Peb Yuav Mus Cuag Leej Twg?
Thaum kawg, peb txhua tus yuav teb tus Cawm Seej lo lus nug hais tias: “Nej yuav tso kuv tseg thiab los?”
Ob peb xyoos tas los kuv tsev neeg tau mus xyuas Thaj Av Dawb Huv. Ib lub sij hawm uas kuv nco ntsoov yog thaum peb mus xyuas chav sab saud nyob hauv Yeluxalees, uas yog qhov chaw tib neeg hais tias Yexus noj Pluas Mov Kawg.
Thaum peb sawv hauv qhov chaw ntawd, kuv nyeem rau lawv los ntawm Yauhas 17, thaum Yexus thov Vajtswv pab nws cov thwj tim:
“Kuv thov … kom lawv thiaj yuav koom ib lub siab ib yam li koj thiab kuv koom ib lub siab. …
“Tsis yog kuv thov koj pab cov neeg no xwb, tiam sis kuv thov koj pab cov neeg uas hnov tej lus uas lawv qhia thiab los ntseeg kuv;
“Kom lawv koom ib lub siab; Txiv, thov cia lawv nyob hauv wb, ib yam li koj nyob hauv kuv thiab kuv nyob hauv koj; thov koj pab kom lawv ua tau ib lub siab.”1
Kuv txais kev tshoov siab loj heev thaum kuv nyeem tej lus no thiab kuv thov Vajtswv nyob hauv qhov chaw dawb huv ntawd hais tias kuv yeej yuav koom siab nrog kuv tsev neeg thiab kuv Leej Txiv Saum Ntuj Ceeb Tsheej thiab Nws Leej Tub.
Peb txoj kev sib raug zoo nrog tsev neeg, phooj ywg, tus Tswv, thiab Nws cov Ntseeg yog qhov uas muaj nqi tshaj nyob hauv peb lub neej. Vim cov neeg no tseem ceeb heev, peb yeej yuav tsum hlub, pov hwm, thiab saib xyuas lawv.
Ib zaj dab neeg nyob hauv vaj lug kub uas ua rau peb tu siab heev yog thaum “[tus Tswv cov pab coj] muaj coob leej” uas tsis txaus siab lees yuav Nws tej lus thiab tej lus qhuab qhia, lawv thiaj li “tso Yexus tseg thiab tsis nrog nws mus lawm.”2
Thaum cov pab coj no mus, Yexus nug nws Kaum Ob tug Thwj Tim hais tias, “Nej yuav tso kuv tseg thiab los?”3
Petus teb hais tias:
“Tus Tswv, … peb yuav mus cuag leej twg? Koj tej lus pub tau txoj sia ib txhis rau neeg.
“Nim no peb ntseeg thiab paub tseeb hais tias koj yog tus dawb huv uas Vajtswv txib los.”4
Thaum lub sij hawm ntawd, thaum lwm tus tsom ntsoov rau tej yam uas lawv tsis kam lees yuav, cov Thwj Tim tsom ntsoov rau qhov uas lawv twb ntseeg thiab paub lawm, yog li ntawd, lawv tseem nrog nraim Yexus Khetos.
Tom qab ntawd, thaum Hnub Peetekos, Kaum Ob tug Thwj Tim tau txais lub txiaj ntsim Vaj Ntsuj Plig Dawb Huv. Lwav ua siab loj ua tim khawv txog Khetos thiab pib to taub ntxiv txog Yexus tej lus qhia.
Niaj hnub no yeej zoo ib yam. Nyuaj rau ib txhia ntseeg Yexus Khetos cov lus caw thiab tseem ua nyuaj rau lawv lees txais. Muaj ib txhia uas ua nyuaj rau lawv to taub ib tsab cai los yog tej lus qhia ntawm lub Koom Txoos. Lwm tus nrhiav tej yam nyuaj to taub txog peb zaj keeb kwm los yog tej yam uas cov mej zeej thiab cov thawj coj ua yuam kev, tsis hais thaum yav tas los thiab tam sim no los yog. Nyuaj rau ib txhia ua raws li kev teev ntuj uas qhia tias yuav tsum ua ntau heev. Thiab, ib txhia twb “dhuav ua tej hauj lwm zoo” lawm.5 Vim tej yam no thiab lwm yam, ib txhia ntawm lub Koom Txoos cov mej zeej tsis tshua muaj siab ntseeg, es lawv xav tias tej zaum lawv yuav nrog cov uas tso Yexus tseg thiab tsis nrog nws mus lawm.
Yog nej cov leej twg txoj kev ntseeg qaug zog me ntsis, kuv xav nug nej lo lus ib yam li Petus nug hais tias: “[Nej] yuav mus cuag leej twg?” Yog tias nej xaiv kom tsis tshua muaj siab ntseeg los sis tawm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, nej yuav mus cuag leej twg? Nej yuav ua dab tsi? Kev txiav txim siab kom “tsis nrog” cov mej zeej ntawm lub Koom Txoos thiab tus Tswv cov thawj coj yuav ua rau nej raug xwm txheej thaum yav tom ntej uas nej tsis pom tam sim no. Tej zaum muaj tej lus qhuab qhia, tej tsab cai, ib feem ntawm zaj keeb kwm uas ua rau nej tsis tshua muaj siab ntseeg, thiab nej xav tias tib txoj kev uas yuav ua rau nej txoj kev nyuaj siab txhawj xeeb tam sim no ploj mus yog kev tsis nrog Haiv Neeg Ntseeg mus ntxiv. Yog nej tau ua neej ntev npaum li kuv, nej yuav paub hais tias tej yam zoo li no yeej tsis kav ntev. Tej zaum ib lub tswv yim tshiab los yog kev tshwm sim yuav qhia tej yam tshiab txog ib qho teeb meem. Cia li nco ntsoov tias, Kev Muab txoj Moo Zoo Txum Tim Rov Qab Los tsis tau tiav lawm.
Tsis txhob muab tej yam tseeb zoo kawg uas tshwm sim dhau los ntawm tus Yaj Saub Yauxej Xamiv tso tseg. Cia li nyeem, xav, thiab ua raws li Khetos cov lus qhuab qhia nyob hauv Phau Ntawv Maumoos tsis tu tsis tseg.
Tsis txhob nres kom muab sij hawm rau tus Tswv thaum nej rau siab xav paub tiag tiag txog tej uas tus Tswv tau muab tshwm sim. Raws li kuv tus phooj ywg zoo thiab tus koom nrog kuv ua hauj lwm Txwj Laug Neal A. Maxwell hais tias, “Peb yuav tsum tsis txhob xav tias … vim peb tsis pom qab piav txog ib yam ces yeej yuav piav tsis tau txog yam ntawd.”6
Yog li ntawd ua ntej nej txiav txim siab tias nej yuav mus thiab ua rau nej sab ntsuj plig raug xwm txheej, kuv xav kom nej tos thiab ua tib zoo xav ua ntej nej muab qhov uas ua rau nej muaj ib zaj lus tim khawv txog Yexus Khetos lub Koom Txoos tso tseg. Cia li tos thiab xav txog tej yam uas nej hnov thiab vim li cas nej tau hnov tej ntawd. Cia li xav txog lub sij hawm thaum tus Vaj Ntsuj Plig Dawb Huv ua tim khawv rau nej txog qhov tseeb nyob mus ib txhis.
Nej yuav mus qhov twg kom nrhiav lwm tus uas ntseeg tias muaj Leej Niam Leej Txiv Saum Ntuj Ceeb Tsheej uas hlub nej, uas qhia peb paub ua li cas kom rov qab los nrog Nkawd nyob mus ib txhis?
Nej yuav mus qhov twg kom kawm txog ib tug Cawm Seej uas yog nej tus phooj ywg zoo tshaj plaws, uas raug txom nyem rau nej tej kev txhaum thiab raug “tej kev mob thiab kev tsim txom thiab kev haub ntxias txhua yam” kom “nws lub siab thiaj li yuav muaj puv nkaus kev hlub tshua, raws li cev nqaij daim tawv, xwv kom nws yuav paub pab nws cov neeg raws li ntawm cev nqaij daim tawv raws li lawv tej kev qaug dag qaug zog,”7 tsis hais kev mob uas los ntawm qhov uas yus tso kev ntseeg tseg?
Nej yuav mus qhov twg kom kawm ntxiv txog Leej Txiv Saum Ntuj Ceeb Tsheej txoj hau kev kom peb zoo siab thiab nyob kaj siab lug mus ib txhis, ib txoj hau kev uas muaj tej lus qhia zoo kawg nkaus rau peb lub neej hauv lub ntiaj teb no thiab nyob mus ib txhis? Cia li nco ntsoov tias, txoj kev cawm seej ua rau peb lub neej no muaj lub ntsiab thiab muaj lub hom phiaj.
Nej yuav mus qhov twg kom nrhiav tau ib lub Koom Txoos uas muaj txiv neej thiab poj niam mob siab ua hauj lwm rau tus Tswv thaum lawv qhia thiab txhawb nqa nej thiab nej tsev neeg?
Nej yuav mus qhov twg nrhiav tau cov yaj saub thiab cov thwj tim uas muaj txoj sia nyob, uas Vajtswv hu kom nej muaj kev pab ntxiv, nej thiaj yuav txais kev ntuas, kev to taub, kev nplij siab, thiab kev tshoov siab kom kov yeej tej teeb meem niaj hnub no?
Nej yuav mus qhov twg kom nrhiav tau ib co neeg uas ua raws li kev cai thiab tej ntsiab cai uas nej xav qhia rau nej cov me nyuam thiab cov xeeb leej xeeb ntxwv?
Thiab nej yuav mus qhov twg kom muaj kev xyiv fab uas los ntawm cov kab ke thiab kev khi lus cawm neeg txoj sia nyob hauv lub tuam tsev?
Cov kwv tij thiab cov muam, kev ua neej raws li Yexus Khetos txoj moo zoo yeej yog ib qho nyuaj. Yeej ib txwm zoo li ntawd, thiab yeej yuav zoo li ntawd. Kev ua neej zoo li cov neeg uas taug ib txoj kev ntxhab thiab nyuaj. Yeej yog ib qho tsim nyog uas tej lub sij hawm peb yuav nres ntawm txoj kev kom ua tau pa, kom saib peb mus qhov twg, thiab rov qab xav seb peb puas taug kev nrawm txaus. Tsis yog txhua tus yuav tsum nres ntawm txoj kev, tiam sis thaum nej yuav tsum ua li ntawd nej tsis ua txhaum dab tsi. Muaj tseeb tiag, yog ib qho zoo heev thaum yus siv lub sij hawm ntawd kom rov qab haus cov dej uas cawm txoj sia ntawm Yexus Khetos txoj moo zoo.
Cov uas raug xwm txheej yog cov uas xaiv kom ua loj leeb tawm ntawm txoj kev uas yuav mus rau tus ntoo cawm txoj sia.8 Tej lub sij hawm peb yuav kawm thiab paub, thiab tej lub sij hawm peb yuav tsum ntseeg thiab cia siab.
Thaum kawg, peb txhua tus yuav teb tus Cawm Seej lo lus nug hais tias: “Nej yuav tso kuv tseg thiab los?”9 Peb txhua tus yuav tsum nrhiav kev teb lo lus nug ntawd. Rau ib txhia, yooj yim rau lawv nrhiav lo lus teb ntawd, rau ib txhia, nws nyuaj heev. Kuv tsis paub vim li cas yooj yim rau ib txhia ntseeg thiab tsis yooj yim rau lwm tus. Kuv tsuas zoo siab uas kuv paub tias muaj tej lus teb, thiab yog peb nrhiav tej lus ntawd—rau siab nrhiav vim peb xav paub tiag tiag thiab peb thov Vajtswv kawg siab kawg ntsws—thaum kawg peb yuav nrhiav tau lus teb rau peb tej lus nug thaum peb ua raws nraim li txoj moo zoo. Thaum kuv ua hauj lwm qhuab qhia, kuv twb paub cov uas tau tso txoj moo zoo tseg thiab lawv rov qab los tom qab lawv raug kev sim siab.
Kuv cia siab hais tias peb yuav caw Vajtswv cov me nyuam ntxiv kom nrhiav thiab ua raws li txoj moo zoo kom lawv “noj cov txiv, uas yog cov uas qab tshaj txhua yam txiv huv tib si.”10
Kuv xav kom peb yaum, lees txais, to taub thiab hlub cov uas tsis tshua muaj siab ntseeg. Peb yuav tsum tsis txhob tso peb cov kwv tij thiab cov muam tseg. Peb txhua tus nyias nyob nyias qhov chaw ntawm txoj kev, thiab peb nyias yuav pab nyias li ntawd.
Ib yam li peb yuav tsum ncav tes pab tos txais cov neeg hloov siab los ntseeg tshiab, peb kuj yuav tsum txhawb nqa cov uas muaj lus nug thiab tsis tshua muaj siab ntseeg lawm.
Hais txog ib zaj lus piv txwv ntxiv, kuv thov txhua tus uas xav tias lawv yuav tawm “lub Nkoj Qub Xi-oos,” uas Vajtswv thiab Yexus Khetos tsav, kom lawv ua tib zoo xav ua ntej lawv ua li ntawd.
Cia li paub hais tias txawm cua daj cua dub thiab nthwv dej nplawm lub nkoj qub no, tus Cawm Seej nyob hauv lub nkoj thiab txawj ua rau cua daj cua dub tus thaum Nws txib hais tias, “Cia li tus.” Mus txog thaum ntawd, peb yuav tsum tsis txhob ntshai, thiab peb yuav tsum rau siab ntseeg tsis tu tsis tseg thiab paub tias, “cua thiab dej yuav mloog nws lus.”11
Cov kwv tij thiab cov muam, kuv cog lus rau nej los ntawm tus Tswv lub npe hais tias Nws yeej yuav tsis tso Nws lub Koom Txoos tseg thiab Nws yeej yuav tsis tso peb tseg hlo li. Cia li nco ntsoov Petus tej lus teb tus Cawm Seej tej lus nug:
“Peb yuav mus cuag leej twg? Koj tej lus pub tau txoj sia ib txhis rau neeg.
“Nim no peb ntseeg thiab paub tseeb hais tias koj yog tus dawb huv uas Vajtswv txib los.”12
Kuv ua tim khawv tias “tsis muaj dua lwm lub npe los sis lwm txoj kev los sis lwm hom cuab yeej uas txoj kev cawm seeg yuav los tau rau noob neej, tsuas yog nyob hauv thiab dhau los ntawm Khetos lub npe … xwb.”13
Kuv kuj ua tim khawv tias Yexus Khetos tau hu cov thwj tim thiab cov yaj saub niaj hnub no thiab tau muab Nws lub Koom Txoos txum tim rov qab los nrog rau cov lus qhia thiab cov lus txib ua ib qho chaw nkaum ntawm kob cua daj cua dub, thiab ntawm txoj kev npau taws uas yuav muaj los tsuas yog cov neeg hauv lub ntiaj teb hloov siab lees txim thiab rov qab mus cuag Nws.14
Kuv kuj ua tim khawv tias tus Tswv “caw lawv txhua leej txhua tus kom los cuag nws thiab los txais yuav nws txoj kev tshav ntuj; thiab nws yeej tsis tau txwv ib tug twg uas los cuag nws, tsis hais neeg tawv dub thiab tawv dawb, tsis hais tus raug txim los tus tsis raug, tsis hais poj niam los txiv neej; … thiab txhua txhia tus zoo tib yam nkaus rau Vajtswv.”15
Yexus yog peb tus Cawm Seej thiab tus Txhiv Dim, thiab Nws txoj moo zoo yuav coj peb rov qab mus nrog peb Leej Niam thiab Leej Txiv Saum Ntuj Ceeb Tsheej yog peb ua raws li txoj moo zoo thiab nrog Nws mus kev. Kuv ua tim khawv txog tej no los ntawm Yexus Khetos lub npe, amees.