Ihs Me Se Pahn Patohla Reh?

Sounpar kei samwalahro, ngehi oh ahi peneinei mwemweitlahng nan Sahpw Sarawio [nan Israel]. Ehu mehkot me I tamataman sang nan aht mwemweito se kohla nan perehn ihmw me mih Serusalem, wasa me [Krais wia] Kamadipw Sarawio.

Nindoken aht keskesihnen wasahu, I wadakehng irail nan Sohn 17 , wasa me Sises kasakaskihong Semehu Sapwellime tohnpadahk ko:

“I patohwan kapakapkin irail … pwe irail en wiahla ehu duwehte ata ketin wia ehu. …

“I sohte kapakapkin irailte, pwe pil irail kan me pahn pwoson ie pwehki arail padahk;

“Pwe irail en wiahla ehu, duwehte Omwi ket rehi, oh Ngehi rehmwi, pwe irail en wiahla ehu rehta.”¹

Loalleie mwekidkihda ansou me I wadwadek mahsen ko oh kehnda ahi wie kapakapki nan wasa sarawio me ngehi oh ahi peneinei en kak wiahla ehu oh patehng Sahm Nanleng oh Sapwellimehu.

Atail ehuohng atail peneinei kan, kempoakepahtail kan, Kauno, oh Sapwellime Mwomwohdiso kopwurupwurdoh iei kisehn mehkot keieu kesempwal akan nan atail mour. Pwehki ehupene pwukat ahr kesempwal, e konehng kitail en kesempwalki, doarehla, oh apwalih.

Ehu soi me kansensuwed nan pwuhk sarawi iei ahnsou me “tohto sapwellimen [Kauno] tohnpadahk ko” peikasalki Sapwellime kaweid kan oh padahk, oh irail “mweisangehr, oh solahr men idawehn Ih.”²

Ni ahnsou me tohnpadahk kan kohkohla, Sises kalelapak rehn Ehkriemeno, “Kumwail pil men keseiehla ?”³

Piter sapengki:

“Maing, ihs me se pahn patohla reh? komwi me Sapwellimanki] mahsen en mour soutuk.

“Oh se pwosonlahr oh esehier me Sapwellimen Koht me Sarawio komwi.”⁴

Nan soangen ansouo, me ekei kin medewehiengete dahme irail sohte pahn kamehlele, Wahnpoaron ko pilada irail en medewe dahme irail kamehlelehier oh ese, oh wahn arail wia mwo, irail mihmihte rehn Krais.

Mwurin ansouo, nan rahn en Pendekos, Ehkriemeno alehdi kisakis en Ngehn Sarawi. Irail eri eimahla nan arail kadehdehki Krais oh tepda wehwehkihla laud duwen sapwellimen Sises padahk kan.

Rahn pwukat sohte weksang mahs. Ong ekei, Sapwellimen Krais luhk en kamehlele oh ieiangte pil apwalte—de apwal en alehda. Ekei tohnpadahk apwaliki wehwehkihla koasondi de padahk en Mwomwohdiso. Ah ekei kin pwunodki atail poadoapoad kan de sapungala me towe kan oh kaun akan wiada, mahs oh rahnpwukat. Ahpw ekei kin apwaliki momourki pelien lamalam me anahne tohnmetei. Ni imwio, ekei kin “pwangahkihda wiewia mwahu kan.”⁵ Kahrepe pwukat oh kahrepe teikan, me kin kahrehda ekei tohn Mwomwohdiso ahr kin peikasalda nan arail pwoson, oh medemedewe ma irail pahn konehng iangala irail akan me “mweisangehr , oh solahr men idawehn” Sises.

Ma mie emen kumwail me ahneki peikasal nan amwail pwoson, I kalelapak rehmwail kalelapakohte me Piter patohwan: “Ihs me [kumwail] pahn patohla reh?” Ma kumwail pahn pilada uhdihsang iang kalapw patehng de kohkohlahsang Mwomwohdiso en Sises Krais en Souleng Imwin rahn-akan me kopwurupwurdou, Iawasa kumwail pahn kohla? Dahme kumwail pahn wia? Pilipil en “solahr men [iang]” tohn Mwomwohdisoh oh Sapwellimen Kauno ladu me pilipilda kan pahn mie lipwe laud rehmwail me sohte kak sansal ansou wet. Mwein mie padahk, koasondi, poadoapoad me kumwail peikasalki, oh kumwail pehm me dene ihte wiepen kapwungala amwail peikasalo iei “sohla [patehng]” Souleng kan. Ma kumwail momour reirei duweiehte, kumwail pahn esehda me soahng koaros kin pein kapwungpwungla. Kamarain en amwail madamadau de kaudiahl kak kamarainihda kapwunodo. Tamataman, Kopwurupwurdou e sohte wiawi ni mwekid ehute, ahpw e wie wiwiawi.

Dehr kohkohlahsang padahk mehlel kan me Soukohp Joseph Smith kasalehda. Dehr uhdihsang wadek, doandoaropwe, oh momourki padahk en Krais me mih nan Pwuhk en Mormon.

Dehr monokehla kiheng Kauno ansou nan omw pahn mehlelki song en esehda dahme Kauno kasalehdar. Duwehte dahme kempoakepahi, Elder Neal A. Maxwell, patohwan, “Kitail en dehr medewehte … me dene atail sohte kak kawehwehda mehkot, a e sohte pahn kak wewehda.” ⁶

Eri mwohn ahmw pahn pilada kohkohlahsang [Mwomwohdiso], I kangongehkinuhk ken uhdi oh medemedewe mwahu mwohn ahmw pahn kesehla dahme tepin elehda ah mie ahmw kadehde pen Mwomwohdiso kopwurupwurdo en Sises Christ. Uhdi oh medewe dahme ke kehnda wasaht oh ia kahrepen ahmw kehn. Medewe ansou kan me Ngehn Sarawi kadehdehienguhk padahk mehlel poatoapoato.

Ia wasa me ke pahn kohla oh diar ekei me iangiuk kamehlele Nohno oh Pahpa Nanleng me limpoak, me kin padahkihong kitail ia mwomwen atail pahn pwurala Rehra nan mwoahl poatoapoato?

Ia wasa me ke pahn kohla oh kaskuhlki duwen Soundor me wia kempoakepahm, me lokolongki dipemw kan oh pil iangahki “medek kan oh apwal akan oh kasongosong koaros” pwe “nan kapehde en kak auduadki kalahngan, sang ni Eh kehnehr ni paliwere, pwe en kak ese lokolok me kitail kehn ni paliwar oh ia mwomwen Eh pahn sowese sapwellime aramas nin duwen arail soumwahu kan,”⁷ iangahki, me I kamehlele, soumwahu en soupwoson?

Ia wasa me ke pahn kohla oh esehla duwen Sapwellimen Sahm Nanleng pilahn en atail peren soutuk oh popohl, pilahn me audaudki soahng kaselel kan me kak pweida, padahk kan, oh kaweidpen atail mour nan sampah oh mour soutuk? Tamataman me pilahn en komour kiheng kitail wewehn atail mour, kahrepe, oh kaweidpe.

Ia wasa me ke pahn kohla oh diar Mwomwohdiso me ahneki koasondi pisetik oh kamarain me ke kin alehsang kaweid oh utuht sang ohl oh lih akan me inouki mehlel ren papah Kauno ni arail pahn papahiuk oh ahmw peneinei?

Ia wasa me ke pahn kohla oh diar soukohp oh wahnpoaron ieias, me Koht malipe pwe en kihenguhk ehu ahl en alehdi kaweid, wehweh, popohl, oh kamarain ong atail kahpwalkan en rahn wet?

Ia wasa me ke pahn kohla oh diar aramas me momourki koasondi kesempwal kan me kitail ehukipene oh men kadaurehieng noumw serihkan oh neirail serihkan?

Oh ia wasa ke pahn kohla oh kehn peren me kin kohdo sang tiahk sarawi en kemourlah kan oh inou kan en nan tehnpas sarawi?

Riei ohl oh lih oko, alehda oh momourki rongamwahu en Krais kin apwal. Ih kin mwomwe mahso, oh e pahn duweduwehte. Mour kak rasohng aramas ahr keid nan ahl ukada oh apwal. E sohte suwed ma ekei pak kitail uhdi nan ahlo oh esingekda, oh pwureng tehk atail ahlo, oh medewe atail seimek. Kaidehn koaros anahne uhdi nan ahlo, ahpw e sohte sapwung ma kitail wia mwo ni ansou me mie atail anahn. Ni mehlel, e kak wia mehkot mwahu ong irail akan me isanikihla ansou mwahu en kakehlakahkin irail pil en komour en rongamwahu en Krais.

Ih me keper ansou me emen kin pilada en salongasang nan ahl me kahluwa kitail kohla ni tuhkehn komouro.⁸ Ekei pak kitail kak esehla oh onopiki oh ese, oh ekei pak kitail anahne kamehlele, likih, oh koapwoaroapwoarki.

Ni imwilahu, emen emen kitail pahn anahne sapeng Sapwellimen Soundoro kalelapako: “Kumwail pil men keseiehla?”⁹ Kitail koaros anahne rapahki pein atail pasapeng. Ong ekei, pasapengo mengei; ong ekei, e kakete apwal. I sohte pahn mwomwehda ese dahme pwoson mengeiki ong ekei ah ekei soh. Ihte I kapingki ahi ese me mie pasapeng ansou koaros, oh ma kitail rapahki—ni ineng mehlel oh kapakapki nan mongiong unsek—kitail pahn udahn diar pasapeng en kalelapako ni atail pahn kohkohlahte nan ahl en rongamwaho. Nan ai wasa, mie me I ese me salongalahr oh pwurehng pwurodo mwurin arail kahpwal akan ah katikala arail pwoson.

Ahi koapwoaroapwoar mehlel iei me kitail en luke wen tohto en Sapwellimen Koht serih kan en rapahki oh mihmi nan ahl en rongamwahuo pwe irail en kak iang alehdi wahn tuhkehu, iei [me] keieu iousang wahn tuhke koaros.”¹⁰

Ahi pekpek sang nan mohngiongi me kitail en kangoange, alehda, wehwehki, oh poakehng irail akan me ahneki kahpwal nan arail pwoson. Kitail sohte pahn monokehla emen rietail ohl oh lih akan. Kitail koaros mihmiseli wasah kei nan ahlo, oh kitail anahne papah emen emen nin duwen arail anahn.

Duwehte atail kasamwoh irail akan me ahptehn iangala Mwomwohdiso, kitail en pil kasalehiong utuht oh sawas ong irail me ahneki kahpwal oh kalelapak nan arail pwoson.

Pwe ien pil doadoahngki ehu karasaras, I kapakapki me koaros me medemedewe kohkohlahsang “Sohp en Mahs Saion” wasa me Koht oh Krais me ilihlih, en uhdi oh medemedewe mwahu mwohn ahmw wia.

Menlau ese me mendahte ma mie melimel en kisineng laud oh iloak me pahn lel sohp en mahso, tamataman ansou koaros me Soundoro ketket loalle oh E kak angiangih melimelo en tukidi ni ah pahn mahsanih, “Meleilei, oh nenenla.” Mwohn e pahn mahsen, kitail en dehr peikasal, oh kitail en katengedi atail pwoson oh ese me “kisiniengo oh sehdo pil kin peikiong Ih.”¹¹

Riei ohl oh lih oko, I inoukihong kumwail ni mwaren Kauno me E sohte pahn likidmahliehla Sapwellime Mwomwohdiso oh E sohte pahn likidmaliehla emen kitail. Tamatamn pasapeng me Piter sapengki Sapwellimen Soundoro keinemwe oh mahseno:

“Ihs me se pahn patohla reh? komwi me Sapwellimanki mahsen en mour soutuk.

“Oh se pwosonlahr oh esehier me Sapwellimen Koht me Sarawio komwi.”¹²

I kadehdehki me sohte ehu mwar de wiepe me mour soutuk kak kohkihdo rehn aramas akan, ihte sang oh ni mwaren Krais.¹³

I pil kadehdehki me Sises Krais malipehdo wahnpoaron akan oh soukohp akan nan atail ahnsou oh kapwurehdohr Sapwellime Mwomwohdiso ki padahk kan oh kosoned akan en wia wasahn ruk sang melimel oh engieng me pahn udahn kohdo ihte ma aramas en sampah koluhla oh pwurodo Reh.¹⁴

I pil kadehdehki me Kauno luke koaros en kohdo reh oh alehda Sapwellime kalahngan; oh e sohte pahn ketin soikala me kohdo Reh, me tontoal oh pwetepwet, me sensel oh saledek, ohl oh lih; … oh koaros duwepenehte rehn Koht.”¹⁵

Sises iei atail Soundor oh Sounkomour, oh Sapwellime rongamwahu kopwurupwurdohu pahn kahluweikitaillahng nan mwoalen Samatail oh Inetail Nanleng ma kitail tengedieng nan ahl en rongamwahuo oh idawehn Sapwellime karasaras akan. Ih mepwukat me I kadehdehki ni mwaren Sises Krais, amen.