Mesisiich el nga er a Klaumerang er a Jesus

Ng blak a rengud el melai a llemesed er a kakerous el tekoi e oumera el kmo a “klebkellel a Dios a mui er a llomes.”⁶ Engdi kede dirrek el medengelii sel teletael loba cherarou el mengeroid er a rechad er a Dios e melibas er tir lolab a osischeklir a rechad el mo ruchei er a osischeklel Osobel.

A Apostol Paulus a mle mesisiich el sioning er a Jesus Kristo le ngii el siliseb er a mengasireng e omult a klengar el teletael lobengkel Osobel.⁷ A tokubets el klengar er a Paulus ruchei a kildmeklii el mo olisechakl er a rechad er a betok el kakerous el beluu. Ng mle soal a “bleketakl” e beot el klengar er a rechedal a Tesalonika me a dirrek el “chubechub” el klengar er a rechad er a Pilipi.⁸ E mlo metik el kmal meringel a lolisechakl er a remellomes e semmong er a tekingel a siukang el rechad er a Greek. Se er a le nga er a Mars’ Hill er a Athens, e ng millasem loba llemesel lolisechakl e dimlak a rongesii. A le bocha er a Korinth, e ng mlo blak a rengul lolisechakl a beot el “osischeklel a mla mekerus el Kristo.”⁹ A kmo dmung a meral tekingel a Apostol Paulus:

“Me a kungedecheduch me a kulisechakl e ng dimlak kusbech a duch er a omelekoi el ultuil er a llemesel a chad, e bai millisiich a tekingek lultuil er a klisichel me a Reng er a Dios:

“Me kemiu oumera er chelechang el diak multuil er a llemesel a klechad, e bai ultuil er a klisichel a Dios.”¹⁰

A bebil er a meral klebokel el cheldecheduch er a chelsel chedaol llechukl el kirel a Osobel me a urerel a debetik er a 1 Korinth. A tal bliongel—15—a mla moues er a beluulechad el rokir lokiu a chelitakl lulngedmokl er ngii a George Frideric Handel el Messiah ngklel.¹¹ Ng olab a dmolech el osisechakl el kirel Osobel. Sel ongedei el bliongel er tial Messiah, lokiuellel a “Hallelujah el Koras,” e a oumesingd er a bades er a chedaol llechukl lousbech a mengai er a 1 Korinth 15. Chelsel a bebil er a ikal bades, e a Paulus a meral ungil smaod a bebil er a ikel rirull Osobel:

“[Chelecha] e a Kristo a mla mekiis er a kodall, … el kot el mekiis er tirkel mla mad.

“… Ng uasiei el kodall a mlei lokiu a tal chad, me ng dirrek el okiis er a kodall a mei lokiu a tal chad.

“A Adam a mlo uchul e a rokui el chad a mo er a kodall, me a Kristo a uchul e a okiis er a kodall a mo er a rokui el chad, …

“Kau el kodall, ngar ker orsum el omekeuad? Kau el kodall, ngar ker a klisichem? …

“E ng di kmal mesaul a Dios, el [ngii] a rullid el mo mesisiich lokiu a Rubak el Jesus Kristo.”¹²

Kede medengei el kmo a ta er a uchul e ng dilubech a Rebet a osischeklel a chad a mlo ngarbab er a ikel beot, e meklou a belkul osischeklel a Kristo. Me ng uchul e a beot el klemechel Osobel, me a betok el bleketakl e mekreos el klemerang a mlengodech malechub e ng ririid. Ng klemerang, el Rekristiano a ngilai a bebil er a osischeklir a re Greek el uaia rirelterir el mo merael chisir. A chad er a omesubel a reksi el Will Durant a milluches: “A Klekristiano a dimlak el temelterir a re dimlak a klechelid er tir; ng bai mlo obengterir. A siukang er a re Greek a uaia blo lengemed e ng di milchelii a beches el klengar er a rengrir tirkel ngiluu.”¹³ A irechar, me a dirrek el chelechal sils, e a rebebil er a rechad a ouketui er a ebangkelio er a Jesus Kristo el, uldesuir a kmo, ng diak lolab a klebech el llemesel a chad.

Se er a uchelel Oluut, e te betok el chad a melekoi el kmo te oltirakl osischeklel Osobel. Betok el beluu a ulemdasou er tir el kmo te Kristiano el beluu. E ng di ng millemolem el mla er ngii a ulaoch el kirel a meringel el sils er kid.

A Heber C. Kimball a mle ta er tirkel Teruich me a teru el Apostol er a uchelel chelechal taem e Kot el Counselor er a President Brigham Young. Ng ulemeklatk el kmo: “Ng mereku sel taem … el bo de nga er a rrau reng er tial ko er a kmal kellechakl el taem er chelechang el mo meringel a bo dodengei el kmo ng techa Santo me a techa cherarou lomtok er a rechedal a Dios. Seikid sel taem … el bo de kerekikl lomes er a remelemalt er a delongelir a remekngit, e taem er a klou el omerritel, e betok a mo ruebet.” Ng mlo rokir a tekingel el kmo “ngar ngii a SKENG el merael mei.”¹⁴

Chelechal taem, e a tekingel a Klekristiano er a chelsel a betok el beluu, luldimukl er a Beluu er a Merikel a kmal mla mo kekerei. A lak a klechelid el doumera er ngii, e ng diak domelchesiu a ngercheled el mo er a Dios. A le uaisei, e ng meringel a dongedmokl a kerbai el kirel a klengar kid. A osischeklir a rechad el sal urrekodel a blechoel kautok

Mekngit el dolekoi, le tia dirrek el duubech er a chelsir a rebebil a re chedal a Ikelesia el tir a touchakl er a llemalt e mo teloi er a ngii di el ngerang el merael chisel—el betok er ngii a bleketakl el diak el melemalt.

A osisiu er a tial ulochel a Heber C. Kimball, e se er a 1982 e a Elder Neal A. Maxwell a millekoi el kmo: “Betok el teletael er a omerritel a mo duubech le ngar ngii olngesonges er a melemalt el blekeradel el chad a diak louchel a rengul kirel. A rebebil a kimer e diak bai loutekangel el mo er a ulebongel. E a rebebil a kuk mecheblad er a re mla ruebet. E dirrek, a rebebil a metord a rengrir, le ng di blechoel ngar ngii olibesongel er a chelsel er a bek el taem!”¹⁵

A ta er a kmal mekngit el teletael er chelechal sils er kid a sel betok el chad a ulsiseb er a chelsel a mekngit el blekeradel e diak el sorir kongei er ngii el kmo ng mekngit. Ng diak sel rengrir malechub el blak el reng er tir el kongei omerellir el kmo ng mekngit.Tia uldimukl er a rebebil el tir aleko te oumerang er a Chedam me a Ngalek e ng di te oumera el kmo a oubeltik el reng el Chedam er a Babeluades a diak a ngera el bo el rellii el kirel a blekeradel el ngii omtok a Llechul.

Tia ikid el uldasou a bleketakl el mla er a uldesuel a Corianton, el ngelekel a Kekerei el Alma er a chelsel a Babier er a Mormon. Ng mla er a chelsel a kmal mekngit el teletael me a Alma a milellach er ngii. Kede ngeltengat er a smiich el profet Alma, el ngii a siliseb er a chelsel a “klou el iilkolk [me a] dirrek el mengasireng el llomes,”¹⁶ el liluches a tekoi le dilung. Sel okedei me a etiu el bliongel er a Alma, e kede chemuiu a tekingel el mo er a ngika el ngelekel me a teletelel ouchel el reng e silodii el kmo a Kristo mlei el kirel a klengit. Ng milketeklii a klou el belkul ouchel reng el mo er a Corianton le ng “diak a ngii di el ngerang el diak el klikiid el soiseb er a rengedel a Dios.”¹⁷

A okeua me a eru el bliongel er a Alma olab a bebil er a kmal meang el osisechakl el kirel a Tngakireng er a chelsel a rokui el chedaol llechukl. A Alma ngilseuir a Corianton el mo medengei el uase ng ko er a “diak el sal melemalt el teletael alsekum a mla ruebet er a klengit el chad a di mo nguemed.”¹⁸ Engdi ng millekoi el kmo ngulemuchel er a Adam, e a chubechub el Dios a milskid a techall er a “ouchel reng” le lak ouchel reng, e sel “ngarbab el uldasou er a mo suobel a mo diak a ultutelel.”¹⁹ A Alma dirrek el dilu el kmo a uldesuel a Dios a “uldasou er a deureng.”²⁰

A osischeklel a Alma a kot el bedochel suobel:“Le kamosang, a llemalt a oltaut a rokui el longerchir, me a klechubechub a dirrek el mengerchir a rokui el blingelel; me ng di tirkel mei el mo ouchel a rengrir a mo suobel.”²¹ Ng kmal klemera tial tekoi, a klebokel el klengeltengat er a ouchel reng me a otireklel a osischeklel Osobel a kmal imis el meklou a belkul. Ng diak el mekngit a bo de bleketakl, el uaia Alma er a lollach er a Corianton, el kirel a kengtil a mekngit lomelilt e lak bo louchel a rengul kirel. Kede blechoel rongesii sel tekoi el kmo, “A le chelechang malechub a bo luriul e ng di rokui el chad a kirir el mo chelbangel a kengtil me a klungiolel omerellir.”²²

Sel klebokel e ngarbab el klengeltengat er a Tngakireng er a Osobel a kmo ngokiu a ouchel reng, e a mekngit lomeruul a mesuld. Uriul er a louchel a rengul a Corianton, e a Alma melkingang el kmo, “Lak el luut el mo omekringel er kau aikal tekoi, di le kngtim a omekringel er kau el merekong, el ngii el ringel a uchul e ke mo ouchel a rengum.”²³

A profet Jacob a millekoi el kirir a re Jews er a recheuodel el kmo “ng mekididai a rengrir el chad el ouketui … a bleketakl el tekoi, … omekeuad er a re profet, e ulsiik a tekoi el meringel er tir a mo medengei. Me ng milkolk losengir a uchul, ngii el ilkolk a mlo er ngii le tir el ulemes lengelakl er a olangch, me te mo ruebet.”²⁴

Ng uaisei el betok okesiu er a romes lengelakl er a olangch,²⁵ e ng di sel kmal bleketakl er chelechal sils a tirkel ngmai osisechakl lengelak er a meral belkul. A osisechakl er a ebangkelio chengelakl er a meral teletelel sel sekum e kede nguu a tal osisechakl el kuk kmal mo ruchei er a bebil er a meklou a belkul e sola mo omtok osicheklir a remengeteklel a Ikelesia. A tal okesiu a sel sekum a chad a dochel, ngmodech, malechub e ng kuk kmal di mesaod er a chimol tekoi er a chelsel a Llach er a Ulekereuil a Bedenged. A kuk chimong a sel kuk desal mo ouedikel el kirel a ulebengelel a beluulechad. A ika el eru el okesiu, e a rebebil a kuk di tir el melibech a belkul el kirir. “Alsekum e kede meltii a llechul a ulekerreuil a bedenged malechub a ngii di losisechakl el mo ko er a uaia le tekoi er a klechelid, e kid a mla omes lengelakl er a olangch.”²⁶

Se er a lolekoi el kirel a meklou a belkul osisechakl, e a Rubak a dilu el kmo, “Ngii di el techang el dochel malechub e ngmas a ikal osisechakl a diak el Chedak.”²⁷ Sel denguu a chimol osisechakl el kuk kmal mo ngarbab el uchul e ngosengesii a blak el reng er kid er a bebil er a osisiu el meklou a belkul osisechakl malechub e kede omtok lengelakl er a osischeklir a remengeteklel a Ikelesia, e kid omes lengelakl er a olangch.

Osisiu, a rebebil er a rechedal a ikelesia a ngmai a moktek er tir el mo er bab, el betok er ngii a ungil, el mo er a deruchall el ngarbab er a osisechakl er a ebangkelio. Te nguu a blak el reng el kirel a moktek er tir el mo ruchei e sola blak el reng er tir er a Osobel me a Osischeklel a mo ruriul. Alsekum e kede nguu a ngii di el ngerang el mo ruchei er a Osobel, alsekum a omerelled a di chotii el kmo ng kuk di ta er a sensei e diak el chedaol Ngelekel a Dios, e seikid e kid omes lengelakl er a olangch. A Jesus Kristo a ngii olangch!

Sel okeuid me a elolem el bliongel er a chelsel a Doctrine and Covenants a meketeklii el kmo a “blak el reng er a klaumera er a Jesus”²⁸ a kot el beot, e klou a belkul skeng er a delongelir tirkel mo ngmai a klengeltengat er a rengedel a celestial me tirkel mo er sel ngariou el rengedel a terrestrial. A blak el reng er kid a ultuil er a klisichel a Jesus Kristo me a tngakireng er Ngii el mo mesisiich er a kodall, e okiu ouchel reng, e ng mesuld a kengtid e mo oltirakl osischeklel a Kristo.²⁹ Kede dirrek lousbech er a llomes me a klemedengei er a klengar me a osischeklel Osobel el omekrael er kid er a rolel a telbiil, luldimukl er ngii a chedaol ruoll er a templo. Ng kirel mo blak a rengud el ngara Kristo, el mesuub a Tekingel, e outekangel el mo er a ulebongel.³⁰

Alsekum e ng meral mo blak a rengud er a klaumera er a Jesus, e ng kired el mengeroid er kid er a ikel olibesongel el mo torbengii omerollir a rebetok el chetengakl el sechal me a redil. Mei e doterkeklid el mo blechoel nga er a omesiou el mo er Ngii. E sel dosiik a llomes, e bo dongeroid er kid er a osischeklel a chad el ngii a ngosengesii a blak el reng er kid el mo er a Osobel. Ng kired el mesa mekngit er sel meral kengtil e kongei er a Tngakireng er a Osobel lokiu ouchel reng. Ng kired el mo diak domes lengelakl er a olangch e a moktek er kid a melutk er a Jesus Kristo, el Osobeled e Olsobel, e oltirakl a Osischeklel.

A demak a ulemes er sel dengkibasira el uaia luchul a klisiich, llomes, me a klou el ralm el mo er a omeruul kall me a omelatech. Ng mle dauch el kirel a ungil klengar ngii.

A tal chad er a omeluches a melekoi el kmo a olibesongel el teletael a sebeched el remuul el mo “dauch el mo er a lmuut el chetengakl el teletael me a babeluades.”³¹

A denguu er kid, e a blak el reng er a klaumera er kid er a Jesus a dauch el mo sebeched el mo nguu a krasia er a Osobel e soiseb er a rengedel a celestial. A Jesus Kristo a di chimo el ngakl el dokiu ngii e ng sebeched el mo suobel.³² A kuchais er a klemera el sioning er ngak el kirel a chedaol Teletelel me a Klisichel er a chelsel sel uldesuel a Chedam. El nga er a ngklel a Jesus Kristo, amen.