O Se Tupulaga e mafai ona Tetee Atu i le Agasala

I le tausaga ma le afa ua tea, sa saunoa ai Peresitene Russell M. Nelson i le manaomia o le “aoao atu … ma fesoasoani e atinae se tupulaga e mafai ona tetee atu i le agasala.”¹ O lena faaupuga—“o se tupulaga e mafai ona tetee atu i le agasala”—na i ai se uiga faaleagaga mo a’u.

Tatou te faamamaluina fanau o e taumafai ia ola i ni olaga mama ma usiusitai. Na ou molimauina le malosi o le toatele o fanau i le lalolagi atoa. Ua latou tutu malolosi ma le, “tutumau ma lē masiiese”² i tulaga ma siosiomaga luitauina eseese. Ua iloa e nei fanau lo latou faasinomaga paia, lagona le alofa o le Tama Faalelagi mo i latou, ma saili ia usiusitai i Lona finagalo.

Peitai, o loo i ai ni fanau o loo tauivi ina ia tutu ma le “tutumau ma lē masiiese” ma ua faamanuaina o latou mafaufau maaleale.³ Ua osofaia i latou i itu uma e “ufanafana mu a le fili”⁴ ma ua manaomia se faamalosiauga ma le lagolago. O i latou o se uunaiga maoae mo i tatou ina ia laa i luga ma sii atu se taua e faasaga i le agasala i a tatou taumafaiga e aumai a tatou fanau ia Keriso.

Faafofoga i upu a Elder Bruce R. McConkie i le toeitiiti atoa le 43 tausaga ua tea:

“I le avea ai o i tatou ma uso o le Ekalesia, ua tatou auai i se taua tele lava. Ua tatou tauina se taua. Ua tusia o tatou igoa i le galuega a Keriso ina ia tetee atu ia Lusifelo. …

“O le taua tele o loo tauina nei i itu uma lava ma ua faapea ona oo mai ai le tele o puapuaga, ma o nisi foi puapuaga e matautia lava, e le o se mea fou. …

“E leai ni e e ta’ua e faavaevaelua i lenei taua.”⁵

O loo faaauau pea ma le malosi faateteleina le taua i le asō. Ua aafia tatou uma i le taua, ma o loo fetaiai a tatou fanau i laina i luma ma ‘autau tetee. O le mea lea, ua matua manaomia ai mo i tatou le faamalosia o a tatou metotia faaleagaga.

O le faamalosia o le fanau ina ia tetee atu i le agasala o se galuega ma se faamanuiaga mo matua, matua matutua, tagata o aiga, faiaoga, ma taitai. Tatou te tauaveina le tiutetauave e fesoasoani atu. Peitai, na faapitoa lava le faatonuga a le Alii i matua ina ia aoao a latou fanau “ia malamalama i le mataupu faavae o le salamo, faatuatua ia Keriso le Alo o le Atua soifua, ma e uiga i le papatisoga ma le meaalofa o le Agaga Paia” ma “ia tatalo, ma savavali tonu i luma o le Alii.”⁶

O le auala e “tausi a’e a [tatou] fanau i le malamalama ma le upumoni”⁷ e ono avea ma se fesili tofotofo talu ai e patino mo aiga ma tamaiti taitoatasi, ae ua tuuina mai e le Tama Faalelagi ni taiala lautele e fesoasoani ia i tatou. O le a uunaia i tatou e le Agaga i auala sili ona lelei tatou te puipuia ai faaleagaga a tatou fanau.

Ina ia amata, e manaomia le mauaina o se faaaliga i le taua o lenei tiutetauave. E ao ona tatou malalamalama i o tatou—ma o latou—faasinomaga ma faamoemoega paia ae tatou te lei fesoasoani atu ia tatou fanau ia iloa po o aii latou ma pe aisea ua latou i ai iinei. E ao ona tatou fesoasoani ia latou iloa e aunoa ma le fesili o i latou o atalii ma afafine o se Tama Faalelagi alofa ma e i ai ni Ona faamoemoega paia mo i latou.

Lua, ia malamalama e manaomia le aoaoga faavae o le salamo ia mafai ai ona tetee atu i le agasala. O le tetee atu i le agasala e le faapea ua leai se agasala, ae o loo faatatau ina ia salamo, mataala, agavaa faifaipea. Masalo o le mafai ona tetee i le agasala e sau o se faamanuiaga mai le tetee faifaipea i le agasala. Fai mai Iakopo, “Tetee atu i le tiapolo, ona sola ese ai lea o ia ia te outou.”⁸

Na “matua totoa i le lototele [fitafita talavou] … ; ae faauta, sa le ona pau lea—o i latou uma … sa faamaoni i taimi uma i soo se mea na faatuatuaina ai i latou. Ioe, … sa aoaoina i latou e tausi i poloaiga a le Atua ma savavali ma le tonu i ona luma.”⁹ Na o atu nei alii talavou i le taua ma tauaveina uiga faaKeriso o ni auupega e tau ai ma o latou fili. Sa faamanatu mai e Peresitene Thomas S. Monson ia i tatou e faapea “e manaomia ona maua e i tatou uma taitoatasi le lototele. O aso uma o o tatou olaga e manaomia ai le lototele—e le mo na o mea e tutupu i le taimi lava lena, ae o le tele o taimi pe a tatou faia ai ni faaiuga pe tali atu i tulaga o siomia ai i tatou.”¹⁰

E oofu e a tatou fanau ni ofutau faaleagaga pe a latou faavaeina mamanu o le avea ma soo patino i aso taitasi. Atonu o tatou manatu faatauvaa i gafatia o le fanau ia maua le manatu faavae o le avea ma soo i aso taitasi. Na fautuaina i tatou e Peresitene Henry B. Eyring ia “vave amata ma ia tutumau.”¹¹ O le ki lona tolu i le fesoasoani i fanau ia mafai ona tetee atu i le agasala o le amata aoao atu ma le alofa i latou i aoaoga faavae ma mataupu faavae autu o le talalelei ao laiti lava—mai tusitusiga paia, Mataupu Faavae o le Faatuatua, tamaitusi o le Mo le Malosi o le Autalavou pese Peraimeri, viiga, ma a tatou lava molimau—lea o le a taitaiina atu fanau i le Faaola.

O le fatuina o mausa faifaipea o le tatalo, suesue i tusitusiga paia, afiafi faaleaiga, ma tapuaiga i le Sapati e taitai atu ai i le atoatoa, tumau, ma tulaga faatauaina lelei malolosi—i se isi faaupuga, amiosa’o faaleagaga. I le lalolagi i le asō, lea ua mouese atu ai le amiosa’o, e talafeagai mo a tatou fanau le malamalama i le amiosa’o moni ma pe aisea e taua tele ai—aemaise ao tatou saunia i latou ia osia ma tausia feagaiga i le papatisoga ma le malumalu. E pei ona aoaoina i le Tala’i La’u Talalelei“O le tausia o tautinoga e saunia ai tagata [e aofia tamaiti laiti] e osia ma tausi feagaiga paia.”¹²

Na aoao mai e Elder Jeffrey R. Holland, “A tatou talanoa loa e uiga i le tausia o feagaiga, ua tatou talanoa i le fatu ma le agaga o lo tatou faamoemoega i le olaga nei.”¹³ E i ai se mana uiga ese i le osia ma le tausia o feagaiga ma lo tatou Tama Faalelagi. Ua iloa e le fili lenei mea, o lea ua ia taumafai ai e faasese le mataupu faavae o le osia o feagaiga.¹⁴ O le fesoasoani i le fanau ia malamalama, osia, ma tausia feagaiga o se tasi lea o ki i le fatuina o se tupulaga e mafai ona tetee atu i le agasala.

E faapefea ona tatou saunia a tatou fanau ia osia ma tausia feagaiga paia ao latou ulu atu ma alualu i luma i auala o le feagaiga? O le aoao atu o fanau e tausia ni folafolaga faigofie ao latou laiti o le a faamalosia i latou e tausia feagaiga paia i o latou olaga o mulimuli mai.

Sei ou faasoa atua se faataitaiga faigofie: I se afiafi faaleaiga, sa fesili ai se tamā, “O faapei mai i tatou o se aiga?” Na tomumu mai Lizzie e lima tausaga na ula lona tuagane matua, o Kevin, ia te ia ma tiga ai ona lagona. Na tautino atu ma le musua e Kevin e sa’o Lizzie. Na fesili le tina o Kevin ia te ia po o le a se mea e mafai ona ia faia e lelei ai le la va ma lona tuafafine. Na mafaufau Kevin ma filifili o le a ia folafola atu ia Lizzie na te le toe taufaalili ia te ia mo se aso atoa e tasi.

I le faaiuga o le aso na sosoo ai ao potopoto faatasi tagata uma mo le lotu faaleaiga, na fesili le tamā o Kevin ia Kevin pe na a mai le mea lea sa ia fai mai na te faia.O le tali a Kevin “Tamā, na ou tausia la’u folafolaga!” Na ioe ma le fiafia i ai Lizzie, ma sa faamalo le aiga ia Kevin.

Ona fautua atu lea o le tina o Kevin afai e mafai ona ia tausia lana folafolaga mo le aso e tasi, aisea e le mafai ai mo ni aso se lua? Na ioe Kevin e toe taumafai. Lua aso ua mavae, na manuia le taumafaiga a Kevin e tausi lana folafolaga, ma ua sili atu ona lotofaafetai Lizzie! Ina ua fesili lona tama po o le a le mafuaaga ua matuai lelei ai le tausiga o ana folafolaga, fai mai Kevin, “Na ou tausia la’u folafolaga ona sa ou fai atu o le a ou tausiaina.”

O se faasologa o folafolaga laiti na tausia ma le manuia e oo atu ai i le amiosa’o. O le faataitaiga faifaipea o le tausia o folafolaga o le sauniuniga faaleagaga lea mo le fanau ina ia maua ai lo latou feagaiga muamua o le papatisoga ma le meaalofa o le Agaga Paia, lea latou te osifeagaiga ai e auauna atu i le Atua ma tausi Ana poloaiga.¹⁵ O folafolaga ma feagaiga e le mafai ona tuueseesea.

I le tusi a Tanielu ua tatou aoao ai ia Sataraka, Mesako, ma Apeteniko na mumusu e ifo i le tupua a le Tupu o Nepukanesa.¹⁶ Na lapataia i latou e le tupu o le a lafoina i latou i le ogaumu e mu ai le afi pe a latou le usiusitai. Sa latou tetee ma fai atu:

“Afai o lea, ua mafai lo matou Atua, matou te auauna i ai, ona laveai mai ia te i matou ai le ogaumu e mu ai le afi. …

“Ae peitai, a le o lea, ia e silafia e oe le tupu e, matou te le auauna i ou atua.”¹⁷

“Ae peitai, a le o lea.” Mafaufau i le uiga o nei upu e ono ma pe faapefea ona latou fesootai i le tausiga o feagaiga. E lei faavaeina e nei alii talavou e toatolu lo latou usiusitai ina ia laveaiina. E tusa lava pe laveaiina i latou, o le a latou tausia la latou folafolaga i le Alii ona sa latou tau atu o le a latou tausia. O le tausiaina o a tatou feagaiga e le suia ona o tatou tulaga. O nei alii talavou e toatolu, e pei foi o le autau talavou lotototoa, o ni faataitaiga matagofie ia o le tetee atu i le agasala mo a tatou fanau.

E faapefea ona faaaoga nei faataitaiga i o tatou fale ma aiga! O “lea fuaitau i luga o lea fuaitau, ma lea mataupu i luga o lea mataupu,”¹⁸ tatou te fesoasoani ai i fanau ia tofo i faamanuiaga i ū laiti. A o latou tausia a latou folafolaga, latou te lagona le Agaga i o latou olaga. Na aoao mai Elder Joseph B. Wirthlin “o le taui sili o le amiosa’o o le mafutaga faifaipea ma le Agaga Paia.”¹⁹ Ona “solo malosi ai lea o [le] lototele [a o tatou fanau] i luma o le Atua.”²⁰ O le a tupu ae mai lenei punavai o le amiosa’o se tupulaga malolosi e mafai ona tetee atu i le agasala.

Uso e ma tuagane, opo faalatalata mai a outou tamaiti laiti—ia matua faalatalata mai ia latou vaai i au amioga faalelotu i aso taitasi ma matamata o e tausia au folafolaga ma feagaiga. “O fanau o ni faataitaiga maoae, o lea ia tuu atu ia i latou se mea maoae e faataitai.”²¹ O loo tatou fesoasoani moni e aoao atu ma faafailele se tupulaga i le Alii e mafai ona tetee atu i le agasala e ala i lea folafolaga ma lea folafolaga ma lea feagaiga ma lea feagaiga.

Ou te molimau atu o loo taitaia e Iesu Keriso lenei Ekalesia. Ao tou aoao atu, taitai, ma alolofa i fanau i le ala a le Faaola, e mafai ona tou maua se faaaliga patino o le a fesoasoani ia te outou i le fatuina ma le faaauupegaina o fanau lotototoa ma mafai ona tetee atu i le agasala. O la’u tatalo ia toe ta’ua e a tatou fanau upu a Nifae: “Pe e te faia ea ia te a’u ia ou gatete i le tu mai o le agasala?”²² Ou te molimau atu na totogiina e lo tatou Faaola agasala o le lalolagi²³—ona sa fetalai mai o le a Ia faia—ma e alofa o Ia ia i tatou e sili atu nai lo le silafiaina e tagata soifua²⁴—ona sa fetalai mai o le a Ia faia. I le suafa, o Iesu Keriso, amene.