2010–2019
Mie Manaman nan Pwuhko
Oakotohpe 2016


Mie Manaman nan Pwuhko

Manaman keieu laud en Pwuhk en Mormon iei wahn eh waikitaildo oh kitail eri karanihla Sises Krais.

Ni Suhn 14, 1989, kapworment en Ghana kauhdi doadoahk en Mwomwohdiso en Sises Krais en Souleng en Imwin rahn akan nan weio pwehki sawewe kei me irail ahniki me pid duwen Mwomwohdiso wet. Kopwormento kihsang ahn Mwomwohdisoh dipwsou koaros, oh kemwekid koaros en misineri uhdi. Tohn Mwomwohdiso, me kin kahdaniki ansouo “uhdi de kundi,” [irail kin] wia arail kak koaros pwe ren momourki rongamwahuo ni sohte patpene en branch kan de sawas en misineri kan. Me tohto koasoaien kangong kan me pid duwen towe kan arailkin kolokol marain en rongamwahuo pwe en kin wie lingelingaling sang ni arail kin kaukaudok nan imwarail kan oh kin sawaspene nin duwen arail wia tohnpadahk kei oh kin pas ni ihmw kan.

Kedekedeo sawehwe me kopworment ahnikio eri kopwungpwungla, oh ni Nohpempe 30, 1990, arail kahpwalo ahpw imwisekla oh doadoahk en Mwomwohdiso eri pwurehng tepda wiawi.1 Mwurin mwo, miehier nanpwungmwahu nan pwungen Mwomwohdiso wet oh kopworment en Ghana.

Tohn Mwomwohdiso kan me iang mi nan apwalo mwadang kasalehda kapai tohto me kodohng irail nan ansou apwalo. Tohto irail me arail pwoson kakehlaila sang nii kahpwal me irail lelohngo. Ahpw ehu kapai en ansou apwalo wiawi ni wiepe ehu me sohte kalap wiawi.

Nicholas Ofosu-Hene wia emen polismen pwulopwul me pwukoahki apwalih ehu ahn LDS ihmwsarawi nan ansou apwalo. Ah pwukoah iei en tetehk ihmwo nihpwong. Ansou me Nicholas lella ni ihmw sarawio, e kilangada me soahng koaros nan ihmwo mwerpesengehr; tehn doaropwe, pwuhk, oh dipwsou teikan pingida. Nan pwungen liselipingo, e kilangada ehu Pwuhk en Mormon. E song pohnsehse pwuhko pwehki e kin rong me dene e suwed. Ahpw e kehn ehu soangen pepehm me sair. Sohla pwand, Nicholas sohla kak pohnsehse pwuhko. E pwekada. E kehn pepehm me e anahne tepda wadek. E wadek pwohngo, pilen mese wie kerekeredi likinsepe ko ni eh wie wadawad.

Tepin eh pwekadao, e wadekala koaros 1  [keieun] Nephi. Keriapak en ah wadawado, e wadekala koaros 2  [keriau en] Nephi. Ansou me e lella nan 2  [keriau en] Nephi irelaud 25, [rieisek-limau], e wadekada ire pwukat: Oh se koasoaia Krais, se pereniki Krais, se kalohki Krais, se kohpada Krais, oh se kin ntingiedi duwen aht kokohp kan, pwe nait seri kan en kak ese dahme irail anahne tehkada ong lapwepen diperail kan.”2

Ansouohte, Nicholas kehn Ngehno ni kehlail kahrehkihong eh tepida makiaki. E pehmada me nan ansou me e wie wadawado e alehdi kadehde kei en pali ngehn me ni mehlel pwuhko wia pwuhk sarawi, me keieu pwung me e wadakehr. E esehda me Souleng en Imwin-rahn akan, weksang dahme e rongehr, udahn kamehlele Sises Krais. Mwurin kahpwal en ansou eh uhdiero oh mesineri ko pwuralahr Ghana, Nicholas, ah pwoud, oh nah seri ko iangala Mwomwohdiso wet. Ansou me I tuhwong nan pahr nekiero, e wia emen kaun en polis, oh wie papah ni eh wia president en Tamale Ghana District en nan Mwomwohdiso wet. E nda, “Mwomwohdiso wekidala ahi mour. … I kapingkihong Koht Wasalapalahpie pwehki eh ketin kahluwaiedohng nan rongamwahu wet.”3

Alibert Davies, pil emen mehn Ghana, iang emen kempoakepah kohla ni ehu atail ihmw sarawi kan, wasa me kempoakepao pahn towehda ehu mihting en presidensi. Nindoken eh awiawih kempoakepao, Alibert wadek ehu pwuhk me e kilangada limwah. Ansou me mihtingo nek, Alibert men wahda pwuhko kohla nimweo. E alehdi mweimwei en wahda kaidehnte pwuhko ahpw pil ehu Pwuhk en Mormon. Ansou me e lella ni mweo, e tepda wadek Pwuhk en Mormon-o. E sohla kak pwilikihdi. E wadek limwahn marain en kandel lao lel kiloak 3:00 nisohrahn. E wia mwo pwohng kei, oh alehdi pepehm laud sang nan dahme e wadekehr oh dahme e pehmehr. Ansouet Albert wialahr emen tohn Mwomwohdiso wet.

Angelo Scarpulla tapiada ah kaskuhlki duwen palien lamalam ni ansou me e sounpar 10 [eisek] nan Italy, wasa me e wia uhdake. E wiahla emen samorou oh papah ah mwomwohdiso ni loaloapwoat. Mwurin ansou kis e tepda peikasaliki dahme e kamehlele, oh ih eri rapahki oh alehdi ansou mwahu en kalaudehla ah sukuhl. Ahpw ni ansou me e wie kalakalaude ah skuhl, ah kahpwal pil lalaudla. Dahme e wadek oh pehm kasalehiong me udahn mie pwupwilahn padahk mehlel me Sises oh Wahnparon ko padahngkiher. Angelo rapahki sapwellimen Koht mwomwohdiso mehlelo nan palien lamalam tohto ahpw e sohte alehdi dahme e raparapahkio erein pahr tohto.

Ehu rahno e tuhwengdi aramas riemen me wia tohn Mwomwohdiso wet me sewesewese mesineri kan rapahki aramas me irail kak padahkih. E pehm anahnen en rong ira oh perenda nan ah rongorong ara kalohko. Angelo alehda Pwuhk en Mormono sang pein nsene.

Soutiko e tepda wadek pwuhko. E pehmada peren mehlel kipehdi. Sang manaman en Ngehno, Koht ketkihong Angelo pepehm mehlel me nan Pwuhk en Mormon-o e pahn diar padahk mehlel me e raparapahki sounpar tohto. E ahnekihda pepehm kansenamwahu ieu. Dahme e wadekada oh dahme e esehda sang rehn misineri kan kamehlelehiong me dahme e medemedewe me mie pwupwila lap wiawi, ahpw e pil esehda me sapwellimen Koht Mwomwohdiso mehlelo kopwurupwurdohr pohn sampah. Mwurin ansou kis Angelo pepdaisla nan Mwomwohdiso wet.4 Ahnsou me I tepin tuhwengdi, e wia president en Rimini Branch en atail Mwomwohdiso nan Italy.

Dahme Nicholas, Alibert, oh Angelo kehnsangehr Pwuhk en Mormono, e duwehte irair me Parley  P. Pratt lellohng:

“Ni ngoang I pahkpeseng [pwuhko]. ... I wadek rahno pwon; mwenge wia katoutou ieu rehi, I sohte inangih mwenge; meir wia katoutou ieu rehi ni ansou me pwohng lelledohr, pwe I men wadawad sang ei men meir.

“Ni ei wadek, ngehnen Kauno tihier pohi, oh I esehier oh wehwehkiher me pwuhko mehlel, me wehwe oh sansal duwehte aramas emen eh ese oh wehwehkihla me e mie. Ahi peren met unseklahr, nin duwen ei kin wiewia, oh I perenda laud sang ahi pahtou kan, tohnmetei kan oh doadoahk kan en ahi mour.”5

Ekei aramas kehnehr manaman kehlail en Pwuhk en Mormon ni tepin arail pahkpesengo, a ekei a kadehdehn mehlelo kin kohdo ekis ekis ni arail kin wadewadek oh kapkapki. Ih soahng wet me wiawihongie. I tepin wadek Pwuhk en Mormon ansou me I tohn sukuhl en seminary me pwulopwul. Met iei Pwuhk en Mormon me I wadeko. I sohte kak ndahieng kumwail uhdahn ansou de wasa me e wiawie, ahpw wasahkis nan wadawado, I tepda kehn mehkot. Mie karakar ehu oh pepehm ehu me kin kohdo ansou koaros me I kin pahkpeseng pwuhko. Pepehmo laudla ansou me I wenla nan ahi wadawado. Pepehmo wiewiawi lelodo rahn wet. Ansou koaros me I kin pahkpeseng Pwuhk en Mormon, e rasohng mehn kamaurda [de switch]—Ngehno kin kereker tikitikdo nan ahi mongiong oh ahi pepehm.

Ong ekei aramas, arail kadehde en Pwuhk en Mormon kin kohdo ni wadekis, mwurin arail onop laud oh kapakap. Mie kempoakepahi men me wadek Pwuhk en Mormon raparapahki en ese ma e mehlel. E doadoahngki luhk me mie nan Moroni pwe en peki rehn Koht ni mohngiong mehlel,luhk me [koasoia] peki rehn Koht sang nan mongiong mehlel, ni ineng mehlel oh pwoson Krais, ma Pwuhk en Mormon mehlel.6 Ahpw e sohte mwadang alehdi pasapeng en inoun ngehno. Ahpw, ehu rahno e wie medemedewe laud, ni eh tangatang kohla pohn ahlo, Ngehno kadehdehiong ih mehlel en Pwuhk en Mormon. Uwen eh direkihla peren laud e kapiredi wenihmwtok en sidohsao oh werikihla, kaidehn ong aramas emen ahpw sampah pwon, “E mehlel!”

Ma atail kadehde en Pwuhk en Mormon miehda ni tepin atail pahkpeseng de mwurin ansou kei, e pahn mie lipwe rehtail ansou koaros ma kitail kin wadwadek oh momourki padahk kan. Presiden Ezra Taft Benson padahngki: Mie manaman nan pwuhko me pahn tepda pwilwohng nan amwail mour kan ni ansou me kumwail pahn tepda mehlelki amwail onop pwuhko. Kumwail pahn diarada manaman kehlail en powehdi kasongosong. Kumwail pahn diar manaman lauden pelian kasongisong. Kumwail pahn diar manaman en soikala likamw. Kumwail pahn diar manaman en mihmihte nan ahl inen oh tehtikitiko.”7

I kangoangehki koaros me alehdi padahk wet, iangahki irail me kolokol Priesthood en Aaron me tuhpene nan mihting wet soutiket, en esehla manaman en Pwuhk en Mormon. Ni duwen ahn President Thomas S. Monson eh kangoangehkinkitail: Wadek Pwuhk en Mormon. Medemedewe ah padahk kan. Idek rehn Sahm Nanleng ma e mehlel.”8 Ansou me kumwail pahn wia met kumwail pahn kehn Ngehn en Koht nan amwail mour kan. Ngehno pahn wia kisehn amwail en kak kadehde me Pwuhk en Mormon mehlel, me Joseph Smith wia soukohp en Koht, oh me Mwomwohdiso en Sises Krais en Souleng en Imwin-rahn akan iei sapwellimen Koht Mwomwohdiso mehlel pohn sampah rahnwet. Kadehdeo pahn seweseikumwail powehdi kasongosong.9 E pahn kaunopkumwailda ong ‘malipilip kesempwal en pwerisek … en doadoahk nan sapwellime Kauno mwetuwelo.”10 E pahn rasohng ehu anke kehlail ansou me kadipadip kan koasoai sapwung kan pahn doadoahk pwehn pelian amwail pwoson, oh e pahn rasohng ehu poahsoan tengeteng en paip ansou me kalelapak apwal akan pahn kohieng kumwail ni amwail sohte kak sapeng, nan ansouohte. Kumwail pahn kak kasawiada mehlel sang sapwung, oh kumwail pahn kehn pepehm en Ngehn Sarawi eh kamkamehlelehieng amwail kadehde ni amwail pahn wie wadwadek Pwuhk en Mormon erein amwail mour.

I pil kangoangehki pahpa oh nohno koaros me rongorong de wadwadek padahk wet en wiahki Pwuhk en Mormon ehu mehkot kesempwal nan imwamwail kan. Ansou me nait seri ko wie kekeirda, se kin wadek Pwuhk en Mormon ansou me se kin mwongehn nimenseng. Met iei dahme se kin kilelehkihdi wasa se wadeko. Ni tapio iei ire ieu sang President Benson me inouki me Koht pahn kamwerehdiong pohtail kapai ma kitail pahn wadek Pwuhk en Mormon.11 Ni imwio iei inou wet me sang President Marion G. Romney, me wia sounsawas nan Presidensi Keieu mahs: I pehm ni mehlel me ma, nan imwatail kan, pahpa oh nohno kan pahn kin kapakap oh kalap wadek sang nan Pwuhk en Mormon ni kapakap oh ansou koaros, ni ara ehupene de pil iangahki neira seri kan, manaman en pwuhko mwahuo pahn kohdo oh audehla imwatail kan oh koaros me kin koukousoan loalle. ... Ngehn en men akpwung pahn sohrala. Nohno oh pahpa kan pahn kaweid neira seri kan ni limpoak laud oh erepit. Seri kan pahn kak rong oh peikiong kaweid en nohno oh pahpa. Mour pwung pahn laudla. Pwoson, kopworopwor oh limpoak—limpoak mwakelekel en Krais—pahn kehlail nan imwatail kan oh atail mour kan, kahrehda eh pahn mie meleilei, popohl oh peren.”12

Met, sounpar tohto mwurin nait seri ko arail kohkohsang ni aht wasahn kousono oh apwapwalih pein arail peneinei kan, se kak kilang ni mehlel pweidahn ahn President Romney inouo. Aht peneinei sohte ekis unsek, ahpw se kak kadehdehki manaman en Pwuhk en Mormon oh kapai kan me kin wadewadek wadohr oh kin wie weuwahdohng nan mour en aht peneinei unsek.

Manaman keieu kesemwpal en Pwuhk en Mormon iei wahn eh kin waikitaildo pwe kitail en karaniala Sises Krais. E wia ehu kadehde kehlail en Ih oh Sapwellime kapwukoah en komouro.13 Sang nan pwuhko kitail wewehkihla duwen kesempwal oh manaman en Sapwellime Tomwo.14 Pwuhko kin padahngki duwen Sapwellime padahk ni sansal.15 Oh pwehki iralaud kaselel kan me kin kawehwehda duwen Krais me ketin iasahro eh ketila rehn men Nephi kan, kitail kilang oh kehn Sapwellime limpoak, kapai, oh padahk ong aramas oko oh esehla me E pahn ketin wiahiong kitail soahngohte, ma kitail kohdo Reh sang ni momourki Sapwellime rongamwahuo.16

Riei ko, I kadehdeki manaman en Pwuhk en Mormon. Ma e wadawad ni lokaiahn wai, Italy, de Frence, ni nting de dipwsou me electronic. I diaradahr pepehm kaselelohte me kin kohsang nan iralaud kan oh iretikitik kan ong nan ahi mour. I kadehdehki eh kak wiahieng kitail en karanihala Krais. I kapakapki me emen emen kitail pahn doadoahngki ni unsek manaman me mie nan pwuhk sarawi kaselel wet. Ni mwaren Sises Krais, amen.

Iren Sawas akan

  1. Tehk “‘You Can’t Close My Heart’: Ghanaian Saints and the Freeze,” Jan. 6, 2016, 2016, history.lds.org.

  2. 2 Nephi 25:26.

  3. Email from Nicholas Ofosu-Hene, Oct. 27, 2015.

  4. Tehk Angelo Scarpulla, Angelo Scarpulla “My Search for the Restoration,” Tambuli, June 1993; 16–20; email sang Ezio Caramia, Septempe 16, 2016.

  5. Autobiography of Parley P. Pratt, ed. Parley P. Pratt Jr. (1938), 37.

  6. TehkMoroni 10:3–5.

  7. Teachings of Presidents of the Church: Ezra Taft Benson (2014), 141.

  8. Thomas S. Monson, “Dare to Stand Alone,” Liahona, Nov. 2011, 62; pil kilang Thomas S. Monson, “Priesthood Power,” Liahona, May 2011, 66; May 2011A Prophet’s Voice: Padahkkan sang rehn Thomas S. Monson (2012), 490–94.

  9. Presiden Thomas S. Monson ketin padahngki: Koaros me kolokol prihsduhdo uhdahn pahn kin wadek neirail pwuhk sarawi kan rahn koaros. …I inoukihong kumwail, ma kumwail kol Aaronic de Melchizedek Prihsduhd, me ma kumwail pahn loaloapwoationg onop pwuhk sarawi kan, amwail manaman en powehdi kasongosong oh alehdi kaweid en Ngehn Sarawi nan mehkoaros me kumwail kin wia pahn keirda” (“Be Your Best Self,” Liahona, May 2009, 68).

  10. Alma 28:14.

  11. I inoukihong kumwail me sang met kohla, ma kitail pahn wadek rahn koaros sang nan tehn doaropwe kan en [Pwuhk en Mormon] oh momourki padahk kan, Koht pahn ketin kamwerehdi pohn emen emen seri nan Zion oh nan Mwomwohdiso kapai me saik me wehwehki lelodo ansouet” (Teachings: Ezra Taft Benson, , 127).

  12. Marion G. Romney, “The Book of Mormon,” Ensign, May 1980, 67.

  13. Tehk, karasepe, title page en Pwuhk en Mormon; 1 Nephi 11; {2 Nephi 25; Mosiah 16; 18; Alma 5; 12; Helaman 5; 3 Nephi 9; Mormon 7.

  14. Tehk, karasepe, 2 Nephi 2; 9; Mosiah 3; Alma 7; 34.

  15. Tehk, karasepe, 2 Nephi 31; 3 Nephi 11; 27.

  16. Tehk 3 Nephi 11–28.