E haere ti’a mātou ia vai ra ?

E rave rahi matahiti i ma’iri a’enei, ’ua tere māta’ita’i tō’u ’utuāfare ’e ’o vau nei i te Fenua Mo’a. Te hō’ē o tā’u mau ha’amana’ora’a ’ū’ana roa nō tō mātou tere ’o te hō’ē ïa tere i te piha teitei i Ierusalema i te vāhi mātauhia nō te Tāmā’ara’a hope’a.

’A ti’a ai mātou i taua vāhi ra, ’ua tai’o atu vau ia rātou i te pāpa’ira’a i roto ia Ioane 17, i reira tō Iesu tāparura’a i tōna Metua nō tāna mau pipi :

« ’O rātou tā’u e pure nei… ’ia hō’ē a’e rātou mai ia tāua ato’a nei ā… 

« ’Aore ho’i au i pure ia rātou ana’e nei, i te feiā ato’a rā e fa’aro’o mai iā’u i tā rātou ra ha’api’ira’a.

« ’Ia riro rātou ato’a ’ei hō’ē ; mai ia ’oe, e tā’u Metua, i roto iā’u nei ra, ’e mai iā’u ho’i i roto ia ’oe na, ’ia hō’ē ato’a rātou i roto ia tāua. »¹

’Ua putapū roa tō’u ’ā’au i te tai’ora’a i teie mau parau ’e ’ua ’ite au iā’u iho i te purera’a i taua vāhi mo’a ra ’ia nehenehe iā’u ’ia hō’ē ’e tō’u ’utuāfare nā reira ato’a ’e tō’u Metua i te Ao ra ’e tāna Tamaiti.

Tō tātou mau aura’a faufa’a rahi ’e tō tātou mau ’utuāfare, te mau hoa, te Fatu, ’e tāna ’Ēkālesia tei fa’aho’ihia mai o te mau mea faufa’a rahi roa ïa i roto i te orara’a nei. Nō te faufa’a rahi o teie mau aura’a, e ti’a ïa i te reira ’ia herehia, ’ia pāruruhia ’e ’ia ’atu’atuhia.

Te hō’ē o te mau ’ā’amu ’oto roa a’e i roto i te pāpa’ira’a mo’a ’ua tupu ïa i te taime « e rave rahi te mau pipi a [te Fatu] » tei ’ite ē e mea fifi ’ia fāri’i i tāna mau ha’api’ira’a ’e te parau ha’api’ira’a tumu, ’e « fa’aru’e maira i reira ra, ’e ’aita maira i pe’e fa’ahou iāna. »²

’A fa’aru’e mai ai teie mau pipi, ’ua fāriu ihora ’o Iesu i te ’Ahuru Ma Piti ’e ui atura : « E haere ato’a ānei ’outou ? »³

’Ua parau atura ’o Petero :

« E te Fatu, e haere ti’a [ïa] mātou ia vai ra ? tei ia ’oe ho’i te parau o te ora mure ’ore ra.

’Ua fa’aro’o a’enei ho’i mātou, ’e ’ua ’ite ho’i mātou ē, ’o ’oe te Mesia, te Tamaiti a te Atua ora ra ».⁴

I taua taime ra, ’a ha’apa’o noa ai vetahi ’ē i te mea tei ’ore e nehenehe ia rātou ’ia fāri’i, ’ua mā’iti te mau ’āpōsetolo i te ha’apa’o i te mea tā rātou i ti’aturi ’e i ’ite, ’e i te hope’ara’a, ’ua fa’aea rātou i te Mesia ra.

I muri mai, i te mahana nō te Penetetōte ’ua fāri’i te Tino ’Ahuru Ma Piti i te hōro’ara’a a te Vārua Maita’i. ’Ua riro mai rātou ’ei feiā itoito i roto i tō rātou itera’a pāpū nō te Mesia ’e ’ua ha’amata rātou i te hāro’aro’a atu ā i te mau ha’api’ira’a a Iesu.

’Aita i huru ’ē atu i teie nei mahana. Nō te tahi, tē vai pa’ari noa ra ā ’aore rā e mea fifi ’ia fāri’i i te anira’a a te Mesia ’ia ti’aturi ’e ’ia fa’aea mai. Tē fifi nei te tahi mau pipi i te māramarama maita’i i te hō’ē ’arata’ira’a ta’a ’ē ’aore rā ha’api’ira’a a te ’Ēkālesia. Tē ’ite nei te tahi i te mau fifi i roto i tō tātou ’ā’amu ’aore rā i roto i te mau paruparu o te tahi mau melo ’e te feiā fa’atere, nō muta’a iho ’e nō teie nei mahana. Tē fifi noa ra ā te tahi ’ia ora i te hō’ē fa’aro’o ’o tē tītau rahi nei. I te pae hope’a, ’ua « rohirohi te tahi i te parau maita’i ».⁵ Nō teie ’e te tahi atu mau tumu, tē turori nei te tahi mau melo nō te ’Ekālesia i roto i tō rātou fa’aro’o, ma te māna’ona’o mai te mea e ti’a paha ia rātou ’ia pe’e i taua mau ta’ata ra tei « fa’aru’e, ’e tei ’ore i pe’e fa’ahou » ia Iesu.

Mai te mea tē vai nei te hō’ē o ’outou e turori nei i roto i tōna fa’aro’o, tē ani nei au ia ’outou i te hō’ē ā uira’a tā Petero i ui : « E haere ti’a ïa [’outou] ’ia vai ra ? » Mai te mea e mā’iti ’outou ’ia riro ’ei melo paruparu ’aore rā ’ia fa’aru’e i te ’Ēkālesia ’a Iesu Mesia i te Feiā Mo’a i te Mau Mahana Hope’a Nei tei fa’aho’ihia mai, e haere ti’a ïa ’outou ia vai ra ? E aha ïa tā ’outou e rave ? Te fa’aotira’a ’ia « ’ore e pe’e fa’ahou » i te mau melo nō te ’Ēkālesia ’e te feiā fa’atere mā’itihia ’e te Fatu, e hope’a ïa tō te reira ’o te ’ore e ’itehia i teie iho ā taime. Tē vai nei paha te tahi ha’api’ira’a tumu, te tahi arata’ira’a, te tahi tufa’a iti o te ’ā’amu e’ita e tū’ati ra i tō ’outou fa’aro’o, ’e ’ua mana’o paha ’outou ē te rāve’a noa ’ia tīnai i taua aura’a ’ore ra i roto ia ’outou i teie iho ā taime ’o te « ’ore ïa e pe’e fa’ahou » i te Feiā Mo’a. Mai te mea e ora maoro ’outou mai iā’u nei, e ’ite ïa ’outou ē e rāve’a tō te mau mea nō te matara rātou iho. E nīni’i mai paha te hō’ē hi’ora’a fa’auruhia ’aore rā te hō’ē heheura’a i te hō’ē māramarama ’āpī i ni’a i te hō’ē parau fifi. ’A ha’amana’o, e ’ere te Fa’aho’i-fa’ahou-ra’a i te hō’ē noa ’ohipa tei tupu, tē tāmau noa ra rā te reira i te tupu.

’Eiaha roa e fa’aru’e i te mau parau mau fa’ahiahia tei heheuhia mai nā roto i te peropheta Iosepha Semita. ’Eiaha roa atu e fa’aea i te tai’o, i te feruri hōhonu, ’e i te fa’a’ohipa i te ha’api’ira’a tumu a te Mesia i roto i te Buka a Moromona.

’Eiaha roa e ha’amo’e i te hōro’a i te hō’ē ā taime nā te Fatu nā roto i te mau tūtavara’a mau ’ia māramarama i te mau mea tā te Fatu i heheu mai. Mai tā tō’u hoa here ’e hoa ’āpōsetolo tahito ’o Elder Neal A. Maxwell i parau i te hō’ē taime : « ’Eiaha tātou e mana’o ē … nō te mea noa ē e’ita te tahi mea e noa’a ia tātou i te tātara, e’ita ïa e noa’a i te tātarahia. »⁶

Nō reira, hou ’outou ’a rave ai i taua mā’itira’a ata’ata ra i te pae vārua ’ia fa’aru’e, tē fa’aitoito nei au ia ’outou ’ia fa’aea ’e ’ia feruri māite hou ’a fa’aru’e ai i te mau mea ato’a tei hōro’a mātāmua ia ’outou i tō ’outou ’itera’a pāpū nō te ’Ēkālesia ’a Iesu Mesia tei fa’aho’ihia mai. ’A fa’aea ’e ’a feruri i te mea tā ’outou i ’ite i’ō nei ’e nō te aha ’outou i ’ite ai i te reira. ’A feruri na i te mau taime i fa’a’ite ai te Vārua Maita’i ia ’outou nō ni’a i te parau mau mure ’ore.

I hea ïa ’outou e haere atu ai nō te ’imi i te mau ta’ata e fāri’i ato’a mai ia ’outou i teie ti’aturi i roto i nā Metua Here i te Ao ra ’o tei ha’api’i mai ia tātou e nāhea ’ia ho’i atu i mua i tō rāua aro mure ’ore ?

I hea ïa ’outou e haere atu ai ’ia ha’api’ihia mai nō ni’a i te hō’ē Fa’aora tei riro ’ei hoa maita’i roa a’e nō ’outou, tei ’ore i māuiui noa nō tā ’outou mau hara, tei fa’a’oroma’i ato’a rā « i te māuiui,’e te ’ati ’e te mau huru fa’ahemara’a ato’a ra » ’ia nehenehe « ’ia fa’a’īhia tōna ra ’ā’au i te aroha i au i te tino ’ia ’ite ’oia nā roto i te tino i te rāve’a e fa’aora ai i tōna mau ta’ata i tō rātou mau paruparu ra, »⁷ ’e tae noa atu, i tō’u ti’aturira’a, i te paruparu nō te ’erera’a te fa’aro’o ?

I hea ïa ’outou e haere ai e ha’api’i rahi atu ā nō ni’a i te ’ōpuara’a a te Metua i te Ao ra nō tō tātou ’oa’oa ’e te hau mure ’ore, te hō’ē ’ōpuara’a tei ’ī i te mau rāve’a fa’ahiahia, te mau ha’api’ira’a, ’e te ’arata’ira’a nō tō tātou orara’a tāhuti nei ’e te orara’a mure ’ore ? ’A ha’amana’o, tē hōro’a nei te ’ōpuara’a nō te fa’aorara’a i te aura’a, te tumu ’e te arata’ira’a, i te orara’a tāhuti nei.

I hea ïa ’outou e haere ai e ’imi i te hō’ē fa’anahonahora’a hōhonu ’e te fa’auruhia a te ’Ēkālesia ’e nā roto atu i te reira ’outou e ha’api’ihia ’e e pāturuhia ai e te mau tāne ’e te mau vāhine tei hina’aro-hōhonu-mau i te tāvini i te Fatu nā roto i te tāvinira’a ia ’outou ’e tō ’outou ’utuāfare ?

I hea ïa ’outou e haere ai e ’imi i te mau peropheta ’e te mau ’āpōsetolo ora, tei pi’ihia e te Atua nō te hōro’a ia ’outou i te tahi atu rāve’a a’o, te rāve’a ’ite, te rāve’a tāmahanahana ’e te rāve’a fa’auru i mua i te mau tāmatara’a nō tō tātou nei tau ?

I hea ïa ’outou e ’imi ai i te mau ta’ata ’o tē ora nei mai te au i te tahi mau faufa’a ’e te mau ture tā ’outou i fāri’i ’e tā ’outou e hina’aro i te hōro’a atu i tā ’outou mau tamari’i ’e mau mo’otua ?

’E i hea ïa ’outou e haere ai nō te ’ite i te ’oa’oa ’o te tae mai nā roto i te mau ’ōro’a fa’aora ’e te mau fafa’ura’a o te hiero ?

Te mau taea’e ’e te mau tuahine, e nehenehe te fāri’ira’a ’e te orara’a i te ’evanelia a Iesu Mesia e riro ’ei ’ohipa teimaha. Mai te reira noa i mua ra ; mai te reira noa ato’a a muri a’e. E nehenehe te orara’a e riro mai te feiā e pa’uma ra i te hō’ē porōmu teitei ’e te pa’ari. E ’ohipa nātura ’e te mātauhia ’ia fa’afa’aea i te tahi taime i ni’a i te ’ē’a nō te huti i te aho, nō te hi’o fa’ahou i tō tātou haere’a ’e nō te hi’opo’a fa’ahou i te vitivitira’a o tō tātou haerera’a. ’Aita te mau ta’ata ato’a i tītauhia i te fa’afa’aea i ni’a i te ’ē’a, e ’ere rā i te mea fifi mai te mea e tītauhia ’ia nā reira. ’oia mau, ’e nehenehe te reira e riro ’ei ’ohipa maita’i nō te mau ta’ata ’ia haru māite i teie rāve’a nō te fa’ahaumarū ia rātou iho i te pape ora nō te ’evanelia a Iesu Mesia.

E tae mai te fifi ’ia mā’iti ana’e te tahi ta’ata ’ia hahi ’ē atu nā ni’a i te ’ē’a o te arata’i atu i te tumu rā’au nō te ora.⁸ I te tahi mau taime e nehenehe tā tātou ’ia ha’api’i, ’ia tuatāpapa ’e ’ia ’ite, i te tahi mau taime, ’e ti’a ia tātou ’ia fa’aro’o ’ia ti’aturi, ’e ’ia tīa’i.

I te pae hope’a, e ti’a ïa ia tātou tāta’itahi ’ia pāhono i te uira’a a te Fa’aora : « E haere ato’a ānei ’outou ? »⁹ E ti’a ia tātou pā’āto’a ’ia mā’imi i tā tātou iho pāhonora’a i taua uira’a ra. Nō te tahi, e mea ’ōhie te pāhonora’a ; nō vetahi ’ē, e mea fifi. ’Aita vau e parau nei ē ’ua ’ite au nō te aha e mea ’ōhie a’e nō te tahi te fa’aro’o ’ia ti’aturi ’eiaha rā nō vetahi ’ē. ’Ua māuruuru rahi rā vau nō te ’ite ē tē vai noa ra te mau pāhonora’a, ’e mai te mea e mā’imi tātou i te reira—mā’imi mau ma te mana’o pāpū ’e te hina’aro mau o te hō’ē ’ā’au pure—e ’itehia ïa ia tātou i te pae hope’a te mau pāhonora’a i tā tātou mau uira’a ’a tāmau noa ai tātou i te haere nā ni’a i te ’ē’a o te ’evanelia. I roto i tā’u tāvinira’a, ’ua mātau vau i te feiā tei haere ’ē atu ’e tei ho’i mai i muri mai i te tāmatara’a o tō rātou fa’aro’o.

Te ti’aturi rahi o tō’u ’ā’au, ’oia ho’i, ’ia ani manihini tātou i e rave rahi atu ā tamari’i a te Atua ’ia ’imi ’e ’ia fa’aea i ni’a i te ’ē’a o te ’evanelia ’ia nehenehe ato’a ia rātou ’ia « ’amu i te hotu ra, tei hau tōna maita’i i tō te mau hotu ’ē’ē ato’a ra ».¹⁰

Te tāparu o tō’u ’ā’au, ’oia ho’i, ’ia fa’aitoito tātou, ’ia fāri’i, ’ia māramarama, ’e ’ia here ho’i i te mau ta’ata e fifi nei i tō rātou ra fa’aro’o. ’Eiaha roa atu tātou e tāu’a ’ore i te hō’ē noa a’e o tō tātou mau taea’e ’e mau tuahine. Nō tātou pā’āto’a nei, e mea ta’a ’ē te vāhi i tāpaehia i ni’a i te ’ē’a, ’e e ti’a ia tātou ’ia utuutu te tahi i te tahi.

Mai ia tātou e ti’a i te ’īriti i tō tātou rima nō te fāri’i i te mau ta’ata fa’afāriu-’āpī-hia, e ti’a ato’a ia tātou ’ia fāri’i poupou ’e ’ia pāturu i te feiā e mau uira’a tā rātou ’e ’o tē turori nei i roto i tō rātou ra fa’aro’o.

Ma te fa’a’ohipa i te tahi parabole mātauhia, tē pure nei au ē, hou ’oia e haere atu ai, ’ia fa’aea ’e ’ia feruri maita’i te ta’ata e mana’o nei i te fa’aru’e i te « Pahi tahito nō Ziona », ’o te fa’aterehia nei e te Atua ’e te Mesia.

’Ia ’ite ’outou ē noa atu e tā’iri mai te mau mata’i e te mau ’are i taua pahi tahito ra, tei ni’a te Fa’aora i te pahi ’e e nehenehe iāna ’ia tāpe’a i te vero i tāna ra fa’auera’a, « ’A fa’aea, ’a mania ». Hou rā te reira, ’eiaha ïa tātou e mata’u, e ti’a rā ia tātou ’ia noa’a te fa’aro’o ’āueue ’ore ’e ’ia ’ite ē « e fa’aro’o te mata’i ’e te moana ato’a iāna ».¹¹

Te mau taea’e ’e te mau tuahine, tē fafau atu nei au ia ’outou i te i’oa o te Fatu ē e’ita roa ’oia e fa’aru’e i tāna ra ’Ekālesia ’e e ’ore roa ’oia e fa’aru’e i te hō’ē o tātou. ’A ha’amana’o i te pāhonora’a a Petero i te uira’a ’e te mau parau a te Fa’aora :

« E haere ti’a [ïa] mātou ia vai ra ? tei ia ’oe ho’i te parau o te ora mure ’ore ra.

’Ua fa’aro’o a’enei ho’i mātou, ’e ’ua ’ite ho’i mātou ē, ’o ’oe te Mesia, te Tamaiti a te Atua ora ra ».¹²

Tē fa’a’ite pāpū nei au ē, ’Aita atu e i’oa, ’aita ho’i e ’ē’a, ’aita ho’i e rāve’a e fa’a’itehia mai, e tae mai ai te ora i te tamari’i a te ta’ata nei, i roto ana’e rā, ’e nā roto ana’e ho’i i te i’oa o te Mesia ».¹³

Tē fa’a’ite pāpū ato’a nei au ē ’ua pi’i Iesu Mesia i te mau ’āpōsetolo ’e te mau peropheta i tō tātou nei tau ’e ’ua fa’aho’i mai i tāna ’Ekālesia ’e te mau ha’api’ira’a ’e te mau fa’auera’a ’ei « vāhi ha’apūra’a nō te vero ’e i te riri » ’o te tae mai iho ā maori rā ’ia tātarahapa te ta’ata o te ao nei ’e ’ia ho’i atu iāna ra.¹⁴

Tē fa’a’ite pāpū fa’ahou atu nei au ē tē ani nei te Fatu « i te mau ta’ata ato’a ’ia haere mai iāna ra, ’e ’ia rave i tōna ra maita’i ; ’e ’aita roa ’oia e fa’a’ore i te hō’ē tei hina’aro iāna ra, te ta’ata ’ere’ere ’e te uouo, te tītī ’e te ti’amā, te tāne ’e te vāhine… ’e hō’ē ana’e tō te ta’ata ato’a ti’ara’a i mua i te Atua ».¹⁵

’O Iesu tō tātou Fa’aora ’e te Tāra’ehara, ’e e ’arata’i ti’a atu tāna ’evanelia tei fa’aho’ihia mai ia tātou i mua i te aro o tō tātou nā Metua i te Ao ra mai te mea e fa’aea tātou i ni’a i te ’ē’a o te ’evanelia ’e ’ia pe’e tātou i tōna ra mau ta’ahira’a ’āvae. ’O tā’u ïa e fa’aite pāpū atu nei i te i’oa mo’a o Iesu Mesia, ’āmene.