Tin poder den e Buki

Dia 14 di Yüni  1989, dor di algun mal informashon over di Iglesia, e gobièrnu di Ghana a eksiliá tur aktividat di e Iglesia di JesuCristu di e Santunan di delaster dianan den e pais Afrikano ei. Gobièrnu a tuma tur propiedat di Iglesia den beslag, i tur aktividatnan mishonal a para. E miembronan di Iglesia, ku ta referí na e periodo aki komo “the freeze” a hasi nan bèst pa biba e evangelio sin e reunionnan di rama òf e apoyo di misioneronan. Tin hopi storianan ku ta inspirá over di kon e miembronan a tene e lus di e evangelio briando dor di alabá den nan hogarnan i tene otro na bista den nan yamamentunan komo maestronan orientadó i maestranan bishitante.

Na final e mal komprondementu a wòrdu resolvé, i dia 30 di Novèmber 1990, e fris (freeze) a kaba i aktividatnan normal a resumí.¹ For di e momentu ei lo bin tin un relashon ekselente entre Iglesia i e gobièrnu di Ghana.

Miembronan ku a biba durante di e fris (freeze) ta masha lihé pa mustra e bendishonnan ku a bini for di e periodo straño ei. E fe di hopi a wòrdu reforsá dor di e kontratempu ku nan a eksperenshá. Pero un bendishon di e fris a bini na un manera pekuliar.

Nicholas Ofosu-Hene tabata un polis yòn otorgá pa vigilá un kas di reunion di e Santunan di Delaster Dia durante di e fris (freeze). Su deber tabata pa vigilá e edifisio den anochi. Ora ku Nicholas a yega promé bia na e kas di reunion, e la Wak ku kosnan a wòrdu tirá aki aya, ku papelnan, buki, i muebelnan for di òrdu. Den e sentro di e desòrdu aki, e la Wak un kopia di e Buki di Mormon. E la trata di ignorá e buki paso e la wòrdu kontá ku e tabata malisioso. Pero e la sinti su mes strañamente atraé na dje. Al final, Nicholas no por a ignorá e buki mas. E la kue. E la sintié inspirá pa kuminsá les’é. E la lesa henter anochi, hañando lágrimanan ta kore for di su wowo sigun e ta lesa.

E promé biaha ku e la kue pa lesa, e la lesa henter 1  Nefi. E di dos biaha e la lesa henter 2 Nefi. Ora ku e la yega na 2 Nefi kapítulo 25, e la lesa lo siguiente: “Nos ta papia di Cristu, nos tin plaser de Cristu, nos ta prediká di Cristu, nos ta profetisá di Cristu, i nos ta skibi sigun nos profesianan, ku nos yunan por sa for di kua fuente nan por Wak pa un remishon di nan pikánan.”²

Na e momentu ei, Nicholas a sinti e Spiritu asina fuerte ku e la kuminsá yora. E la realisá su mes ku den e kurso di su lesamentu e la haña diferente inspirashonnan spiritual ku e buki aki tabata skritura, esun di mas korekto ku e la yega di lesa. E la realisá su mes ku e Santunan di Delaster Dia, kontrali di loke e la tende, ta kere firmamente den JesuCristu. Despues ku e fris (freeze) a kaba i misioneronan a bini bek na Ghana, Nicholas, su kasá i yunan a djòin e Iglesia. Ora ku mi a mir’é aña pasá, e tabata un komandante di polis i tabata sirbi komo e presidente di e Tamale Ghana Distrikto di Iglesia. E ta bisa: “Iglesia a transformá mi bida ... Mi ta duna danki na Dios todopoderoso ku E la guia mi pa yega na e evangelio aki.”³

Alibert Davies, un otro Ghanes, a kompaña su amigu pa bai un di nos kasnan di reunion, kaminda e amigu tabatin un reunion di presidensia. Miéntras e tabata warda riba su amigu, Alibert a lesa un buki ku e la haña den bisindario. Ora ku e reunion a kaba, Alibert ker a bai kas ku e buki. E la haña pèrmit no solamente pa bai ku e buki ei pero tambe un kopia di e Buki di Mormon. Ora ku e la yega kas, e la kuminsá lesa e Buki di Mormon. E no por a stòp. E la lesa na lus di bela te ku 3 or di mardugá. E la hasi esaki diferente anochi, aplastá dor di loke ku e la lesa i sinti. Alibert awor aki ta un miembro di Iglesia.

Angelo Scarpulla a kuminsá su estudio di teologia den su pais di nasementu Italia ora ku e tabata 10 aña. Al final e la bira un saserdote i a sirbi su iglesia ku dedikashon. Na sierto momentu su fe a kuminsá tambaliá i e la buska i haña oportunidatnan pa studia mas aleu. Mas e tabata studia, no opstante, mas prekupá e tabata bira. Loke e la lesa i sinti a konvensé ku tabatin un apostasia general for di e evangelio berdadero instruí dor di Jesus i su promé Apòstelnan. Angelo a buska Dios su religion berdadero den vários religionnan pero a keda insatisfecho durante hopi añanan.

Un dia e la enkontrá dos miembro di Iglesia ku tabata yudando e misioneronan pa haña mas hende pa instruí. E la sinti su mes atraé na nan i a tende nan mensahe ku goso. Ku ansha Angelo a akseptá un kopia di e Buki di Mormon.

E anochi ei e la kuminsá lesa e buki. E la sinti su mes yená ku goso. Por medio di e Spiritu, Dios a duna Angelo un siguransa paden ku den e Buki di Mormon e lo haña e bèrdat ku e tabata buska pa hopi aña. Sentimentunan tierno a pasa dor di dje. Loke e la lesa i loke e la siña di e misioneronan a konfirmá su konklushon ku tabatin un apostasia general, pero tambe e la siña ku Dios su Iglesia berdadero a wòrdu restourá na tera. Un breve tempu despues, Angelo a wòrdu batisá den e Iglesia.⁴ Ora ku mi a sera konosí ku n’e, e tabata presidente di e rama Rimini Italia di nos Iglesia.

Loke Nicholas, Alibert, i Angelo a eksperensha ku e Buki di Mormon ta paresido na Parley  P. Pratt su eksperensha:

Mi a habri [e buki] ku anhelo. ... Mi a lesa henter dia; kome tabata un molèster, mi no tabatin deseo pa kuminda; drumimentu tabata un karga ora.... nochi a yega, paso mi tabata preferá pa lesa ku pa drumi.

Miéntras ku mi tabata lesa, e spiritu di Señor tabata riba mi, i mi tabata sa i tabatin komprenshon ku e buki ei tabata bèrdat, mes un kla ku un hende ta komprondé i sa ku e ta eksistí. Mi goso tabata yen, manera e tabata ta, i mi a gosa sufisientemente ku e por a paga pa tur mi doló, sakrifisio i difikultatnan di den mi bida.”⁵

Tin hende ku tin asina un eksperensha poderoso ku e Buki di Mormon e promé bia ku nan habrié, pero pa otronan e testimonio di e bèrdat ta bini gradualmente miéntras ku nan ta lesa i hasi orashon over di dje. Esaki tabata den mi kaso. Mi a lesa e Buki di Mormon pa promé biaha komo un studiante di seminario. Esaki ta e kopia di e Buki di Mormon ku mi a lesa. Mi no por konta bosnan e ora presis òf e lugá kaminda e la pasa, pero un kaminda durante di e lesamentu ei, mi a kuminsá sinti algu. Tabatin un sentimentu kaloroso i un spiritu ku tabata tei kada bes ku mi a habri e buki. E sentimentu tabata krese sigun mi a sigui lesa. E sentimentu ei ta sigui te e dia aki. Kada bes ku mi habri e Buki di Mormon, ta manera sirkiuto ta konektá----e Spiritu ta kore, drenta den mi kurason i alma.

Pa otronan, un testimonio di e Buki di Mormon ta bini mas poko poko, despues di hopi estudio i orashon. Mi tin un amigu ku a lesa e Buki di Mormon buskando pa sa si e ta bèrdat. E la apliká e invitashon di den Moroni pa puntra Dios ku un kurason sinsero, ku intenshon real i fe den Cristu, si e Buki di Mormon ta bèrdat.⁶ Pero e no a haña e kontesta spiritual primintí inmediatamente. No opstante, un dia, miéntras ku e tabata pensando, manehando riba un kaminda, e Spiritu a testifiká na dje di e bèrdat di e Buki di Mormon. Asina felis i emoshoná e tabata ku e la baha su glas di outo anto grita, pa ku niun hende en partikular i tòg pa henter mundu, “E ta bèrdat!”

No ta importá si nos testimonio di e Buki di Mormon ta bini e promé bia ku nos habrié òf durante un periodo, e lo influenshá nos tur dia si nos sigui les’é i apliká su siñansanan. Presidente Ezra Taft Benso a instruí: “Tin un poder den e buki ku lo kuminsá pasa den bo bida mesora ku bo kuminsá un estudio serio di e buki. Lo bo haña poder mas grandi pa resistí tentashon. Lo bo haña poder pa evitá desepshon. Lo bo haña e poder pa keda riba e kaminda stret i smal.”⁷

Mi ta kurashá tur ku ta risibí e mensahe aki, inkluyendo e kargadónan di e Saserdosio Aaroniko ku ta huntu den e reunion aki awe nochi, pa diskubrí e poder di e Buki di Mormon. Manera Presidente Thomas S. Monson a kurashá: “Lesa e Buki di Mormon. Reflehá su siñansanan. Puntra Tata Selestial si e t bèrdat.”⁸ Durante di e proseso ei lo bo sinti e Spiritu di Dios den boso bida. E Spiritu ei lo ta parti di bo testimonio ku e Buki di Mormon ta bèrdat, ku José Smith tabata un profeta di Dios, i ku e Iglesia di JesuCristu di e Santunan di Delaster Dia ta Dios su Iglesia berdadero riba tera awendia. E testimonio ei lo yuda bo resistí tentashon.⁹ E lo prepará bo pa e “gran yamamentu di diligensia ... pa traha den e hòfi di Señor.”¹⁰ E lo para komo un ankra ora ku akusashonnan òf deklarashonnan ku ta difamá ta wòrdu usá pa reta bo fe i lo ta un fundashon sigur ora ku boso ta wòrdu kuestioná over di preguntanan ku bo no por kontesta, a ménos inmediatamente. Lo bo por distinguí bèrdat for di fout, i lo bo sinti e siguransa di e Spiritu Santu re- konfirmando bo testimonio kada bes atrobe ora ku bo ta sigui lesa e Buki di Mormon durante di bo bida.

Mi ta kurashá tambe tur mayornan ku ta tendiendo òf lesando e mensahe aki pa hasi e Buki di Mormon un parti importante di bo hogar. Sigun nos yunan tabata krese, nos tabata lesa for di e Buki di Mormon sigun nos ta desayuná. Esaki ta e bookmark ku nos tabata usa. Dilanti tin un sita di Presidente Benson kaminda e ta primintí ku Dios lo opsekiá un bendishon riba nos sigun nos ta lesa e Buki di Mormon.¹¹ Patras tin e promesa aki di Presidente Marion G. Romney, anteriormente un konsehero den e Promé Presidensia: “Mi ta sinti sigur ku si den nos hogarnan, mayornan lo lesa for di Buki di Mormon bou di orashon i frekuentemente, tantu komo nan so i huntu ku nan yunan, e spiritu di e gran buki ei lo bin drenta nos hogarnan i keda einan. ... e spiritu di disputa lo bai. Mayornan lo konsehá nan yunan ku mas amor i sabiduria. Yunan lo bira mas habrí i sumiso pa tende e konseho di nan mayornan. Rektitut lo krese. Fe, speransa, i karidat---e amor puru di Cristu--- lo abundá den nos hogarnan i bida, tresiendo den nan sombra, pas, goso, i felisidat.”¹²

Awor aki, hopi aña despues ku nos yunan a sali for di kas i ta kriando nan mes famianan, nos por Wak klaramente e realisashon di Presidente Romney su promesa. Nos famia ta leu for di ta perfekto, pero nos por testifika di e poder di e Buki di Mormon i e bendishonnan ku les’é a trese i ta sigui trese den e bidanan di henter nos famia.

E poder di mas grandi di e Buki di Mormon ta su impakto den trese nos mas serka di JesuCristu. E ta un testimonio fuerte di Dje i di Su mishon pa salba.¹³ Dor di Dje nos por yega di komprondé e mahestat i poder di Su Ekspiashon.¹⁴ E ta instruí Su doktrina hopi kla.¹⁵ I dor di e kapítulonan magnífiko deskribiendo e bishita di e Cristu resusitá na e Nefitanan, nos ta Wak i eksperensh’é, estimando, bendishonando, i siñando e hendenan ei i ta bin komprondé ku E lo hasi mesun kos pa nos si nos bini mas serka di Dje por medio di biba Su evangelio.¹⁶

Rumannan, mi ta duna testimonio di e poder di e Buki di Mormon. No ta importá si ta les’é na Ingles, Italiano, òf Franses, di print òf riba un aparato elektróniko, mi a bin haña e mes un spiritu maravilloso koriendo di su kapítulonan i versonan te den mi bida. Mi ta duna testimonio di su abilidat di yuda nos yega mas serka di Cristu. Mi ta pidi, ku kada unu di nos lo tuma full bentaha di e poder ku ta den e buki maravilloso aki. Den e nòmber di JesuCristu, amèn