Wan Jeneresen we I Save Stanap Agensem Sin

Wan mo haf yia i bin pas, Presiden Rasel M. Nelson i bin tokbaot nid ia “blong tijim mo help blong lukaotem wan jeneresen we i save stanap agensem sin.”¹ Toktok ia─“jeneresen we i save stanap agensem sin”─ i tajem wan dip pat long saed blong spirit insaed long mi.

Yumi givim ona long ol pikinini we oli traehad blong stap klin mo gat fasin blong stap obei. Mi bin witnesem paoa ia long plante pikinini raon long wol. Oli “stanap strong mo no muvmuv” ² long plante kaen jalenj we oli stap fesem. Ol pikinini ia oli andastanem tabu aedentiti blong olgeta, oli filim lav blong Papa long Heven, mo lukaot blong stap obei long ol tok blong Hem.

Be, i gat ol pikinini we oli faenem i had blong “stanap strong mo no muvmuv” mo ol gudfala tingting blong olgeta i stap trabol.³ .“Ol spia blong devel” ⁴ i atakem olgeta long evri saed mo oli nidim paoa mo sapot. Olgeta i nidim bigfala help long yumi blong joen blong faet agensem sin long wok blong yumi blong karem ol pikinini blong yumi i kam long Kraes.

Lisin long ol toktok blong Elda Bruce R. Mckonkie kolosap 43 yia i bin pas:

“Olsem ol memba blong Jos, yumi joen long wan bigfala faet. Yumi stap long wo. Yumi pat long faet ia agensem Lusifa. …

“Bigfala wo ia we i stap gohed long evri saed mo i stap pulumaot plante man, samfala i ded, hemi no wan niu samting. …

“Naoia i nomo save gat wan we i stap long medel graon long faet ia.”⁵

Tedei, wo ia i gohed wetem moa paoa. Faet ia i kasem yumi evriwan, mo ol pikinini blong yumi nao oli stap long fored, oli stap fesem fos blong enemi. Mo yumi nid blong mekem ol plan blong yumi long saed blong spirit i kam moa strong.

Blong givim paoa long ol pikinini blong save stanap agensem sin hem i wan wok mo wan blesing blong ol paren, ol bubu, ol famli memba, ol tija, mo ol lida. Hem i wok blong wanwan long yumi blong help. Be, Lod i givim wan instraksen long ol paren blong tijim ol pikinini “blong andastanem doktrin blong sakem sin, fet long Kraes Pikinini blong God we i laef, mo baptaes mo presen we i Tabu Spirit” mo “blong prea, mo wokbaot long stret laef long fored blong Lod.”⁶

Olsem wanem blong “lukaotem ol pikinini blong yumi blong oli kam antap long laet mo trutok” ⁷ i save kam wan jalenj from se hem i defdefren long wanwan famli mo wanwan pikinini, be Papa long Heven i bin givim sam rul we i save helpem yumi evriwan. Bae Spirit i givim insperesen long yumi long wanem yumi save mekem blong protektem ol pikinini blong yumi long saed blong spirit.

Faswan, hem i blong gat wan visen long olsem wanem wok ia i impoten. Yumi mas andastanem tabu aedentiti mo stamba tingting blong yumi—mo blong olgeta—bifo yumi save helpem ol pikinini blong yumi blong luk huia olgeta mo from wanem oli stap long wol ia. Yumi mas helpem olgeta blong save stret se olgeta oli ol pikinini boe mo gel blong wan Papa long heven we i gat lav mo Hem i tingting bigwan long olgeta.

Namba tu, hem i blong andastanem doktrin blong sakem sin mo hao hem i wan impoten pat blong save stanap agensem sin. Blong save stanap agensem sin i no minim se yu nogat sin, be hem i save minim se yu gohed blong sakem sin, stap lukaot gud, mo gat strong tingting. Maet blong stanap agensem sin i kam olsem wan blesing blong oltaem stanap agensem sin. Olsem we Jemes i bin talem, “Yufala i mas blokem Setan, nao bambae hem i ronwe long yufala,” ⁸

Ol yangfala soldia blong Hileman “oli no les long wanem oli mekem …  ; be luk i no hemia nomo—oli ol man … we oli tru long evri taem long eni samting we ol lida blong olgeta … i trastem long olgeta. Yes, oli bin ol man we ol paren blong olgeta i tijim olgeta blong holem ol komanmen blong God mo wokbaot stret long fored blong Hem.”⁹ Ol yangfala ia oli go long wo wetem ol klin fasin blong Kraes olsem ol tul blong faet blong olgeta agensem enemi. Presiden Tomas S. Monson i rimaenem yumi se “singaot ia blong leftemap tingting i kam oltaem long yumi. Evri dei long laef, i nidim blong stap leftemap tingting—i no long ol spesel taem nomo, be traem oltaem, taem yumi mekem ol desisen o kasem ansa long ol situesen we yumi stap long hem.”¹⁰

Ol pikinini blong yumi oli werem ol klos blong faet long saed blong spirit taem oli tekem fasin blong stap olsem wan disaepol evri dei. Maet yumi luk daon long paoa blong ol pikinini blong save kasem ol fasin blong stap olsem wan disaepol evri dei. Presiden Henry  B. Eyring i givim kaonsel long yumi blong “stat tijim olgeta eli mo gohed blong tij oltaem.”¹¹ Nambatri ki blong helpem ol pikinini blong yumi blong save stanap agensem sin hem i blong stat fulumap olgeta wetem ol gospel doktrin mo prinsipol wetem lav—long ol skripja, Toktok blong Biliv, Blong Strong blong Ol Yut buklet, ol Praemeri singsing, ol him, mo ol testemoni blong yumiwan—we bae i save lidim ol pikinini i go long Sevya.

Blong gat ol fasin blong prea, stadi skripja, gat famli haos naet mo Sabat wosip oltaem i lid i go long fasin blong stap wan, gat filing blong trae had oltaem, mo ol gudfala fasin—long nara toktok, strong long saed blong spirit. Long taem blong tedei, we gudfala paoa i lus evriwan, ol pikinini blong yumi gat raet blong andastanem stret gudfala paoa ia mo from wanem hem i impoten tumas—speseli taem yumi stap mekem olgeta i rere blong mekem mo kipim ol tabu kavenan long taem oli kasem baptaes mo insaed long tempol. Olsem we Prijim Gospel blong Mi i tijim, “Blong stap kipim ol komitmen [ingkludum ol yangfala pikinini] i stap mekem rere ol pipol blong mekem mo kipim ol tabu kavenan.”¹²

Elda Jefri R. Holan i bin tijim, “Taem yumi tokbaot fasin blong stap kipim ol kavenan, yumi stap tokbaot stamba tingting blong yumi long wol ia.” ¹³ I gat wan defren paoa i stap long fasin blong stap mekem mo kipim ol kavenan wetem Papa blong yumi long Heven. Enemi i save hemia, mekem se hem i stap haedem tingting ia blong mekem kavenan. ¹⁴ Blong helpem ol pikinini blong andastanem, mekem, mo kipim ol tabu kavenan hem i wan nara ki blong gat wan jeneresen we i blokem aot sin.

?Olsem wanem nao yumi save rere long ol pikinini blong yumi blong mekem mo kipim ol tabu kavenan taem oli kam insaed mo gro folem rod blong kavenan? Blong tijim ol pikinini blong kipim ol smolsmol promes taem oli yang bae i givim paoa long olgeta blong save kipim ol tabu kavenan long laef blong olgeta afta.

Bae mi serem wan smol eksampol: Long famli haos naet, wan papa i askem, “?Evri samting long famli i oraet?” Faef yia Lisi i komplen se bigfala brata blong hem, Kevin, i stap jikim hem mo stap mekem hem i harem nogud. Kevin i talemaot se Lisi i tru. Mama blong Kevin i askem long hem wanem hem i save mekem blong pleplei gud wetem sista blong hem. Kevin i tingting mo i disaed se bae hem i mekem wan promes wetem Lisi blong nomo jikim hem blong wan ful dei.

Long en blong nekis dei, taem evriwan i stap tugeta long famli prea, papa blong Kevin i askem long hem wanem hem i bin mekem. Ansa blong Kevin i “!Papa, mi kipim promes blong mi!” Lisi i agri wetem glad mo famli i presem Kevin.

Mama blong Kevin i givim tingting blong hem se ?sapos Kevin i save kipim promes blong hem blong wan dei, wos wei bae hem i no save mekem blong tu dei? Tu dei i pas, Kevin i gat sakses blong kipim promes blong hem, !mo Lisi i glad bigwan! Taem papa blong hem i askem se from wanem hem i stap kipim gud promes blong hem, Kevin i talem, “Mi kipim promes blong mi from se mi talem se bae i mekem.”

Ol sakses blong kipim ol smolsmol promes olsem i stap lid i go long gudfala paoa. Fasin blong stap kipim ol promes oltaem i stap priperem ol pikinini long saed blong spirit blong kasem fasfala kavenan blong olgeta blong kasem baptaes mo presen we i Tabu Spirit, we oli promes blong givim seves long God mo kipim ol komanmen blong Hem. ¹⁵ Ol promes mo ol kavenan yu no save seraotem.

Insaed long buk blong Daniel yumi lanem se Sedrak, Mesak, mo Abednego oli no wantem givim wosip long aedol blong King Nebukadnesa. ¹⁶  King i wonem olgeta se bae i sakem olgeta i go long faea sapos oli no mekem wanem hem i talem. Olgeta i no wantem mo oli talem:

“Sapos i tru we bae yu sakem mitrifala i go long faea ia, God ia we mitrifala i wok blong hem, hem i save sevem mitrifalalong bigfala faea ia …

“Be sapos hem i no sevem mitrifala, nating nomo. Be yu mas save se bae mitrifala i no save mekem wosip long ol god blong yu.”¹⁷

“Be sapos hem i no [mekem].” Tingting long mining blong ol toktok ia mo olsem wanem oli go bak long fasin blong kipim ol kavenan. Trifala yang man ia oli no talem se bae oli obei nomo from se bae Lod i sevem olgeta. Iven sapos Lod i no sevem olgeta, bae olgeta i gohed blong kipim promes blong olgeta long Lod from se oli talem se bae oli mekem. Fasin blong kipim ol kavenan blong yumi hem i no mas jenis folem ol situesen blong yumi. Trifala yang man ia, semak olsem ol yangfala soldia blong Hileman, oli ol naesfala eksampol blong fasin blong stanap agensem sin blong ol pikinini blong yumi.

?Olsem wanem nao yumi save folem ol eksampol ia long ol hom mo ol famli blong yumi? “Tijing folem tijing, rul folem rul.”¹⁸ yumi stap helpem ol pikinini blong yumi blong testem sakses long ol smolsmol wei. Taem oli kipim ol promes blong olgeta, bae oli filim Spirit long laef blong olgeta. Elda Josef B Witlin i bin tijim se “bigfala presen blong gudfala paoa hem i blong gat Tabu Spirit olsem fren blong yu oltaem.”¹⁹ Afta bae “tras [blong ol pikinini blong yumi] bae i gro i kam strong long fored blong God.” ²⁰ Aot long ol gudfala paoa ia i kam wan paoaful jeneresen we i save blokem aot sin.

Ol brata mo sista, holem taet ol smol wan blong yu kolosap—kolosap gud blong oli save luk ol gudfala fasin blong yu long saed blong spirit mo wajem yu taem yu stap kipim ol promes mo ol kavenan blong yu. “Ol pikinini oli save kopi, givim olgeta wan gudfala samting blong oli save kopi.”²¹ I tru, yumi stap help blong tijim mo lukaotem wan jeneresen we i save blokem aot sin i go long Lod promes folem promes mo kavenan folem kavenan.

Mi testifae se Jisas Kraes i lidim Jos ia. Taem yu tij, lidim, mo lavem ol pikinini folem fasin blong Sevya, bae yu save kasem revelesen blong yuwan we bae i save helpem yu blong krietem mo protektem ol strong pikinini we oli save stanap agensem sin. Prea blong mi hem i bae ol pikinini blong yumi oli talem ol toktok blong Nifae: “?Bae yu mekem mi blong seksek taem mi luk sin?” ²² Mi testifae se Sevya blong yumi i pemaot praes blong ol sin blong wol²³—from se Hem i talem se bae Hem i mekem, mo Hem i lavem yumi moa bitim we yumi save andastan²⁴—from Hem i talem se bae Hem i mekem. Long nem blong Jisas Kraes, amen.