2010–2019
Ib Tiam Neeg Tsis Xav Ua Txhaum
Plaub Hlis Ntuj Xyoo 2017


Ib Tiam Neeg Tsis Xav Ua Txhaum

Thaum nej qhia, coj, thiab hlub cov me nyuam, nej txais tau kev tshwm sim uas yuav pab nej tu thiab txhawb nqa cov me nyuam uas ua siab loj thiab tsis xav ua txhaum.

Ib xyoo thiab ib nrab tas los, Thawj Tswj Hwm Russell M. Nelson hais txog qhov uas peb yuav tsum “qhia thiab pab tu ib tiam neeg uas tsis xav ua txhaum.”1 Sob lus—“ib tiam neeg uas tsis xav ua txhaum”—yeej tshoov kuv lub siab heev.

Peb hwm cov me nyuam uas siv zog ua neej dawb huv thiab ncaj ncees. Kuv twb pom cov me nyuam lub dag zog nyob thoob plaws lub ntiaj teb. Lawv sawv “khov kho thiab ruaj nrees”2 kov yeej tej teeb meem thiab tej xwm txheej nyuaj heev. Cov me nyuam no to taub lawv yog Vajtswv cov me nyuam, lawv paub Leej Txiv Saum Ntuj Ceeb Tsheej txoj kev hlub lawv, thiab xav ua raws li Nws lub siab nyiam.

Txwam li ntawd los, muaj cov me nyuam uas nyuaj rau lawv sawv “khov kho thiab ruaj nrees” thiab lawv lub siab mos muag raug mob heev.3 Nyob txhua sab “tus yeeb ncuab tej xib xub hluav taws”4 tawm tsam lawv thiab yuav tsum muaj neeg tiv thaiv thiab txhawb nqa lawv. Lawv ua rau peb mob siab xav sawv tawm tsam kev txhaum thiaj li coj tau peb cov me nyuam los cuag Khetos.

Cia li mloog Txwj Laug Bruce R. McConkie tej lus 43 xyoos tas los:

“Vim peb yog mej zeej ntawm lub Koom Txoos, peb tab tom ua tsov ua rog loj heev. Peb ua tsov rog. Peb twb tuaj Khetos tog kom tawm tsam Luxifaws. …

“Txoj kev ua tsov ua rog loj heev uas nyob thoob plaws lub ntiaj teb no ntshe yuav ua rau ntau tus neeg raug mob, thiab ib txhia yuav raug tua tuag, tsis yog ib qho tshiab. …

“Yeej ib txwm tsis muaj thiab yeej yuav tsis muaj cov neeg uas nyob nruab nrab nyob hauv kev ua tsov ua rog no.”5

Niaj hnub no kev ua tsov ua rog no loj zuj zus tuaj. Kev ua rog no raug peb txhua tus, thiab peb cov me nyuam nyob pem hauv ntej tawm tsam kev phem. Yog li ntawd, peb haj yam yuav tsum npaj peb tej txheej txheem ntawm sab ntsuj plig kom pab lawv.

Kev txhawb nqa cov me nyuam kom lawv tsis xav ua txhaum yog ib txoj hauj lwm thiab ib txoj koob hmoov rau cov niam tsev txiv tsev, pog yawg, niam tais yawm txiv, tsev neeg, cov xib hwb, thiab cov thawj coj. Peb txhua tus muaj kev lav ris pab lawv. Tiam sis, tus Tswv twb qhia kom niam tsev txiv tsev qhia lawv cov me nyuam to taub tej lus qhuab qhia ntawm kev hloov siab lees txim, kev ntseeg Khetos uas yog tus Vajtswv muaj sia zees nyob Leej Tub, thiab kev cai raus dej thiab lub txiaj ntsim Vaj Ntsuj Plig Dawb Huv thiab qhia lawv kom taug kev ncaj rau tus Tswv.6

Peb yuav ua li cas kom tu peb cov me nyuam raws li txoj kev kaj thiab qhov tseeb7 ntshe yog ib lo lus nug uas nyuaj teb vim txhua tsev neeg thiab txhua tus me nyuam nyias txawv nyias, tiam sis Leej Txiv Saum Ntuj Ceeb Tsheej tau muab tej lus qhia uas yuav pab peb txhua leej txhua tus. Tus Ntsuj Plig yuav tshoov peb lub siab kom paub tej yam twg yuav txhawb peb cov me nyuam dag zog.

Ua ntej, peb yuav tsum to taub vim li cas kev lav ris no tseem ceeb. Peb yuav tsum to taub peb—thiab lawv—yog Vajtswv cov me nyuam thiab muaj lub hom phiaj dab tsi ua ntej peb yuav pab peb cov me nyuam to taub lawv yog leej twg thiab vim li cas lawv nyob no. Peb yuav tsum pab lawv paub tseeb hais tias lawv yog Leej Txiv Saum Ntuj Ceeb Tsheej cov tub thiab ntxhais thiab Nws yeej muaj tej yam nws xav kom lawv ua.

Qhov thib ob, yuav tsum to taub cov lus qhuab qhia ntawm kev hloov siab lees txim thiaj li yuav tsis xav ua txhaum. Qhov uas yus tsis xav ua txhaum tsis yog hais tias yus tsis ua txhaum, tiam sis qhov no txhais hais tias yus ib sij hloov siab lees txim, saib xyuas, thiab ua siab loj. Tej zaum qhov uas yus tsis xav ua txhaum yog ib txoj koob hmoov los ntawm qhov uas yus pheej tawm tsam kev txhaum. Raws li Yakaunpaus hais tias, “Nej yuav tsum tawm tsam dab Ntxwg Nyoog, dab thiaj yuav khiav ntawm nej mus.”8

Cov tub rog hluas “rau siab heev rau txoj kev muaj peev xwm … ; tiam sis saib seb, tsis tas li no xwb—lawv yog neeg ncaj thiab tseeb rau txhua lub sij hawm rau txhua yam uas tau kom lawv ua. Muaj tseeb tiag, [lawv niam thiab txiv tau] qhia [lawv] kom coj Vajtswv tej lus txib thiab kom mus ncaj ncaj rau ntawm nws.”9 Cov tub hluas no twb mus ua rog es lawv muab Khetos tej cwj pwm ua cuab yeej tawm tsam lawv cov yeeb ncuab. Thawj Tswj Hwm Thomas S. Monson hais kom peb nco ntsoov tias “Vajtswv yeej hu kom peb txhua tus ua siab loj tsis tu tsis tseg. Txhua hnub ntawm peb lub neej peb yuav tsum ua siab loj—tsis yog thaum lub sij hawm tseem ceeb xwb, tiam sis yog thaum peb txiav txim siab los yog thaum peb raug xwm txheej.”10

Peb cov me nyuam coj tej cuab yeej tiv rog ntawm sab ntsuj plig thaum lawv pib ua tej yam txhua hnub kom coj raws li tus Tswv. Tej zaum peb saib tsis taus cov me nyuam txoj kev txawj to taub kev ua tej yam txhua hnub kom coj raws li tus Tswv. Thawj Tswj Hwm Henry B. Eyring ntuas peb kom “pib thaum tseem yau thiab ua ruaj nrees.”11 Yog li ntawd, qhov thib peb uas pab cov me nyuam tsis xav ua txhaum yog kev pib thaum lawv tseem yog me nyuam yaus qhia lawv txog cov lus qhuab qhia thiab ntsiab cai ntawm txoj moo zoo—siv tej yam xws li cov vaj lug kub, Tej Nqe Kev Ntseeg, phau Kom Ntxiv Dag Zog rau cov Tub Hluas Ntxhais Hluas, tej zaj nkauj ntawm lub Koom Haum Me Nyuam Yaus, tej zaj nkauj qhuas Vajtswv, thiab peb zaj lus tim khawv—kom coj cov me nyuam los cuag tus Cawm Seej.

Kev pab coj cwj pwm uas ua tsis tu tsis tseg xws li kev thov Vajtswv, kev kawm vaj lug kub, tsev neeg hmo ua ke, thiab kev teev tiam thaum Hnub Caiv ua rau yus coj tag nrho, ua ncaj, thiab coj raws li tej ntsiab cai zoo—los yog hais tias, yus muaj kev ncaj ncees ntawm sab ntsuj plig. Nyob hauv lub ntiaj teb no tsis tshua muaj leej twg uas ua ncaj ua ncees, es peb cov me nyuam yuav tsum to taub tias kev ua ncaj ua ncees yog dab tsi thiab vim li cas yog ib qho tseem ceeb heev—qhov tseem ceeb tshaj yog thaum peb npaj lawv ua raws li tej kev khi lus thaum ua kev cai raus dej thiab nyob hauv lub tuam tsev. Raws li phau Qhia Kuv txoj Moo Zoo qhia hais tias, “Kev ua raws li tej kev cog lus npaj cov neeg [tsis hais cov neeg hluas] kom ua raws li tej kev khi lus dawb ceev.”12

Txwj Laug Jeffrey R. Holland qhia hais tias, “Thaum peb hais txog kev ua raws li peb tej kev khi lus, peb hais txog lub ntsiab ntawm peb lub hom phiaj nyob hauv lub ntiaj teb no.”13 Qhov uas yus ua thiab ua raws li tej kev khi lus nrog peb Leej Txiv Saum Ntuj Ceeb Tsheej yeej muaj hwj chim heev. Tus yeeb ncuab paub qhov no, yog li ntawd nws ua rau tib neeg tsis pom meej lub ntsiab ntawm kev khi lus.14 Kev pab cov me nyuam to taub, ua, thiab ua raws li tej kev khi lus dawb ceev yeej yog ib qho uas pab kom tiam neeg no tsis xav ua txhaum.

Peb yuav ua li cas kom npaj peb cov me nyuam ua raws li tej kev khi lus dawb ceev? Kev qhia cov me nyuam kom ua raws li lawv tau cog lus thaum lawv tseem yog me nyuam yaus yuav pab lawv muaj hwj chim ua raws li lawv tej kev khi lus thaum lawv loj hlob lawm.

Cia kuv hais ib zaj lus piv txwv: Nyob hauv ib tsev neeg hmo ua ke, leej txiv nug hais tias, “Peb puas sib raug zoo nyob hauv peb tsev neeg?” Lizzie uas muaj tsib xyoos yws yws hais tias nws tus nus hlob, Kevin, thab nws dhau thiab ua rau nws tu siab. Kevin lees hais tias Lizzie hais yog lawm. Kevin niam nug Kevin seb nws yuav ua li cas kom sib raug zoo nrog nws tus muam. Kevin xav me ntsis ces txiav txim siab tias nws yuav cog lus rau Lizzie tias nws yuav tsis thab nws tas ib hnub nkaus.

Hnub tom qab ntawd thaum txhua leej txhua tus koom ua ke muaj tsev neeg kev thov Vajtswv, Kevin txiv nug Kevin seb nws ua li cas. Kevin teb hais tias, “Txiv es, kuv tau ua raws li kuv cog lus ’os!” Lizze pom zoo qhov nws hais, thiab tsev neeg txhua tus hais tias lawv zoo siab rau Kevin.

Ces Kevin niam hais tias yog nws txawj ua raws li nws tau cog lus tas ib hnub, ces ua cas nws ho ua tsis tau tau ob hnub nkaus? Kevin yeem sim ua ntxiv seb. Ob hnub tag lawm, ces Kevin ua raws li nws cog lus, thiab Lizzie haj yam zoo siab! Thaum Kevin txiv nug seb vim li cas nws ua raws nraim li nws tau cog lus lawm, Kevin hais tias, “Kuv ua raws li kuv cog lus lawm vim kuv hais tias kuv yuav ua li ntawd.”

Qhov uas yus ua raws li yus tau cog lus ib los mus ib los tsis tu tsis tseg yeej ua rau yus los ua neeg ua ncaj ua ncees. Kev coj raws li tau cog lus yeej yuav pab cov me nyuam npaj ntawm sab ntsuj plig txais kev khi lus ntawm kev cai raus dej thiab txais lub txiaj ntsim Vaj Ntsuj Plig Dawb Huv, lawv thiaj li khi lus kom ua hauj lwm rau Vajtswv thiab ua raws li Nws tej lus txib.15 Yeej muab tsis taus kev cog lus thiab kev khi lus sib cais.

Nyob hauv phau Daniyees peb kawm txog Sadalas, Mesakas, thiab Anpenekaus uas tsis kam teev tiam Vaj Ntxwv Nenpukajnexales tus mlom.16 Tus vaj ntxwv ceeb toom lawv hais tias nws yuav muab lawv pov rau hauv ib lub cub tawg uas nplaim cig sib ntswg yos. Lawv tsis kam thiab hais tias:

“Yog hais tias tus Vajtswv uas peb hwm pom zoo pab peb, nws yeej yuav pab kom peb dim ntawm cov nplaim taws thiab ntawm koj txhais tes. …

“Txawm yog nws tsis pab peb los peb hais rau koj hais tias peb yeej yuav tsis hwm thiab tsis pe [koj] tus mlom.”17

“Txawm yog nws tsis pab peb.” Cia li xav txog tej lus no thiab tej lus no muaj lub ntsiab dab tsi hais txog kev ua raws li tej kev khi lus. Peb tug tub hluas no yeej tsis mloog Vajtswv lus tsuas yog lawv dim xwb. Txawm yog lawv tsis dim los, lawv yeej yuav ua raws li lawv tau cog lus rau tus Tswv vim lawv hais tias lawv yuav ua li ntawd xwb. Kev ua raws li peb tej kev khi lus tsis nyob ntawm tej xwm txheej uas peb raug. Peb tug tub hluas no, ib yam li cov tub rog hluas, yeej coj yam ntxwv zoo txog kev tsis xav ua txhaum rau peb cov me nyuam.

Tej yam ntxwv no muaj nqi li cas nyob hauv peb tsev thiab rau peb tsev neeg? Ib nqe lus ntxiv rau ib nqe lus, ib ntsiab cai ntxiv rau ib ntsiab cai,18 peb pab cov me nyuam ua taus zuj zus. Thaum lawv ua raws li lawv tau cog lus tseg lawm, lawv hnov tau tus Ntsuj Plig nyob hauv lawv lub neej. Txwj Laug Josepeh B. Wirthlin qhia tias “nqi zog tseem ceeb tshaj plaws ntawm kev ua ncaj ua ncees yog qhov uas peb muaj tus Vaj Ntsuj Plig Dawb Huv nrog nraim peb nyob.”19 Ces peb cov me nyuam txoj kev tso siab yuav muaj zog tuaj nyob ntawm Vajtswv xub ntiag.20 Los ntawm kev ua ncaj ua ncees yuav muaj ib tiam neeg uas muaj hwj chim thiab tsis xav ua txhaum.

Cov nus thiab cov viv ncaus, cia li puag nej cov me nyuam yaus rau hauv nej lub xub ntiag xwv kom lawv yuav pom nej coj yawm ntxwv teev ntuj txhua hnub thiab saib nej ua raws li nej tej kev khi lus. “Cov me nyuam txawj qog, yog li ntawd cia li ua tej yam zoo rau lawv qog.”21 Peb pab qhia thiab tu ib tiam neeg uas tsis xav ua txhaum rau tus Tswv thaum peb qhia kev cog lus ntxiv rau kev cog lus thiab kev khi lus ntxiv rau kev khi lus.

Kuv ua tim khawv tias Yexus Khetos coj lub Koom Txoos no. Thaum nej qhia, coj, thiab hlub cov me nyuam raws li tus Cawm Seej txoj kev, nej txais tau kev tshwm sim uas yuav pab nej tu thiab txhawb nqa cov me nyuam uas ua siab loj thiab tsis xav ua txhaum. Kuv thov Vajtswv kom peb cov me nyuam yuav ua zoo li Nifais cov lus hais tias: “Koj puas yuav ua kom kuv tshee thaum kuv pom kev txhaum?”22 Kuv ua tim khawv tias peb tus Cawm Seej theej txhoj rau neeg ntiaj teb23—vim Nws hais tias Nws yuav ua li ntawd—thiab Nws hlub peb tshaj qhov peb cov neeg ntiaj teb txawj to taub24—vim Nws hais tias Nws yuav ua li ntawd. Los ntawm Yexus Khetos lub npe, amees.