2010–2019
Ai Tabatamata Dau Vorata na iValavala Ca
Epereli 2017


Ai Tabatamata Dau Vorata na iValavala Ca

Ni o vakavulica, liutaka, ka lomani ira na gone ena ivakarau ni iVakabula, e rawa ni o ciqoma na ivakatakila ka na vukei iko ena nodra tauyavu ka vakaiyaragi na gone dau vorata na ivalavala ca gugumatua.

Ena dua veimama na yabaki sa oti, a vosa o Peresitedi Russell M.Nelson baleta na kena gadrevi “me vakavulici ka vukei me vakatuburi cake e dua na itabatamata dau vorata na ivalavala ca.”1 Na malanivosa—“e dua na itabatamata dau vorata na ivalavala ca”—e qirita e dua na rorogo vakayalo e yaloqu.

Eda dokai ira na gone era segata me ra bulataka e dua na bula savasava ka talairawarawa. Au sa vakadinadinataka na nodra igu e vuqa na gone e vuravura raraba. Era qaqa, “tudei, ka sega ni yavalati rawa”2 ena veimataqali ituvaki kei na draki ni bula bolei. O ira na gone oqo era kila na kedra ivakatakilakila vakalou, vakila na loloma ni Tamada Vakalomalagi ka segata me ra talairawarawa ki na Lomana.

Ia, era tu eso na gone e dredre tiko me ra “tudei ka sega ni yavalati rawa” ka sa mavoa tu na nodra vakasama malumalumu.3 Era sa bololaki ena veiyasana kecega mai na “gasauvidi ni meca”4 ka gadreva na veivakaukauwataki kei na veitokoni. Sa dua na veivakauqeti cecere vei keda me da tucake ka valuta na ivalavala ca ena noda sasaga me da kauti ira mai na luveda vei Karisito.

Rogoca na vosa nei Elder Bruce R. McConkie voleka ni 43 na yabaki sa oti:

Ni da lewena na Lotu, eda sa vakaitavi ena dua na veisaqasaqa kaukauwa. Eda vala tiko. Eda sa soli keda ki na inaki i Karisito me da valuti Lusefa. .…

“Na ivalu sa carubi tiko oqo ena veiyasana kecega ka kalouca ni vuqa era sa vuetaki kina, eso e bibi sara, e sega ni ka vou. …

“Ia e sega ni rawa ni dua e tu e lomadonu ena ivalu oqo.”5

Nikua sa tomani tikoga na ivalu oqo ka tosocake tikoga na kena kaukauwa. E tarai keda kece na ivalu oqo, ka ra tu ena laini e liu na luveda ka qaravi ira tu yani na meca. O koya, sa torocake tikoga kina na gagadre me da vaqaqacotaka na noda ivadi vakayalo.

Me ra vakaiyaragitaki na gone me ra vorata na ivalavala ca e dua na itavi ka veivakalougatataki vei ira na itubutubu, lewe ni matavuvale, qasenivuli, kei na iliuliu. Sa noda itavi yadua me da veivuke. Ia, na Turaga sa vakaroti ira vakatabakidua na itubutubu me ra vakavulici ira na luvedra “me ra kila na ivakavuvuli ni veivutuni, vakabauta na Karisito na Luve ni Kalou bula, kei na papitaiso kei na isolisoli ni Yalo Tabu” ka “me ra dau masu, ka lako vakadodonu e matana na Turaga.”6

Na ivakarau me da “vakavulici ira [kina] na [luveda] ena rarama kei na dina”7 e rawa ni dua na taro dredre baleta ni ka ni matavuvale yadua kei na gone, ia o Tamada Vakalomalagi sa solia mai na idusidusi raraba ka na vukei keda. Ena vakauqeti keda na Yalo ena sala mana duadua me da taqomaki ira kina vakayalo na luveda.

Me tekivu yani, sa yaga me tiko e dua na raivotu me baleta na bibi ni itavi oqo. Sa dodonu me da kila na noda—kei na nodra—ivakatakilakila vakalou kei na inaki ni se bera ni qai rawa me da vukei ira na luveda me ra raica o cei o ira kei na cava na vuna era tiko kina eke. Sa dodonu me da vukei ira me ra kila ka sega ni lomatarotaro ni o ira na luvena tagane ka luvena yalewa e dua na Tamada Vakalomalagi ka tu Vua na nanamaki vakalou ena vukudra.

iKarua, me kilai ni ivunau ni veivutuni e yaga ki na noda yaco me dau vorata na ivalavala ca. Na vorata na ivalavala ca e sega ni kena ibalebale me sega noda ivalavala ca, ia e kena ibalebale me veivutuni tikoga, kidakida tiko, ka gugumatua. E rairai na vorata na ivalavala ca e yaco mai me veivakalougatataki ena kena vorati tikoga na ivalavala ca. Me vaka e tukuna o Jemesa, “Vorata na tevoro, ena drotani kina vei kemudou ko koya” (Jemesa 8:7).

O ira na cauravou yaloqaqa “era sa cauravou bulabula kece ka yaloqaqa… ; ia raica me kena ikuri—ni ra sa … tamata yalodina ena veigauna kecega ena veika kecega era nuitaki kina. Io, … ni ra sa vakavulici me ra muria tikoga na ivakaro ni Kalou ka lako vakadodonu e matana.”9 Era lako ki valu na cauravou oqo ka kauta voli na ivalavala ni bula Vakarisito me ra valuta kina na nodra meca. E vakananuma vei keda o Peresitedi Thomas S. Monson ni “kaci ni yaloqaqa e dau yaco wasoma mai vei keda. Sa dau gadrevi na yaloqaqa ena noda bula e veisiga—sega ena veigauna tu yadua eso ia vakavuqa ni da vakatulewa se da sotava tiko na veituvaki ni bula e wavoliti keda tu.”10

Era na daramaka na luveda na iyaragi vakayalo ni ra tauyavutaka na ivakarau ni bula vakatisaipeli e veisiga. E rairai eda beca tiko beka na kaukauwa e tu vei ira na luveda me ra kukuva na ivakavuvuli ni bula vakatisaipeli e veisiga. E vakasalataki keda o Peresitedi Henry B. Eyring me da “tekivu vakamataka ka tudei.”11 Na ikatolu ni ki ni nodra vukei na itabagone me ra vorata na ivalavala ca sai koya me tekivu ni ra se gone sara me ra vulica na ivunau taumada ni kosipeli—mai na ivolanikalou, na Yavu ni Vakabauta, na ivolalailai Me iSakisaki ni iTabagone sere ni Lalai, serenilotu, kei na noda dui ivakadinadina—oqori ena tuberi ira na gone vua na iVakabula.

Na tarai cake ni itovo tudei ni masumasu, vuli ivolanikalou, lotu vakamatavuvale, kei na sokalou ena Siga ni Vakacecegu ena vakavurea na taucoko, tudei e loma, kei na ivakarau ni bula savasava qaqaco—ena dua tale na vosa, buladokai vakayalo. Ena vuravura nikua, sa yali vakadua kece na ivakarau ni bula dokai, e dodonu me ra kila na luveda se cava na buladokai dina kei na vuna e rui bibi kina—vakauasivi ni da vakarautaki ira me ra cakava ka maroroya na veiyalayalati tabu ena papitaiso kei na valetabu. Ni da Qasenivuli ni Vunautaka Noqu Kosipeli, “Na maroroi ni yalayala e vakarautaka na tamata [oka kina na tamata gone sara] me cakava ka maroroya na veiyalayalati tabu.”12

E vakavuvulitaka o Elder Jeffrey R. Holland, “Ni da tukuna na maroroi ni veiyalayalati, eda sa tukuna tiko na uto kei na yalo ni noda inaki ena bula oqo.”13 Ena basika na mana matalia ena noda cakava ka maroroya na veiyalayalati kei na Tamada Vakalomalagi. E kila oqo na meca, o koya sa vakabuwawataka kina na ivakavuvuli ni caka veiyalayalati.14 Nodra vukei na gone me ra kila, cakava, ka maroroya na veiyalayalati tabu e dua tale na ki ni kena tara e dua na itabatamata dau vorata na ivalavala ca.

Me da vakarautaki ira vakacava na luveda me ra cakava ka maroroya na veiyalayalati tabu ni ra curuma ka lakova na salatu ni veiyalayalati? Nodra vakavulici na gone me ra maroroya na veiyalayala rawarawa ni ra se gone ena vaqaqacotaki ira me ra maroroya na veiyalayalati tabu ena nodra bula e muri.

Meu wasea mada e dua na ivakaraitaki rawarawa: Ena lotu vakamatavuvale a taroga e dua na tama, “Sa vakaivei tiko noda itosotoso vakamatavuvale?” O Lizzie e yabaki lima e dau kudru ni sa rui dau vakalialiai koya ka vakamosia na yalona o Kevin na ganena qase. E lomalomarua o Kevin ni vakadinadinataka ni dina o Lizzie. E tarogi Kevin o tinana se cava e rawa ni cakava me vinaka cake kina nodrau veimaliwai kei ganena. E vakasama o Kevin qai lewa ni na yalataka vei Lizzie me na kua ni vakanini koya ena dua na siga taucoko.

Ni oti na siga ka tarava ni ra soqoni vata me ra masu, a tarogi Kevin o tamana se sa vakacava. E vakaoqo nona isaunitaro o Kevin “Ta, au a maroroya noqu yalayala!” A duavata ena marau o Lizzie ka vakavinavinakataki Kevin na vuvale.

Qai vakatura o tinai Kevin ni kevaka sa rawa ni maroroya nona yalayala ena dua na siga, cava e sega ni rawa ni rua kina na siga? A yalataka o Kevin ni na tovolea tale. Sa sivi e rua na siga, sa rawa ni maroroya tiko o Kevin na nona yalayala, ka sa vakavinavinaka vakalevu o Lizzie! Ni taroga o tamana se cava na vuna sa maroroya vinaka tiko kina nona yalayala, e kaya o Kevin, “Au maroroya na noqu veiyalayalati baleta niu a kaya niu na kitaka vakakina.”

Ni veitaravi na yalayala lalai maroroi vinaka ena vakavuna na buladokai. Ni vakamatautaki na maroroi yalayala sai koya na vakavakarau vakayalo me baleta nodra ciqoma na gone na imatai ni nodra veiyalayalati ni papitaiso kei na isolisoli ni Yalo Tabu, ka ra yalataka kina me ra qarava na Kalou ka maroroya na Nona ivakaro.15 Erau sega ni rawa ni veitawasei na yalayala kei na veiyalayalati.

Ena ivola nei Taniela eda vulica kina nodratou besetaka o Setareki, Mesake kei Apete-niko me ratou qarava na nona matakau na Tui o Nepukanesa.16 A tukuna vei iratou na tui ni ratou na biu ki na lovo bukawaqa kevaka eratou sega ni muria. Eratou bese ka kaya:

“Ke sa vakaoqori, ko koya na neitou Kalou, o koya keitou sa qarava sa rawata me vakabulai keitou mai na lovo ni bukawaqa. …

“Ia ke sega, mo ni kila, koi kemuni na tui, ni keitou sa bese ni qarava na nomuni kalou.”17

“Ia ke sega.” Vakasamataka mada na ibalebale ni tolu na vosa oqo kei na kedratou isema ki na maroroi veiyalayalati. A sega ni yavu tiko ni nodratou talairawarawa na cauravou e tolu oqo me ratou sereki. Kevaka sara mada ga eratou na sega ni sereki, eratou na maroroya tiko ga na nodratou yalayala vua na Turaga baleta ni ratou a tukuna vakakina. Na maroroi ni noda veiyalayalati e sega ni dau vakatau ena keda ituvaki. O iratou na cauravou lewe tolu oqo, me vakataki ira ga na cauravou yaloqaqa, era ivakaraitaki vakasakiti vei ira na luveda ni vorata na ivalavala ca.

Ena yaga vakacava na ivakaraitaki oqo ki na noda veivale kei na noda matavuvale? “Na vosa ena vosa, na ivunau ena ivunau,”18 eda vukei ira na gone me ra tovolea vakalalai na qaqa. Ni ra maroroya na nodra yalayala, era vakila na Yalo ena nodra bula. E vakavuvulitaka o Elder Joseph B. Wirthlin ni “icovi cecere duadua ni bula dokai sai koya na veitokani tudei ni Yalo Tabu.”19 Ia ena “vakaukauwataki kina na no[dra] vakabauta [na luveda] ena mata ni Kalou.”20 Mai na toyevu ni bula dokai sa tovure mai kina e dua na itabatamata dau vorata na ivalavala ca.

Kemuni na taciqu kei na ganequ , ni tauri ira voleka mai nomuni lalai—voleka sara mai me ra raica na nomu itovo vakalotu e veisiga ka sarava ni o maroroya toka nomu yalayala kei na veiyalayalati. “O ira na gone era dau veivakatotomuri cecere, solia vei ira e dua na ka cecere me ra vakatotomuria.”21 Eda sa veivuke dina tiko me da vakavulica ka susuga e dua na itabatamata dau vorata na ivalavala ca vua na Turaga yalayala ena yalayala kei na veiyalayalati ena veiyalayalati.

Au vakadinadinataka ni o Jisu Karisito e liutaka tiko na Lotu oqo. Ni o vakavulica, liutaka, ka lomani ira na gone ena ivakarau ni iVakabula, e rawa ni o ciqoma na ivakatakila ka na vukei iko ena nodra tauyavu ka vakaiyaragi na gone dau vorata na ivalavala ca gugumatua. Noqu masu me ra vakavoqataka na malanivosa nei Nifai na noda gone: “Mo ni vakayacori au mada meu na sautaninini niu sa raica na ivalavala ca?”22 Au vakadinadinataka ni a sorovaka na ivalavala ca ni kai vuravura na iVakabula23—baleta ni a kaya ni na vakayacora vakakina, ka ni lomani keda vakalevu cake mai na ka eda rawa ni vakasamataka na tamata wale24—baleta ni a kaya o Koya ni na vakayacora vakakina. Ena yacai Jisu Karisito, emeni.