A Matou Ō Ea Ia Te Ai?

I nai tausaga talu ai, sa matou asiasi atu ai ma lo’u aiga i le Nuu Paia. O se tasi o mea matagofie ou te manatuaina mea mai la matou malaga o se asiasiga i le afeafe pito aluga i Ierusalema, le nofoaga anamua o le Tausamaaga Mulimuli.

A o matou tutu ai i lena nofoaga, sa ou faitau atu ia i latou mai le Ioane 17, lea sa aioi atu ai Iesu i Lona Tama mo Ona soo:

“Ou te tatalo mo i latou ... ina ia tasi o i latou, faapei o i taua. ...

“E le faapito la’u tatalo mo i latou nei, a o i latou foi e faatuatua ia te au ona o la latou upu;

“Ina ia tasi i latou uma, faapei o oe le Tama o i totonu ia te au, o au foi o i totonu ia te oe, ina ia tasi i latou i totonu ia te i taua”¹

Sa matua ootia au a o faitauina nei upu ma iloa ane ai o loo ou tatalo foi au ia i lena nofoaga paia ina ia mafai ona tasi au ma lo’u aiga faatasi ma lo’u Tama Faalelagi ma Lona Alo.

O a tatou mafutaga faapelepele ma aiga, uo, le Alii, ma Lana Ekalesia toefuataiina o nisi ia o mea e sili ona taua i le olaga. Ona o nei mafutaga e matua taua lava, e tatau ona faamemelo i ai, puipuia, ma faafaileleina.

O se tasi o tala faamomoiloto i tusitusiga paia na tupu i le taimi na iloa ai e “isi ... soo e toatele [o le Alii]” ua faigata ona taliaina Ana aoaoga ma le aoaoga faavae, ma sa latou “o ese ... i tua, a e lei toe feoai i latou ma ia.”²

Ona faliu atu lea o Iesu i le Toasefululua ma fesili, “Pe tou te fia o ese foi?”³

Sa tali sa’o atu Peteru:

“Le Alii e, a matou o ea ia te ai? O ia te oe upu o le ola e faavavau.

“Ua matou talitonu, ma ua matou iloa o oe o le Keriso, o le Alo o le Atua soifua.”⁴

I lena taimi, a o taulai atu isi tagata i mea sa le mafai ona latou taliaina, sa filifili Aposetolo e taulai atu i mea na latou matua taitonu ma iloa, ma i se taunuuga, sa latou mau faatasi pea ma Keriso.

Mulimuli ane, i le aso o le Penetikoso, sa maua ai e le Toasefululua le meaalofa o le Agaga Paia. Sa oo ina latou totoa i a latou molimau ia Keriso ma amata ai ona malamalama atoatoa atili i aoaoga a Iesu.

E leai foi ma se eseesega i nei aso. Mo nisi, o le valaaulia a Keriso ia talitonu ma tumau pea o loo faaauau pea ona faigata—pe talia gatā. O nisi soo e faigata ona malamalama i se aiaiga faavae patino po o se aoaoga a le Ekalesia. O isi e atugalu lava i lo tatou talafaasolopito po o ni le atoatoa o nisi o tagata ma taitai o le ekalesia, i le tuanai ma le taimi nei. O loo i ai pea isi e faigata ona ola i se tapuaiga o loo manaomia ai le tele o mea. Ma le mea mulimuli, o nisi ua “faavaivai i le faia o mea lelei.”⁵ Mo nei mafuaaga ma isi mafuaaga, ua lemautonu ai isi tagata o le Ekalesia i lo latou faatuatua, ma tuufesili ai pe faamata e tatau ona latou mulimuli ia i latou o e “ua o ese i tua, ma le toe feoai” ma Iesu.

A i ai se tasi o outou ua fememea’i i lou faatuatua, ou te fesili atu ia te outou i le fesili lava e tasi na fesili ai Peteru: “A [outou] o ea ia te ai?” Afai e te filifili ia le toe toaga mai pe tuua foi le Ekalesia toefuataiina a Iesu Keriso o le Au Paia o Aso e Gata Ai, o fea o le a e alu i ai? O le a se mea o le a e faia? O le faaiuga o le “le toe feoai” ma tagata o le Ekalesia ma taitai filifilia a le Alii o le a i ai sona aafiaga mo se taimi umi lea e le mafai ona vaaia pea i le taimi nei. Atonu o loo i ai ni aoaoga faavae, ni aiaiga faavae, sina vaega o le talafaasolopito e feteenai ma lou faatuatua, ma atonu e te lagona ai e na o le pau le auala e foia ai lena fenumiaiga i le loto i le taimi nei o le “le toe feoai” ma le Au Paia. Afai e te soifua i le umi ua ou ola ai, o le a e iloaina e i ai lava i faafitauli se auala e foia ai e i latou lava. Atonu o se malamalamaaga musuia po o se faaaliga e ono faamalamalamaina ai se faafitauli. Manatua, o le Toefuataiga e le o se mea se tasi na tupu, ae o loo faaauau pea ona faaali mai.

Aua lava ne’i lafoaia upumoni sili na faaali mai e ala mai i le Perofeta o Iosefa Samita. Aua lava ne’i tuu le faitauina, mafaufau loloto, ma le faaaogaina o le mataupu faavae a Keriso o loo i totonu o le Tusi a Mamona.

Aua nei musu e tuu atu se taimi tutusa i le Alii e ala i taumafaiga faamaoni e malamalama i mea ua faaali mai e le Alii. E pei ona fai mai la’u uo pele ma paaga muamua o Elder Neal A. Maxwell i se tasi taimi, “E le tatau ona tatou manatu ... faapea ona ua le mafai ona tatou faamalamalamaina se mea, o le a le mafai lava la ona faamalamalamaina.”⁶

O lea la a o lei e faia lena filifiliga lamatia faaleagaga e alu ese, ou te uunaia oe ia toe taofi ma mafaufau ma le toto’a a o lei e lafoaia soo se mea na aumaia oe i lau molimau o le Ekalesia toefuataiina a Iesu Keriso i le taimi muamua lava. Taofi ma mafaufau i mea sa e lagonaina iinei ma le mafuaaga na e lagonaina ai. Mafaufau i taimi na molimau atu ai le Agaga Paia ia te oe e uiga i upumoni e faavavau.

O fea o le a e alu i ai e te maua ai isi e tutusa tou talitonuga i Matua Faalelagi patino ma agaalofa, o e ua aoaoina i tatou i le auala e toe foi atu ai i lo La afioaga e faavavau?

O fea o le a e alu i ai ina ia aoaoina e uiga i se Faaola o lau uo mamae, o le na mafatia e le gata mo au agasala ae o le na mafatia foi i “tiga ma puapuaga ma faaosoosoga o ituaiga eseese uma” ina ia “mafai ona faatumuina ona loto i le alofa mutimutivale, e tusa ai ma le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga,”⁷ ou te talitonu, e aofia ai ma le vaivaiga o le leai o se faatuatua?

O fea o le a e alu i ai e aoao atili ai e uiga i le fuafuaga a le Tama Faalelagi mo lo tatou fiafia ma le filemu e faavavau, ma le taitaiga mo o tatou olaga faaletino ma faavavau? Manatua, o le ata o le faaolataga ua ia avatua i le olaga faaletino le uiga, faamoemoega, ma le taitaiga.

O fea o le a e alu i ai e maua ai se faatulagaga auiliili ma musuia o faalapotopotoga faaleEkalesia lea e aoao ai oe ma lagolagoina e alii ma tamaitai o e e matua tuuto atu lava i le tautuaina o le Alii e ala i le auauna atu ia te oe ma lou aiga?

O fea o le a e alu i ai e maua ai ni perofeta ma aposetolo soifua, o e ua valaauina e le Atua e tuu atu ia te oe se isi punaoa o fautuaga, malamalamaaga, faamafanafanaga, ma musumusuga mo luitau o o tatou aso?

O fea o le a e alu i ai e maua ai tagata o e ola i se seti fautuaina o tulaga faatauaina ma tulaga faatonuina o loo e faasoaina ma manao e tuufaasolo atu i lau fanau ma fanau a fanau?

Ma o fea o le a e alu i ai e lagona ai le olioli lea e sau mai sauniga faaola ma feagaiga o le malumalu?

Uso e ma tuafafine, o le taliaina ma le ola ai i le talalelei a Keriso e mafai ona luitauina. Sa luitauina i taimi uma, ma o le a faapena lava. O le olaga e tai pei o tagata sopo mauga e fe’a’ei i se auala tu ma faigata. O le mea masani lava le taofi i lea taimi ma lea taimi i luga o le ala ae to le manava, toe iloilo le ala, ma toe fetuunai le saoasaoa o le alu. E le o tagata uma e manaomia ona taofi i luga o le ala, ae e leai se mea e leaga ai lou faia o lena mea pe a manaomia e ou tulaga. O le mea moni, e mafai ona avea ma se mea lelei mo i latou e faaaogaina atoa le avanoa e toe faafou ai i latou lava i vai ola o le talalelei a Keriso.

E oo mai le lamatiaga pe a filifili se tasi e alu ese mai le ala lea e tau atu i le laau o le ola.⁸ O nisi taimi e mafai ona tatou aoao, suesue, ma iloa, ma o nisi taimi e ao ona tatou talitonu, faalagolago, ma faamoemoe.

I le faaiuga, e tatau ia i tatou taitoatasi ona tali atu i le fesili a le Faaola: “Pe tou te fia o ese foi?”⁹ E ao ia i tatou uma ona saili mo a tatou lava tali i lena fesili. Mo nisi, o le tali e faigofie lava; mo isi, e faigata. Ou te le faafoliga e iloa le mafuaaga e faigofie atu le faatuatua e talitonu ai mo nisi nai lo isi. Ae ou te matua faafetai lava i le iloa ai o loo i ai lava iina ia tali, ma afai tatou te saili i ai—saili moni ma le manatu moni i ai ma le faamoemoe atoa o se loto agaga tatalo—o le a iu lava ina tatou maua ia tali i a tatou fesili a o tatou faaauau ai i luga o le ala o le talalelei. I la’u auaunaga, ua ou iloa i latou o ē na ō ese ma toe foi mai ina ua mavae le tofotofoga o le faatuatua.

Ou te faamoemoe ma le faamaoni o le a tatou valaauliaina se aofaiga faateleina o fanau a le Atua ia maua ma tumau i luga o le ala o le talalelei ina ia mafai foi e i latou ona “aai i le fua ua sili ona manaomia nai lo isi fua uma lava.”¹⁰

Ou te aioi atu ma le faamaoni ia tatou faamalosiau atu, taliaina, malamalama ma alolofa ia i latou o loo tauivi ma lo latou faatuatua. E le tatau lava ona tatou tuulafoaiina soo se tasi o o tatou uso ma tuafafine. O loo tatou i ai uma i nofoaga eseese i luga o le ala, ma e manaomia ona tatou auauna atu i le tasi ma le isi e pei ona tatau ai.

E pei foi lava ona tatau ai ona faaloaloa atu o tatou lima i se agaga o le talileleia o tagata fou liliu mai, e faapena foi ona tatau ia i tatou ona talia ma lagolago i latou o loo i ai ni fesili ma ua fenumiai i lo latou faatuatua.

I le faaaogaina ai o se isi talafaatusa ua masani ai, ou te tatalo afai o i ai soo se tasi o mafaufau e tuua le “Vaa Tuai o Siona,” lea o loo i ai le Atua ma Keriso i le foeuli, o le a taofi ma toe mafaufau toto’a ae e te lei faia lena mea.

Faamolemole ia iloa e ui lava ina taia e matagi malolosi ma galu le vaa tuai, ae ia manatua pea o loo i ai le Faaola i luga o le vaa ma e mafai ona vavao i le matagi i Lana poloaiga, “Filemu, ina malū ia.” Ae, e le tatau ona tatou fefefe, ma e tatau ona tatou maua se faatuatua le femoumouai ma iloa “[e oo lava] i le matagi ma le vai [e usiusitai] ia te ia.”¹¹

Uso e ma tuafafine, ou te folafola atu ia te outou i le suafa o le Alii o le a Ia le tuulafoai lava i Lana Ekalesia ma o le a Ia le tuulafoai lava i soo se tasi o i tatou. Manatua le tali a Peteru i le fesili ma le fetalaiga a le Faaola?

“Le Alii e, a matou o ea ia te ai? O ia te oe upu o le ola e faavavau.

“Ua matou talitonu, ma ua matou iloa o oe o le Keriso, o le Alo o le Atua soifua.”¹²

Ou te molimau atu e “leai se isi igoa e tuuina mai po o se isi lava ala po o ni auala e mafai ona oo mai ai le olataga i le fanauga a tagata, ua nao i le suafa lava ma ala i le suafa lava o Keriso”¹³

Ou te molimau atu foi ua valaauina e Iesu Keriso aposetolo ma perofeta i o tatou aso ma toefuatai mai Lana Ekalesia ma aoaoga ma poloaiga “e fai ma sulufaiga mai afa, ma mai le toasa” ia o le a mautinoa lava e oo mai vagana ai ua salamo tagata o le laolagi ma toefoi mai ia te Ia.¹⁴

Ou te molimau atu foi o le Alii ua “valaauina i latou uma ia o mai ia te ia ma taumamafa i lona agalelei; ma e le teena e ia se tasi e sau ia te ia, e uliuli pe pa’epa’e, e pologa pe saoloto, o tane ma fafine; ... ma ua tutusa tagata uma i le Atua.”¹⁵

O Iesu o lo tatou Faaola ma le Togiola, ma o Lana talalelei toefuataiina o le a taitai atu ai i tatou ma le saogalemu i le afioaga o o tatou Matua Faalelagi pe afai tatou te tumau i luga o le ala o le talalelei ma mulimuli i Ona tulagaao. Ou te molimau atu ai i nei mea i le suafa o Iesu Keriso, amene.”