2010–2019
Ngar Ngii a Klisiich er a chelsel tial Hon
October 2016


Ngar Ngii a Klisiich er a chelsel tial Hong

Sel Kot el klou el klisiich el ngar a Babier er a Mormon sel klisichel el ngoikid el mo kmeed er a Jesus Kristo.

Sera June 14, 1989, eng mlar ngii a diak el bleketakl el chisel a Ikelesia, ma kabelment ra Ghana a tirrob a rokui el tekingel a Ikelesia er a Jesus Kristo er a Uriul-klebesei el Santo er a chelsel tiakid el basio er a Africa. A kabelment a ngilai a rokui el kloklel a Ikelesia, ma rokui el urerel a remissionari a milterob. A rechedal a Ikelesia, el omekedong er tial taem el “chelsimer,” a mlo er a tkul rebab el sebechir el oltirakl ebangkelio el di dimlak a ikelesia ma ngesou ra re missionari. Ng betok a ungil cheldechederir el ulrrekodel a llomes er a ebangkelio meng di medidiich ra lou misang er a rekeblirir el kaiuedingel lokiu a odingel er a blai me a oldingel e olsisechakl.

Meng bai mlo sebechel mesemechokl tial mle cheleuid, me sera November 30, 1990, e tial chelsimer a mlo diak meng mle omuchel er a smechel a tekingel a Ikelesia.1 Seikid el merchelechang, eng mla ngar ngii a ungil deleuill er a Ikelesia me a kabelment er a Ghana.

A rechedal a ikelesia el kiliei ra le ngarngii a chelsimer a kmal mereched lolecholt a klengeltengat el ngilai er tiakid el taem. A klaumerang er a rebetok a mlo mesisiich lokiu a ringel el chilbangel. Engdi a tara klengeltengat er tial chelsimer a mlei el lulekiu a ngodech el teletael.

A Nicholas Ofosu-Hene a mle kekerel chad el bulis el urerel a mengkar ra basio ra LDS ra le ngar ngii a chelsimer. A ngerchelel a mengkar ra blil a miting sel le kebesengei. A Nicholas ra lekot el mor tial blil a miting, eng miles a klalou el mle beriid, el babier, ma hong, ma kingall ma tebel el mle kaukeangel. Chelsel tial chibaselei, eng milsa Babier er a Mormon. Ng millasem el lolechib a medal rengii le te mla ouchais er ngii el lekong mekngit. Eng di mle omelchesiu el soal tial hong. Me ng, kal Nicholas a dikeal sebechel lochebir tial hong. Meng ngiluu. Ng ual mlorimel lomuchel el menguiu er ngii. Ng milenguiu er tial rokir el kesus, e miles chiuosech el merael er a chotengel er a longuiu.

Sera kot el taem er a lenguu, eng iliuii el rokir a kot el Nephi. Sel ongerul taem, eng chiliuiiOngeru el Nephi. Sera le bocha ra Ongeru el Nephi bliongel 25, eng chiliuii tiang: “Aki mengedecheduch er a Kristo, e outkeu el ngara Kristo, aki olisechak er a Kristo, aki omlaoch er a Kristo, e meluches a ulaoch, me a rengelekam bolodengei el kmo ngera le bor ngii e te ngmai a ngebetel a kngterir.”2

Tiaikid el taem ea Nicholas a mlo melchesuar ra Chedaol Reng el mle mesisiich meng longelang. Ng mocha medengei el kmo sera longuiu eng ngiluu a chedaol lodubech el kmo tial hong a chedaol llechukl, el diak a tal cheleuid er tial hong el blal chiuii. E mlo medengei el kmo a re Uriul-klebesei el Santo, a ngodech ra bla lerenges el kirirr, a kmal mesisiich loumerang er a Jesus Kristo. Uriul ra bol merek a Chelsimer ma remisionari llueta el mora Ghana, e a Nicholas, bechil ma rengelekir a mlo chedal a Ikelesia. Sera kisang er tial mlo merek el rak, eng mle meredel er a rebulis, e a ngerchelel a mle president ra Ikelesa ra Tamale Ghana District. Ng dilu el kmo, “A Ikelesia a mla ngodechii a klengar er ngak. … Ak mereng a sulel Dita el Mui ra Klisiich el Dios el milengetikaik er ngak el mer tial ebangkelio.”3

Alibert Davies, el dirrek el Ghanaian, a ulebengkel a sechelil el mlora tara ikal blil ongdibel el sechelil a mlo oumiting er a presidency. Sera longiil er a sechelil, ea Alibert a chiliuii a hong el mlar bita er ngii. Sera bochal merek a miting, e a Alibert a mle soal melai er tial hong el mora blil. Ng dimlak el dil kengei er ngii mel nguu tial hong ng dirrek el ngiluu a Babier er a Mormon. Sera bol rei, eng ulemuchel el menguiu ra Babier er a Mormon. Ng dimlak el sebechel mecherei. Ng milenguiu loba kandalang el mocha edei el klok ra tutau. Ng mle uaisei el sesei el klebesei, ng mlo beraod a rengul ra le chiluiu ma lomelchesuar. A Alibert a chedal a Ikelesia er chelechang.

Angelo Scarpulla a ulemuchel omesubel ra tekoi ra klechelid ra belual ra Italy er sera le teruich a rekil. Meng kang a mlo baderei e ulsisechakl er a ikelesia er ngii loba blakelreng. Tara taem ea klaumerang er ngii a mlo mechitechut, me ngulsiik e ngilai a techall el lemuut el mora skuul. Sera lorael omesubel mong, eng bai, mirael el mo bekikl. Aikel chiluiu ma blo lomelchesiu a rirelii el momedengei el kmo ng mlar ngii a bosech er a ikel klemerang losisechakl el lulsisechakl a Jesus ma re mle kot el Apostol. A Angelo a ulsiik er a meral klechelid er a Dios er a kakerous el bedengel a klechelid e dimlak bo lungil besul ra rengul el betok el rak.

A tara sils eng mlo kebetech ngii ma reterul chedal a Ikelesia el ulengeseu er a remisionari losiik ra rechal el bo lolsisechakl er tir. Ngulmelchesiu el soal mo er tir meng mle ungil a rengul lorrenges a klumech el lolab. A Angelo a mle soal el nguu a Babier er a Mormon.

Sel kesus eng ulemuchel el menguiu er tial hong. Ng mlo ulis lungil a rengul. Ngokiu a Chedaol Reng, ea Dios a ulterkeklii el mora Angelo meng mlo medengei el kmo a chelsel tial Babier er a Mormon eng mo metik a klemerang el ngii a ulsiik el mla mo betok el rak. Ng mlo mui er a deurreng. Aikel chiluiu ma le siluub er a remisionari a mlo oterkokl a ikel tekoi lolab el kmo ng mla er ngii a klou el bosech, ng dirrek el mlo medengei el kmo a meral Ikelesia er a Dios a mla moluut el mera beluulechad. Telkib el taem ruriul er tiang ea Angelo a miltecholb el chedal a Ikelesia.4 Se er ak kot el mesang, eng mle president er a Rimini Italy Branch er a Ikelesia er kid.

A ikel le blo er ngii a Nicholas, Alibert, ma Angelo lobengkel tial Babier er a Mormon a di osisiu ngii me sel dilubech el mora Parley P. Pratt:

“Ak milkengii [tial hong] el mle semerirar. … Ak milenguiu el tal sils; a blengur a mle ongesang, ng dimlak el soak a kall; a cheliuaiu meng mle ongesang sel … bol kebesengei, e leng bai mle soak el menguiu er ak mechiuaiu.

“Se er ak kunguiu, ea reng er a Rubak a mle er ngak, me ak mle medengei e bleketakl el merngak el kmo tial hong a klemerang, ng bleketakl e ulecholt el di ua chad el bleketakl el me re ngii e medengei el kmo ngii a chad. A deurreng er ngak a mlo mui, er seikid el taem, e uldeu ra renguk leng medeel el umer a rokui el klengit el reng, el blok charm er ngii ma urerek er a klengar er ngak.”5

A rebebil a klou el tekoi a dilubech el mortir ra le ketengir el mekengii a Babier ra Mormon, eng di a rebebil a mlo mesang a klaumerang el mekekokil mechemolt sel longuiu e loluluuch el kirel. Tiaikid a teletael a mler ngak. Ak mle kot el choiuii a Babier ra Momon er ser ak ngeasek el ngara seminary. Tiakid sel Babier ra Mormon el ngak a chiliuii. Ng diak el sebechek el meskau a taem ma basio er sera ledubech, engdi chelsel sera kunguiu, e ak kulemuchel lomelchesiu er a kmo ngerang. A renguk a mlo omelchesiu ea reng a mlei sel bek el taem el kbekengii tial hong. Tial kumelchesiu er ngii a milrael mo klou er a kulemolem el menguiu. Tial kumelchesiu er ngii a melemolem el mer chelechang. Bek el taem el kbekengii a Babier er a Mormon, eng diua kbekengii a llomes—a Chedaol Reng a omaoch el mera chelsel a renguk ma bedengek el rokir.

E a kuk bebil er a rechad, a ngeiul a klaumerang er a Babier er a Mormon a lmuut el kmal meod, ruriul er a losuub e loluluuch. Ngar ngii a sechelik el chiliuii a Babier ra Mormon el soal momedengei el kmo ng klemerang. Ng ultirakl er sel ongtil a Moroni el oker ra Dios el loba ngariou el reng, el meral ngara rengul loba klaumerang er a Kristo, el kmo ng klemerang tial Babier er a Mormon.6 Eng di ngii a dimlak, el mereched, el nguu a nger lokiu sel chedaol el yaksok. Engdi, a tara klebesei er a lesal kmal lomdasu, el ulemekall er a rael, ea Chedaol reng a mle sioning el morngii er a klemerang er tial Babier ra Mormon. Ng meral mlo ulis lungil a rengul meng ngiluu a mado ra mlil el meriou e uleldiu, er a ngii di el chad, “Ng klemerang!”

Meng diak el iior el kmo a klaumerang er kid er a Babier er a Mormon a denguu sel ketenged el mekengii tial hong malechub eng mei er a kemanget el taem, tia mo mengitikaik er kid er a klengar er kid alsekum me kede melemolem el oltirakl a osisechakl el ngar ngii. A President Ezra Taft Benson a ulsisechakl: “Ngar ngii a klisiich ra chelsel tial hong el ngii a me soiseb er a klengar er kau er sel taem el kau a meral mo blak a rengum el mesuub er tial hong. Ke mo mesisiich el otngakl a ngibesereng. Ke mo mesisiich el diak mecheblad. Ke mo mesisiich el ngar sel kekerei e ibutek el rael.”7

Ng soak a rokui el chad el nguu tial klumech, uldimukl tirkel lolab a Aaronic Priesthood el ngar tial miting er chelecha el kesus, el mo nguu tial klisiich er a Babier er a Mormon. El uai se er a lulmeklakt er kid a President Thomas S. Monson el kmo: “Monguiu er a Babier er a Mormon. Momdasu a osisecheklel. E moker ra Chedam ra Babeluades el kmo ng klemerang.”8 Tiakid el taem e kau a mo melchesiu ra Reng ra Dios ra klengar er kau. Tial Chedaol Reng a mo tebedechel a klaumera er kau el kmo tial Babier er a Mormon a klemerang, e a Joseph Smith a profet er a Dios, e a Ikelesia ra Jesus Kristo er a Uriul-klebesei el Santo a meral Ikelesia ra Dios el ngara beluulechad er chelechang. Tial klaumerang a mo ngosukau el otngakl a ngibesereng.9 E mo kudmeklau el mo nguu “sel ngarbab lokedong er a blakelreng  … el mo oureor er a sersel a Rubak.”10 Tiang a mo otim sel borngii otelechakl malechub a tekoi el melemall el mo melsemai ra klaumerang er kau e dirrek el smisichii a deruchellem sel bo lomtok er kau lolab a ker el kau a diak el sebechem longer, er a di mereched el taem. Ke mo sebechem el mesang a klemerang ma diak, e mo melchesuar ra Chedaol Reng el ngii a lmuut el smisichii a klaumerang er kau er a bek el taem sel molemolem el menguiu era Babier er a Mormon er a klengar er kau.

Ak dirrek el soak a rokui el oungalek e lorrenges malechub eng menguiu er tial klumech el mo rulii ma Babier er a Mormon a kot el mo klou a ultutelel er a blimiu. A rengelekam ra lorael mo meklou, e a ki milnguiu a Babier er a Mormon sel ki momengur a le tutau. Tiakid sel bookmark el kimulusbech er ngii. Tial medal eng ngarngii a tekingel a President Benson el yaksok el kmo a Dios a mo chochubel a klengeltngat el merkid sel donguiu er a Babier er a Mormon.11 Ea bitang eng tiakid el yaksok er a President Marion G. Romney, el mle counselor er a Kot el Presidency: “A kungil medengei el kmo alsekum, ea chelsel a blid, ea roungalek a blechoel el menguiu er a Babier er a Mormon loba nglunguuch, el tir el terung me a tir ma rengelekir, ea reng er tial hong a mo mekekii a rekeblid ma rokui el chad el kiei er a chelsel. … A reng el omtok a mo diak. A roungalek a mo mellach er a rengelekir loba klou el beltikelreng me a llomes. A rengalek a mo orrenges e oltirakl a llecherir a rechad ra blirir. Ng mo klou a klung. A klaumerang, urunguled, ma tmolech el beltikelreng—el klikiid el beltik el reng er a Rubak—a mo klou er a chelsel a rekeblid ma klengar er kid, e meskid a redechel el budech, deureng, ma diul a rengud.”12

Chelechang, el mla imiu a betok el rak el renglekam a mla mo ileakl el mengedmokl a delengcheklir, e ngii a chemota er kemam sel yaksok ra President Romney el mla mutaut. A telungalek er kemam a diak el lungil er a rokui, eng di ng sebecham locholt a klaumerang er kemam er a klisiichel a Babier er a Mormon me a klengeltengat el ki mngilai lokiu omengiuam er ngii, e melemolem lomeskemam, ra klengar er a rokui el chedal a telungalek er kemam.

Sel kot el klou el klisiich el ngar a Babier er a Mormon sel klisichel el ngoikid el mo kmeed er a Jesus Kristo. Tia mesisiich el sioning er Ngii me a urerel el lolsobel.13 Ngokiu ngii e kede mo medengelii sel klebokel e mesisiich el Tngakireng er Ngii14 Ngolisechakl osisecheklel a Kristo el kmal bleketakl.15 Me a ikal kmal lungil bliongel el mesaod ra odngelel ma okisel a Kristo el mora rechad ra Nephi, kede mesang e melchesuar er Ngii loubeltikelreng, omekngeletngat, e olsisechakl er tir e solang e mo medengei el kmo Ngii a mo rulii a osisiu el tekoi el merkid, alsekum kede me er Ngii e oltirakl er a ebangkelio er Ngii.16

Rodam, Ak ouchais er a klisiich el ngara Babier er a Mormon. El donguiu er ngii el tekoi ra Merikel, Italy, malechub a French; llechukl malechub eng electronic, e ak mla mesang a osisiu el lungil reng el ngara bek el bliongel ma bades el mera klengar er ngak. Ak sioning el sebechel ngosukid el mo kmeed er a Kristo. Ak meluluuch me a derta er kid a monguu tial techall er tial klisiich el ngii a ngar tial kmal lungil el hong er a chedaol llechukl. El ngara ngklel a Jesus Kristo, amen.

Uleklatk

  1. Mesa “‘You Can’t Close My Heart’: Ghanaian Saints and the Freeze,” Jan. 6, 2016, history.lds.org.

  2. 2 Nephi 25:26.

  3. Email el mlara Nicholas Ofosu-Hene, Oct. 27, 2015.

  4. Mesa Angelo Scarpulla, “My Search for the Restoration,” Tambuli, June 1993, 16–20; email from Ezio Caramia, Sept. 16, 2016.

  5. Autobiography of Parley P. Pratt, ed. Parley P. Pratt Jr. (1938), 37.

  6. Mesa Moroni 10:4–5.

  7. Teachings of Presidents of the Church: Ezra Taft Benson (2014), 141.

  8. Thomas S. Monson, “Dare to Stand Alone,” Liahona, Nov. 2011, 62; dirrek mesa Thomas S. Monson, “Priesthood Power,” Liahona, May 2011, 66; A Prophet’s Voice: Messages from Thomas S. Monson (2012), 490–94.

  9. A President Thomas S. Monson a ulsisechakl: “A rokui loba priesthood a kirir el mesuub chedaol llechukl ra bek el sils. … Ak yaksok er kau el kmo, alsekum me koba Aaronic malechub a Melchizedek Priesthood, el kmo alsekum eng blak a rengum el mesuub chedaol, e a klisichem el odngakl a ngibesereng a melai a uekrael er a Chedaol Reng a mo mesisiich” (“Be Your Best Self,” Liahona, May 2009, 68).

  10. Alma 28:14.

  11. “Ak yaskok er kau er chelechang el mong, alsekum eng bek el sils el donguiu a llel a [Babier er a Mormon] e otirakl a osisecheklel, A Dios a mo chubelii er a derta el ngelekel a Zion ma Ikelesia a klengeltengat el dirkak dengai” (Teachings: Ezra Taft Benson, 127).

  12. Marion G. Romney, “The Book of Mormon,” Ensign, May 1980, 67.

  13. Mesa, okesiu, el ngar sel dai er a Babier er a Mormon; 1 Nephi 11; 2 Nephi 25; Mosiah 16; 18; Alma 5; 12; Helaman 5; 3 Nephi 9; Mormon 7.

  14. Mesa, okesiu, 2 Nephi 2; 9; Mosiah 3; Alma 7; 34.

  15. Mesa, okesiu, 2 Nephi 31; 3 Nephi 11; 27.

  16. Mesa 3 Nephi 11–28.