Ehu Dih me kak Pelian Dihp

Sounpar ehu-elep samwalahro, President Russell  M. Nelson mahsanih duwen anahnepen “padahkih oh sewese kairada ehu dih en aramas me kak pelian dihp.”¹ Ongie pwuloio —“ehu dih me kak pelian dihp”—mie wehwe ni palingehn.

Kitail kin kesempwaliki seri kan me kin nannantiheng ahniki mour mwakelekel oh mour me peik. I kadehdehier kehlail en kidelepen seri wasa koaros nan sampah. Re inenen “poadidi oh tengeteng”² ni soangoasoangen irair kan oh soahng kan me apwal. Seri pwukat wehwehki ihs irail me re kohsang rehn Kauno, kin pehm limpoak en Sahm Nanleng ohng irail, oh kin nannantiheng peikieng Kupwure.

Ahpw, mie ekei seri me kin kahpwalki “kesihnenkihda me mehlelo oh tengetengedi” arail madamadau me luwet oh kin mwadang en lohdiong pahn me suwedo.³ “Ketiou kisiniei kan en me suwedo”⁴ kin kodohng irail sang pali koaros oh re anahne mehlel sawas oh utuht. Irail pahn wia mehn sawas laud ong kitail ni atail pahn uhda oh pelianda dihp ni atail kak koaros pwe kitail en wahdo neitail serihkan rehn Krais.

Rong mahsen kan en Elder Bruce R. McConkie kerenieng sounpar 43 samwalahro:

“Ni atail wiahier tohn Mwomwohdiso wet, kitail iangehr pidada lapalahn uhpene. Kitail mihmi nan mahwin. Kitail wialahr iengen Krais pwehn peieng Lucifer. …

“Lapalahn mahwin en palingehn wet kin koapwoailehda pali koaros oh kahredahr kidelepen aramas arail keidila liki, ekei soahng keper pwukat, sohte wia mehkot kapw. …

“Ansouet sohte me kak sewese ehu pali nan mahwin wet.”⁵

Rahnwet mahwino wie wenwenlahte mwowe ni kehlail. Mahwin wet kin sair kitail koaruhsie, oh neitail seri kan mi mwowe oh sohpeilahng pwihn me uhongkitailo. Iei me kahrehda, anahno kin wie kekehlailla ong kitail pwe kitail en kakehailiala atail koasondi en mwekid kan en palingehn.

Kakehlailih seri kan pwe ren wiahla aramas me kin pelian dihp wia doadoahk ieu oh kapai ieu ong nohno oh pahpa, pahpa & nohno kahlap, tohn peneineio, oh kaun kan. Emen emen kitail ahniki pwukoahn sawas. Eri, kauno ketin, ni oaritik, kamarainieki pahpa oh nohno kan en kasukuhlih neirail seri kan pwe “ren wehwehki padahk en koluhla, pwoson Krais sapwellimen Koht Ieiaso, oh pepdais oh ale kisakis en Ngehn Sarawio” oh “kapakap, oh waun mwohn Koht.”⁶

Duwen “kairada [neitail] seri kan nan marain oh mehlel”⁷ kak wia ehu peidek me apwal pwehki e wiawihda ongete ehu peneinei oh emen seri, ahpw Sahm Nanleng ketikiheng-kitailehr kaweid me kin doadoahk ong koaruhsie me pahn seweseikitail. Ngehno pahn ketin kaweid kitail nan wiepe kan me keieu mwahu me kak doarehla neitail seri kan ni palingehn, duwehte perehpen soumwahu.

Pwehn tapiada, ahniki ehu kamarainpen pwukoah wet inenen kesempwal. Kitail anahne wehwehki atail - oh arail - ihs irail me kohsang rehn Kauno oh kahrepe me re miehki mwohn atail kak sewese neitail seri kan pwe ren kak kilang ihs irail oh kahrepen arail mi sampah. Kitail anahne seweseirail ren wehwehki ni sohte peidek me re wia sapwellimen Sahm Nanleng serepein oh pwutak oh me E sapwelliniki kasikparail me sarawi.

Keriau, wehwehki padahk en koluhla kesempwal ong pelianda dihp. Pelian dihp sohte wehwehki sohte dipe, ahpw e kin kasalehda koluhla ansou koaros, tehkwasa, oh nannanti. Ele wia emen me kin soikala dihp kin miehda ni wiepen kapai ieu sang ni kalap soikala dihp. Duwehte dahme James koasoaiahiero, “Soikala tepelo, rongorong mwahu, oh e pahn sopohsanguhk.”⁸

Seri sounpei kan “inenen kommwad ong eimah … ; ahpw kilang, kaidehn ihte met---re … kin mehlel ansou koaros nan soahng sohte lipilipil me re kapwukoahiengehr. Ei, … re sukuhlki ren kolokol kosonned akan en Koht oh ahniki mour pwung mwohn Koht.”⁹ Mwahnakapw pwukat kolahr mahwin oh tehtehki mour mwahu en Christ pwe ren wiahki dipwisoun mahwin oh pelianiki arail imwintihti kan. Presiden Thomas  S. Monson kataman kiheng kitail me “malipilip en eimah kohdohng rehn emen emen kitail. Rahn koaros nan atail mour eimah anahn—kaidehnte ansou kapwuriamwei kan ahpw ansou koaros me kitail wiahda pilipil kan de sapeng soahng me pahn kin pwarada rehtail.”¹⁰

Neitail seri kan kin likawih kapwat en mahwin en palingehn ni arail kin kasalehda soangen wiepen doadoahk en tohnpadahk kan rahn koaros. Ele kitail kin tikitingki ahn seri kan kak en alehda madamadau en doadoahk en tohnpadahk rahn koaros. President Henry B. Eyring kaweid kitail en “tepda kasukuhlieki seri kan ni mwadang soahng pwung kan nan arail mour, oh pepeusehla kasukuhlihrail nan arail mour.”¹¹ Eri kesiluh en kih en sewese seri kan pwe ren wiahla aramas me kin pelian dihp kin tepda ni arail tikitil pwehn kasukuhlki dahme keieu konehng nan padahk kan en rongamwahuo—sang nan pwuhki sarawi kan, Articles of Faith, pwuhkFor the Strength of Youthkoul kan en Primary, melkahka sarawi kan, oh pein atail kadehde kan—me pahn kahluwahla seri kan rehn Sounkomouro.

Wiahda tiahk en kapakap me tengeteng, onop pwuhk sarawi, soutik en peneinei, oh kaudoak en Sabbath kin elehda unsek ni soahng koaros, loale duweduwehte, oh mwakelekel oh mehlel nan wiewia me kehlail--ni ehu kawehwe, kehlail en palingehn. Nan sampah rahnwet, me kehlaid wie sosohrala, neitail seri kan anahne wehwehki dahkot kehlail mehlel oh dahme e kesempwaliki--mehlel ni atail kin kaunopirailda pwehn wiahda oh kolokol inou sarawi kan ansoun pepdais oh nan tehnpas sarawio. Ni duwen me Preach My Gospel kin padahngki, “Kolokol inou kan kin kaunopada aramas [iangahki aramas me inenen pwulopwul] ren wiahda oh kolokol inou sarawi kan.” ¹²

Elder Jeffrey  R. Holland padahngki, “Ni atail kin koasoaia duwen kolokol inou, kitail kin koasoakoasoaia kahrepe kesempwal nan mour wet.”¹³ Mie manaman me sohte rek nan wiahda oh kolokol inou kan rehn Sahm Nanleng. Imwintihtio wehwehki met, ih eri ekihla iren madamadau en wiahda inouo.¹⁴ Sewese seri kan en wehwehki, wiahda, oh kolokol inou sarawi kan wia pil ehu kih en wiahda ehu dih en aramas me kin soikala dihp.

Ia duwen atail kin kaunopada neitail seri kan pwe ren wiahda oh kolokol inou sarawi kan ni arail pidolong oh keirda nan ahl en inouo? Kasukuhlieki seri kan ren kolokol inou mengei kan ni arail tikitik pahn kiheng irail ren kolokol inou sarawi kan ni arail pahn laudila.

Mweidehngie I en sawasiki ehu karasras mengei: Nan soutik en peneinei, pahpa men ahpw kalelapak, “Ia iretail ni atail wia ehu peneinei?” Lizzie, me sounparehr limau, kampileinki me rie pwutak laudo, Kevin, kin kapakapailoke oh kamadakalahr ah pepehm kan. Kevin sohte men nda me Lizzie pwung. Ahn Kevin nohno eri idek rehn Kevin ma dahme e kak wia pwe en kin mwahu ong rie serepeino. Keving medewehla oh lemehda me e pahn inoukiheng Lizzie me e sohte pahn lidere rahn ehu pwon.

Ni imwin rahn pweidi mandao ni koaros arail pokonpenehr ong kapakap en peneinei, ahn Kevin pahpao kalelapak rehn Kevin duwen eh wia mwo. Ahn Kevin pasapeng dene “Pahpa, I kolokolete ahi inouo! Lizzie pwungki ni eh inenen peren. Peneineio eri kalahngan ong Kevin.

Ahn Kevin nohno eri pekihda ma Kevin kak kolokol ah inouo rahn ehu, dahme e sohte kak wiahki rahn riau? Kevin eri pwungkihla en pwurehng song. Rahn riau neklahr, Kevin pweida nan kolokol ah inou, oh Lizzie inenen kalahnganki! Ni ansou me ah pahpao idek kahrepen eh kolokol mwahu ah inouo, Kevin sapengki, “I kolokol ahi inouo pwehki I nda me I pahn.”

Pweida ni kisin mehkot tikitik, pahn sewesei kitail en kolokol atail inou kan en mehlel , . Kaiahn en kolokol inou ansou koaros wia kaunop en palingehn ong seri kan pwe ren alehdi arail keieun inou en papdais oh kisakis en Ngehn Sarawi, eri re kin inoukihdi irail en papah Koht oh kolokol Sapwellime kosonned akan.¹⁵ Inou kan oh inou sarawih kan sohte kin tohrohrpeseng.

Nan pwuhk en Daniel, kitail esehla duwen Sadarak, Mihsak, oh Apedneko arail sohte men sarawihong ahn Nahnmwarki Nebuchadnezzar kohto.¹⁶ Nahnmwarkio eri ndahng irail me re pahn lekidekla nan kisiniei karakar ma reh sohte pahn wia. Re sohte peikieng oh nda:

“Ma iei duwe en men, aht Koht me se kin papaho kak ketin doareikitala sang kisinei karakaro. …

“Ahpw ma soh, a en wehwehieng komwi, maing nahnmwarki, me se sohte pahn papah sapwellimomwi koht akan.” ¹⁷

“Ahpw ma soh.” Medemedewe wehwehn lepin lokaia sliuh oh ia mwomen ah kasalehda duwen kolokol inou kan. Ohl silimen pwukat sohte poahsoanehkihda arail peik ong ni Kauno pahn doarieraila . Tehn ma Kauno sohte doareiraila , re pahn kolokolete arail inou ong Kauno pwehki re ndahier me re pahn. Kolokol atail inou kan kin ansou koaros sohte poahsoanda sang nan atail kahpwal. Mwahnakapw silimen pwukat, duwehte seri sounpei kan me mihmi nan pwuken Alma, me wia karasepe mwahu ong ni soikala dihp ohng neitail serih kan.

Ia duwen karasaras pwukat arail kin doadoahk nan imwatail kan oh ong atail peneinei kan? “Ekis ekis,” ¹⁸ kitail kin sewese seri kan ren keirda. Ni arail kin kolokol arail inou kan, re kin pehm Ngehno nan arail mour. Elder Joseph B. Wirthling padahngki me “kisakis keieu mwahu en mehlel iei ansou koaros patapatohng Ngehn Sarawi.” ¹⁹ A ahn neitail seri kan “likilik pahn kehlailla douluhl rehn Koht.” ²⁰ Sang ni kaweid en mehlel, dihen aramas me kin pelian dihp kin miehda ni kehlail.

Riei ohl oh lih akan, kolodohng kumwail noumwail seri kan--pwe ren kilang amwail wiewiahn rahn koaros me pid sarawi oh kilang amwail kolokol amwail kahula kan oh inou kan. “Seri kan wia soun kahlamangih mwahu kei, kahrehda kasalehheng irail mehkot kesempwal me ren alasang.” ²¹ Kitail kin mehlel sewese padahkih oh kairada ehu dihen aramas me kin pelian dihp ong Kauno kahula sang ni kahula oh inou sang ni inou.

I kadehdehki me Sises Krais kin ketin kaweid Mwomwohdiso wet. Ni amwail kin wia kasuskuhl, kaweid, oh poakohng seri kan ni wiepen Sounkomouro, kumwail kak alehdi pein amwail koudiahl me pahn seweseikumwail ni wiahda oh tehtehki ngoang, seri me kin pelian dihp. Ahi kapakap iei me neitail seri kan pahn kapwurehieng mahsen kan en Nephi: “Kumwail kak wia pwe I en rerada ni ansou me dihp pahn pwarada?” ²² I kadehdehki me atail Sounkomouro ketin tomwikihla dipen sampah²³—pwehki E mahsanih me E pahn, oh E poakoahng kitail laud²⁴—pwehki E masanih me E pahn. Ni mwaren Sises Krais, amen.