Txoj Sia Nyob Mus Ib Txhis
Vajtswv paub nej thiab caw nej los paub Nws.
Kuv hais lus rau nej, tiam neeg uas tab tom loj hlob—cov tub hluas ntxhais hluas, cov uas yuav poj niam yuav txiv thiab cov uas tseem tsis tau yuav—nej cov uas yog cov thawj coj ntawm tus Tswv lub Koom Txoos thaum yav tom ntej. Vim muaj kev phem, kev ntxhov siab, kev ntshai, thiab kev kub ntxhov nyob hauv ntiaj teb niaj hnub nim no, kuv hais lus meej rau nej txog txoj koob hmoov thiab lub yeeb koob uas los ntawm kev paub Vajtswv.
Yexus Khetos tau qhia qhov tseeb ntau uas piav txog Leej Txiv Saum Ntuj Ceeb Tsheej txoj hau kev zoo siab thiab nej muaj feem li cas nyob rau hauv txoj hau kev ntawd. Kuv xav hais txog ob qho tseeb uas yuav pab nej to taub qhov uas nej yog Vajtswv tus me nyuam thiab paub nej lub hom phiaj nyob hauv lub neej no.
Qhov thib ib: “Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis.”1
Qhov thib ob: “Txoj sia nyob mus ib txhis ntawd yog qhov uas lawv paub koj thiab paub hais tias koj tib leeg thiaj yog Vajtswv thiab paub Yexus Khetos tus uas koj txib los.”2
Thov cia li nco ntsoov ob qho tseeb no—ob qho no qhia vim li cas—thaum kuv piav seb nej thiab peb txhua tus yuav ua li cas kom paub Vajtswv.
Paub Nws Dhau Los ntawm Kev Thov Vajtswv
Kuv cov phooj ywg hluas, peb yuav pib paub Vajtswv dhau los ntawm kev thov Vajtswv.
Thaum lub Plaub Hlis Ntuj 7, 1829, Oliver Cowdery uas muaj 22 xyoos pib ua hauj lwm ua tus teev ntawv rau Yauxej Xamiv uas muaj 23 xyoos. Nkawd hluas heev—ib yam li nej. Oliver thov Vajtswv kom pom zoo rau txoj Kev Muab txoj Moo Zoo Txum Tim Rov Qab Los thiab nws txoj hauj lwm. Ces nws txais kev tshwm sim kom teb nws tej lus thov hais tias:
“Saib seb, koj yeej paub hais tias koj tau nug kuv thiab kuv tau ua rau koj lub cim xeeb to taub. …
“Muaj tseeb tiag, kuv qhia rau koj, kom koj yuav paub hais tias yeej tsis muaj leej twg li tsuas yog Vajtswv tib leeg thiaj paub koj tej kev xav thiab tej lub hom phiaj ntawm koj lub siab. …
“… Yog koj xav tau kev ua tim khawv ntxiv, muab koj lub cim xeeb xav mus rau hmo uas koj thov kuv nyob hauv koj lub siab. …
“Kuv tsis tau hais lus ua rau koj lub siab kaj … los? Koj yuav tau kev ua tim khawv dab tsi uas tseem ceeb tshaj li qhov uas los ntawm Vajtswv?”3
Thaum nej thov Vajtswv nrog kev ntseeg, nej yuav hnov Vajtswv txoj kev hlub thaum Nws tus Ntsuj Plig hais lus rau nej tus ntsuj plig. Txawm nej xav tias nej nyob nej ib leeg xwb los, nej yeej tsis nyob nej ib leeg hauv lub ntiaj teb no. Vajtswv paub nej txhua leej txhua tus. Thaum nej thov Vajtswv, nej yuav los paub Nws.
Paub Nws Dhau Los ntawm Kev Kawm Vaj Lug Kub
Dhau los ntawm kev kawm vaj lug kub, nej kawm txog tus Cawm Seej, thiab nej kuj los paub Nws tiag tiag.
Thaum Plaub Hlis Ntuj xyoo 1985, Txwj Laug Bruce R. McConkie hais lus nyob hauv lub tuam rooj sab laj—13 hnub ua ntej nws tas sim neej. Nws xaus nws zaj lus thaum nws hais lus tim khawv no:
“Kuv yog nws ib tug tim khawv, thiab yuav muaj ib hnub thaum kuv yuav xuas tes kov tej qhov txhab hauv nws tes thiab nws taw thiab kuv yuav los kua muag ua rau nws txhais ko taw ntub tas.
“Tiam sis thaum ntawd kuv yeej yuav tsis paub zoo dua qhov kuv paub tam sim no hais tias nws yog Vajtswv Leej Tub uas Muaj Hwj Chim Tag Nrho, nws yog peb tus Cawm Seej thiab tus Txhiv Dim, thiab peb txais kev cawm seej dhau los ntawm nws cov ntshav uas theej txhoj thiab tsis muaj lwm txoj kev.”4
Peb txhua tus uas mloog Txwj Laug McConkie hais lus yeej nco ntsoov peb xav li cas thaum ntawd. Thaum nws pib hais lus, nws qhia yog vim li cas nws txoj kev ua tim khawv muaj hwj chim heev. Nws tias:
“Thaum kuv hais lus txog tej yam zoo kawg nkaus no kuv yuav siv kuv tus kheej tej lus, txawm yog nej xav tias kuv tej lus yog los ntawm cov vaj lug kub. …
“Muaj tseeb tias tej lus no yog lwm tus xub tshaj tawm, tiam sis tej lus no yog kuv tej lus lawm, vim Vajtswv tus Ntsuj Plig Dawb Huv tau ua tim khawv rau kuv tias tej lus no muaj tseeb, thiab tam sim no twb yog zoo li tus Tswv tau muab tej lus no tshwm sim rau kuv thaum xub thawj. Yog li ntawd kuv twb hnov nws lub suab thiab paub nws txoj lus.”5
Thaum nej kawm thiab xav txog cov vaj lug kub, nej kuj yuav hnov Vajtswv lub suab, paub Nws tej lus, thiab los paub Nws. Vajtswv yuav muab Nws tej lus tseeb nyob mus ib txhis tshwm sim rau nej. Cov lus qhuab qhia thiab ntsiab cai yuav rais los ua ib feem ntawm nej thiab yuav tawm los ntawm nej lub siab kiag.
Ntxiv rau kev kawm vaj lug kub nej tus kheej, yeej yog ib qho tseem ceeb kawm vaj lug kub nrog nej tsev neeg.
Nyob hauv wb tsev neeg wb xav kom wb cov me nyuam paub tus Ntsuj Plig lub suab. Wb ntseeg tias tau muaj li ntawd thaum peb ua ib tsev neeg kawm Phau Ntawv Maumoos txhua hnub. Peb zaj lus tim khawv muaj zog zuj zus tuaj thaum peb hais txog tej yam tseeb dawb ceev.
Kev kawm vaj lug kub yog ib txoj kev uas tus Ntsuj Plig siv kom nyias kawm nyias qhov. Thaum nej kawm vaj lug kub txhua hnub, nej tus kheej thiab nrog nej tsev neeg, nej yuav kawm tus Ntsuj Plig lub suab zoo li cas thiab yuav paub Vajtswv.
Paub Nws Dhau Los ntawm Kev Ua Raws Li Nws lub Siab Nyiam
Ntxiv rau kev thov Vajtswv thiab kev kawm vaj lug kub, peb yuav tsum ua raws li Vajtswv lub siab nyiam.
Tus Cawm Seej yog tus uas coj yam ntxwv zoo tag nrho rau peb. Nws hais tias, “Kuv los saum ntuj los tsis yog los ua raws li kuv lub siab, tiam sis kuv los ua raws li tus uas txib kuv los lub siab nyiam.”6
Thaum tus Cawm Seej uas tau sawv rov los tshwm sim rau cov Neeg Nifais, Nws hais tias, “Thiab saib seb, kuv yog txoj kev kaj thiab txoj sia ntawm neeg ntiaj teb; thiab kuv twb tau haus ntawm lub khob dej iab uas Leej Txiv muab rau kuv, thiab ua rau Leej Txiv tau yeeb koob ntawm qhov uas kuv ris neeg ntiaj teb tej kev txhaum, kuv thiaj tau ua txhua yam raws li Leej Txiv lub siab nyiam txij thaum chiv keeb los.”7
Peb ua raws li Leej Txiv lub siab nyiam thaum peb coj raws li peb tej kev khi lus, ua raws li cov lus txib, thiab pab ua hauj lwm rau Vajtswv thiab peb cov neeg zej zog.
Kuv tus poj niam, Rhonda, thiab kuv muaj niam muaj txiv uas yeej yog tib neeg tsis txawv heev—tej zaum zoo ib yam li nej niam nej txiv. Tiam sis ib yam kuv nyiam txog wb niam wb txiv yog qhov uas lawv muab lawv lub neej tshwj tseg rau kev ua hauj lwm rau Vajtswv, thiab lawv twb qhia wb ua zoo ib yam li ntawd.
Thaum Rhonda niam thiab txiv sib yuav tau ob peb xyoos xwb, cov thawj coj hu nws txiv uas muaj 23 xyoos xwb mus ua tub txib. Nws yuav tsum ncaim nws tus poj niam thiab nkawd tus ntxhais uas muaj 2 xyoos xwb mus. Ces lawv hu nws tus poj niam mus ua hauj lwm nrog nws thaum xya lub hlis kawg ntawm nws txoj kev ua tub txib—nkawd cia cov txheeb ze tu nkawd tus ntxhais.
Ob peb xyoos tom qab ntawd, nkawd muaj plaub tug me nyuam lawm, es nkawd tsiv tsev mus rau Missoula, Montana, Rhonda txiv thiaj li kawm tau ntawv qib siab. Tiam sis, nkawd nyob ob peb hlis xwb thaum Thawj Tswj Hwm Spencer W. Kimball thiab Txwj Laug Mark E. Petersen hu Rhonda txiv ua tus thawj tswj hwm thib ib ntawm ceg txheem ntseeg tshiab hauv Missoula. Nws tsuas muaj 34 xyoos. Nws twb tso nws txoj kev kawm ntawv tseg vim nws xav ua raws li tus Tswv lub siab nyiam—tsis ua raws li nws tus kheej lub siab nyiam.
Kuv niam kuv txiv twb ua hauj lwm ua kab ke hauv lub tuam tsev tau 30 xyoos tawm—kuv txiv yog ib tug ua kev cai sib khi, kuv niam ua hauj lwm ua kab ke. Nkawd twb mus ua tub txib tsib zaug thiab—nyob hauv Riverside, California; Ulaanbaatar, Mongolia; Nairobi, Kenya; lub Tuam Tsev Nauvoo Illinois; thiab lub Tuam Tsev Monterrey Mexico. Nyob hauv Mexico nkawd khwv heev kom kawm tau ib yam lus tshiab, uas nyuaj rau nkawd thaum nkawd muaj 80 xyoo. Tiam sis nkawd xav ua raws li tus Tswv lub siab nyiam tsis ua raws li nkawd lub siab xav xwb.
Rau nej Tsoom Haiv Neeg Ntseeg hauv Hnub Nyoog Kawg uas ua hauj lwm nyob thoob plaws lub ntiaj teb no, kuv hais tej lus rau nej zoo li tus Tswv hais rau tus yaj saub Nifais, Hilamas tus tub, hais tias: “Koj tau koob hmoov, … rau tej yam uas koj tau ua lawm … yam tsis nkees li … , [vim koj] tsis tau nrhiav koj tus kheej txoj sia, tiam sis tau nrhiav yam uas kuv siab nyiam, thiab tau coj li kuv tej lus txib.”8
Thaum peb muaj siab xav ua raws li Vajtswv lub siab nyiam kom rau siab ntseeg ua hauj lwm pab Nws thiab peb cov neeg zej zog, peb yuav paub tias Nws pom zoo rau peb thiab peb yuav paub Nws tiag tiag.
Paub Nws Dhau Los ntawm Kev Hloov Ua Neeg Zoo Li Nws
Tus Cawm Seej qhia peb tias txoj kev zoo tshaj kom paub Vajtswv yog kev hloov ua neeg zoo li Nws. Nws qhia hais tias: “Yog li ntawd, nej yuav tsum ua neeg zoo li cas? Kuv hais rau nej tseeb tias, zoo tib yam li kuv.”9
Peb yuav tsum ua neeg tsim nyog kom thiaj li ua neeg zoo li Nws. Nws txib hais tias, “Hloov nej tus kheej ua dawb huv; muaj tseeb tiag, hloov nej lub siab kom huv, thiab ntxuav nej txhais tes … kom kuv yuav ua rau nej huv.”10 Thaum peb pib ua neeg zoo li Nws, peb hloov siab lees txim thiab txais kev zam txim, thiab Nws ntxuav peb sab ntsuj plig kom huv.
Xwv kom pab peb thaum peb hloov zuj zus los ua zoo li Leej Txiv, tus Tswv tau cog lus rau peb li no hais tias: “Txhua tus uas tso nws tej kev txhaum tseg thiab los cuag kuv, thiab hu kuv lub npe, thiab ua raws li kuv lub suab hais, thiab ua raws li kuv tej lus txib, yuav pom kuv lub ntsej muag thiab paub hais tias muaj kuv.”11
Dhau los ntawm peb txoj kev ntseeg Nws txoj kev txi theej txhoj, tus Cawm Seej ntxuav peb kom huv, kho peb zoo, thiab ua rau peb paub Nws thaum Nws pab peb hloov los ua neeg zoo li Nws. Maumoos qhia hais tias, “Cia li thov Leej Txiv kawg siab kawg ntsws, … xwv kom nej yuav hloov los ua Vajtswv cov tub [thiab cov ntxhais]; xwv kom thaum nws yuav tshwm los peb yuav zoo li nws.”12 Thaum peb siv zog hloov los ua neeg zoo li Vajtswv, Nws yuav hloov peb kom zoo dua li peb hloov tau peb tus kheej.
Paub Nws Dhau Los ntawm Kev Coj Raws Li cov Xib Hwb
Xwv kom pab peb thaum peb siv zog ua zoo, Vajtswv tau muab cov xib hwb thiab cov uas coj yam ntxwv zoo rau peb. Kuv xav qhia nej txog kuv ib tug xib hwb, Txwj Laug Neal A. Maxwell. Nws xav hloov nws lub siab nyiam kom zoo li Leej Txiv lub siab nyiam tsis tu ncua xwv kom hloov los ua neeg zoo li Vajtswv.
20 xyoo tas los lawm, nws qhia kuv tias nws xav li cas tom qab lawv qhia nws tias nws muaj mob cancer. Nws qhia kuv tias, “Kuv xav koom nrog Vajtswv pawg, tsis hais nyob hauv lub neej no los sis nyob lub neej tom ntej los yog.” Kuv tsis xav zaum twj ywm xwb. Kuv xav koom tes ua hauj lwm.”13
Ob peb lim tiam tom qab ntawd, nws tsis tshua xav thov Vajtswv kho nws qhov mob; nws tsuas xav ua raws li Vajtswv lub siab nyiam. Nws tus poj niam, Colleen, qhia nws tias thaum Yexus thov thawj zaug hauv lub Vaj Khexemanes, Nws hais tias, “Yog koj pom zoo, thov koj tshem lub khob no ntawm kuv mus.” Ces tom qab ntawd tus Cawm Seej hais tias, “Txawm yog li cas los thov koj tsis txhob ua raws li kuv lub siab nyiam, tiam sis ua raws li koj lub siab nyiam xwb.”14 Nws yaum kom Txwj Laug Maxwell coj raws li tus Cawm Seej tus yam ntxwv, thov kom txais kev kho mob, ces tom qab ntawd ywj rau Vajtswv lub siab nyiam, es nws twb ua li ntawd.15
Tom qab nws raug tej kev txhaj tshuaj tua cancer ntev thiab sab heev tas ib xyoos lawm, nws yeej rov qab muaj peev xwm koom tes ua hauj lwm. Nws twb ua hauj lwm tau xya xyoo mus ntxiv.
Kuv nrog nws ua hauj lwm ob peb zaug thaum ntawd. Kuv paub txog nws txoj kev ua siab zoo, kev khuv leej, thiab kev hlub. Kuv pom qhov uas nws sab ntsuj plig zoo zuj zus tuaj dhau los ntawm nws txoj kev raug mob thiab nws txoj kev ua hauj lwm ntxiv thaum nws siv zog hloov ua neeg zoo li tus Cawm Seej
Tus uas coj yam ntxwv thiab tus xib hwb zoo kawg, uas peb txhua tus muaj, yog peb tus Tswv thiab tus Cawm Seej, Yexus Khetos, uas hais tias, “Kuv yog txoj kev, yog qhov tseeb, thiab yog txoj sia: tsis muaj leej twg mus cuag tau Leej Txiv tsuas yog mus ntawm kuv mus xwb thiaj tau.”16 “Los nrog kuv mus,”17
Kuv cov kwv thiab cov muam, kev paub Vajtswv yog lub hom phiaj ntawm lub neej no. “Txoj sia nyob mus ib txhis ntawd yog qhov uas [peb] paub … koj tib leeg thiaj yog Vajtswv thiab paub Yexus Khetos tus uas [Leej Txiv] txib los.”18
“Peb yuav tsis mus lawm yav tom ntej nrog txoj hauj lwm tseem ceeb ua luaj no los? … Ua siab loj, [kuv cov phooj ywg hluas]; thiab cia li mus, mus tsis tu ncua kom txog thaum yeej!”19
Vajtwv paub nej thiab caw nej los paub Nws. Thov Leej Txiv, kawm vaj lug kub, muaj siab xav ua raws li Vajtswv lub siab nyiam, siv zog hloov los ua neeg zoo li tus Cawm Seej, thiab coj raws li cov xib hwb ncaj ncees. Thaum nej ua li no, nej yuav los paub Vajtswv thiab Yexus Khetos, thiab nej yuav txais txoj sia nyob mus ib txhis los ua nej tug. Kuv caw nej ua li no vim kuv yog ib tug ua tim khawv tshwj xeeb txog Nkawd. Nkawd muaj txoj sia nyob. Nkawd hlub nej. Kuv hais lus tim khawv li no los ntawm Yexus Khetos lub npe, amees.