2010–2019
Ewōr Kajoor ilo Bok in Mormon eo
Oktoba 2016


Ewōr Kajoor ilo Bok eo

Kajoor eo eļap an Bok in Mormon ej an maron̄ jelōt ad epaake ļo̧k Jisōs Kraist.

Ilo Juun 14, 1989, kōn wōt jet meļeļe ko rejjab jejjet kōn Kabun̄ in, kien eo an Ghana ekar kabōjrak aolep m̧akūtkūt ko an Kabun̄ eo an Jisōs Kraist im Armej ro Rekwojarjar ilo Raan-ko Āliktata ilo laļ in an RiAfrica. Kien eo ekar bōk aolep men ko m̧weien Kabun̄ in, im aolep jerbal in mijenede rekar bōjrak. Membōr ro an Kabun̄ in, ro kōnono kaki ilo tōre in āinwōt “bōjrak in kabun̄,” rekar kōm̧m̧ane jon̄an wōt aer maron̄ mour kōn gospel eo ilo an ejjeļo̧k kweilo̧k ko an branch ak jipan̄ an mijenede ro. Elōn̄ bwebwenato ko rem̧m̧an kōn wāween an membōr ro kōjparok wōt meram eo an rom̧aak gospel eo jān aer kabun̄jar ilo mōko m̧weer im lale doon āinwōt rūkaki in loļo̧k ko an kōrā im em̧m̧aan.

Āliktata jameļeļe in kar ņamejļan, im ilo Nobōm̧ba 30, 1990, bōjrak in kabun̄ in im m̧akūtkūt ko an Kabun̄ rekar wōnm̧aanļo̧k wōt.1 Jān tōre eo jem̧jerā ko an Kabun̄ in im ikōtaan kien eo an Ghana ekar em̧m̧an wōt.

Membōr ro rekar mour ilo iien bōjrak in kabun̄ in ekar emōkaj aer kwaļo̧k tok kōjeram̧m̧an ko rekar waļo̧k n̄an er jān iien in eoktak. Tōmak eo an elōn̄ armej rekar kajoorļo̧k jān apan̄ in rekar jelm̧ae. Ak juon iaan kōjeraam̧m̧an ko an bōjrak in kabun̄ in ekar itok juon wāween eoktak.

Nicholas Ofosu–Hene ekar juon policeman eo em̧m̧an dettan kar jitōn̄ e bwe en waje im̧ōnjar in an LDS ilo iien bōjrak jān kabun̄ in. Eddo eo an ekar n̄an waje m̧wiin ilo bon̄. Ke Nicholas ekar itaak tok ilo im̧ōnjar eo, ekar lo bwe men otemjej ilowaan m̧weo rekar ejjeplōklōk, kōn peba ko, bok ko, im jea im tebōļ rekar ejjeplōklōk. Ilubwilijer men kein rejeplōklōk, ekar lo juon kape in Bok in Mormon. Ekar kajjieon̄ kōjekdo̧o̧ne bok in kōnke ekar ron̄ jān an armej ba bwe bok in enana. Ak en̄jake eo an ekar kōjak kōnke ekar kōņaan. Āliktata, Nicholas ekar kōņaanļo̧k wōt in kōjekdo̧o̧n bok in. Ekar jibwe lōn̄tak. Ekar en̄jake āinwōt rej kipel e bwen riiti. Ekar riiti aolepān bon̄ōn̄ eo, ilo an dānin kōm̧jaļaaļ iturin mejān ke ej riiti.

Iien eo jinoin ekar jibwe lōn̄tak, ekar riiti aolep 1 Nipai. Iien eo kein karuo ekar jibwe lōn̄tak, ekar riiti aolep 2 Nipai. Ke ekar tōpar 2 Nipai jebta 25, ekar riiti naan kein: “Im jej kōnono kōn Kraist, jej m̧ōņōņō ilo Kraist, jej kwaļo̧k kōn Kraist, jej kanaan kōn Kraist, im jej jeje ekkar n̄an kanaan ko ad, bwe ro nejid ren maron̄ jeļā n̄an ia rej maron̄ reilo̧k n̄an jeorļo̧k jero̧wiwi ko aer.”2

Ilo tōre in Nicholas ekar en̄jake kajoor in Jetōb eo im ekar jino jan̄. Ekar kile bwe tōre in ekar riit ekar bōk juon im̧we jān jetōb bwe bok in ekar jeje ko rekwojarjar, ejejjet tata iaan bok ko ekar riiti. Ekar kile bwe Armej ro Rekwojarjar ilo Raan-ko Āliktata, keidi n̄an ta eo ekar ron̄ jān armej, eļap aer tōmak ilo Jisōs Kraist. Ālkin an jem̧ļo̧k bōjrak jān kabun̄ in im mijenede ro rekar bar jepļaaktok n̄an Ghana, Nicholas, kōrā eo pāleen im ajri ro nejin rekar kobatok ilo Kabun̄ in. Ke ikar loe e iiō eo ļo̧k, ekar juon police commander im ekar jerbal āinwōt būreejtōn an Tamale Ghana District an Kabun̄ in. Ej ba: “Kabun̄ in ekar ukōt mour eo aō. … Ij kam̧m̧oolol Anij Ekajoor Bōtata kōn An kar tōltok eo n̄an gospel in.”3

Albert Davies, bar juon RiGhana, ekar mije tok juon m̧ōttan n̄an juon iaan im̧ōnjar kein, ijo im in m̧ōttan ekar kōm̧m̧ane juon kweilo̧k an būreejtōnji eo. Tōre in ekar kōttare in m̧ōttan, Albert ekar riiti juon bok ekar loe. Ke kweilo̧k eo ekar jem̧ļo̧k, Albert ekar kōņaan in bōke bok in n̄an m̧weo imōn. Ekar bōk juon mālim bwen jab bōke bok eo ak enej bōk juon kape in Bok in Mormon eo. Ke ekar tōpar ļo̧k m̧weo, ekar jino riiti Bok in Mormon eo. Ekar jab maron̄ likūti. Ekar riiti kōn kāāntōl m̧ae 3:00 awa jibbon̄. Ekar wōnm̧aanļo̧k wōt bar jet bon̄, ļo̧kjeņ an kōn ta eo ekar riiti im ta eo ekar en̄jake. Albert ej kiiō juon membōr in Kabun̄ in.

Angelo Scarpulla ekar jino ekkatak ko an kōn kabun̄ ilo Italy kapijuknen eo an ke ekar 10. Āliktata ekar erom juon pris im jipan̄ kabun̄ eo an ilo wūjlepļo̧k. Ilo juon tōre tōmak eo an ekar jino m̧ōjņo̧, im ekar kappukōt im bōk iien ko rem̧m̧an n̄an kōļapļo̧k an ekkatak. Ilo an ļapļo̧k an ekkatak, ijoke, ekar ļapļo̧k an inepata. Ta eo ekar riiti im kar kile ippān bwe ekar wōr juon tōre in bun̄ jān tōmak jān katak ko rem̧ool kar katakin jān Jisōs im Rijilōk ro m̧okta. Angelo ekar kappukōt kabun̄ eo em̧ool an Anij ilo elōn̄ tōmak ko ak ekar jab ju būruwōn ium̧win elōn̄ iiō ko.

Juon raan ekar ioon ruo membōr in Kabun̄ in ro rekar jipan̄ mijenede ro kappokļo̧k armej bwe ren katakin. Ekar en̄jake an epaakeļo̧k er im lukkuun m̧ōņōņō in ron̄jake ennaan eo aer. Angelo ekar m̧ōņōņō in bōk juon kape in Bok in Mormon.

Joteen eo ekar jino riiti bok eo. Ekar en̄jake an obrak kōn lan̄lōn̄. Jān Jetōb eo, Anij ekar leļo̧k n̄an Angelo juon kam̧ool ilo e bwe ilo Bok in Mormon eo emaron̄ lo m̧ool ko me ekar pukōti ium̧win elōn̄ iiō ko. En̄jake ko rem̧m̧an rekar ibebtok ippān. Ta eo ekar riiti im ta eo ekar ekkatak jān mijenede ro rekar kapen jem̧ļo̧kin an jeļā bwe ekar wōr juon bun̄ jān tōmak eo eļap, ak ekar barāinwōt ekkatak bwe Kabun̄ eo em̧ool an Anij emōj an jepļaaktok n̄an laļ in. Jidik iien tokālik, Angelo ekar peptaij tok n̄an Kabun̄ in.4 Jinoin aō kar ioon e, ekar juon būreejtōn an Rimini Italy Branch an Kabun̄ in ad.

Ta eo Nicholas, Alibert, im Angelo rekar en̄jake kōn Bok in Mormon eo ejjeļo̧k oktak jān en̄jake eo an Parley P. Pratt:

“Ikar kōppeļļo̧k [bok eo] kōn ikdeleel. … Ikar riiti aolepān raan eo; m̧ōn̄ā ekar juon menin bōbrae, ekar ejjeļo̧k aō kōņaan m̧ōn̄ā; kiki ekar juon menin bōbrae … n̄e ekar bon̄, kōnke ikar kōņaan riit bwe in kiki.

“Ke ikar riit, jetōb eo an Irooj ekar itok ioō, im ikar jeļa im meļeļe bwe bok eo ekar m̧ool, āinwōt an alikkar im waļo̧k āinwōt an juon armej meļeļe im jeļa bwe ej mour. Aō lan̄lōn̄ ekar obrak, āinwōt an kar, im ikar lukkuun lan̄lōn̄ eļapļo̧k kōn aolep būrom̧ōj ko, kaarmejete ko im wāween ko reppen an mour eo aō.”5

Jet ewōr juon aer en̄jake ekajoor kōn Bok in Mormon eo jinointata ke rekar kōppeļļo̧k e, ak n̄an ro jet kam̧ool kōn m̧ool ko rej ibebtok ilo aer riiti im jar kake. Kar jekjek eo n̄an n̄a. Kein kajuon in aō riiti Bok in Mormon eo ke ikar juon jodikdik rijikuul in jemenere. En̄in ej kape in Bok in Mormon eo ikar riiti. Ijjab maron̄ ba n̄an kom̧ jejjet in iien eo ak jikin eo ekar bōk jikin, ak juon jikin jān aō riiti, ikar jinoin en̄jake juon men. Ekar wōr juon en̄jake im juon jetōb ekar itok aolep iien ij kōppeļļo̧k e bok in. En̄jake in ekar eddōkļo̧k ilo aō wōnm̧aanļo̧k im riiti. En̄jake in ej wōnm̧aanļo̧k wōt n̄an rainin. Aolep iien ij kōppeļļo̧k Bok in Mormon eo, ej āinwōt n̄e kwoj jiped juon kii—Jetōb eo ej ibebtok ilo būruwōm̧ im n̄an am̧.

N̄an ro jet, juon naan in kam̧ool kōn Bok in Mormon erum̧wij an itok, ālkin eļap ekkatak im jar. Ewōr juon m̧ōtta eo ekar riiti Bok in Mormon eo kappukōt n̄an jeļā eļan̄n̄e ekar m̧ool. Ekar kōjerbal e karuwaineneik in ilo Moronai n̄an kajjitōk ippān Anij kōn juon bōro em̧ool, kōn jibadbad em̧ool im tōmak ilo Kraist, eļan̄n̄e Bok in Mormon eo ej m̧ool.6 Bōtaab ekar jab m̧ōkaj an bōk juon uwaak kallim̧ur jān jetōb. Ijoke, juon raan ke ekar ļōmņak, im ettōr ilowaan iaļ eo, Jetōb eo ekar kam̧ool n̄an e kōn m̧ool eo an Bok in Mormon eo. Ekar lukkuun m̧ōņōņō im obrak an ekar lelaļļo̧k wintō in wa eo an im lamōj, ejjab n̄an juon ak n̄an aolepān laļ in, “Ej m̧ool!”

Men̄e naan in kam̧ool eo ad kōn Bok in Mormon kein kajuon an itok ke jej kōppeļļo̧k ak iumwin juon tōre, enaaj im̧we kōj aolepān raan ko ad n̄e jej wōnm̧aanļo̧k n̄an riiti im mour kōn katak ko. Būreejtōn Ezra Taft Benson ekar katakin: “Ewōr juon kajoor ilo bok in eo enaaj jino ibebtok ilo mour ko ami iien eo kom̧ij jino juon iien ekkatak em̧ool an bok in. Kom̧ naaj lo eļapļo̧k kajoor n̄an jum̧ae kapo. Kom̧ naaj lo eļapļo̧k kajoor n̄an kōjekdo̧o̧n m̧on. Kom̧ naaj lo kajoor eo n̄an pād wōt ilo iaļ in erānin̄ im eaidik.”7

Ij rōjan̄ aolep n̄an bōk ennaan in, ekoba rikabwijer Priesthood eo an Aron kar kobatok ilo kweilo̧k in joteen in, n̄an loe kajoor eo an Bok in Mormon eo. Āinwōt an Būreejtōn Thomas S. Monson kar rōjan̄: “Riiti Bok in Mormon eo. Kejōkļo̧kjeņ kōn katak ko an. Kajjitōk ippān Jemedwōj Ilan̄ eļan̄n̄e ej m̧ool.”8 Ilo iien ņe kwonaaj en̄jake Jetōb eo an Anij ilo mour ko am̧. Bwe Jetōb eo enaaj m̧ōttan naan in kam̧ool eo am̧ bwe Bok in Mormon eo ej m̧ool, bwe Josep Smith ekar juon rikanaan an Anij, im bwe Kabun̄ eo an Jisōs Kraist im Armej ro Rekwojarjar ilo Raan-ko Āliktata ej Kabun̄ eo em̧ool an Anij ioon laļ in rainin. Naan in kam̧ool ņe enaaj jipan̄ eo jum̧ae kapo.9 Enaaj kōpooj eok n̄an “kūr in tiljek eļap … n̄an jerbal ilo jikin kallib eo an Irooj.”10 Enaaj jutak āinwōt juon an̄kō em̧ool n̄e jekpen ņae ak naan in riab ko kōjerbali n̄an jum̧ae tōmak eo am im enaaj erom juon pedped epen n̄e kwoj lo jum̧ae kōn kajjitōk ko kwojjab maron̄ uwaaki, eļaptata iien eo emōkajtata. Kom̧ naaj maron̄ kile m̧ool jān bōd, im kom̧ naaj en̄jake kam̧ool an Jetōb Kwojarjar eo ej kapen naan in kam̧ool eo am̧ bar juon im bar juon ilo am̧ wōnm̧aanļo̧k im riiti Bok in Mormon eo aolepān mour eo am.

Ij barāinwōt rōjan̄ aolep ro jinen im jemān rej ron̄jake ak riiti ennaan in bwe ren kōm̧m̧an bwe Bok in Mormon eo juon men eaorōk ilo m̧weo im̧ōm̧. Ilo an ajri ro nejid eddōkļo̧k, jej riit jān Bok in Mormon eo ilo ad m̧ōn̄a in jibbon̄. En̄in ej juon bok me kōm̧ kar kōjerbale. Itulowa im̧aan bok in ej juon kout jān Būreejtōn Benson ej kallim̧ur bwe Anij enaaj lutōk waj juon iood ilo ad riiti Bok in Mormon eo.11 Itulik in bok in ej kallim̧ur eo jān Būreejtōn Marion G. Romney, kar juon rikakpilōklōk ilo Būreejtōnji eo Kein Kajuōn “Ij en̄jake kam̧ool bwe n̄e, ilo m̧ōko imōd, ro jinen im jemed renaaj riit jān Bok in Mormon tiljek im aolep iien, erro jim̧or im ajri ro nejierro, jetōb eo an bok in eļap enaaj itok im kobrak m̧ōko im̧ōd im aolep ro rej pād ie. … Jetōb in aitwerōk enaaj em̧m̧akūt. Ro jinen im jemān renaaj kōkpilōklōk ajri ro nejier ilo eļap iakwe im mālōtlōt. Ajri ro renaaj ļapļo̧k aer uwaak im pokake n̄an naan in kōkpilōklōk ko an jineer im jemāer. Mour jim̧we enaaj ļapļo̧k. Tōmak, kōjatdikdik, iakwe-em̧ool im iakwe eo erreo an Kraist—enaaj pād ilo m̧ōko im̧ōd im mour ko, bōktok n̄an er āinwōt juon waļo̧k in aenōm̧m̧an, lan̄lōn̄, im m̧ōņōņō.”12

Kiiō, elōn̄ iiō tokālik ajri ro nejūm̧ rekar em̧m̧akūt jān m̧weo imōm̧ im rej karuttoļo̧k baam̧le ko aer make, kōm̧ maron̄ loe an kūrm̧ool kallim̧ur in an Būreejtōn Romney. Baam̧le eo aō rettoļo̧k jān wāppen, ak kōm̧ maron̄ kam̧ool kōn kajoor eo an Bok in Mormon eo im kōjeram̧man ko bwe riiti ekar bōktok im ej wōnm̧aanļo̧k wōt bōktok n̄an mour ko an aolep baam̧le in.

Kajoor eo eļap an Bok in Mormon ej an maron̄ jelōt ad epaake ļo̧k Jisōs Kraist. Ej juon kam̧ool ekajoor kōn E im mijen in pinmuur eo An.13 Jān e jemaron̄ in meļeļe aiboojoj im kajoor eo an Pinmuur eo An.14 Ej katakin katak ko An ralikkar.15 Im kōnke jebta ko rem̧m̧an rej kōmeļeļeik loļo̧k eo an Kraist ekar jerkakpeje n̄an RiNipai ro, jej lo im en̄jake iakwe eo An, kōjeram̧m̧an, im katakin armej rein im kar jino meļeļe bwe Enaaj kōm̧m̧ane ejja wāween in wōt n̄an kōj n̄e jej itok n̄an E ilo mour kōn gospel eo An.16

Em̧m̧aan ro jeiū im jatū, ij kwaļo̧k naan in kam̧ool eo aō kōn m̧ool eo an Bok in Mormon. Men̄e riiti ilo Kajin English, Italy, ak French, ilo jeje ak ilo juon electronic device, ikar loe ejja jetōb in em̧m̧an ej ibebtok jān jebta kein im eoon kein n̄an mour eo aō. Ij kam̧ool kōn maron̄ eo an n̄an jipan̄ kōj epaakeļo̧k Kraist. Ij jar bwe kōj kajjojo renaaj jeram̧m̧an kōn kajoor in ilo bok in em̧m̧an in jeje ko rekwojarjar. Ilo etan Jisōs Kraist, amen.

Kakeememej ko

  1. Lale “‘You Can’t Close My Heart’: Ghanaian Saints and the Freeze,” Jan. 6, 2016, history.lds.org.

  2. 2 Nipai 25:26.

  3. Email from Nicholas Ofosu-Hene, Oct. 27, 2015.

  4. Lale Angelo Scarpulla, “My Search for the Restoration,” Tambuli, June 1993, 16–20; email from Ezio Caramia, Sept. 16, 2016.

  5. Autobiography of Parley P. Pratt, ed. Parley P. Pratt Jr. (1938), 37.

  6. Lale Moronai 10:4–5.

  7. Teachings of Presidents of the Church: Ezra Taft Benson (2014), 141.

  8. Thomas S. Monson, “Dare to Stand Alone,” Liahona, Nov. 2011, 62; see also Thomas S. Monson, “Priesthood Power,” Liahona, May 2011, 66; A Prophet’s Voice: Ennaan ko jān Thomas S. Monson (2012), 490–94.

  9. Būreejtōn Thomas S. Monson eaar katakin: “Aolep ri kabwijer priesthood eo rej aikuj bok kuņaer ilo riiti jeje ko rekwojarjar aolep raan. … Ij kalim̧uri kom̧, men̄e kwoj kabwijer Aaronic ak Melchizedek Priesthood, n̄e kwenaaj ekkatak jeje ko rekwojarjar ilo tiljek, kajoor eo am̧ n̄an jum̧ae kapo im n̄an bōk tōl eo an Jetōb Kwojarjar eo ilo aolep men ko kwonaaj kōm̧m̧ani naaj ļapļo̧k” (“Be Your Best Self,” Liahona, May 2009, 68).

  10. Alma 28:14.

  11. “Ij kallim̧uri kom̧ bwe jān iien in m̧aanļo̧k, eļan̄n̄e jenaaj ekkatak jān peij ko jān [Bok in Mormon] im mour jān katak ko ie, Anij enaaj lutōktok ioon kajjojo ajri in Zaion im juon kōjeram̧m̧an an Kabun̄ reno̧jak” (Teachings: Ezra Taft Benson, 127).

  12. Marion G. Romney, “The Book of Mormon,” Ensign, May 1980, 67.

  13. Lale, n̄an waanjon̄ak, taitōl peij eo an Bok in Mormon; 1 Nipai 11; 2 Nipai 25; Mosaia 16; 18; Alma 5; 12; Hilamōn 5; 3 Nipai 9; Mormon 7.

  14. Lale, n̄an waanjon̄ak, 2 Nipai 2; 9; Mosaia 3; Alma 7; 34.

  15. Lale, n̄an waanjon̄ak, 2 Nipai 31; 3 Nipai 11; 27.

  16. Lale 3 Nipai 11–28.