Fihl se Ma Kuh in Kuhtanglah Ma Koluk

Yac se tahfuh somlah ah, Prestuhn Russell M. Nelson el sramsram ke enenweyuck “in luti ac tuhfahlah fihl se ma kuh in kuhtanglah ma koluk.”¹ Kahs sacn—“fihl se ma kuh in kuhtanglah ma koluk uh” —arlac yohk srihpac nuh sihk.

Kuht ahkfuhlwactye tuhlihk srihsrihk suc sang kuhiyaclos in moul nwacsnwacs ac ahkostwen. Nga tuh liye kuh luhn tuhlihk puhkantwen fin facluh nohfohn. Elos tu na fokoko, “insacnweacng ac tu na kuh”² ke kain in ma upac ac acn nuhkwewa. Tuhlihk inge kahlwem ke ohiyac muhtahl lalos, puhla luhngse luhn Pahpah tuhmwaclos Inkuhsrao nuh selos, ac suk in ahkos luhngse Lal.

Tuhsruhk, oasr pac tuhlihk suc upac nuh selos in “insacnweacng ac tu na kuh” ac nuhnak fihsrwacsr lalos ahkkolukyeyuck.³ Elos ahkkolukyeyucklac ke ohiyac nuhkwewa ke “mwe pihsr fihrihr luhn mwet lain”⁴ ac enenuh in ahkkweyeyuck ac kahsruh. Elos sie srihpac na yohk kuht in tuyak ac orek mweun lain ma koluk uh ke kuh lasr in us tuhkuh tuhlihk nahtuhsr nuh yurin Kraist.

Lohng kahs lal Elder Bruce R. McConkie apkuhran nuh ke yac 43 somlah:

“Ke mempucr luhn Alu uh, kuht in wi mweun na yohk se. Kuht oasr ke mweun se. Kuht welah tari srihpacn Kraist in lainuhl Lucifer. …

“Mweun luhlahp se ma oasr ke kuh la ke acn nuhkwewa ac ke ahsor tuh uniyac mwet puhkantwen, kuhtuh nuh ke misac, tiacna ma sasuc se. …

“Tiac kuh in mwet ma tiacna wi ke mweun se inge.”⁵

Mihsenge mweun se lihksreni oasr ac upaclah. Mweun se inge puhlakihnyuck sesr kais sie, ac tuhlihk nahtuhsr oasr nuh met ac lain mwet lokoalok. Pwacnwacng, enenweyuck kuh in muh ahkfokokoye plwacn in karihngihn nguhn lasr.

In ahkkweye tuhlihk uh in muh kuh in kuhtanglah ma koluk pa ma kunacn pahpah ninac, pahpah ac ninac mahtuh, sucu, mwet luti, ac mwet kol. Kuht nohfohn wi kunohkohn se inge in kahsruh. Tuhsruhk, Leum El sifacna sapkihn pahpah ac ninac in luti tuhlihk nahtuhlos “in kahlwem ke mwe luti luhn auliyak uh, luhlahlfongi ke Kraist Wen nuhtin God moul, ac ke pacptais ac ke mwe song luhn Nguhn Muhtahl” ac “in pruhe, ac in fahsr fal ye muhtuhn Leum.”⁶

Kuht ac “tuhfahlah fuhkah tuhlihk nahtuhsr uh ke kahlwem ac pwacye”⁷ sahp kihsen siyuck na upac se ke srihpen ma na nuh sin kais sie sucu ac tuhlihk in topuk, tuh Pahpah Inkuhsrao El use masap nuh sin mwet nuhkwewa ma kuh in kahsruh kuht. Nguhn ac fah luti kuht ke ohiyac wo emet in ahkkweye nguhn luhn tuhlihk nahtuhsr.

Ma se met, in oasr kahlwem se ke yohk srihpaciyacn kunohkohn se inge yohk srihpac na pwacye. Kuht in kahlwem ohiyac ac srihpac muhtahl lasr—ac ohiyac ac srihpac muhtahl lalos—met liki kuht kuh in kahsruh tuhlihk nahtuhsr in liye lah suc elos uh ac lah efuh elos oasr inge. Kuht enenuh in kahsrwelos etuh in wacngihn ahlohloh muh elos tuhlihk mukul ac muhtwacn nuhtin Pahpah luhngse Inkuhsrao ac lah El plwacni ma wolacna kwaclos.

Ahkluo, in kahlwem lah mwe luti luhn auliyak yohk srihpac elos in muh kuh in kuhtanglah ma koluk. Kuh in kuhtanglah ma koluk tiac kalmac pa in muh suwohswohs, tuh kalmac pa kuh in kwacna auliyak, oaru, ac puhlaik. Sahp in kuh in kuhtanglah ma koluk tuhkuh ke sie mwe insewowo ke kuht kalweni in lain ma koluk. Oacna James el tuh fahk, “Ke kowos in lain Devil, ac el fah kahingkihn kowos.”⁸

Mwet mweun fuhsr ke Puk luhn Mormon ah tuh “arulacna tu na kuh ke puhlaik … ; tiac pa inge nohfohn—elos … suwohswohs pacl nuhkwewa ke oacna sie ma suc luhlahlfongiyuck eltahl kac. Ahok, … elos tuh lutiyuck in liyacacng masap luhn God ac in fahsr suwohs ye muhtahl.”⁹ Mukul fuhsr inge som in mweun ac sruok ohiyacn Kraist ke kuhfwen mwe mweun in lain mwet lokoalok lalos. Prestuhn Thomas S. Monson el ahkacsmakihnye kuht lah “pahng nuh ke puhlaik tuhkuh fusus nuh sesr kais sie. Lwen nuh kwewa ke moul lasr enenweyuck—tiac nuh ke kais kuhtuh pacl muhkwena tuhsruhk pacl nuh kwewa ke kuht oraclah sulwaclah kuh topuk ohiyac sikyak nuh sesr uh.”¹⁰

Tuhlihk nahtuhsr nokomwacng mwe loeyuck in mweun lalos ke elos akiyac ohiyac in mwet tuhma lutlut lwen nuhkwewa. Sahp kuht tiacna kahlwem nuh pwacye ke kuh se luhn tuhlihk nahtuhsr in moulkihn ohiyac luhn mwet tuhma lutlut lwen nuhkwewa. Prestuhn Henry  B. Eyring tuh luti kuht in muh “muhtwacwacack ke elos fuhsr ac kampare na.”¹¹ Na ma ahktolu in kahsruh tuhlihk kuhtanglah ma koluk pa in muhtwacwacack ke elos srwackna srihk in lotwelos ke luhngse mwe luti luhn wosasuc uh—ke ma suhmuhslah uh, Ip Yohk luhn Luhlahlfongi ah, puk srihsrihk Nuh ke Ahkkweyacn Mwet Fuhsr, on in tuhlihk srihsrihk, on in alu, ac luhlahlfongi lasr sifacna—ma el kol tuhlihk nuh sin Mwet Lahngo.

In oraclah ohiyac se in lwen nuhkwewa pruhe, lutlut ma suhmuhslah, ekuh in toeni luhn sucu, ac alu in Sacnri ac fah kol nuh ke mihslac, kuh luhn sifacna, ac ohiyac suwohs se—ke kahs sahyac, suwohs in nguhn. Ke facluh mihsenge, ke mwet suwohs luhkuhn na wacngihnlac, tuhlihk nahtuhsr enenuh in kahlwem lah meac kalmac suwohs uh ac efuh yohk srihpac—yohk ke kuht ahkoeloslac in oraclah ac liyacacng olwelah muhtahl ke pacptais uh ac lun tempuhl uh. Oacna Luti Wosasuc Luhk luti kuht, “In liyacacng olwelah ahkolah mwet [wi mwet fuhsr] in oraclah ac liyacacng olwelah muhtahl.”¹²

Elder Jeffrey R. Holland el tuh luti, “Ke kuht sramsramkihn liyacacng olwelah uh, kuht sramsramkihn srihpac na yohk luhn moul lasr fin facluh.”¹³ Oasr kuh yohk ma tuhkuh ke kuht oraclah ac liyacacng olwelah yurin Pahpah tuhmasr Inkuhsrao. Mwet lokoalok ah etuh ke ma inge, oruh el ahkfohsyeack srihpac se ma kuht oraclah olwelah uh.¹⁴ In kahsruh tuhlihk kahlwem, oraclah, ac liyacacng olwelah muhtahl pa siepac inkacnek in oraclah fihl se ma kuh in kuhtanglah ma koluk.

Na kuht ac ahkolah fuhkah tuhlihk nahtuhsr in oraclah ac liyacacng olwelah muhtahl kwaclos utyak nuh kac ac fahsr ke inkacnek luhn olwelah? In luti tuhlihk uh in liyacacng olwelah srihsrihk ke elos fuhsr ah ac fah ahkkweyaclos in liyacacng olwelah muhtahl tohk ke elos mahtuhlah.

Lwelah ngan akacsruhi ma se ma sikyak: Ke sie ekuh in toeni luhn sucu, pahpah se siyuck, “Kuh kuht luhngse sie sin sie ke sucu se inge?” Lizzie suc yac limekohsr tohrkahskahs muh mukul mahtuh wiyacl, Kevin, luhngse ahkkasrkuhsrakyacl ac oruh elan suhpwacrlac. Kevin el insese ke suhpwacr muh el fahk pwacye. Ninac kiyacl Kevin siyuck lah meac se el kuh in oruh in luhngse muhtwacn wiyacl. Kevin el nuhnkuh ac sulwaclah muh el ac olwelah nuh Lizzie muh el ac tiac ahkkasrkuhsrakyacl ke lwen fohn se.

Ke sahflahiyacn lwen sacn ke sucu ah fahsr tuhkweni in pruhe, pahpah tuhmwacl Kevin siyuck sel Kevin lah el oruh fuhkah. Top lal Kevin pa “Pahpah, nga tuh liyacacng olwelah se luhk ah!” Lizzie el engan in insese. Ac sucu sac ahkfuhlwactyacl Kevin.

Ninac kiyacl Kevin na fahk muh el fin kuh in liyacacng olwelah se lal ke lwen se, efuh el tiac kuh in oruh ke lwen luo? Kevin el insese in sulpac srihke. Lwen luo somlah ah, Kevin el tuh ahkfalye olwelah se lal ah, ac Lizzie el tarilacna liki na met ah! Ke pahpah tuhmwacl siyuck tuh efuh el kuh in liyacacng olwelah arlac wo, Kevin el fahk, “Nga tuh liyacacng olwelah luhk mweyen nga fahk muh nga ac oruh.”

Olwelah srihsrihk puhkantwen ma liyeyuckyang kol nuh ke suwohs. In srihke in kwacna liyacacng olwelah lasr ac fah ahkolah in nguhn nuh sin tuhlihk uh in eis olwelah met lalos luhn pacptais ac mwe song luhn Nguhn Muhtahl, kac ma inge elos olwelah in kuhlwacnsapuh God ac ahkos masap Lal.¹⁵ Olwelah srihsrihk uh ac olwelah muhtahl uh tuhkweni tiacna fahsrwelihk.

Ke puk lal Daniel ah kuht etwaclah kacl Shadrach, Meshach, ac Abed-nego suc srahngwesr in muh alu nuh sin ma sruhlwaclah lal Tohkohsrah Nebuchadnezzar.¹⁶ Tohkohsrah sac ahksensenyaclos muh ac fah sisyucklac elos nuh in e fihrihr luhlahp se elos fin tiacna oruh. Elos srahngwesr ac fahk:

“God se su kut kulansap nu se uh fin kuh in molikutla liki e firir inge. …

“Tusruktu El finne tia molikuhtlac, lela in arulacna kalem sin tokosra lah kut tia ku in alu nu sin god lom an.”¹⁷

“Tusruktu El finne tia molikuhtlac.” Nuhnkuh ke kalmacn kahs inge ac kuhpahsr la nuh ke liyacacng masap uh. Mukul fuhsr tolu inge tiacna ke ahkos muhkwena fin molikuhtlac uh. Finne tiac moliyucklac, elos ac liyacacng masap lalos nuh sin Leum mweyen elos fahk muh elos ac oruh. In liyacacng olwelah uh enenuh in srweyucklac liki acn ma kuht oasr kac uh. Mukul fuhsr tolu inge, oacna mwet mweun fuhsr ah, elos srihkasrak na wowo nuh sin tuhlihk nahtuhsr uh in kuhtanglah ma koluk uh.

Na srihkasrak inge ac kapsreyuck fuhkah nuh ke lohm sesr ac sucu lasr? “Ip nuh ke ip, luti nuh ke luti,”¹⁸ kuht kahsruh tuhlihk uh puhlakihn ma wo ke ip srihsrihk. Ke elos liyacacng masap lalos, elos puhlakihn Nguhn ke moul lalos ah. Elder Joseph B. Wirthlin tuh luti muh “opi fuhlwact emet luhn suwohs uh pa oasr luhn Nguhn Muhtahl ke pacl nuhkwewa.”¹⁹ Na fah tuhlihk nahtuhsr uh kapwack in fokoko ye muhtuhn Leum.²⁰ Liki unohn luhn suwohs uh tuhkuh fihl ahkkweyeyuck se ma kuh in kuhtanglah ma koluk uh.

Tamuhlwel ac tahmtahel, sruokyac nuh fototo tuhlihk srihsrihk nuhtuwos—fototo lah elos in liye ohiyacn alu lom ac liye kom in karihngihn olwelah ac wuhlweacng lom. “Tuhlihk pa wo in oruh oacna sie, na oruh ma elos kuh in oruh oacna sie.”²¹ Pwacye kuht kahsruh in luti ac karihngihn sie fihl se ma kuh in kuhtanglah ma koluk nuh sin Leum olwelah nuh ke olwelah ac wuhlweacng nuh ke wuhlweacng.

Nga fahkwack muh Jisus Kraist El kol Alu se inge. Ke kowos luti, kol, ac luhngse tuhlihk uh ke ohiyacn mwet lahngo uh, kowos kuh in eis fwackyuck sifacna ma ac kahsruh kowos in oraclah ac nokomwacng fihl se ma kuh in kuhtanglah ma koluk uh. Pruhe luhk ma lah tuhlihk nahtuhsr uh fah kalweni kahs lal Nephi: “Yac kom kuh in oruh tuh nga in rarrar ke liyeyacn ma koluk?”²² Nga fahkwack lah Mwet Lahngo lasr iwaclah nuh ke ma koluk luhn facluh²³—ke srihpacn El fahk muh El ac oruh, ac muh El luhngse kuht yohk likina kuht mwet sukawihl kuh in kahlwem kac²⁴—ke srihpacn El fahk muh El ac oruh. Ke inen Jisus Kraist, amen.