຄວາມດັ່ງຕໍ່ໄປນີ້: “ແລະ ພວກເຮົາເວົ້າເຖິງພຣະຄຣິດ, ພວກເຮົາປິຕິຍິນດີໃນພຣະຄຣິດ, ພວກເຮົາສັ່ງສອນເລື່ອງພຣະຄຣິດ, ພວກເຮົາທຳນາຍເຖິງພຣະຄຣິດ, ແລະ ພວກເຮົາບັນທຶກຕາມຄຳທຳນາຍຂອງພວກເຮົາ ເພື່ອລູກຫລານຂອງພວກເຮົາ ຈະໄດ້ຮູ້ວ່າ ພວກເຂົາຈະຫລຽວຫາແຫລ່ງໃດເພື່ອການປົດບາບຂອງພວກເຂົາ.”2
ໃນເວລານັ້ນ ທ້າວນິໂກລັສໄດ້ຮູ້ສຶກເຖິງພຣະວິນຍານທີ່ມີພະລັງທີ່ສຸດ ຈົນລາວຮ້ອງໄຫ້ສະອຶກສະອື້ນ. ລາວໄດ້ຮັບຮູ້ວ່າ ໃນຂະນະທີ່ລາວອ່ານຂໍ້ນີ້ ລາວໄດ້ຮັບການດົນໃຈທາງວິນຍານຫລາຍເທື່ອ ວ່າປຶ້ມເຫລັ້ມນີ້ ເປັນພຣະຄຳພີ, ເປັນປຶ້ມທີ່ຖືກຕ້ອງທີ່ສຸດ ທີ່ລາວເຄີຍອ່ານມາ. ລາວໄດ້ຮັບຮູ້ວ່າ ໄພ່ພົນຍຸກສຸດທ້າຍ, ບໍ່ໄດ້ເປັນຢ່າງທີ່ລາວໄດ້ຍິນ, ແຕ່ເຂົາເຈົ້າເຊື່ອແທ້ໆໃນພຣະເຢຊູຄຣິດ. ຫລັງຈາກຊ່ວງຢຸດສະງັກ ໄດ້ສິ້ນສຸດລົງ, ແລະ ຜູ້ສອນສາດສະໜາໄດ້ກັບຄືນໄປປະເທດການາ, ທ້າວນິໂກລັສ, ພັນລະຍາຂອງລາວ ພ້ອມດ້ວຍລູກໆຂອງລາວ ໄດ້ເຂົ້າຮ່ວມສາດສະໜາຈັກ. ເມື່ອຂ້າພະເຈົ້າໄດ້ເຫັນລາວປີກາຍນີ້, ລາວໄດ້ເປັນຜູ້ບັນຊາການກົມຕຳຫລວດ, ແລະ ຮັບໃຊ້ເປັນປະທານເຂດທາແມວ ປະເທດການາ ຂອງສາດສະໜາຈັກ. ລາວກ່າວວ່າ, “ສາດສະໜາຈັກໄດ້ປ່ຽນຊີວິດຂອງຂ້ານ້ອຍ. … ຂ້ານ້ອຍຂອບພຣະໄທພຣະເຈົ້າຜູ້ຊົງລິດອຳນາດຍິ່ງໃຫຍ່ ທີ່ໄດ້ພາຂ້ານ້ອຍມາສູ່ພຣະກິດຕິຄຸນນີ້.”3
ທ້າວອາລິເບີດ ເດວີສ໌, ກໍເປັນຊາວການາອີກຄົນໜຶ່ງ, ຜູ້ໄດ້ໄປຕຶກໂບດຂອງພວກເຮົາ ກັບເພື່ອນຄົນໜຶ່ງ ຜູ້ໄປປະຊຸມຝ່າຍປະທານ. ໃນຂະນະທີ່ລາວກຳລັງນັ່ງລໍຖ້າເພື່ອນ, ທ້າວອາລິເບີດໄດ້ອ່ານປຶ້ມເຫລັ້ມໜຶ່ງ ທີ່ວາງຢູ່ໃກ້. ເມື່ອການປະຊຸມສິ້ນສຸດລົງ, ທ້າວອາລິເບີດຢາກເອົາປຶ້ມຫົວນັ້ນກັບເມືອບ້ານ. ລາວບໍ່ພຽງແຕ່ໄດ້ຮັບອະນຸຍາດໃຫ້ເອົາປຶ້ມຫົວນັ້ນກັບເມື່ອບ້ານເທົ່ານັ້ນ, ແຕ່ລາວຍັງໄດ້ຮັບພຣະຄຳພີມໍມອນນຳອີກ. ເມື່ອລາວໄປຮອດບ້ານ, ລາວໄດ້ເລີ່ມຕົ້ນອ່ານພຣະຄຳພີມໍມອນ. ລາວບໍ່ສາມາດວາງມັນລົງ. ລາວໄດ້ອ່ານຢູ່ໃຕ້ແສງທຽນ ຈົນເຖິງ 3 ໂມງເຊົ້າ. ລາວໄດ້ເຮັດແບບນັ້ນ ເປັນເວລາຫລາຍຄືນ, ຕື້ນຕັນໃຈກັບສິ່ງທີ່ລາວໄດ້ອ່ານ ແລະ ສິ່ງທີ່ລາວໄດ້ຮູ້ສຶກ. ບັດນີ້ ທ້າວອາລິເບີດເປັນສະມາຊິກຄົນໜຶ່ງຂອງສາດສະໜາຈັກ.
ທ້າວແອງຈີໂລ ສະກາປູລາ ໄດ້ເລີ່ມຕົ້ນສຶກສາຝ່າຍສາດສະໜາ ໃນບ້ານເກີດເມືອງນອນຂອງລາວ ທີ່ປະເທດອີຕາລີ ຕອນລາວມີອາຍຸໄດ້ 10 ປີ. ໃນທີ່ສຸດ ລາວໄດ້ກາຍເປັນຄຸນພໍ່ ແລະ ໄດ້ຮັບໃຊ້ສາດສະໜາຈັກຂອງລາວດ້ວຍຄວາມອຸທິດຕົນ. ໃນຈຸດໜຶ່ງຂອງຊີວິດ ສັດທາຂອງລາວໄດ້ເລີ່ມຫວັ່ນໄຫວ, ແລະ ລາວໄດ້ຄົ້ນຄວ້າ ແລະ ໄດ້ຮັບໂອກາດໃຫ້ສຶກສາເພີ່ມເຕີມ. ເມື່ອລາວໄດ້ສຶກສາຫລາຍຂຶ້ນເທົ່າໃດ, ລາວກໍຍິ່ງມີຄວາມສົງໄສຫລາຍຂຶ້ນເທົ່ານັ້ນ. ສິ່ງທີ່ລາວໄດ້ອ່ານ ແລະ ຮູ້ສຶກ ໄດ້ເຮັດໃຫ້ລາວໝັ້ນໃຈວ່າ ເຄີຍມີການປະຖິ້ມຄວາມເຊື່ອ ຈາກຄຳສອນທີ່ແທ້ຈິງ ທີ່ສອນໂດຍພຣະຄຣິດ ແລະ ໂດຍກຸ່ມອັກຄະສາວົກລຸ້ນທຳອິດ. ທ້າວແອງຈີໂລໄດ້ຊອກຫາສາດສະໜາຈັກທີ່ແທ້ຈິງຂອງພຣະເຈົ້າ ໃນສາດສະໜາຕ່າງໆ ແຕ່ລາວກໍຍັງຮູ້ສຶກບໍ່ພໍໃຈຢູ່ ເປັນເວລາຫລາຍປີ.
ມື້ໜຶ່ງ ລາວໄດ້ເຫັນສະມາຊິກຂອງສາດສະໜາຈັກສອງຄົນ ທີ່ກຳລັງຊ່ວຍເຫລືອຜູ້ສອນສາດສະໜາ ຊອກຫາຄົນທີ່ຈະສອນ. ລາວຮູ້ສຶກສົນໃຈເຂົາເຈົ້າ ແລະ ໄດ້ຟັງຂ່າວສານຂອງເຂົາເຈົ້າດ້ວຍຄວາມຊື່ນຊົມ. ທ້າວແອງຈີໂລໄດ້ຮັບເອົາພຣະຄຳພີມໍມອນດ້ວຍຄວາມເຕັມໃຈ.
ໃນຄືນນັ້ນ ລາວໄດ້ເລີ່ມຕົ້ນອ່ານພຣະຄຳພີ. ລາວໄດ້ເຕັມໄປດ້ວຍຄວາມສຸກ. ຜ່ານທາງພຣະວິນຍານ, ພຣະເຈົ້າໄດ້ມອບຄວາມໝັ້ນໃຈໃຫ້ແກ່ທ້າວແອງຈີໂລ ວ່າໃນພຣະຄຳພີມໍມອນເຫລັ້ມນັ້ນ ລາວຈະພົບເຫັນຄວາມຈິງທີ່ລາວຊອກຫາຢູ່ ເປັນເວລາຫລາຍປີ. ລາວໄດ້ເຕັມໄປດ້ວຍຄວາມຮູ້ສຶກອັນຫວານຊື່ນ. ສິ່ງທີ່ລາວໄດ້ອ່ານ ແລະ ຮຽນຈາກຜູ້ສອນສາດສະໜາ ໄດ້ຢືນຢັນຄວາມຄິດຄວາມເຫັນຂອງລາວ ກ່ຽວກັບການປະຖິ້ມຄວາມເຊື່ອ, ພ້ອມນີ້ ລາວກໍຍັງໄດ້ຮຽນຮູ້ວ່າ ສາດສະໜາຈັກທີ່ແທ້ຈິງຂອງພຣະເຈົ້າ ໄດ້ຖືກຟື້ນຟູແລ້ວ ຢູ່ໃນໂລກນີ້. ບໍ່ດົນຈາກນັ້ນ ທ້າວແອງຈີໂລໄດ້ຮັບບັບຕິສະມາເຂົ້າໃນສາດສະໜາຈັກ.4 ຕອນຂ້າພະເຈົ້າໄດ້ເຫັນລາວເປັນເທື່ອທຳອິດ, ລາວໄດ້ເປັນປະທານສາຂາ ຣີມີນີ ຂອງສາດສະໜາຈັກຂອງເຮົາ ໃນປະເທດອີຕາລີ.
ສິ່ງທີ່ທ້າວນິໂກລັສ, ທ້າວອາລິເບີດ, ແລະ ທ້າວແອງຈີໂລໄດ້ມີປະສົບການນຳພຣະຄຳພີມໍມອນ ແມ່ນຄ້າຍຄືກັນກັບປະສົບການຂອງ ພາລີ ພີ ພະແຣັດ ທີ່ວ່າ:
“ຂ້າພະເຈົ້າເປີດ [ພຣະຄຳພີ] ດ້ວຍຄວາມຢາກຮູ້ຢາກເຫັນ. … ຂ້າພະເຈົ້າອ່ານໝົດມື້; ບໍ່ກິນເຂົ້າບໍ່ກິນນ້ຳ, ຂ້າພະເຈົ້າບໍ່ຄິດຢາກກິນຫຍັງ; ຂ້າພະເຈົ້າບໍ່ຢາກນອນ ເມື່ອກາງຄືນມາເຖິງ, ເພາະຂ້າພະເຈົ້າຢາກອ່ານຫລາຍກວ່າຢາກນອນ.
“ຂະນະທີ່ຂ້າພະເຈົ້າອ່ານ ພຣະວິນຍານຂອງພຣະເຈົ້າໄດ້ສະຖິດຢູ່ກັບຂ້າພະເຈົ້າ, ແລະ ຂ້າພະເຈົ້າຮູ້ ແລະ ເຂົ້າໃຈວ່າ ໜັງສືນີ້ເປັນຄວາມຈິງ ຊຶ່ງແຈ່ມແຈ້ງ ແລະ ສະແດງບອກຢ່າງເຊັດເຈນແບບດຽວກັນກັບທີ່ຄົນໃດຄົນໜຶ່ງເຂົ້າໃຈ ແລະ ຮູ້ວ່າຕົວເຂົາມີຢູ່ຈິງ. ບໍ່ດົນ ຂ້າພະເຈົ້າມີຄວາມສຸກເຕັມຂະໜາດ, ແລະ ຄວາມສຸກຂອງຂ້າພະເຈົ້າ ມີຫລາຍກວ່າການທົດແທນຄວາມໂສກເສົ້າ, ການເສຍສະລະ, ແລະ ຄວາມທຸກຍາກລຳບາກທັງໝົດ ໃນຊີວິດຂອງຂ້າພະເຈົ້າ.”5
ບາງຄົນໄດ້ມີປະສົບການທີ່ມີພະລັງເຊັ່ນນັ້ນ ນຳພຣະຄຳພີມໍມອນ ໃນເທື່ອທຳອິດທີ່ເຂົາເຈົ້າເປີດອ່ານມັນ, ແຕ່ສຳລັບບາງຄົນ ປະຈັກພະຍານເຖິງຄວາມຈິງໄດ້ມາເຖິງເທື່ອລະເລັກເທື່ອລະນ້ອຍ ໃນຂະນະທີ່ເຂົາເຈົ້າອ່ານ ແລະ ອະທິຖານກ່ຽວກັບມັນ. ນັ້ນຄືກໍລະນີຂອງຂ້າພະເຈົ້າ. ຕອນຂ້າພະເຈົ້າໄດ້ອ່ານພຣະຄຳພີມໍມອນເທື່ອທຳອິດ ຕອນເປັນນັກຮຽນໄວລຸ້ນໃນຫ້ອງຮຽນສາດສະໜາ. ນີ້ຄືພຣະຄຳພີມໍມອນເຫລັ້ມທີ່ຂ້າພະເຈົ້າໄດ້ອ່ານ. ຂ້າພະເຈົ້າບໍ່ສາມາດບອກທ່ານໄດ້ ເຖິງເທື່ອທຳອິດ ຫລື ສະຖານທີ່ທຳອິດທີ່ມັນໄດ້ເກີດຂຶ້ນ, ແຕ່ໃນໄລຍະທີ່ຂ້າພະເຈົ້າໄດ້ອ່ານ, ຂ້າພະເຈົ້າໄດ້ເລີ່ມຕົ້ນຮູ້ສຶກເຖິງບາງສິ່ງ. ຄວາມຮູ້ສຶກອັນອົບອຸ່ນ ແລະ ພຣະວິນຍານ ໄດ້ມາສູ່ຂ້າພະເຈົ້າ ທຸກເທື່ອທີ່ຂ້າພະເຈົ້າເປີດອ່ານມັນ. ຂ້າພະເຈົ້າຮູ້ສຶກເຖິງພຣະວິນຍານຫລາຍຂຶ້ນ ເມື່ອຂ້າພະເຈົ້າອ່ານມັນຕື່ມອີກ. ຄວາມຮູ້ສຶກນັ້ນກໍຍັງມີຢູ່ໃນທຸກວັນນີ້. ທຸກເທື່ອທີ່ຂ້າພະເຈົ້າເປີດພຣະຄຳພີມໍມອນ, ກໍຄືກັນກັບຂ້າພະເຈົ້າເປີດສະວິດໄຟ—ພຣະວິນຍານໄດ້ເຂົ້າສູ່ຫົວໃຈ ແລະ ຈິດວິນຍານຂອງຂ້າພະເຈົ້າ.
ສຳລັບບາງຄົນ, ປະຈັກພະຍານເຖິງພຣະຄຳພີມໍມອນ ໄດ້ມາເຖິງຢ່າງຊ້າໆ, ຫລັງຈາກການສຶກສາ ແລະ ການອະທິຖານເປັນເວລາດົນນານ. ຂ້າພະເຈົ້າມີເພື່ອນຄົນໜຶ່ງ ຜູ້ໄດ້ອ່ານພຣະຄຳພີມໍມອນ ໃນການສະແຫວງຫາ ເພື່ອຈະໄດ້ຮູ້ຈັກ ຖ້າຫາກວ່າມັນເປັນຄວາມຈິງຫລືບໍ່. ລາວໄດ້ຮັບເອົາຄຳເຊື້ອເຊີນຂອງໂມໂຣໄນ ເພື່ອໃຫ້ທູນຖາມພຣະເຈົ້າ ດ້ວຍໃຈຈິງ, ດ້ວຍເຈດຕະນາອັນແທ້ຈິງ ໂດຍມີສັດທາໃນພຣະຄຣິດ, ຖ້າຫາກວ່າພຣະຄຳພີມໍມອນເປັນຄວາມຈິງຫລືບໍ່.6 ແຕ່ລາວບໍ່ໄດ້ຮັບຄຳຕອບທາງວິນຍານທີ່ສັນຍາໄວ້ໃນທັນທີທັນໃດ. ແຕ່ມື້ໜຶ່ງ, ໃນຂະນະທີ່ລາວຄຸ້ນຄິດຢູ່ ແລະ ຂັບລົດໄປ, ພຣະວິນຍານໄດ້ເປັນພະຍານຕໍ່ລາວ ເຖິງຄວາມຈິງຂອງພຣະຄຳພີມໍມອນ. ດ້ວຍຄວາມດີອົກດີໃຈ ແລະ ດ້ວຍຄວາມປາບປື້ມຫລາຍທີ່ສຸດ ລາວໄດ້ໝຸນແວ່ນລົງ ແລະ ໄດ້ຮ້ອງອອກໄປ, ບໍ່ແມ່ນຮ້ອງໄປໃສ່ຄົນໃດຄົນໜຶ່ງ ແຕ່ຮ້ອງໄປໃສ່ທຸກຄົນທົ່ວໂລກວ່າ, “ມັນເປັນຄວາມຈິງ!”
ບໍ່ວ່າເຮົາຈະໄດ້ຮັບປະຈັກພະຍານເຖິງພຣະຄຳພີມໍມອນ ໃນເທື່ອທຳອິດທີ່ເຮົາເປີດອ່ານມັນ ຫລື ອ່ານມັນເປັນເວລາດົນນານກໍຕາມ, ມັນຈະມີອິດທິພົນຕໍ່ເຮົາ ໄປຕະຫລອດຊີວິດ ຖ້າຫາກເຮົາອ່ານມັນຕໍ່ໄປ ແລະ ນຳໃຊ້ຄຳສອນຂອງມັນ. ປະທານເອສະຣາ ແທັບ ເບັນສັນ ໄດ້ສອນວ່າ: “ມັນມີພະລັງຢູ່ໃນພຣະຄຳພີມໍມອນ ຊຶ່ງຈະເລີ່ມຕົ້ນຫລັ່ງໄຫລເຂົ້າໄປໃນຊີວິດຂອງທ່ານ ໃນນາທີທີ່ທ່ານເລີ່ມສຶກສາມັນຢ່າງຈິງຈັງ. ທ່ານຈະພົບເຫັນພະລັງທີ່ຍິ່ງໃຫຍ່ກວ່າ ເພື່ອຕ້ານທານກັບການລໍ້ລວງ. ທ່ານຈະພົບເຫັນພະລັງ ເພື່ອຫລີກເວັ້ນຈາກການຫລອກລວງ. ທ່ານຈະພົບເຫັນພະລັງ ເພື່ອຢູ່ໃນທາງທີ່ຄັບແຄບ.”7
ຂ້າພະເຈົ້າຂໍຊຸກຍູ້ທຸກຄົນ ທີ່ໄດ້ຮັບຂ່າວສານນີ້, ຮ່ວມທັງຜູ້ດຳລົງຖານະປະໂລຫິດແຫ່ງອາໂຣນ ໃຫ້ຄົ້ນຫາພະລັງຂອງພຣະຄຳພີມໍມອນ. ດັ່ງທີ່ປະທານທອມມັສ ແອັສ ມອນສັນ ໄດ້ຊຸກຍູ້ວ່າ: “ຈົ່ງອ່ານພຣະຄຳພີມໍມອນ. ຈົ່ງໄຕ່ຕອງຄຳສອນຂອງມັນ. ຈົ່ງທູນຖາມພຣະບິດາເທິງສະຫວັນ ຖ້າຫາກວ່າ ມັນເປັນຄວາມຈິງຫລືບໍ່.”8 ໃນໄລຍະທີ່ທ່ານອ່ານ ທ່ານຈະຮູ້ສຶກເຖິງພຣະວິນຍານຂອງພຣະເຈົ້າ ຢູ່ໃນຊີວິດຂອງທ່ານ. ພຣະວິນຍານນັ້ນ ຈະເປັນພາກສ່ວນໜຶ່ງໃນປະຈັກພະຍານຂອງທ່ານ ວ່າພຣະຄຳພີມໍມອນເປັນຄວາມຈິງ, ວ່າໂຈເຊັບ ສະມິດ ເປັນສາດສະດາຂອງພຣະເຈົ້າ, ແລະ ວ່າສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ເປັນສາດສະໜາຈັກທີ່ແທ້ຈິງຂອງພຣະເຈົ້າ ຢູ່ໃນໂລກທຸກວັນນີ້. ປະຈັກພະຍານດັ່ງກ່າວ ຈະຊ່ວຍທ່ານໃຫ້ຕ້ານທານກັບການລໍ້ລວງ.9 ມັນຈະຕຽມທ່ານສຳລັບ “ການເອີ້ນຄວາມພາກພຽນຂອງມະນຸດຄັ້ງໃຫຍ່ … ເພື່ອໃຫ້ເຮັດວຽກໃນສວນອະງຸ່ນຂອງພຣະຜູ້ເປັນເຈົ້າ.”10 ມັນຈະເປັນສິ່ງຄ້ຳຈູນທ່ານ ເມື່ອຄຳກ່າວຫາ ຫລື ຄຳໃສ່ຮ້າຍປ້າຍສີ ຖືກໃຊ້ ເພື່ອປ່ຽນແປງສັດທາຂອງທ່ານ ແລະ ມັນຈະເປັນຮາກຖານທີ່ໝັ້ນຄົງ ເມື່ອທ່ານປະເຊີນກັບຄຳຖາມທີ່ທ່ານບໍ່ສາມາດຕອບ, ຢ່າງໜ້ອຍໃນທັນທີທັນໃດ. ທ່ານຈະສາມາດເບິ່ງອອກວ່າ ອັນໃດຖືກ ອັນໃດຜິດ, ແລະ ທ່ານຈະຮູ້ສຶກໝັ້ນໃຈກັບການຢືນຢັນຂອງພຣະວິນຍານບໍລິສຸດ ຕໍ່ປະຈັກພະຍານຂອງທ່ານ ເທື່ອແລ້ວເທື່ອອີກ ເມື່ອທ່ານສືບຕໍ່ອ່ານພຣະຄຳພີມໍມອນເລື້ອຍໄປ ຕະຫລອດຊີວິດຂອງທ່ານ.
ຂ້າພະເຈົ້າກໍຂໍຊຸກຍູ້ພໍ່ແມ່ທັງຫລາຍ ທີ່ໄດ້ຍິນ ຫລື ອ່ານຂ່າວສານນີ້ ເຮັດໃຫ້ພຣະຄຳພີມໍມອນ ເປັນພາກສ່ວນທີ່ສຳຄັນ ໃນບ້ານເຮືອນຂອງທ່ານ. ຕອນລູກຂອງພວກເຮົາຍັງນ້ອຍ, ພວກເຮົາໄດ້ອ່ານພຣະຄຳພີມໍມອນ ຕອນກິນເຂົ້າເຊົ້າ. ນີ້ຄືສິ່ງໝາຍໜ້າປຶ້ມ ອັນທີ່ພວກເຮົາໄດ້ໃຊ້. ຢູ່ທາງໜ້າ ມີຂໍ້ຄວາມຂອງປະທານເບັນສັນ ສັນຍາວ່າ ພຣະເຈົ້າຈະຖອກເທພຣະພອນລົງມາເທິງເຮົາ ເມື່ອເຮົາອ່ານພຣະຄຳພີມໍມອນ.11 ຢູ່ທາງຫລັງມີຄຳສັນຍາຂອງປະທານແມຣີອອນ ຈີ ຣອມນີ, ອະດີດທີ່ປຶກສາຂອງຝ່າຍປະທານສູງສຸດ ມີຄຳວ່າ: “ຂ້າພະເຈົ້າແນ່ໃຈວ່າ ຖ້າຫາກ ຢູ່ໃນບ້ານເຮືອນຂອງເຮົາ ພໍ່ແມ່ຈະອ່ານພຣະຄຳພີມໍມອນ ດ້ວຍການອະທິຖານ ແລະ ອ່ານເປັນປະຈຳ, ສອງຕໍ່ສອງ ຫລື ກັບລູກໆຂອງເຂົາເຈົ້າ, ແລ້ວພຣະວິນຍານຂອງພຣະຄຳພີທີ່ຍິ່ງໃຫຍ່ນັ້ນ ຈະຂະຫຍາຍໄປທົ່ວບ້ານເຮືອນຂອງເຮົາ ແລະ ເຖິງທຸກຄົນທີ່ອາໄສຢູ່ໃນນັ້ນ. … ວິນຍານທີ່ຂັດແຍ້ງກັນຈະໜີໄປ. ພໍ່ແມ່ຈະແນະນຳລູກໆຂອງຕົນ ດ້ວຍຄວາມຮັກ ແລະ ດ້ວຍປັນຍາທີ່ດີກວ່າ. ລູກໆຈະຕອບຮັບ ແລະ ເຮັດຕາມຄຳແນະນຳຂອງພໍ່ແມ່ຂອງເຂົາ. ສັດທາ, ຄວາມຫວັງ ແລະ ຄວາມໃຈບຸນ—ຄວາມຮັກອັນບໍລິສຸດຂອງພຣະຄຣິດ—ຈະສະຖິດຢູ່ໃນບ້ານເຮືອນ ແລະ ໃນຊີວິດຂອງເຮົາ, ນຳຄວາມສະຫງົບ, ຄວາມຊື່ນຊົມ, ແລະ ຄວາມສຸກມາໃຫ້.”12
ບັດນີ້, ຫລາຍປີຫລັງຈາກລູກໆຂອງພວກເຮົາໄດ້ອອກເຮືອນໄປ ແລະ ມີຄອບຄົວຂອງຕົນເອງ, ພວກເຮົາສາມາດເຫັນໄດ້ຢ່າງແຈ່ມແຈ້ງເຖິງຄຳສັນຍາຂອງປະທານຣອມນີໄດ້ເກີດເປັນຈິງ. ຄອບຄົວຂອງພວກເຮົາ ຍັງຢູ່ໄກຈາກຄວາມດີພ້ອມທຸກຢ່າງ, ແຕ່ພວກເຮົາສາມາດເປັນພະຍານເຖິງພະລັງຂອງພຣະຄຳພີມໍມອນໄດ້ ແລະ ເຖິງພອນທີ່ໄດ້ຮັບຈາກການອ່ານມັນ, ແລະ ຍັງໄດ້ຮັບພອນຢູ່ຕໍ່ໄປ, ໃນຊີວິດຂອງຄອບຄົວພວກເຮົາທັງໝົດ.
ພະລັງທີ່ຍິ່ງໃຫຍ່ທີ່ສຸດຂອງພຣະຄຳພີມໍມອນ ແມ່ນຜົນກະທົບຂອງມັນ ໃນການເຮັດໃຫ້ເຮົາເຂົ້າໃກ້ພຣະເຢຊູຄຣິດຫລາຍຂຶ້ນ. ມັນເປັນພະຍານທີ່ເຂັ້ມແຂງເຖິງພຣະອົງ ແລະ ເຖິງພາລະກິດແຫ່ງການໄຖ່ຂອງພຣະອົງ.13 ຜ່ານທາງພຣະຄຳພີມໍມອນ ເຮົາຈຶ່ງເຂົ້າໃຈເຖິງການຊົດໃຊ້ອັນສັກສິດ ແລະ ມີພະລັງຂອງພຣະອົງ.14 ພຣະຄຳພີມໍມອນສອນເຮົາຢ່າງແຈ່ມແຈ້ງ ເຖິງຄຳສອນຂອງພຣະອົງ.15 ແລະ ເປັນເພາະບົດທີ່ສຳຄັນ ຊຶ່ງບັນຍາຍເຖິງການມາຢ້ຽມຢາມຂອງພຣະຄຣິດທີ່ໄດ້ຟື້ນຄືນພຣະຊົນແລ້ວ ຕໍ່ຊາວນີໄຟ, ເຮົາຈຶ່ງເຫັນພຣະອົງຮັກ, ໃຫ້ພອນ, ແລະ ສອນຜູ້ຄົນເຫລົ່ານັ້ນ ແລະ ຈຶ່ງເຂົ້າໃຈວ່າ ພຣະອົງຈະເຮັດຢ່າງດຽວກັນນັ້ນກັບເຮົາ, ຖ້າຫາກເຮົາມາຫາພຣະອົງ ໂດຍການດຳລົງຊີວິດຕາມພຣະກິດຕິຄຸນຂອງພຣະອົງ.16
ອ້າຍນ້ອງທັງຫລາຍ, ຂ້າພະເຈົ້າເປັນພະຍານເຖິງພະລັງຂອງພຣະຄຳພີມໍມອນ. ບໍ່ວ່າຈະອ່ານມັນເປັນພາອັງກິດ, ພາສາອີຕາລີ, ຫລື ພາສາຝະຣັ່ງ ກໍຕາມ; ບໍ່ວ່າຈະອ່ານຈາກປຶ້ມ ຫລື ຈາກເຄື່ອງອີເລັກໂທນິກ ກໍຕາມ, ຂ້າພະເຈົ້າພົບເຫັນວ່າ ພຣະວິນຍານອັນດຽວກັນນັ້ນ ໄດ້ຫລັ່ງໄຫລມາຈາກປຶ້ມ ເຂົ້າສູ່ຊີວິດຂອງຂ້າພະເຈົ້າ. ຂ້າພະເຈົ້າເປັນພະຍານເຖິງຄວາມສາມາດຂອງມັນ ທີ່ຈະໃຫ້ເຮົາເຂົ້າໃກ້ພຣະຄຣິດຫລາຍຂຶ້ນ. ຂ້າພະເຈົ້າອະທິຖານວ່າ ເຮົາແຕ່ລະຄົນ ຈະສວຍໂອກາດຍຶດເອົາພະລັງ ທີ່ມາຈາກພຣະຄຳພີທີ່ດີເລີດນີ້. ໃນພຣະນາມຂອງພຣະເຢຊູຄຣິດ, ອາແມນ.