Ng Techang a Debo er Ngii

Sese el rak ra mla memong, e ngak ma telungalek er ngak a mlo oldingel ra Holy Land. A tara kmal dirk kudengelii er tial omerolam sera ki bo momes ra ngara nikai el delmerab er a Jerusalem, el sel mla er ngii a Ulebongel Chedaol Belsoil.

Me sera kim dechor er tial basio, e ak mlenguiu ra Johanes 17, el mo er tir, el Jesus a miluluuch el mora Demal el kirir tirka el chedal:

“Ak meluluuch el kirir … me bol tang, el uai kid. …

“E diak di kululuuch el kirir tirkang el lemerkong, me a dirrek el tirkel mo oumerang er ngak lokiu a tekingir;

“Me tir e rokui bol tang; el di uaikau, e Chedam, el lobengkek, me ngak obengkem, me tir el dirrek bol tang lobengked.”¹

Ng meral rirtechii a renguk er ak kunguiu a ikal tekoi me ak miluluuch er a chelsel tial chedaol basio el mo sebechek el mo tang ngak ma telungalek er ngak me a Demak ra Babeluades me a Ngelekel.

A mekreos el deleuill er kid ma telungalek er kid, resechelid, Rubak, me a mla moluut el Ikelesia a bebir ra tekoi el meklou a ultutelel er a klengar. E le uchul aikal deleuill a kmal meklou a ultutelel, meng kired el urrekodel, mengeluolu, and omekeroul.

A ta er a ikel mo lmangel a rengud er ngii el cheldecheduch er a chedaol llechukl a seral “betok el oltirakl [ra Rubak]” a mle meringel er tir el ngmai a osisecheklel, me te “chilitii, e dimlak el luut el meral el obengkel.”²

Me seral riid tirkal chedal, ea Jesus e mileltii el mor tirkal Teruich me a Terung e uleker, “Kemiu meko mo merael el dirrek?”³

Me a Petrus a ulenger:

“Rubak, ng techa kibo er ngii? kauia olab a rokui el tekoi ra diak a ulebengelel el klengar.

“Me kemam a oumerang e ungil medengei el kmo kau ia Kristo, el Ngelekel a ngar el Dios.”⁴

Seikid el taem, el bebil ra rechad lomes el bedul a diak el sebechir el kongei el tekoi, e a re Apostol a mililt lomes a ikel loumerang e medengei, me tiakid a dilubech, tir a dimle kiei lobengkel a Kristo.

Uriul, el mle Baskua, e tir el Teruich ma Terung a ngiluu a sengk ra Chedaol Reng. Te di mlo chemolt el sioning er a Kristo e mocha merael el mo ungil medengei osisecheklel a Jesus.

Chelechang a diak el ngodech er sel taem. A rebebil, sel okedongel a Kristo el mo oumerang e obengkel a melemolem el meringel—ng meringel er tir a ngmai. A rebebil ra chedal a chetituokel er tir el mo medengei a derta el llechul ma osisecheklel a Ikelesia. A rebebil a mo ngodech a rengrir ra reksi er kid malechub a kuk chelitecheterir a rechedal a ikelesia ma roungerachel, ra ngara mong el mer chelechang. E dirrek el bebil a meringel er tir el oltirakl er tial klechelid el kmal betok a kired el meruul. E, a rebebil a mla mo mesaul el meruul a ungil.”⁵ A ikaikid malmuut el bebil ra tekoi, el bebil ra rechedal a Ikelesia a diak el ulterekokl a klaumerang er tir, e bai omdasu a mo obengterir tirkel “chilitii e dimlak el luut el meral lobengkel a Jesus.”

Alsekum eng ngar ngii er kemiu a metetermokl a klaumerang er ngii, e a kuker er kemiu sel keril a Petrus: “[Ko] mo er techang?” Alsekum me ke tibir el diak komei malebhub e ke choitii a Ikelesia er a Jesus Kristo er a Uriul-klebesei el Santo, e ke mo er ker? Ngera ke mo meruul er ngii? A omelilt el mo ”diak morael” lobengkel a rechedal a Ikelesia ma remlengilt ra Rubak loungerachel a morngii a telemellel el diak el sebechel meues er chelechang. Ng locha ngar ngii a bebil er a osisechakl, llach, telkib el tekingel a reksi lomtok ra klaumerang er kau, me komdasu el kmo a dital rolel eng mo ungil a rokiu a mo ”diak morael” lobengterir a re Santo. Omko meke mo kiei el meketeket el uai ngak, e ke momedengei el kmo ngar ngii a rolel ea tekoi a dingii el sumecheklii. A ulekrael malechub a ocholt a sebechel meklemesid ra bebil ra tekoi. Lak mobes, a Oluut a diak el dital taem, tiang a dirk ke merael.

Mei melak mechoit a ngarbab el klemerang el mla mocholt lokiu a Profet Joseph Smith. Lak molengull er a omengiuem, omdasu, e mousbech a ikal osisecheklel a Kristo el ngara Babier er a Mormon.

Lak mokor el chemoit a tabesul temem el mora Rubak el meral mo ungil medengei a bla locholt a Rubak. El uaikel dilung a kmal sechelik el kimdilak loureor, el Elder Neal A. Maxwell, el kmo, “Ng diak el kired el dioba uldesued … el kmo sel sekum a tekoi a diak el sebeched el smodii eng dial el belkul a kmo meng diak el sebechel mesaod.”⁶

Ma uchei er a omrelii tial kengaol el melilt el mo cheroid ra ikelesia, e a kulengit ma kot e bo mungil lomdasu ruchei ra omchoit aikel ngii a ngilikau el mera klaumerang er kau er tial mla moluut el Ikelesia er a Jesus Kristo er a kot luchul. Bom chelellakl e momdasu er sel blo olchesuar er ngii e ngara uchul meke mlo melchesuar er ngii. Bo momdasu er sel taem el Chedaol Reng a mlochotii el merkau a meral di ngar el klemerang.

Ke mor ker e metik er a rebebil el moumerang osisiu el tekoi, er a ungil Loungalek el ngara Babeluades, el olsisechakl er kid a roled e kede lmuut el mo er Tir?

Ke morker e ngmai osisechakl el kirel Osobel el ngii a meral sechelim, el dimlak el dil bol charm el kirel a kengtim ng dirrek el mlo chouarm ra ringel ma ongarm ma ngibesereng er a kekerous el teletael me a bedengel bo lobekeik ra klechuechub, tial bedengel ra tech, me bol meduch mel sebechel lolngeseu ra rechedal ra chelitecheterir,”⁷ uldimukl, a kuumerang, ngelsengesed era klaumerang?

Ke morker e suub a lemuut el betok el kirel a uldesuel a Chedam er a Babeluades el kirel a diak a ulebengelel el deureng, ma budech, el uldasu el mui ra meang el techall, osisechakl, ma ulekrael er a klechad er kid ma diak a ulebengelel klengar er kid? Lak mobes, a uldasu er a mosuobel a meskid a belkul a klengar, moktek er kid, me a ongetikaik.

Ke morker e metik er a meral komakai e ulekrael el teleketek el Ikelesia el ngii omnguu osisechakl ma ngeseu lokiu a resechal ma redil el tir a meral ngar ngii ra rengrir a mesiou ra Rubak el mesou er kau ma telungalek er kau?

Ke morker e metik ra rekiei el profet ma re apostols, el mlokedong ra Dios lomeskau a tara obor ngii e kengmai osisechakl, klemedengei, ongelaod, me a ulekrael el kirel a betok el tekoi el dechelbangel er chelechang?

Ke mor ker e metik er a rechad el mo oltirakl a beldukl el ungil tekoi ma kerbai el mosisiu er ngii e soam lomesterir a rengelekem ma rengelekir?

E morker e nguu a deureng el ngii a mei lokiu chedaol lureor el mo olsobel ma telbiil el meruul er a templo?

Rodam ma rodos, a ngeiul ma oltireklel a ebangkelio ra Kristo a sebechel mo chetituokel. Tia di mla uaisei, e di uaisei el mong. A klengar a sebechel ua chad el merael ra rois el kongesachel e meringel el rael. Ng kirel e sebeched el kuk mong e ongellid er tial rael e otuu a telid, e merkii osenged ra dengar ngii, e tibir a rretel omeroled. Ng diak el rokui el chad a mo olengull er tial rael, eng di ngdiak a mekngit er ngii sel sekum eng kirel leng metacherbesul. E uaisei, el sebechel mo klisiich e ungil tekoi el mor tirkel nguu tial techall el mo omekbeches er tir loba madedok ra klengar er a ebangkelio er a Kristo.

Ng mo kengaol sel sekum a chad a melilt el merael mo cheroid er a rael el ngii a bedul a kerekar er a klengar.⁸ A lebebil ra taem eng sebeched el subii e omes er ngii e momedengelii, e a lebebil ra taem eng kired el di mo oumerang, e oureng.

Sel orokiolel, ea derta er kid a kirel longer ra keril Osobel: “Kau ke dirrek el mo merael?”⁹ Kid a kired el mosmiik a nger er kid el mortial ker. A denguu ra rebebil, eng beot er tir longer; engdi a rebebil, a kmal meringel. Ng diak du ak medengelii a uchul ma klaumerang e beot el mora rebebil ea rebebil a diak. Ak kmal lungil a renguk el kmo a rokui el nger a di ngar ngii, malsekum ke dosiik—meral losiik el blak a rengud el ungil a moktek er kid el oba nglunguuch ra rengud—e ke er di mol mo metik a nger er a kerid sel dolemolem er tial rolel ebangkelio. Sera kulisechakl, e ak medengelterir tirkel ririid e liluut el mei ruriul er a skeng ra klaumerang er tir.

A dmolech el urungulek a kmo kede mo mengemedaol ra rubdois el ngelekel a Dios el mei e mellemolem er tial rael er a ebangkelio me tir el dirrek a mo sebechir el “menga er sel rodech, el ngii el rodech [a] kot lungil er a rokui el rodech.”¹⁰

Sel kmal ngara renguk longit a kmo kede mo mengesuseu, kongei, e ungil medengei, e oubeltikelreng er tirkel chetituokel a klaumerang er tir er chelechang. Ng meral diak el kired el choitii a ngii dil odam me a odos er kid. Ke de rokui el kakerous a de ngarngii er a tial rael, meng kired el kaingeseu el mong e mei.

El kmal diua sel blerk chimad el mengemedaol er a rebeches el mlechell el beches, meng dirrek el kired el ngoititerir e ngosuterir tirkel ngar ngii a nger er tir e mesesibas er a klaumerang er tir.

A kusbech ra tara belkul a tekoi, me ak meluluuch meng kel lomdasu el mo ikrii tial “Uodel el Dillel a Zion,” el Dios ma Kristo omesiul er ngii, bol chelellakl e bolungil lomdasu ruchei er a lorael.

Kulengit me bo modengei el kmo tia ngii mesel meses a eolt ma chedesaoch lomteuat er tial chuodel diall, e lak mobes el kmo a Osobel a ngar tial diall e sebechel torbengii a sesel eolt el okiu a tekingel, “Budech, bom chelellakll.” Me sel uaisei, eng diak el kired el medakt, e dirrek el diak el kirel mesim a klaumerang er kid e medengei el kmo “ng dirrek el eolt ma daob a mengull er ngii.”¹¹

Rodam ma rodos, ak yaksok loba ngklel a Rubak el Ngii a diak el chitii a Ikelesia er ngii ma diak el chitii a ngidil tar kid. Molebedek er a Petrus ra longer ngiia Osobel er a keril:

“Ng techang a ki bo er ngii? kauia obang a rokui el tekoi el kirel a diak a ulebengelel klengar.

“Me kemam a oumerang e ungil medengei el kmo kau ea Kristo, el Ngelekel a ngar el Dios.”¹²

A kuuchais el kmo ng diak a ngodech el ngakl malechub eng ngii di el rael malechub a teletael el sebechel a chad lokiu ngi eng mo suobel, ng bai okiu a dita el ngklel a Kristo.”¹³

Ak dirrek louchais el kmo a Jesus Kristo a mla mekedongeterir a re apostol ma re profet er ngii er chelechal taem e mla olutii a Ikelesia er Ngii el ngii omdernged er a sesel eolt, ma ringel el ngii a mei alsekum a rechad a diak bo louchel a rengrir e lobult el mo er Ngii.¹⁴

Ak le muut el sioning el kmo a Rubak a olengit ra rokui mel lorael el mo er ngii me bo lolai er sel klungiolel; e ngii a diak lorrob ra ngii di el chad el me er ngii, chedelekelek ma becheleleu, kelebus ma mimokl, sechal ma redil; … e a rokui a di osisiu er a medal a Dios.”¹⁵

A Jesus ngii a Osebeled e Olsobel, e a mla moluut el ebangkelio er Ngii a ngoikid el selbechakl el lemuut el mora lengarngii a Roungalek er kid er a Babeluades alsekum me kede kiei el ngar tial rolel ebangkelio e oltirakl er a bekesel ochil. A ikang a kuuchais loba ngkel a Jesus Kristo, amen.