Serka Ken Nos Tin Ku Bai?

Algun aña pasa mi famia i ami a bishita e Pais Santu. Un di mi memorianan mas intenso di e biahe ei tabata e bishita na e sala ariba na Yerusalèm, e sitio tradishonal di e Último Sena.

Ora nos tabata parando den e lugá ei, mi a lesa for di Juan 17, na unda Jesus a roga Su Tata pa Su disipelnan:

“Mi ta resa pa nan … pa nan por ta un manera nos ta un. …

“Mi no ta resa solamente pa esnan aki, ma tambe pa esnan ku pa medio di nan palabra lo kere den Mi.

“… mare nan tur por ta un, manera Abo ta den Mi i Ami den Bo, pa asina nan por ta den nos, …”¹

Mi tabata profundamente konmové lesando e palabranan aki i a haña mi mes resando den e sagrado lugá ku mi por bira un ku mi famia i ku mi Tata Selestial i ku Su Yu.

Nos relashonnan presioso ku famianan, amigunan, Señor, i Su Iglesia restorá ta entre e kosnan mas importante den bida. Pasobra e relashonnan ei ta asina importante, nan mester wòrdu apresiá, protehá, i kuidá.

Un di e storianan mas tristu den eskritura a pasa ora “hopi di [Señor Su] disipelnan” a hañ’é duru pa akseptá Su siñansanan i doktrinanan, i nan “a bira bèk i no a sigui kana huntu kun’É mas.”²

Ora e disipelnan ei a sali, Jesus a bira na e Diesdos i a puntra, “Boso tambe ke bai afò?”³

Pedro a kontestá:

“Señor, serka ken nos tin ku bai? Abo tin e palabranan ku ta duna bida eterno!

“Nos ta kere i nos a haña sa tambe ku Abo ta e [Cristo, e Yu di e Dios bibu].”⁴

Den e momentu ei, ora otronan a enfoká riba kiko nan no por a akseptá, e Apòstelnan a skohe pa enfoká riba loke nan tabata kere i sa, i komo resultado, nan a keda ku Cristo.

Despues, riba e dia di Pentekòste, e Diesdos a risibí e don di e Spiritu Santu. Nan a bira yen kurashi den nan testigu di Cristo i a kuminsá pa komprendé mas kompletamente Jesus Su siñansanan.

Awe no ta diferente. Pa algun, e invitashon di Cristo pa kere i keda ta kontinuá pa ta duru—òf difísil pa akseptá. Algun disipelnan ta lucha pa komprondé un polítika òf siñansa di Iglesia spesífiko. Otronan ta haña preokupashon den nos historia òf den e imperfekshonnan di algun miembronan i lidernan, di pasado i presente. Ainda otronan ta hañ’é difísil pa biba un religion ku ta rekirí asina hopi. Finalmente, algun a bira “kansa di hasi bon.”⁵ Pa e rasonnan ei i otronan, algun miembronan di Iglesia ta vasilá den nan fe, tratando di disidí si por ta nan mester sigui esnan kende “a bira bèk i no a sigui kana huntu [ku Jesus] mas.”

Si algun di boso ta duda den boso fe, mi ta puntra boso e mesun pregunta ku Pedro a puntra: “Serka ken [bo] tin ku bai?” Si bo ta skohe pa bira inaktivo òf pa laga e Iglesia restorá di JesuCristo di e Santunan di e Delaster dianan, na unda bo lo bai? Kiko bo lo hasi? E desishon pa “no kana mas” ku miembronan di Iglesia i e Señor Su lidernan skohé lo bai tin un impakto di tempu largu ku no semper por wòrdu mirá awor aki. Por ta tin algun doktrina, algun polítika, algun pida di historia ku ta pone bo den desakuerdo ku bo fe, i bo por ta sinti ku e úniko manera pa resolva e inkietut di paden awor aki ta pa “no kana mas” ku e Santunan. Si bo ta biba asina largu manera ami a hasi, bo lo yega di haña sa ku e kosnan tin un manera di resolvé nan mes. Un komprenshon òf revelashon inspirá por duna klaridat na un asuntu. Kòrda, e Restorashon no ta un evento, pero e ta kontinuá pa desaroyá.

Nunka bandoná e gran bèrdatnan revelá dor di e Profeta Joseph Smith. Nunka stòp lesa, skrudiñá, i apliká e doktrina di Cristo kontené den e Buki di Mormon.

Nunka faya pa duna tempu igual na Señor dor di esfuersonan honesto pa komprendé kiko Señor a revelá. Manera mi amigu stimá i eks-kolega Elder Neal A. Maxwell a yega di bisa, “Nos no mester asumí … ku djis pasobra algu ta ineksplikabel pa nos e ta ineksplikabel.”⁶

Asina ku promé ku bo ta hasi e skohe spiritualmente peligroso pa sali, mi ta enkurashá bo pa stòp i pensa kuidadosamente promé di entrega kiko e tabata ku a trese bo bo testimonio di e Iglesia restorá di JesuCristo na promé lugá. Stòp i pensa tokante kiko bo a sinti akinan i pakiko bo a sintié. Pensa tokante e tempunan ora e Spiritu Santu a duna testigu na bo di bèrdatnan eterno.

Unda bo lo bai pa haña otronan ku ta kompartí bo fe den Mayornan Selestial personal i amoroso, ku ta siña nos kon pa bolbe na Nan presensia eterno?

Unda bo lo bai pa wòrdu siña tokante un Salbador ku ta bo mihó amigu, ken no solamente a sufri pa bo pikánan pero ken tambe a sufri “dolónan i aflikshonnan i tentashonnan di kada manera” pa asina “su paden por ta yen ku miserikòrdia, segun e karni, pa asina e por sa segun e karni kon pa yuda su hendenan segun nan enfermedatnan,”⁷ inkluso, mi ta kere, e enfermedat di pèrdè fe?

Unda bo lo bai pa siña mas tokante e plan di Tata Selestial pa nos eterno felisidat i pas, un plan ku ta yen ku posibilidatnan, siñansanan, i guia maravioso pa nos bidanan mortal i eterno? Kòrda, e plan di salbashon ta duna bida mortal nifikashon, propósito, i direkshon.

Unda bo lo bai pa haña un struktura organisashonnan di Iglesia detayá i inspirá dor di kua bo ta wòrdu siñá i apoyá pa hòmbernan i muhénan ku ta profundamente komprometé na sirbi Señor pa sirbi abo i bo famia?

Unda bo lo bai pa haña profetanan i Apòstelnan bibu, kende ta yamá pa Dios pa duna bo un otro rekurso pa konseho, komprenshon, konsuelo, i inspirashon pa e desafionan di nos dia?

Unda bo lo bai pa haña hende ku ta biba segun un set preskribí di balornan i standardnan ku bo ta kompartí i kier pasa na bo yunan i nietunan?

I unda bo lo bai pa eksperensia e goso ku ta bini dor di e ordenansanan salbadó i kombenionan di e tèmpel?

Rumannan, akseptando i bibando e evangelio di Cristo por tin hopi desafio. E semper tabata asina, i e semper lo bai ta. Bida por ta manera hende subiendo un hanchi steil i difísil. E ta un kos natural i normal pa tuma un brek den bes en kuando riba e hanchi pa hala rosea, pa rekalkulá nos kargamentunan, i pa rekonsiderá nos paso. No tur hende mester tuma un brek riba e kaminda, pero no tin nada fout den hasi esei ora bo sirkunstansianan ta rekirí esei. Di echo, e por ta un kos positivo pa esnan ku ta tuma ful bentahoso di e oportunidat pa refresko nan mes ku e awa bibu di e evangelio di Cristo.

E peliger ta bini ora un hende ta skohe pa sali for di e kaminda ku ta guia pa e palu di bida.⁸ Tin biaha nos por siña, studia, i sa, i tin biaha nos tin ku kere, konfia, i spera.

Na final, kada un di nos mester kontesta riba e Salbador Su pregunta: “Boso tambe ke bai afó?”⁹ Nos tur tin ku buska nos mesun kontestanan riba e pregunta ei. Pa algun, e kontesta ta bini fásil; pa otronan, e ta difísil. Mi no ta pretendé pa sa dikon fe pa kere ta bini mas fasil na algun ku na otronan. Mi ta djis asina gradesido pa sa ku e kontestanan semper tei, i si nos ta buska nan—realmente buska ku intento sinsero i ku propósito kompletu di un kurason na orashon—nos lo haña e kontestanan finalmente pa nos preguntanan ora nos ta kontinuá riba e kaminda di evangelio. Den mi ministerio, mi a konosé esnan ku a drif i bolbe despues di nan prueba di fe.

Mi speransa sinsero ta ku nos lo invitá un kantidat mas haltu di Dios Su yunan pa haña i keda riba e kaminda di evangelio pa asina nan tambe por “tuma di e fruta, kua ta mas deseabel ku tur otro fruta.”¹⁰

Mi ruego di kurason ta ku nos lo enkurashá, akseptá, komprendé, i stima esnan ku ta luchando ku nan fe. Nos nunka mester neglishá kualke di nos rumannan. Nos tur ta na diferente lugánan riba e kaminda, i nos mester ministrá na otro segun esei.

Djis manera nos mester habri nos brasanan den un spiritu di bon bini kombersonan nobo, asina tambe nos mester brasa i apoyá esnan ku tin preguntanan i ta basilando den nan fe.

Utilisando un otro metáfora familiar, mi ta resa ku kualke hende ku ta pensa di sali for di “Barko Bieu di Sion,” na unda Dios i Cristo ta na e timon, lo pousa i pensa kuidadosamente promé di hasié.

Por fabor sa ku asta aunke gran tormentonan di bientu i olanan ta bati riba e barku bieu, semper kòrda ku e Salbador ta riba bòrda i ta kapabel pa skual e tormento ku Su mandato, “Pas, sea ketu.” Te e ora ei, nos no mester tin miedu, i nos mester tin fe sin falta i kòrda ku asta e bientu i e lamá ta obedes’É.¹¹

Rumannan, mi ta primintí boso den e nòmber di Señor ku E nunka lo bandoná Su Iglesia i ku E nunka lo bandoná niun di nos. Kòrda e kontesta di Pedro riba e Salbador Su pregunta i palabranan:

“Serka ken nos tin ku bai? Abo tin e palabranan ku ta duna bida eterno!

“Nos ta kere i nos a haña sa tambe ku Abo ta e [Cristo, e Yu di e Dios bibu].”¹²

Mi ta testifiká ku “otro nòmber lo no wòrdu duná ni ningun otro kaminda, ni manera pa medio di kua salbashon por bini na e yunan di hende, únikamente den i pa medio di e nòmber di Cristo.”¹³

Mi tambe ta testifiká ku JesuCristo a yama Apòstelnan i profetanan den nos dia i a restourá Su Iglesia ku siñansanan i mandamentunan komo un refugio di e tormenta, i for di furia ku seguramente lo bini sekante e hendenan di e mundu arepentí i bolbe na djE.¹⁴

Mi ta sigui testifiká ku Señor ta invitá nan tur pa bini na dje i tuma di su bondat; i e no ta nenga niun ku ta bini na dje, desafio i blanku, mará i liber, hende hòmber i hende muhé; … i tur ta meskos na Dios.¹⁵

Jesus ta nos Salbador i Redentor, i Su evangelio restorá lo guia nos seguramente bèk na e presensia di nos Mayornan Selestial si nos ta keda riba e kaminda di e evangelio i sigui Su pasonan. Na kua mi ta testifiká den e nòmber di JesuCristo, amèn.