Ani aj-ik’in tooxik?

K’iila chihab’ chaq, laa’in ut lin junkab’al xoowulak sa’ li Santil Ch’och’. Jun li xqak’ul li toj nink’oxla, a’an naq xqil li xkab’ xk’ojaril li kab’l, li na’ajej seraqinb’il naq li Jesus kixtzeka li Paswa.

Naq xaqxooko sa’ li na’ajej a’an, xinyaab’asi Jwan 17, b’ar wi’ li Jesus natz’aaman chiru lix Yuwa’ choq’ reheb’ lix tzolom:

“Nintijok chirixeb’ … re naq junaqeb’ a’an jo’ naq juno laa’o chiqib’il. …

“Moko ka’aj ta wi’ chirixeb’ a’in nintijok, chirixeb’ aj b’an wi’ li te’paab’anq we sa’ xk’ab’a’ li raatineb’;

“Re naq junaqeb’ ta chixjunileb’; jo’ naq laa’at, at inYuwa’, wankat wik’in ut laa’in aawik’in, re naq junaqeb’ ta ajwi’ a’an qik’in.”¹

Xtoch’e’ li waam chi us naq xwil li aatin a’in ut ak xin’ok chi tijok sa’ li loq’laj na’ajej a’an re tintz’aama naq junaqin junelik rik’in lin junkab’al ut rik’in lin Choxahil Yuwa’ ut rik’in li Ralal.

Li qakomonil rik’ineb’ li qajunkab’al, li qamiiw, li Qaawa’, ut lix Iglees k’ojob’anb’il wi’chik, nawan sa’ xyanqeb’ li k’a’ru q’axal aajel ru sa’ qayu’am. Rik’in naq jwal aajeleb’ ru li komonil a’in, tento raj te’oxloq’iiq, te’kole’q, ut te’ch’olaniiq.

Jun reheb’ li esil jwal ra rab’inkil sa’ loq’laj hu kik’ulman naq “naab’aleb’ lix tzolom [li Qaawa’]” ch’a’aj ke’ril xk’ulub’ankil lix k’utum ut lix tzol’leb’, ut “ke’sutq’iik chirixeb’, ut ink’a’ chik ke’rochb’eeni.”²

Naq yookeb’ chi elk li tzolom a’in, li Jesus kirileb’ li Kab’laju ut kixpatz’, “Ma teeraj ajwi’ xik laa’ex?”³

Laj Pedro kichaq’ok:

“Qaawa’, ani aj-ik’in tooxik? Aawik’in wank li aatin nak’ehok li junelik yu’am.

“Ut laa’o naqapaab’ ut naqanaw naq laa’at li Kristo, li Ralal li Yo’yookil Dios.”⁴

Sa’ li hoonal a’an, naq wankeb’ li neke’xk’oxla junes li k’a’ru ch’a’aj xk’ulub’ankil, eb’ li Apostol ke’xk’oxla junes li k’a’ru neke’xpaab’ ut neke’xnaw, ut xb’aan a’an, ke’kana rik’in li Kristo.

Moqon, sa’ xkutankil li Pentekostes, eb’ li Kab’laju ke’xk’ul li maatan re li Santil Musiq’ej. Ke’kawu xch’ool sa’ xnawom chirix li Kristo ut ke’ok chixtawb’al ru xk’utum li Jesus.

Moko jalan ta li nak’ulman anajwan. Wankeb’ li toj ch’a’aj neke’xk’ul xb’oqb’al rik’in li Kristo naq te’paab’anq ut te’kanaaq. Wankeb’ li tzolom li neke’elajik rik’in jun li taqlahom malaj k’utum sa’ li Iglees. Wankeb’ li neke’xtaw ch’a’ajkilal sa’ li k’a’ru xk’ulman qik’in junxil, malaj sa’ xmajelaleb’ li komon ut li jolominel, junxil jo’ ajwi’ anajwan. Wankeb’ li neke’xtaw ch’a’ajkilal sa’ jun li paab’aal li naraj naab’al li k’anjel. Ut wankeb’ li ak xe’lub’ “sa’ xb’aanunkil li us.”⁵ Jo’kan naq wankeb’ li neke’wiib’an sa’ xpaab’al, ut neke’xpatz’ ma usaq raj wi te’xtaaqeheb’ li “ke’sutq’iik chirixeb’, ut ink’a’ chik ke’rochb’eeni” li Jesus.

Wi yookat chi wiib’ank sa’ laa paab’aal, ninpatz’ aawe li k’a’ru kixpatz’ laj Pedro: “Ani aj-ik’in [tatxik]?” Wi nakakanab’ k’anjelak malaj wi nakakanab’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, b’ar tatxik? K’a’ru taab’aanu? Wi taaye naq “ink’a’ chik [taawochb’eeniheb’]” xkomon li Iglees ut li jolominel sik’b’ileb’ ru xb’aan li Qaawa’, taak’ul jun li nimla eek’asink li anchal ink’a’ taawil anajwan. Maare wan junaq tzol’leb’, junaq taqlahom, malaj jun esilal re junxil li nakatxk’e sa’ jun wech’ok-ib’ rik’in laa paab’aal, ut maare nakaweek’a naq k’a’ajwi’ tatruuq chixtuqub’ankil a’an wi “ink’a’ chik [taawochb’eeniheb’] laj Paab’anel. Wi taanumsi laa yu’am jo’ najtil xinnumsi lin yu’am laa’in, taak’e reetal naq wan li b’e b’ar wi’ chixjunil naxtuqub’ rib’. Jun na’leb’ musiq’anb’il malaj k’utb’esinb’il naru tixsaqenob’resi ru jun chik li na’leb’. K’e reetal, lix k’ojlajik wi’chik li evangelio maawa’ yal jun ajwi’ li k’ulum. Toj yoo b’an chi k’ulmank.

Maakanab’ li xnimal ru na’leb’ k’utb’esinb’il rik’in li Profeet aj Jose Smith. Maakanab’ rilb’al, xk’oxlankil, ut roksinkil lix tzol’leb’ li Kristo li wan sa’ lix Hu laj Mormon.

Matpalto’ sa’ xk’eeb’al ajwi’ laa hoonal choq’ re li Qaawa’ rik’in xyalb’al aaq’e chixtawb’al ru lix k’utb’esihom. Li chaab’il wamiiw ut wech aj k’anjel li Elder Neal A. Maxwell kixye, “Ink’a’ raj taqak’oxla … naq yal xmaak naq ink’a’ naru xch’olob’ankil k’a’ruhaq qab’aan, ink’a’ ajwi’ naru xch’olob’ankil.”⁶

Jo’kan naq chi toj maji’ nakasik’ li xuwajelil b’e re tat-elq, nink’e laa ch’ool naq taaxaqab’ aawib’ ut tatk’oxlanq chi us naq toj maji’ nakakanab’ li k’a’ru xatxk’am sa’ laa nawom chirix lix evangelio li Jesukristo junxil. Xaqab’ aawib’ ut k’oxla li k’a’ru ak xaweek’a arin ut k’a’ut naq xaweek’a. K’oxlaheb’ li hoonal naq li Santil Musiq’ej xch’olob’ chawu li na’leb’ re li junelik q’e kutan.

B’ar tatxik re xtawb’aleb’ ani li te’xwotz aawik’in laa paab’aahom re choxahil Na’b’ej Yuwa’b’ej li neke’xk’ut chiqu chanru toosutq’iiq rik’ineb’?

B’ar tatxik re xk’ulb’al aana’leb’ chirix jun li Kolonel li wan jo’ laa wamiiw, li xnumsi rahilal moko ka’aj ta wi’ choq’ re laa maak, re ajb’an wi’ “rahilal ut ch’a’ajkilal ut xyalb’al rix, li jar paay wan … re naq lix sa’ xch’ool nujenaqaq chi uxtaan, jo’ chanru li tz’ejwalej, re taaruuq tixnaw sa’ li tz’ejwalej chanru xk’eeb’al xtenq’ankileb’ lix tenamit jo’ chanru xmajelal lix kawilaleb’,”⁷ jo’ ajwi’ li majelal re xsachb’al laa paab’aal?

B’ar tatxik re xtzolb’al chirix lix na’leb’ li qaChoxahil Yuwa’ choq’ re xsahil ut xtuqtuukilal li qach’ool, jun li na’leb’ nujenaq chi chaq’al ruhil wankilal, k’utum, ut b’eresink choq’ re qayu’am? K’e reetal, li k’uub’anb’il na’leb’ re li kolb’a-ib’ naxk’e xyaalalil, rajb’al, ut xb’ehil li qayu’am arin.

B’ar tatxik re xtawb’al jun li k’anjel musiq’anb’il ut tuqub’anb’il ru chi us, b’ar wi’ nakak’ul laa tenq’ankil rik’ineb’ li ixq ut li winq li neke’xq’axtesi rib’ chi tz’aqal re te’k’anjelaq chiru li Qaawa’ choq’ aawe ut re laa junkab’al?

B’ar tatxik re xtawb’aleb’ li profeet ut li apostol, li b’oqb’ileb’ xb’aan li Dios re xk’eeb’al aawe jun chik laa tenq’ sa’ xk’ulb’al li na’leb’, li k’ojob’ank ch’oolej, ut laa musiq’ankil choq’ re li k’a’ru ch’a’aj?

B’ar tatxik re xtawb’aleb’ li ani neke’xyu’ami li na’leb’ ut taqlahom li nakapaab’ ajwi’ laa’at, ut li taawaj xnumsinkil reheb’ laa walal aak’ajol?

Ut b’ar tatxik re xk’ulb’al li sahil ch’oolejil li nachal rik’in li k’ojob’anb’il k’anjel ut li sumwnak re li santil ochoch?

Ex was wiitz’in, wan naq ch’a’aj xk’ulub’ankil ut xyu’aminkil li evangelio. Ak wanjenaq chi jo’kan, ut toj taawanq chi jo’kan. Wan naq anchal yooko chi taqsink sa’ jun li b’e jwal ch’a’aj. Maak’a’ reek’ naq taqaxaqab’ qib’ jo’q’ehaq sa’ li b’e re toohilanq, re taqatuqub’ wi’chik li qametz’ew, ut taqajal xjunpaatil li qayokb’. Moko chiqajunilo ta taqaj hilank, a’ut moko maak ta li hilank naq aajel ru xb’aan li k’a’ru yookat chixnumsinkil. Chi yaal, naru naq chaab’ilaq a’an choq’ reheb’ li ani neke’roski li hoonal a’an chi us re te’rak’ob’resi rib’ sa’ li yo’yookil ha’ re lix evangelio li Kristo.

Nachal li k’a’ru xuwajel naq wan ani li na’el sa’ li b’e li nak’amok toj sa’ li che’ re li yu’am.⁸ Wan naq naru tootzoloq, tootz’iloq rix, ut taqanaw li na’leb’ chi ch’olch’o, ut wan ajwi’ naq tento toopaab’aanq ut tooyo’oninq.

Sa’ xraqik chixjunil, chiqajunilo tento taqasume xpatz’om li Kolonel: “Ma teeraj ajwi’ xik laa’ex?”⁹ Chiqajunilo tento taqasik’ chanru taqasume li patz’om a’an. Wankeb’ li te’xsume chi moko ch’a’aj ta. Wankeb’ ink’a’. Ink’a’ ninb’aanu wib’ jo’ aj nawom re k’a’ut naq ink’a’ ch’a’aj li paab’ank choq’ re li jun, a’b’an cha’a’j choq’ re li jun chik. Yal ninb’antioxi naq junelik wan xsumenkil li patz’om, ut wi naqasik’—chi tiik ut chi anchal li qajom—timil timil taqataw xsumenkil li qapatz’om naq nokokanaaq sa’ xb’e li evangelio. Sa’ lin k’anjel laa’in, xinnaweb’ ru li xe’jalb’ehiik ut xe’sutq’iik chirix lix yalb’aleb’ rix lix paab’aal.

Tz’aqal wajom inch’ool, a’an naq taqab’oqeb’ naab’aleb’ chik li ralal xk’ajol li Dios chixtawb’al ut chi kanaak sa’ xb’e li evangelio re naq te’ruuq ajwi’ “[chixyalb’al] ru li che’, li q’axal atawaal wi’chik chiru chixjunil chik li ru che’.”¹⁰

Lin tz’aam laa’in, a’an naq taqatenq’aheb’, taqak’uleb’, taqab’iheb’, ut taqaraheb’ li ani ch’a’aj wankeb’ rik’in lix paab’aal. Maajo’q’e raj taqatz’eqtaana junaq li qas qiitz’in. Jalan jalanq li wanko wi’ sa’ li b’e, ut tento taqatenq’a qib’ chiqib’il qib’ aran.

Jo’ chanru taqaq’aluheb’ li ani yookeb’ chi ok jo’ ak’ komon, chi jo’kan raj ajwi’ taqaq’aluheb’ ut taqatenq’aheb’ li ani wankeb’ xk’a’uxl ut neke’wiib’an sa’ xpaab’aal.

Jo’ naxye jun aatin li ak eerab’ihom, laa’in nintz’aama naq li ani naxk’oxla elk sa’ li “Jukub’ Sion,” b’ar wi’ li Dios ut li Kristo neke’jolomink, tixxaqab’ rib’ ut tixtz’il rix chi us.

Chenawaq naq us ta li nimla kaq-sut-iq’ ut li nimla ha’ natenok chiru li tiixil jukub’, chek’e reetal naq li Kolonel wan chi sa’ ut wan xwankil chixq’usb’al li iq’ rik’in lix taqlahom, “Chexch’anaaq.” Naq toj chal re a’an, ink’a’ raj tooxuwaq, ut xaqxooq qapaab’al chixnawb’al naq “a’atq li iq’ ut li palaw neke’ab’ink chiru.”¹¹

Ex was wiitz’in, ninye eere sa’ lix k’ab’a’ li Qaawa’ naq a’an maajo’q’e tixkanab’ lix Iglees ut naq maajo’q’e tixkanab’ junaq sa’ qayanq. Chijultiko’q eere k’a’ru kixye laj Pedro re xsumenkil lix patz’om ut li raatin li Kolonel:

“Qaawa’, ani aj-ik’in tooxik? Aawik’in wank li aatin nak’ehok li junelik yu’am.

“Ut laa’o naqapaab’ ut naqanaw naq laa’at li Kristo, li Ralal li Yo’yookil Dios.”¹²

Ninch’olob’ xyaalal “naq maajun chik k’ab’a’ej taak’eemanq, chi moko junaq chik b’e malaj chan chik ru taaruuq taachalq wi’ li kolb’a-ib’ reheb’ li ralal xk’ajoleb’ li winq, ka’ajwi’ rik’in ut xb’aan lix k’ab’a’ li Kristo.”¹³

Ninch’olob’ ajwi’ xyaalal naq li Jesukristo xb’oqeb’ li apostol ut li profeet anajwan ut xk’ojob’ wi’chik lix Iglees rik’in li k’utum ut li taqlahom “choq’ muheb’aal chiru li kaq-sut-iq’, ut chiru li josq’il” li taachalq wi ta li tenamit ink’a’ te’xjal xk’a’uxl ut te’sutq’iiq rik’in li Kristo.¹⁴

Ninch’olob’ ajwi’ xyaalal naq li Qaawa’ “naxb’oqeb’ chixjunil chi chalk rik’in ut chixyalb’al lix chaab’ilal; ut maajun naxtz’eqtaana li nachal rik’in, q’eq ut saq, moos ut ach’ab’anb’il, winq ut ixq; … ut juntaq’eeteb’ chixjunil chiru li Dios.”¹⁵

Li Jesus, a’an laj Kolol qe ut laj Tojol qix, ut lix evangelio tixk’am qab’e chi sutq’iik rik’in li qaChoxahil Na’ Yuwa’ wi nokokana sa’ xb’e li evangelio ut wi naqataaqe xnums li roq’. A’an ninch’olob’ xyaalal sa’ lix k’ab’a’ li Jesukristo, amen.