2010–2019
Totoa i le Molimau ia Iesu
Oketopa 2016


Totoa i le Molimau ia Iesu

E le mafai ona i ai ni a tatou molimau o le Tama ma le Alo ae tatou fenumia’i ma lē mautonu i maa tu’ia..

O le ola e faavavau o le meaalofa silisili lea a le Atua ma e tuuina atu ia i latou e “tausia ... poloaiga a le [Atua] ma tumau e oo i le iuga.”1 I le isi itu, o le ola e faavavau faatasi ma lo tatou Tama Faalelagi e le tuuina atua i “e sa lei totoa i le molimau ia Iesu.”2 E tele ni maa tu’ia i lo tatou lototoa e mafai ona taofia i tatou mai le ausiaina o le sini o le ola e faavavau.3 O maa tu’ia e mafai ona lavelave; se’i ou faamanino atu.

I le tele o tausaga talu ai sa fausia ai e lo’u tama se tamai fale i se vaega o le fanua o le faatoaga sa ola ae ai o ia. O le faataatiaga o le laufanua atoa sa ma’eu na’ua. Ina ua fausia puipui o le tama’i fale, sa ou asiasi atu i ai. Sa faateia lava a’u i le faamalama na i ai se vaaiga sa taulai sa’o atu lava i se pou moli sa le’i mamao ese mai le fale. Ia te a’u, sa matua faalavelave tele i le vaaiga ofoofogia.

Ata
O le vaaiga i fafo i le pou moli mai le faamalama

Sa ou fai atu, “Tama, aisea na e faatagaina ai i latou e tuu le pou moli i luma tonu o lau vaaiga mai le faamalama?”

O lo’u tama, o se tagata toaga ma to’a, sa alaga mai ma ni lagona, “Quentin, o le pou moli le la o le mea aupito sili lea ona matagofie ia te a’u i le faatoaga atoa lava!” Ona ia faamautu mai lea: “A ou vaai atu i le pou le la, ou te iloaina, e le pei o le taimi na ou ola a’e ai iinei, o le a ou le toe asuvai i ni paelo mai le vaipuna e ave i le fale e fai ai kuka, fufulu ai o’u lima, pe taele ai. Ou te le toe tutuina ni moli ga’o po o ni moli fagu i le po e faitautusi ai. Ou te manao ia ou vaai i le pou moli le la i le ogatotonu o le faamalama ou te matamata ai.

Sa ese foi se vaaiga a lo’u tama i le pou moli nai lo a’u. Ia te ia, o lena pou sa fai ma faatusa o se olaga ua siitiaina, ae ia te a’u o se maa tu’ia i se vaaiga ofoofogia. Sa faatauaina e lo’u tama le eletise, mōlī, ma le māmā e sili atu i lo se vaaiga matagofie. Sa vave ona ou iloaina e ui sa avea le pou ma se maa tu’ia ia te a’u, ae sa i ai sona uiga moni faafaatusa tele i lo’u tama.

O se maa tu’ia o “se faalavefau i se talitonuga po o se malamalamaaga” po o “se faafitauli i le alualu i luma.”4 O le tautevateva faaleagaga o le “pa’u atu lea i le agasala po o le faatautee.”5 O se maa tu’ia e mafai ona avea ma soo se mea e faalavefau ia i tatou mai le ausiaina o sini amiotonu.

E le mafai ona i ai ni a tatou molimau o le Tama ma le Alo ae tatou fenumia’i ma lē mautonu i maa tu’ia. E le tatau ona tatou pauu atu i lena mailei. O a tatou molimau e uiga ia i Laua e manaomia ona faatumauina le mama ma le faigofie e pei o le puipuiga faigofie a lo’u tama o le pou moli i le faatoaga na ia ola a’e ai.

O a nisi o maa tu’ia o loo faafenumia’ia ma faafaigataina a tatou molimau mama ma faigofie e uiga i le Tama ma le Alo ma taofia ai i tatou mai le totoa i lena molimau?

O Le Tasi Maa Tu’ia o Filisofia a Tagata

Ua tatou tuuto atu i ituaiga uma o le poto ma talitonu “o le mamalu o le Atua o le atamai lea.”6 Ae ua tatou iloa foi o le togafiti e fiafia i ai le tiapolo o le taitai ese lea o tagata mai le Atua ma mafua ai ona latou tautevateva e ala i le faamamafaina o filosofia [po o manatu] o tagata e sili atu i lo le Faaola ma Ana aoaoga.

O le Aposetolo o Paulo o se molimau mautinoa ia Iesu Keriso ona o se aafiaga faavavega ma le Faaola na suia ai le olaga.7 O le talaaga tulagaese o Paulo na saunia ai o ia e fesootai atu i tagata o aganuu e tele. Sa alofa o ia i le “faigofie ma le faamaoni” o tagata Tesalonia ma le “alofa agamalu” o tagata Filipi.8 Sa ia muai iloaina e faigata atu ona fesootai i le atamai ma le faaleaganuu o tagata Eleni. I Atenai i luga o Areopako, sa ia taumafai ai se talanoaga faalefilosofia ma sa teenaina. I tagata Korinito, sa tonu ai ia te ia ia tau lava o le aoao atu “o le aoaoga faavae a Keriso na faasatauroina.”9 I le faaaogaina o upu a le Aposetolo o Paulo:

“E lei sauni atu foi la’u upu, ma la’u tala’iga i upu mālie o le poto o tagata, a e peitai o le faasino mai e le Agaga ma le mana:

“Ina ia le i ai lo outou faatuatua i le poto o tagata, a o le mana o le Atua.”10

O nisi o tala sili ona ofoofogia o tusitusiga paia e uiga i le Faaola ma Lana misiona o loo ta’u mai i le 1 Korinito. O le mataupu—15—ua matua gauai atu i ai le lalolagi atoa e ala i faatinoga faamusika a George Frideric Handel, le Messiah.11 O loo i ai aoaoga faavae loloto e uiga i le Faaola. I le vaega lona tolu o le Messiah, lea e sosoo lava ma le “Hallelujah Chorus,” o loo faaaogaina ai le tele o mau mai le 1 Korinito 15. I ni nai fuaiupu nei, o loo faamatalaina ai ma le matagofie e Paulo nisi o mea na ausiaina e le Faaola.

“[Aua] o lenei ua toe faatuina mai Keriso i e ua oti, ua avea ma faapolopolo o e ua momoe.

“Aua ua oo mai le oti talu le tagata, ua oo mai foi le toe tutu o e ua oti talu le tagata.

“Aua faapei ona oti uma ia Atamu e faapea foi ona faaolaina uma ia Keriso. ...

“Le oti e, o fea o i ai lou tui? Le tuugamau e, o fea o i ai lou manumalo? ...

“A e faafetai i le Atua, o le na te foaiina mai le manumalo ia te i tatou talu lo tatou Alii o Iesu Keriso.”12

Ua tatou iloa o se vaega na tupu ai le Liliuese ona o filisofia a tagata na faasilisili i lo aoaoga faavae autu ma taua a Keriso. Nai lo le faigofie o le savali a le Faaola, o le tele o upumoni manino ma taua sa suia pe leiloloa. O le mea moni, sa talia e le FaaKerisiano nisi o uputuu faalefilosofia FaaEleni e faamaonia ai o latou talitonuga faatasi ma a latou aganuu sa i ai. Sa tusia e le tusi talafaasolopito o Will Durant: “Sa lei faaumatiaina e le FaaKerisiano faiga faapaupau; sa ia vaetamaina mai. Sa mou atu tu ma aga FaaEleni, ae tulai mai ai se olaga fou ia i latou sa apoina ni ona vaega.”13 I le talafaasolopito, faapea ai ma o tatou lava aso, e teena e nisi tagata le talalelei a Iesu Keriso ona, i o latou manatu, e le o lava se lavelave faaleatamai o i ai.

I le amataga o le Toefuataiga, e toatele sa tautino e mulimuli i aoaoga a le Faaola. E tele atunuu sa manatu ia i latou lava o ni malo Kerisiano. Ae e oo foi i lena taimi sa i ai se valoaga e uiga i se taimi sili atu ona faigata mo o tatou aso.

O Heber C. Kimball o se tasi o uluai Aposetolo e Toasefululua o lenei tisipenisione ma sa Fesoasoani Muamua ia Peresitene Polika Iaga. Sa ia lapatai mai: “Ua oo mai le taimi ... o le a faigata ai ona iloa foliga o se Au Paia mai foliga o se fili e faasagatau i le nuu o le Atua. O le taimi la lena e tagai ai mo le seleselega tele, aua o le a lulueseina ē amiotonu mai ē amioleaga, ma e toatele o le a pauu.” Sa ia faaiuina e faapea o loo i ai “se SUEGA o loo sau.”14

I o tatou aso, o le faatosinaga o le FaaKerisiano i le tele o atunuu, e aofia ai le Iunaite Setete, ua matua faaitiitia lava. A aunoa ma talitonuga faalelotu, o le a leai se lagona o le tali atu o le tagata lava ia i le Atua. O le mea lea, ua faigata ona faamautuina tulaga faatauaina lautele e uiga i le auala e ola ai. O filosofia e matua taofimau e tele ina feteenai ma le tasi ma le isi.

Ae paga lea, e tupu foi lenei mea i nisi tagata o le Ekalesia o e ua maluelue talitonuga ma faatosinaina e mea ua taatele i lena taimi—e tele lava ua manino e le o ni mea amiotonu.

E tusa ai ma le valoaga a Heber C. Kimball, sa saunoa ai foi Elder Neal A. Maxwell i le 1982: “O le tele o le luluina o le a tupu ona o fesasia’iga i amioga amiotonu ia e le o salamo ai. O nisi o le a faavaivai nai lo le tumau e oo i le iuga. O nisi o le a faaseseina e tagata ua liliuese. E faapena foi, o isi o le a faatausuai, ona o le a i ai maa tu’ia e fitoitonu i tisipenisione taitasi!”15

O Le Isi Maa Tu’ia o le Musu e Vaai i le Agasala i Lona Tulaga Moni

O se tasi o vaaiga tulagaese ma faapopoleina o o tatou aso, o le toatele o tagata e faia amioga agasala ae mumusu e manatu i ai o se agasala. E leai ma so latou faanoanoa po o se naunautaiga e faailoa a latou amioga o ni mea sese moni. E oo lava foi i isi e i ai se talitonuga i le Tama ma le Alo e talitonu sese e faapea o se Tama i le Lagi alofa e le tatau ona tuuina ni taunuuga mo amioga e feteenai ma Ana poloaiga.

O le talitonuga tonu lava lenei sa i ai ia Korianetona, le atalii o Alema le Itiiti i le Tusi a Mamona. Sa ia faia ni amioga le mama matuia ma sa fautuaina ai e Alema. Ua faamanuiaina i tatou i le tusiaina ai e le perofeta maoae o Alema, o le sa aafia patino i “se lua loloto sili ona pogisa [ma le] malamalama ofoofogia,”16 ia faatonuga na ia tuuina mai. I le mataupu 39 o le Alema, tatou te faitau ai i le auala sa ia fautuaina ai lenei atalii e ala i le faagasologa o le salamo ona ia faamalamalama atu lea o le auala na afio mai ai Keriso e aveese le agasala. Sa ia faamanino atu le manaomia o le salamo ia Korianetona ona “e leai se mea le mama e mafai ona mautofi i le malo o le Atua.”17

I le Alema 42 o loo i ai nisi o aoaoga faavae sili ona ofoofogia e uiga i le Togiola i tusitusiga paia. Sa fesoasoani Alema ia Korianetona ia malamalama e le o se lē “faamasinotonu le tofia o le tagata agasala i se tulaga o le pagatia.”18 Ae sa ia ta’ua e amata atu ia Atamu, sa saunia ai e se Atua alofa mutimutivale se “taimi e salamo ai” ona a aunoa ma le salamo, “ua le taulau le fuafuaga tele o le olataga.”19 Sa faamautu foi i ai e Alema le fuafuaga a le Atua o se “fuafuaga o le fiafia.”20

Ua sili ona aoga o aoaoga a Alema: “Aua faauta, e faaaoga e le faamasinotonu ona manaoga uma; ma e maua foi e le alofa mutimutivale mea uma e a ia lava; ma o lea, e leai se tasi ae ua nao e lava ua salamo moni e faaolaina.”21 O le malamalama moni i ai, e matua taua tele ai faamanuiaga mamalu o le salamo ma le usiusitai i aoaoga a le Faaola. O se mea talafeagai le manino, e pei ona sa faia e Alema ia Korianetona, e uiga i taunuuga o filifiliga agasala ma le leai o se salamo. Ua tele ona tautino mai, “Pe vave pe tuai mai ae e ao lava ona fetaiai tagata uma ma taunuuga o a latou filifiliga.”22

O faamanuiaga ofoofogia ma faaselesitila o le Togiola a le Faaola e faapea, o amioga agasala o le a soloia ese e le salamo. Ina ua mavae le salamo o Korianetona, sa faaiu atu e Alema e faapea, “Ia e tuu nei mea ia le toe faalavelave ia te oe, ae ia nao au agasala ia e popole i ai, le popole lena e aumai ai oe i lalo i le salamo.”23

O Le Tagai i Talaatu o le Faailoga o se Maa Tu’ia

Sa faasino atu le perofeta o Iakopo i Tagata Iutaia anamua o “se nuu ua maaa” o e na inoino i upu manino, sa “latou fasioti perofeta, ma saili mo mea sa le mafai ona latou malamalama i ai. O le mea lea, ona o lo latou tauaso, o se tauaso na oo mai i le latou vaai i tala atu o le faailoga, o lea o le a latou pauu ai.”24

E ui o loo tele ni faataitaiga o le vaai i tala atu o le faailoga,25 ae o se tasi iloga i o tatou aso o le manatu faasausili. O le manatu faasausili faaletalalelei o le faasili lea e se tasi o soo se mataupu faavae o le talalelei i luga o isi mataupu faavae taua e tutusa lelei ma finauina faapea e sili atu pe feteenai foi ma aoaoga a taitai o le Ekalesia. O se tasi faataitaiga pe a fautua e se tagata ni faaopopoga, suiga po o ni faamamafa autu i se vaega se tasi o le Upu o le Poto. O le isi o ni tapenaga taugata mo le “iuga o le lalolagi.” I faataitaiga uma ia e lua, ua uunaia ai isi e taliaina ni faaliliuga tumaoti. “Afai tatou te liliuina se tulafono faalesoifua maloloina po o se isi mataupu faavae i se ituaiga o faanaunautaiga faalelotu, o lona uiga ua tatou vaai i tala atu o le faailoga.”26

I le fetalai ai e uiga i le taua o aoaoga faavae, sa folafola mai ai e le Alii, “Ai se na te tala’i atu se mea e tele atu pe itiiti mai i lo lenei, o ia lava lea ua le o se a a’u.”27 A tatou faateleina soo se mataupu faavae i se ala e faaitiitia ai lo tatou tuuto atu i isi mataupu faavae e tutusa le taua pe faia foi se mea e feteenai ai pe faasili atu foi i aoaoga a taitai o le Ekalesia, ua tatou vaai i tala atu o le faailoga.

Ma le isi, o nisi tagata o le ekalesia ua faasili atu ni galuega, o le tele lava o mea lelei, i se tulaga e sili atu i lo aoaoga faavae autu o le talalelei. Ua latou suitulaga lo latou tuuto atu i le galuega e fai ma a latou faamuamua ae tuualalo lo latou tuuto atu i le Faaola ma Ana aoaoga i se tulaga lona lua. Afai tatou te faamuamua soo se mea i luga atu o lo tatou tuuto i le Faaola, afai o a tatou amioga ua iloa ai ua na o Ia o se isi faiaoga ae le o le Alo paia o le Atua, o lona uiga ua tatou vaai i tala atu o le faailoga. O Iesu Keriso o le faailoga!

O le vaega 76 o le Mataupu Faavae ma Feagaiga ua faamanino mai ai e faapea o le “totoa i le molimau ia Iesu”28 o le suega faigofie ma taua lea i le va o i latou o e o le a mauaina faamanuiaga o le malo selesitila ma i latou e o i le malo terasitila e maualalo ifo. Ina ia totoa, e manaomia ona tatou taulai atu i le mana o Iesu Keriso ma Lana taulaga togiola e faatoilalo ai le oti ma, e ala i le salamo, e faamama ai i tatou mai agasala, ma e manaomia ona tatou mulimuli i le mataupu faavae a Keriso.29 Tatou te manaomia foi le malamalama ma le poto e uiga i le soifuaga ma aoaoga a le Faaola e taiala ai i tatou i luga o le ala o feagaiga, e aofia ai sauniga paia o le malumalu. E tatau ona tatou mausali ia Keriso, taumamafa i Ana afioga, ma tumau e oo i le iuga.30

Faaiuga

Afai e ao ona tatou totoa i a tatou molimau ia Iesu, e tatau ona tatou aloese mai maa tu’ia o loo saisaitia ma taofia ai i tatou mai le alualu i luma o le toatele o isi alii ma tamaitai mamalu. Ia tatou filifili ia i ai i taimi uma i Lana galuega. A o saili atu i le poto, e manaomia ona tatou aloese mai filosofia a tagata ia e faaitiitia ai lo tatou tuuto atu i le Faaola. E tatau ona tatou vaai i le agasala i lona tulaga moni lava ma talia le Togiola a le Faaola e ala i le salamo. E manaomia ona tatou aloese mai le vaai i tala atu o le faailoga ma taulai atu ia Iesu Keriso, lo tatou Faaola ma le Togiola, ma mulimuli i Lana mataupu faavae.

Sa vaai lo’u tama i le pou o se auala e maua ai le eletise, malamalama, ma le tele o le vai mo kuka ma le faamamaina. Sa avea o se maa lagolago na faaleleia ai lona olaga.

Na fautua mai se tasi tusitala e faapea e mafai ona faia maa tu’ia e avea ma “maa lagolago ina ia avea ma tagata malualii ma oo atu ai i le lagi .”31

Mo i tatou, o le totoa i a tatou molimau ia Iesu o se maa lagolago lea agai atu i le agavaa mo le alofatunoa o le Faaola ma le malo selesitila. O Iesu Keriso ua na o le pau lea o le suafa i lalo o le lagi e mafai ona faaolaina ai tatou.32 Ou te tuu atu la’u molimau mautinoa i Lona paia ma Lana matafaioi faalelagi i le fuafuaga a le Tama. I le suafa o Iesu Keriso, amene.

Faamatalaga

  1. Mataupu Faavae ma Feagaiga 14:7; tagai foi Ioane 17:3.

  2. Mataupu Faavae ma Feagaiga 76:79.

  3. Tagai i le Faamaoni i le Faatuatua: O Se Tusitaiala o le Talalelei(2004), 52–53.

  4. Merriam-Webster’s Collegiate Dictionary, 11th ed. (2003), “stumbling block.”

  5. Merriam-Webster’s Collegiate Dictionary, “stumble.”

  6. Mataupu Faavae ma Feagaiga 93:36.

  7. Tagai Ioane 9:1–9; 13–18.

  8. Tagai Frederic W. Farrar, The Life and Work of St. Paul (1898), 319.

  9. Tagai Farrar, The Life and Work of St. Paul (319), -20.

  10. 1 Korinito 2:4–5.

  11. Tagai i le George Frideric Handel, Messiah, ed. T. Tertius Noble (1912).

  12. 1 Korinito 15:20–22, 55, 57.

  13. Will Durant, The Story of Civilization, vol. 3, Caesar and Christ (1944), 595.

  14. Heber C. Kimball, in Orson F. Whitney, Life of Heber C. Kimball (1945), 446.

  15. Neal A. Maxwell, “Ia Fiafia Pea,” Liahona, Ian. 1983, 127.

  16. Mosaea 27:29.

  17. Alema 40:26.

  18. Alema 42:1. I aoaoga faavae a le Au Paia o Aso e Gata Ai, o le laveaiga ua faia mo tagata uma e aofia ai i latou e le i faalogo ia Keriso i lenei olaga, o fanau e maliliu a o lei oo i tausaga e tali atu ai, ma i latou e leai se malamalama (tagai Mataupu Faavae ma Feagaiga 29:46–50; 137:7–10).

  19. Alema 42:5.

  20. Alema 42:8.

  21. Alema 42:24. Ia manatua o le soanauna patino mo le faamasinotonu o le his (alii) ma le soanauna patino mo le alofa mutimutivale o le her (tamaitai).

  22. Robert Louis Stevenson, in Carla Carlisle, “A Banquet of Consequences,” Country Life Magazine, July 6, 2016, 48. O loo faamamalu e Mrs. Carlisle ia Robert Louis Stevenson mo le upusii. E avatu e isi le faamamaluga i isi.

  23. Alema 42:29.

  24. Iakopo 4:14.

  25. I se tusiga na ou tusiaina mo le mekasini a le Ekalesia i le 2003, sa ou faamamafaina ai ni vaega se fa e mafai ona tupu ai le tauaso i mataupu faalelotu ma le tautevateva lea na faamatalaina e Iakopo: suitulagaina o filosofia a tagata mo upumoni o le talalelei, manatu faasausili i mataupu o le talalelei, o uiga fiatoa ua suia ai uiga faapaiaina o aso uma, ma le faasiliina o tulafono i lo aoaoga faavae (tagai “Vaai i Tala Atu o le Faailoga,” Liahona, Mat. 2003, 21–24).

  26. Tagai Quentin L. Cook, “Vaai i Tala Atu o le Faailoga,” Liahona, Mat. 2003, 2122.

  27. Mataupu Faavae ma Feagaiga 10:68.

  28. Mataupu Faavae ma Feagaiga 76:79.

  29. Tagai 2 Nifae 31:17–21.

  30. Tagai 2 Nifae 31:20–21.

  31. Henry Ward Beecher, i le Tryon Edwards, A Dictionary of Thoughts (11891), 586.

  32. Tagai 2 Nifae 31:21; Mosaea 3:17.