Kōm Naaj Ilo̧k N̄an Wōn?

Jet iiō ko ļo̧k, baam̧le eo aō im n̄a kar loļo̧k Āne Kwojarjar. Juon iaan ememļo̧kjeņ ko aō eaiboojoj jān tūreep eo am kar loļo̧k eo n̄an ruum̧ eo ilōn̄ ilo Jerusalem, jikin eo jeļā kake an Kōjota Eo Āliktata.

Ke kom̧ kar jutak ilo jikin eo, iaar riit n̄an er jān Jon 17, ijo Jisōs eaar akweļap ippān Jemān kōn ro Rikaļoran:

“Ij jar kōn er … bwe ren juon wōt, āinwōt Kōj. …

“Ak I jab jar kōn rein wōt, a barāinwōt kōn ro renaaj lōke Eō kōn aer in naan;

“Bwe er otemjej ren juon, āinwōt Kwe, Jema ilo N̄a, im N̄a ilo Kwe, bwe er barāinwōt ren ilo Kōj.”¹

Iaar kanooj m̧weiur ke ij riiti naan kein im lo eō make jar ilo jikin jab eo ekwojarjar bwe in maron̄ iien otemjej erom juon wōt ippān baam̧le eo aō im ippān Jema Ilan̄ im ippān Nejin.

Kadkad ko ad raorōk ippān baam̧le ko, ro m̧ōttad, Irooj, im Kabun̄ eo kōjepļaaktok An rej ilubwiljin men ko me raorōk tata ilo mour. Kōnke kōn kadkad kein rekanooj in aorōk, rej aikuj kaorōki, kōjparoki, im naajdik.

Juon iaan bwebwenato ko pen ilo en̄jake ilo jeje ko rekwojarjar kar waļo̧k ke “elōn̄ iaan ro rikaļoran [Irooj]” kar lo bwe epen n̄an bōk katak ko An im katak, im raar “jab bar etetal Ippān .”²

Ke rikaļoor rein raar ilo̧k, Jisōs eaar oktak ļo̧k n̄an Jon̄oulruo ro im kajjitōk, “Kom̧ barāinwōt kōņaan ilo̧k ke?”³

Piter eaar uwaak:

“Irooj, kōm naaj ilo̧k n̄an wōn? Ippam̧ naan ko naan in mour indeeo.

“Im kōm ar tōmak im jeļā bwe Kwe Juon eo E kwōjarjar nejin Anij.”⁴

Ilo tōre jab eo, ke ro jet raar kalimjōk ta eo rejjab maron̄ bōke, Rijilōk ro raar kālet n̄an kalimjōk ta eo raar tōmak im jeļā, im āinwōt juon tōprak, raar pād wōt ippān Kraist.

Tok ālik, ilo raan in Pentecost eo, Jon̄oulruo eo eaar bōk menin letok eo an Jetōb Kwojarjar. Raar erom kijin̄en̄e ilo kam̧ool eo aer kōn Kraist im kar jino meļeļe eļapļo̧k kōn katak ko an Jisōs.

Rainin ejjab oktak. N̄an jet, kūr eo an Kraist n̄an tōmak im ej wōnm̧aanļo̧k wōt im pād ilo an pen—ak pen n̄an bōke. Jet rikaļoor rej kakkōt wōt n̄an meļeļe juon kakien ak katak an Kabun̄ in. Jet rej lo n̄ūrbōktak ilo bwebwenato eo ad ak ilo jab wānōk ko an jet ro uwaan ak ritōl, jem̧aan im kiiō. Jet rekab de lo epen n̄an mour kōn kabun̄ me ej aikuj kanooj ļap karmejete. Āliktata, jet raar erom “m̧ōk ilo kōm̧m̧an em̧m̧an.”⁵ Kōn men kein im un ko jet, jet ro uwaan Kabun̄ in rejjab jeļā kōn tōmak eo aer, kejōkļo̧kjeņ eļan̄n̄e bōlen rej aikuj ļo̧o̧r ro me “raar ro̧o̧l, jab bar etetal” ippān Jisōs.

Eļan̄n̄e ewōr juon iaami ej pere ilo tōmak eo ami, ij kajjitōk ippāmi ejja kajjitōk eo wōt me Piter eaar kajjitōk: “[Kwo] naaj ilo̧k n̄an wōn?” Eļan̄n̄e kom̧ij kālet n̄an erom jāniknik ak n̄an ilo̧k jān Kabun̄ eo kōjepļaaktok an Jisōs Kraist im Armej ro Rekwojarjar ilo Raan-ko Āliktata, ia kwonaaj ilo̧k n̄an e? Ta eo kwonaaj kōm̧m̧ane? Jokālet eo n̄an “jab bar etetal” ippān ro uwaan Kabun̄ im ritōl ro kar kālet an Irooj naaj wōr juon kilaan aitok kitien me eban maron̄ iien otemjej jejjet meļeļe kake kiiō. Emaron̄ wōr jet katak, jet kakien, jidik m̧ōttan bwebwenato me ej likūt eok ilo jab errā ippān tōmak eo am̧, im komaron̄ en̄jake bwe iaļ eo de eo n̄an ņa mejļan tarpok eo itulowa kiiō ej n̄an “jab bar etetal” ippān Rikwojarjar ro. Eļan̄n̄e kwonaaj mour aitok āinwōt kar n̄a, kwonaaj itok n̄an jeļā bwe men ko ewōr wāween aer ņa mejļaer kōn er make. Juon im̧we in lale ak revelesōn maron̄ kōļapļo̧k meļeļe ilo juon unin kōnono. Keememej, Jepļaaktok eo ejjab juon m̧akūtkūt, bōtaab ej wōnm̧aanļo̧k wōt n̄an ļapļo̧k.

Jāmin kōjerwawaik m̧ool ko reļļap kar kwaļo̧ki n̄an Rikanaan Josep Smith. Jāmin jokod riiti, kejōkļo̧kjeņ, im kōjerbal katak eo an Kraist epād ilo Bok in Mormon.

Jāmin likjab n̄an leļo̧k jokkuun wōt juon iien n̄an Irooj kōn kajieon̄ ko rem̧ool n̄an meļeļe ta eo Irooj eaar kwaļo̧k. Āinwōt an eo m̧ōttan jitōnbōro im kar rijerbal eo m̧ōttan Elder Neil A. Maxwell kar ba, “Jejjab aikuj in elmakot … bwe kōnke jejjab maron̄ kōmeļeļeik juon men eban kōmeļeļe.”⁶

Kōn menin m̧okta jān am̧ kōm̧m̧ane kālet eo ilo jetōb ekauwōtatat n̄an ilo̧k, ij kōketak eok n̄an bōjrak im ļōmņak jojo kōjparoke m̧okta jān joļo̧k jabdewōt men eaar bōktok eok n̄an naan in kam̧ool eo am̧ kōn Kabun̄ eo kōjpeļaaktok an Jisōs Kraist ilo jino in. Bōjrak im ļōmņak kōn ta eo kwar en̄jake ijin im etke kwar en̄jake. Ļōmņak kōn iien ko me Jetōb Kwojarjar eo eaar kwaļo̧k kam̧ool n̄an kwe kōn m̧ool eo indeeo.

Ia eo kwonaaj ilo̧k n̄an pukōt ro jet aer tōmak wōt kwe ilo juon make, ro Jemād im Jined Ilan̄, ro rej katakin kōj ekōjkan bar jepļaak n̄an im̧aan Mejāer indeeo?

Ia eo kwonaaj ilo̧k n̄an e n̄an katakin kōn Rilo̧mo̧o̧r eo m̧ōttam̧ em̧m̧aan tata, eo eaar jab en̄taan wōt kōn jerawiwi ko am̧ ak eo eaar barāinwōt en̄taan kōn “metak ko im kaen̄tanaan ko im kapo ko otemjeļo̧k” kōn menin “bwe būruōn ren maron̄ obrak kōn tūriam̧o, ekkar n̄an kanniōk, bwe En maron̄ jeļā ekkar n̄an kanniōk ekōjkan jipan̄ armej ro An ekkar n̄an m̧ōjņo ko aer,”⁷ ekoba, ij tōmak, m̧ōjņo eo kōn luuji tōmak?

Ia eo kwonaaj ilo̧k n̄an katak eļapļo̧k kōn karōk eo an Jemedwōj Ilan̄ kōn m̧ōņōņō indeeo eo ad im aenōm̧man, juon karōk eo me eobrak kōn maron̄ ko raiboojoj, katak ko, im tōl n̄an mour ko ad ilo mour in im indeeo? Keememej, karōk in lo̧mo̧o̧r ej letok meļeļe, unin, im tōl an mour in.

Ia eo kwonaaj ilo̧k n̄an pukōt juon Kabun̄ ilo tipdikin im eim̧we me kwoj katakin im rie jān em̧m̧aan im kōrā ro eļap aer wujlepļo̧k n̄an jerbal n̄an Irooj kōn jerbal n̄an eok im baam̧le eo am̧?

Ia eo kwonaaj ilo̧k n̄an pukōt rikanaan ro im rijilōk ro remour, ro kūr jān Anij n̄an lewaj n̄an eok bar juon kein jipan̄ n̄an kapilōk, meļele, kaenōm̧m̧an, im im̧we n̄an apan̄ ko an tōre in ad?

Ia eo kwonaaj ilo̧k n̄an pukōt armej ro me rej mour kōn kōro̧ro in aorōk ko kwaļo̧k im jon̄ak ko me kwoj kwaļo̧ki im kōņaan liļo̧k n̄an ajri ro nejūm̧ im jibūm̧?

Im ia eo kwonaaj ilo̧k n̄an en̄jake lan̄lōn̄ eo im ej itok kōn kain̄i in lo̧mo̧o̧r ko im bujen ko an tampeļ eo?

Ro jeiū im jatū, bōk im mour kōn gospel eo an Kraist maron̄ in idajon̄jon̄. Eļakkar iien otemjej idajon̄jon̄, im enaaj aindein indeeo. Mour emaron̄ āinwōt rietaltal aitok ro rej walōn̄ļo̧k ilo juon iaļ eo eju im pen. Ej juon men ejjab oktak im ekkā jet iien bōjrak n̄an bōk kūtuwōd, n̄an bar lale iaļ eo ad, im n̄an bar lale jon̄an iiūm̧ eo ad. Ejjab aolep rej aikuj in bōjrak ioon iaļ eo, bōtaab ejjeļo̧k juon men ebōd ilo kōm̧m̧ane menin n̄e jekjek ko am̧ ej aikuj. Ilo m̧ool, emaron̄ in erom em̧m̧an n̄an ro bōk aolep em̧m̧an eo an iien eo em̧m̧an n̄an bar kakkijeik er make kōn dān in mour an gospel eo an Kraist.

Kauwōtata ej itok n̄e juon ej kālet n̄an jejļo̧k jān iaļ eo me ej tōl ļo̧k n̄an wōjke in mour eo.⁸ Jet iien jemaron̄ katak, ekkatak, im jeļā, im jet iien jej aikuj tōmak, lōke, im kōjatdikdik.

Ilo jem̧ļo̧kin, kajjojo iaad aikuj uwaake kajjitōk eo an Rilo̧mo̧o̧r: “Kom̧ barāinwōt kōņaan ilo̧k ke?”⁹ Jej aikuj pukōt n̄an kōj make uwaak eo n̄an kajjitōk eo. N̄an jet, uwaak eo epidodo, n̄an ro jet, epen. Ijjab etan ke ijeļā etke tōmak n̄an tōmak epidodoļo̧k an itok n̄an jet jān ro jet. Ij kanooj kam̧m̧oolol n̄an jeļā bwe uwaak ko rej iien otemjej pād, im eļan̄n̄e jej pukōt er—lukkuun pukōt kōn lukkuun kōttōpar im kōn jibadbad edipio an juon buruwōn jar—āliktata jenaaj lo uwaak ko n̄an kajjitōk ko ad ilo ad wōnm̧aanļo̧k wōt ioon iaļ an gospel eo. Ilo jerbal in kwaļo̧k eo aō, iaar jeļā ro rekar eļļo̧k im bar jepļaaktok ālkin an mālijjon̄ an tōmak eo aer.

Kōjatdikdik eo aō em̧ool ej bwe jenaaj karuwainenik juon ļapļo̧k in oran ro nejin Anij n̄an pukōt im pād ioon iaļ in gospel eo bwe ren barāinwōt maron̄ “m̧ōn̄ā leen wōjke eo, eo [ej] enno̧ļo̧k jān leen ko jet.”¹⁰

Akweļap eo aō em̧ool ej bwe jenaaj ketak, bōk, meļeļe im iakwe ro me rej kōbkōb kōn tōmak eo aer. Jejjab aikuj n̄an jidik kōjerwawaik jabdewōt ro jeid im jatid. Jej aolep pād ilo jikin ko roktak jān doon ilo iaļ eo, im jej aikuj kwaļo̧k n̄an doon ekkar n̄ane.

Ejja āinwōt ad aikuj eļļo̧ke peid ilo juon jetōb in karuwainene n̄an rioktak ro rekāāl, jej aikuj barāinwōt dāpij im rie ro me ewōr aer kajjitōk im rej pere tōmak eo aer.

Kōjerbal bar juon kōkaļļe jeļā kake, ij jar bwe jabdewōt ej ļōmņak in ilo̧k jān “Kabun̄ in,” ijo Anij im Kraist rej ilo jila eo, naaj bōjrak im ļōmņak jojo kōjparoke m̧okta jān kōm̧m̧ane.

Jouj im jeļā bwe men̄e lan̄ ko reļļap an kōto im ņo ko rej kakkure wa eo, Rilo̧mo̧o̧r eo ej pād ioon wa eo im emaron̄ in kauwe ļan̄ eo kōn An in naan “Kwon jab m̧akūtkūt.” M̧ae iien eo, jej aikuj jab mijak, im ej aikuj wōr ad tōmak edim im jeļā bwe “kōto im lo̧jet rej pokake E m̧ae tōre eo, jej aikuj jab mijak, im ej aikuj wōr ad tōmak edim im jeļā bwe “kōto im lo̧jet rej pokake E.”¹¹

Ro jeiū im jatū, ij kallim̧ur eok ilo etan Irooj eo me E ejjamin naaj kōjerwawaik Kabun̄ eo An im bwe E ejjamin naaj kōjerwawaik jabdewōt iaad. Keememej uwaak eo an Piter n̄an kajjitōk eo in naan ko an Rilo̧mo̧o̧r eo:

“Kōm naaj ilo̧k n̄an wōn? Ippam̧ naan ko naan in mour indeeo.

“Im kōm ar tōmak im jeļā bwe Kwe Juon eo E kwōjarjar nejin Anij.”¹²

Ij kam̧ool bwe “ejjeļo̧k naaj bar āt letok ak jabdewōt bar iaļ ak wāween lo̧mo̧o̧r emaron̄ itok n̄an ro nejin armej, ilo wōt im kōn wōt etan Kraist.”¹³

Ij barāinwōt kam̧ool bwe Jisōs Kraist kar kūr rijilōk ro im rikanaan ro ilo tōre in ad im kōjepļaaktok Kabun̄ eo An ippān katak ko im kien ko āinwōt “juon likōpejn̄ak jān ļan̄ ko, im jān jibabne,” bwe em̧ool enaaj itok ijello̧kin armej in laļ in rej ukweļo̧k im bar ro̧o̧l n̄an E.¹⁴

Ij kaitokļo̧k kam̧ool bwe Irooj ej “kūrtok er aolep n̄an itok n̄an Ippān im bōk leen em̧m̧an eo An; im E ejjeļo̧k Ej kabbōjrak e jān an itok Ippān, kilmeej im mouj, rilokjak im rianemkwōj, m̧aan im kōrā; … im aolep rej āinwōt juon n̄an Anij.”¹⁵

Jisōs ej ad Rilo̧mo̧o̧r im Ripinmuur, im gospel eo kōjepļaak tok An naaj tōlļo̧k kōj n̄an im̧aan mejān Jemed im Jined Ilan̄ eļan̄n̄e jej pād wōt ioon iaļ an gospel eo im ļoor jenokan Neen. Eo me ij kam̧ool ilo etan Jisōs Kraist, amen.