2010–2019
Peran ilo Naan in Kam̧ool kōn Jisōs
Oktoba 2016


Peran ilo Naan in Kam̧ool kōn Jisōs

Jejjab maron̄ kōtļo̧k bwe naan in kam̧ool ko ad kōn Rilo̧mo̧o̧r ren pok im pen ad meļeļe kōn wōt mennin ļōkatip ko.

Mour indeeo, eo ej mennin letok eo eļaptata iaan mennin letok ko an Anij im ej n̄an ro rej “kōjparok kien ko An [Anij] im niknik n̄an jem̧ļo̧kin.”1 Ilo bar juon wāween, mour indeeo ippān Jemādwōj Ilan̄ ej kaarmejet ro me “rejjab peran ilo naan in kam̧ool kōn Jisōs.” 2 Elōn̄ jejjo mennin lōkatip ko ilo ad peran me remaron̄ bōbrae kōj jān ad tōpar kōtōpar eo an mour indeeo.3 Mennin lōkatip ko remaron̄ pen; ij lewōj waanjon̄ak.

Elōn̄ iiō ko rem̧ootļo̧k jema eaar kalōk juon em̧ jidikdik mōttanļo̧k melaaj in jikin tāāp menin mour ijo eaar rūttoļo̧k ie. Jikin ko kwoj alooji jān melaaj eo reaibojoj. Ke rej kōm̧m̧ane dipin em̧ jidikdik eo, iaar etal im lale ijeņ. Iaar bwilōn̄ ke wintō eo me jej lo aibojoj in jikin eo jej lo joor in jarōm ejjab ettoļo̧k jān m̧weo imō. Ippa make, ekar juon men eo ekakko ilo aō lale an aiboojoj melaaj eo.

Pija
Joor in Jarōm eo inamōj in wintō eo

Iaar ba, “Jema, etke kwar tin kōtļo̧k aer likūt joor in jarōm eo imaan in wōt jene me jej reinamōj ļo̧k im lo aibojoj in jikin eo jān wintō eo?”

Jema, juon eo ekapāāl ilo jerbal ko an im jeļā kemaanwa, eaar kōmeļeļeik jān en̄jake eo an, “Quentin, joor in jarōm en ej juon iaan men ko reaibojoj tata ippa ilo aolepān melaaj in!” Innem eaar kwaļo̧k etke ejaam kar kōm̧m̧ane. “N̄e ij reiļo̧k im lale joor en, ij kile ke, ejjab āinwōt ke iaar rūttoļo̧k ije, Iban bar ekkotak nien dān ko jān jikin aibōj ko n̄an m̧weo n̄an kōmat, kwal peiū, ak tutu. Iban bar tile kantōl ko ak iliki oil ilo laam ko ilo bon̄ bwe in riit. Ikōnaan loe joor in jarōm eo iolaptata in ijo jej reinamōjļo̧k n̄an alooje jān wintō eo.”

Jema eaar oktak meļeļe eo an kōn joor in jarōm eo jān n̄a. Ippān, joor en ej kwaļo̧k an em̧m̧anļo̧k jokkun mour, ak ippa ekar juon mennin lōkatip n̄an alooje aibojoj in jikin eo. Jema eaar lukkuun kaorōk jarōm, meram, im erreo ijjeļo̧kin alooje jikin eo. Iaar kajju kile ke ilo an joor in jarōm eo kar juon mennin lōkatip n̄an n̄a, eļap an ļap tokjen, ļap meļeļein n̄an jema.

Mennin lōkatip ko rej “kapan̄ ad tōmak ak meļeļe” ak “kapan̄ ad wōnmaanļo̧k.”4 N̄an wōtlo̧k ej “ilo ad jerawiwi ak jab pokake.”5 Mennin lōkatip ko remaron̄ jabdewōt men ko rej kamad kōj jān ad tōpar kōtōpar ko rejim̧we.

Jejjab maron̄ kōtļo̧k bwe naan in kam̧ool ko ad kōn Rilo̧mo̧o̧r ren pok im pen ad meļeļe kōn wōt mennin ļōkatip ko. Jejjab maron̄ wōtlo̧k ilo aujiid in. Naan in kam̧ool ko ad kōn Er rej aikuj erreo im alikkar āinwōt an alikkar an jema kōjparok joor in jarōm eo ilo melaaj eo eaar rūttoļo̧k ie.

Ta jet iaan mennin lōkatip ko me rej kapok im kapan̄ an erreo im allikar naan in kam̧ool ko ad kōn Jemān im Nejin im bōbrae kōj jān ad peran ilo naan in kam̧ool?

Juon iaan Mennin Ļōkatip ko ej Mālōtlōt an Armej

Jej kaorōk jeļāļo̧kjeņ an aolep kain im tōmak “Aiboojoj eo an Anij ej jeļāļo̧kjeņ.”6 Ak jej barāinwōt jeļā lukkuun karōk eo an eo enana ej n̄an tōlļo̧k buruōn armej jān Anij im kōm̧m̧an bwe ren tippok itok jān mālōtlōt an armej ijjeļo̧kin Rilo̧mo̧o̧r im katak ko An.

Rijilōk Paul ekar juon rikam̧ool eo eperan kōn Jisōs Kraist kōn kabwilōn̄lōn̄ im en̄jake ko eaar iooni ippān Rilo̧mo̧o̧r bwe en kar oktak mour eo an.7 Paul ejeņoļo̧k kōn kadkadin eo ekar kōpooj e n̄an kwaļo̧k n̄an armej ro jān kajjojo laļ. Em̧m̧an ippān “m̧ool im allikar” an Tessalonika im “tūriamo̧ ko rejouj” an Pilippai.8 Ekar pen jidik an kwaļo̧k ekkar n̄an jeļāļo̧kjeņ im manit ko an RiGreek ro. Ilo Athen ioon tōļ Mars, ekar kajjieon̄ kōjerbal mālōtlōt n̄an katakin armej ro im rekar makoko. N̄an Rikorint ro, eaar peran n̄an kwaļo̧k ilo alikkar “katak ko kōn Kraist ke eaar debāāl.”9 N̄an kōjerbal naan ko an Paul make eaar ba:

“Im aō naan im aō kwaļo̧k ear jab ilo naan in kareel an mālōtlōt, a ilo kam̧ool in Jetōb im kajoor:

“Bwe ami tōmak en jab ilo mālōtlōt in armej, a ilo kajoor an Anij.”10

Jet iaan bwebwenato ko rekabwilōn̄lōn̄ kōn Rilo̧mo̧o̧r im mijen eo An rej waļo̧k ilo1 Korint. Juon Jepta—15—emōj kairuj laļ in ilo wāween al jān George Frideric Handel Messiah.11 Epād ie katak ko rem̧ool kōn Jisōs Kraist. Ilo mōttan eo kein kajilu an Messiah, , kar kajju bōk jikin ālkin “Hallelujah Chorus,” eiten aolepān eoon ko raar kōjerbali raar jān 1 Korint 15. Ilo jet iaan eoon kein, eaibojoj an Paul kar kōmeļeļeik jet iaan ta ko Rilo̧mo̧o̧r eo eaar kōm̧m̧ani:

“[Bwe] kiiō emōj an Kraist jerkakpeje jān ro re mej, … leen m̧oktata iaan ro rej kiki.

“…  Bwe āinwōt mej ear itok kōn armej, barāinwōt kōn armej ej itok jerkakpeje an ro re mej.

“Bwe āinwōt ilo Adam ro otemjej rej mej, āindein barāinwōt ilo Kraist ro otemjej re naaj mour. …

“O mej, ewi am̧ ire? “O mej, ewi am̧ anjo̧? …

“A kam̧m̧oolol Anij, [eo] ej letok n̄an kōj anjo̧ kōn ad Irooj Jisōs Kraist.”12

Jejeļā kōn marōk jilōn̄lōn̄ eo eaar waļo̧k kōnke katak ko an armej raar watōki reutiejļo̧k jān katak ko an Kraist, katak ko raorōk. Ijjelo̧kin an lukkuun alikkar enaan ko an Rilo̧mo̧o̧r, m̧ool ko ralikkar im aorōk raar oktak im jako. Ilo m̧ool, rikūrjin raar mour kōn jet iaan manit ko an RiGreek n̄an dāpij tōmak ko aer ippān manit eo aer. Juon eo etijem̧ļo̧k kōn history etan in Will Durant eaar je: ”Rikūrjin ro raar jab joļo̧k wāween aer kabun̄ n̄an ekjab, raar mour kake. Manit eo an Greek eaar jako ļo̧k ak eaar bar ejaak jān ro me raar kōjparok jet iaan manit eo.”13 Ilo bwebwenato, im ilo raan kein ad, jet armej raar jum̧ae gospel eo an Jisōs Kraist kōnke, ilo tōmak ko aer, ejabwe jelāļo̧kjen an armej.

Ilo jimarok in Jerkakpeje eo, elōn̄ ro raar ba bwe rej ļoor katak ko an Rilo̧mo̧o̧r. Elōn̄ laļ ko raar likūt er bwe er Rikūrjin. Ak mekarta eaar wōr kannaan kōn iien ko reppenļo̧k ilo raan ko ad.

Heber C. Kimball kar juon iaan Rijilōk ro Jon̄oulruo jinointata ilo epepen in im kar Rikakpilōklōk eo Kein Kajuon n̄an Būreejtōn Brigham Young. Eaar kakkōl: “Iien eo ej itok im enaaj pen ad jeļā wōn enana im wōn Rikwojarjar jān imaan mejan rikōjdat ro rej jumae armej ro an Anij. Innem … ālkin iien ko reppen rej itok n̄e renaaj kajeņoļo̧k ro rijerawiwi jān ro rūm̧m̧an, enaaj lōn̄ wōt ro renana. Eaar kōjem̧ļo̧ke ke enaaj “itok iien idajon̄jon̄.”14

Ilo raan ko ad, im̧we ko an Rikūrjin ilo elōn̄ laļ ko, ekitbuuj United States, reddikļo̧k. N̄e ejjeļo̧k tōmak ilo kabun̄, ejjeļo̧k en̄jake n̄an bōk eddo ko ad n̄an Anij. Kōn menin, epen n̄an ejaake men ko reaorōk ippān armej kōn wāween mour. Mālōtlōt an armej, ko eļap kōjerbali ekkā aer boktok jorrāān.

Ej bar waļo̧k ippān jet iaan membōr ro ilo Kabun̄ in ro rej erļo̧k jān kam̧ool ko aer im po ilo men ko an jidik wōt iien—jejjo kōn jet un ko rejjab jim̧we.

Ekkar n̄an Kanaan eo an Heber  C. Kimball, Elder Neal A. Maxwell eaar ba ilo 1982: “Enaaj ļap kōjeņoļo̧k ej bōk jikin kōn wōt m̧wil nana ko me rejjab ukweļo̧k jāni. Jet renaaj ebbwer ijjello̧kin aer dāpdep wōt n̄an jem̧ļo̧kin. Jet renaaj po ilo m̧oņ an ro rūriab. Barāinwōt, ro jet renaaj inepata, im rebwe ilo kajjojo epepen rej jet iaan mennin ļōkatip ko.”15

Bar Juon Menin Lōkatip Ej Makoko in Kile Jerawiwi ko

Juon iaan mōttan eo ejenoļo̧k im kalulu ilo raan kein ej bwe elōn̄ armej raar bōk koņaer ilo m̧wil ko rebōd ak remakoko in kalikkar ke rej jerawiwi. Rejjab buromōj ak ikdeelel n̄an kile m̧wil ko ke relukkuun bōd. Barāinwōt ro jet rej kwaļo̧k aer tōmak ilo Jemān im Nejin im tōmak ke Jemādwōj Ilan̄ eo ej iakwe kōj ej aikuj kajejtokjen leen m̧wil ko me rejelōt kien ko An.

En̄in kar jekjekin tōmak eo an Korianton, ļeo nejin Alma eo Edik ilo Bok in Mormon. Eaar bōk koņaan ilo m̧wil ko rebōd im kaburomōjmōj im Alma eaar katakin e. Jejeram̧m̧an bwe rikanaan Alma eo em̧m̧an, eo ewōr an imenene kōn “ro̧n̄ emarok jilōn̄lōn̄ [im] meram ekabwilōn̄lōn̄,” 16 emōj je katak ko eaar katakin. Ilo jepta 39 ilo Alma, jej riiti wāween an kar katakin ļein nejin kōn ukweļo̧k innem kōmeļeļeik wāween an kar Kraist jeorļo̧k jerawiwi ko ad. Eaar kalikkar aorōkin ukweļo̧k n̄an Korianton kōnke “ejjeļo̧k men ettoon emaron̄ jolōte aelōn̄ in Anij.”17

Alma 42 epād ie jet iaan katak ko rekabwilōn̄lōn̄ kōn Pinmuur eo ilo aolepān eoon ko. Alma eaar jipan̄ Korianton meļeļe ke ejjab “ebōd bwe rijero̧wiwi en aikuj ba kajjien n̄an juon mejatoto in būrom̧ōj.”18Ak eaar je jān jinoin jān kar Adam, Anij eo etūriamo̧ eaar letok “iien n̄an ukeļo̧k” kōnke n̄e ejjeļo̧k ukweļo̧k, “karōk in lo̧mo̧o̧r eļap en kar jej tokjān.” 19 Alma eaar kile ke karōk eo an Anij ej juon “karōk in m̧ōņōņō eļap.”20

Katak ko an Alma relukkuun ļap meļeļeier: “Bwe lo, jim̧we ej kōjerbal aolep akweļap ko an, im barāinwōt tūriam̧o kake ej pukot aolep men ko an; im āindein, ejjeļo̧k ak ro wōt em̧ool aer ukeļo̧k rej mour.” 21 Meļeļe kōn ta eo em̧ool, kōjeram̧m̧an ko raibojoj an ukweļo̧k im pokake katak ko an Rilo̧mo̧o̧r relukkuun aorōk. Ejjab kalikjakļo̧k ilo an lukkuun alikkar, āinwōt Alma n̄an Korianton, kōn leen kālōt ko rebōd im likjab ilo ukweļo̧k. Ekkā aer kwaļo̧k, “Ejjab to ak tokālik aolep renaaj madmōde leen kālet ko aer make.”22

Kōjeram̧m̧an ko rekabwilōn̄lōn̄ kōn Pinmuur eo an Rilo̧mo̧o̧r ej bwe kōn ukweļo̧k, m̧wil ko rejarawiwi naaj jeorļo̧k. Ālkin an Korianton ukweļo̧k, Alma eaar kōjem̧loke ilo an ba, “kōtļo̧k bwe men kein rejjab bar kainepataik eok, im kōtļo̧k wōt bwe jero̧wiwi ko am̧ ren kainepataik eok, kōn inepata eo enaaj bōk laļļo̧k eok n̄an ukeļo̧k.”23

Reilo̧k jān kakōļļe eo ej juon Menin Lōkatip

Rikanaan Jekab eaar ņa etan RiJew ro etto āinwōt “armej kijn̄en̄e kōnwaer” raar dike …naan ko realikkar, …kar m̧an rikanaan ro, im kappukot men ko raar jab maron̄ meļeļe. Kōn menin, kōn pilo eo aer, pilo eo eaar itok jān reilo̧k jān kakōļļe eo, rej aikuj wōtlo̧k.”24

Ilo an lōn̄ waanjon̄ak kōn ro rej reiļo̧k jān kakōļļe eo,25 juon men eo eļap ilo raan kein ej tarjenjon̄an. Ad tarjenjon̄an kōn gospel ej ilo wāween an juon kautiej katak ko jet an gospel ilōn̄inļo̧k katak ko jet me rebar aorōk im likūt bwe ej ilōn̄inļo̧k ak jum̧ae katak ko an ritōl ro ilo Kabun̄ in. Juon waanjon̄ak ej n̄e juon ej kajjieon̄ kakobaba, ukōt, im kwaļo̧k wōt jidikin mōttan Naan in Mālōtlōt. Bar juon ej kōļapļap an kōpopo n̄an an jem̧lo̧k laļ in. Ilo waanjon̄ak kein ruo, ro jet rej tōmak n̄an errā kōn meļeļe ko aer make. “Eļan̄n̄e jej ukōt juon kien in ājmour ak jabdewōt katak ko ilo jekjek etarjenjon̄an kōn kabun̄, jej reiļo̧k jān kōkaļļe eo.”26

Kōnono kōn katak ko raorōk, Irooj eaar kwaļo̧k, “Jabdewōt ej kwaļo̧k eļapļo̧k ak dikļo̧k jān in, ejja in wōt ej jab jān Eō.”27 N̄e jej bōklōn̄tak jabdewōt katak ko ilo wāween eo me ej kadikļo̧k ad m̧ool n̄an katak ko jet raorōk ak eļļāļo̧k jān katak ko an ritōl ro an Kabun̄ in, jej reiļo̧k jān kakōļļe eo.

N̄an kakobaba, jet member rej bōklōn̄tak un ko, elōn̄ rem̧m̧an, n̄an likūt jekjek eo eutiejļo̧k jān katak ko an gospel me rallikar. Rej wujļepļo̧k n̄an meļeļe ko aer rej likūt imaantata im kadikļo̧k aer wujļepļo̧k Rilo̧mo̧o̧r im katak ko An im watōke ejjab lukkuun aorōk. Eļan̄n̄e jej kautiej jabdewōt men ilōn̄ļo̧k ad wujlepļo̧k n̄an Rilo̧mo̧o̧r, eļan̄n̄e jej kile E āinwōt juon rikaki ijjeļo̧kin an Nejin Anij ekwojarjar, innem jej reiļo̧k jān kōkaļļe eo. Jisōs Kraist ej kōkaļļe eo!

Jekjen 76 ilo Katak im Bujen ko ej kalikkar bwe “peran ilo naan in kam̧ool kōn Jisōs”28epidodo, im juon teej eo eaorōk n̄an ro renaaj jolet e kōjeram̧m̧an ko an celestial kingdom im ro ilo terrestrial kingdom. Bwe jen peran jej aikuj mije wōt kajoor eo an Jisōs Kraist im Pinmuur eo An n̄an anjo̧ jān mej im, kōn ukweļo̧k, n̄an karreoik kōj jān jerawiwi ko im n̄an ļoor katak ko an Kraist.29 Jej aikuj meram im jeļāļo̧kjeņ kōn mour eo an Rilo̧mo̧o̧r im katak ko An n̄an tōl kōj ilo iaļan bujen in, ekitbuuj kain̄i ko rekwojarjar an tampel. Jej aikuj dim ilo Kraist, kwojkwoj ioon naan ko An, im niknik n̄an jemļo̧kin.30

Āliktata

Eļan̄n̄e jej peran ilo naan in kam̧ool ko ad kōn Jisōs, jej aikuj kōjekdoon mennin lōkatip ko me ej kōbōjrak im bōbrae wōnmaanļo̧k eo an em̧m̧aan im kōrā ro rem̧m̧an. Jej aikuj kālet n̄an pād wōt ilo jerbal in An. Ilo ad pukōt jeļāļo̧kjeņ, jej aikuj kōjekdoon katak ko an armej me ej kadikļo̧k ad wujlepļo̧k Rilo̧mo̧o̧r. Jelukkuun meļeļe kōn jerawiwi im m̧ōņōņō kōn Pinmuur eo an Rilo̧mo̧o̧r ilo wāween ad ukweļo̧k. Jej aikuj kōjekdoon ad reilo̧k jān kakōļļe eo im mije wōt Jisōs Kraist, ad Rilo̧mo̧o̧r im Ripinmuur, im ļoor katak ko An.

Jema eaar likūt joor eo āinwōt juon wāween eo ej leļo̧k kajoor, meram, im eļap dān n̄an kōm̧āt im karreo. Ekar juon kein jipan̄ n̄an wōnmaanļo̧k ilo mour eo an.

Juon rijeje ej likūt mennin lōkatip ko remaron̄ oktak n̄an “kein jipan̄ ko jān erom juon armej eutiej im n̄an Lan̄.”31

N̄an kōj, peran ilo naan in kam̧ool ko ad kōn Jisōs ej juon kein jipan̄ ko bwe jen maron̄ karbab ilo jouj eo an Rilo̧mo̧o̧r im celestial kingdom. Jisōs Kraist ej āt eo wōt iumin lan̄ me jemaron̄ bōk lo̧mo̧o̧r jāne. 32 Ij kwaļo̧k aō kam̧ool kōn mour kwojarjar eo An im eddo eo An ekwojarjar ilo Karōk eo an Jemān. Ilo etan Jisōs Kraist, amen.

Kakeememej ko

  1. Katak im Bujen ko 14:7; bar lale Jon 17:3.

  2. Katak im Bujen ko 76:79.

  3. Lale True to the Faith: A Gospel Reference (2004), 52–53.

  4. Merriam-Webster’s Collegiate Dictionary, 11th ed. (2003), “stumbling block.”

  5. Merriam-Webster’s Collegiate Dictionary, “stumble.”

  6. Katak im Bujen ko 93:36.

  7. Lale Jerbal 9:1–9; 26:13–18.

  8. Lale Frederic W. Farrar, The Life and Work of St. Paul (1898), 319.

  9. Lale Farrar, Life and Work of St. Paul, 319–20.

  10. 1 Korint 2:4–5.

  11. Lale George Frideric Handel, Messiah, ed. T. Tertius Noble (1912).

  12. 1 Korint 15:20–22, 55, 57.

  13. Will Durant, The Story of Civilization, vol. 3, Caesar and Christ (1944), 595.

  14. Heber C. Kimball, in Orson F. Whitney, Life of Heber C. Kimball (1945), 446.

  15. Neal A. Maxwell, “Be of Good Cheer,” Ensign, Nov. 1982, 68.

  16. Mosaia 27:29.

  17. Alma 40:26.

  18. Alma 42:1. Ilo katak ko an Armej ro Rekwojarjar ilo Raan Kein Āliktata, aolep men raar pojak n̄an armej, ekoba ro raar jab ron̄ kōn Kraist ilo mour in, ajri ro raar mej mokta jān iiō in bōk eddo, im ro ejjelo̧k aer meļeļe. (lale Katak im Bujen ko 29:46–50; 137:7–10).

  19. Alma 42:5.

  20. Alma 42:8.

  21. Alma 42:24. Note that the personal pronoun for justice is his (male) and the personal pronoun for mercy is her (female).

  22. Robert Louis Stevenson, in Carla Carlisle, “A Banquet of Consequences,” Country Life, July 6, 2016, 48. Mrs. Carlisle credits Robert Louis Stevenson for the quote. Jet rej leļo̧k nōbar n̄an ro jet.

  23. Alma 42:29.

  24. Jekab 4:14.

  25. Ilo juon bwebwenato Iaar jeje n̄an magazine ko an Kabun̄ ilo 2003, Iaar kwaļo̧k emen eria ko me remaron̄ ejaak tarpok ko an armej kōn jeje ko rekwojarjar im lōkatip ko me Jekab eaar kōmeļeļeiki: jikin mālōtlōt an armej ej bōk jikin m̧ool ko an gospel, tarjānjon̄an kōn gospel, jerbal n̄an bōk nebar jān armej ijjeļo̧kin kōm̧m̧ani eddo ko an kabun̄ aolep raan im kaorōkļo̧k kien ko jān katak ko an gospel. (lale “Reiļo̧k jān kakōļļe eo,” Liahona, Mar. 2003, 21–24).

  26. Quentin L. Cook, “Reilo̧k jān kakōļļe eo,” Liahona, Mar. 2003, 22.

  27. Katak im Bujen ko 10:68.

  28. Katak im Bujen ko 76:79.

  29. Lale 2 Nipai 31:17–21.

  30. Lale2 Nipai 31:20–21.

  31. Henry Ward Beecher, in Tryon Edwards, A Dictionary of Thoughts (1891), 586.

  32. Lale 2 Nipai 31:21; Mosaia 3:17.