Ac Pa inge Moul Ma Pahtpaht

Kawuck fuhsr luhk, kuht kuh in muhtwacwacack in etuh God ke pruhe.

Ke Eprel 7, 1829, Oliver Cowdery yac 22 matwac muhtwacwacack orekma lal ekihn mwet sihm lal Joseph Smith suc yac 23 matwac. Elos fuhsr—oacpacna kowos. Oliver el tuh siyuck sie ahkkweyelah sin God ke fohlohkihnyuckyak uh ac orekma lal kac. In topuk, el tuh eis fwackyuck ten inge:

Fwack nuh sel Oliver Cowdery lah el tuhfahna siyuck sin Leum siyuck se pacna inge ac Leum El tohpohkohllah. 

Leum El ahkacsmakuhnuhl Oliver lah wacngihn mwet sahyacl God ma etuh nuhnak lal ac ke luhn insiacl. 

 Fin Oliver el ke pac sie mwe loh yohk, el enenuh in esam fong se ma el tuh pahng nuh sin Leum ke insiacl ah. …

Leum El ahkacsmakuhnuhl Oliver lah El sramsramkihn mihs nuh ke nuhnak lal . El ac koflah eis sie mwe loh yohk liki sie mwe loh sin God. ³

Ke kowos pruhe ke luhlahlfongi, kowos fah puhla luhngse luhn God ke pacl Nguhn Lal sramsram nuh ke nguhnuwos. Wacngihn ma ke muhkwena kuh tahfuh luo kom puhla kuhtuh pacl uh, kowos tiac muhkwena ke facluh se inge. God El etwekowos, sifacna. Ke kowos pruhe, kom eklac in Etwacl.

Ke kowos lutlut ke ma suhmuhslah, kowos tiac lutlut muhkwena kacl Mwet Lahngo, tuhsruhk pwacyena kowos kuh in etuh Mwet Lahngo.

Ke Eprel 1985, Elder Bruce R. McConkie el sramsram ke toeni luhlahp—lwen na 13 met liki el misac. El ahksahfye ke fahkwack luhlahlfongi inge:

“Ke sie mwet loh lal, ac ke sie lwen tuhkuh nga fah puhla iken osra ke pahol ac ke niyacl ac fah sroksrokihnyac niyacl ke sronin muhtuhk.

“Tuhsruhk nga fah tiac etuh wo liki pacl sacn liki nga etuh ingena lah el Wen nuhtin God Kuhlwacna, lah El pa Mwet Lahngo ac Mwe Molwelah lasr, ac lah molwelah tuhkuh kacl ac ke srah in iwaclah lal ac wacngihn ohiyac sahyac.”⁴

Kuht sesr ma lohng ke Elder McConkie el sramsram ke lwen sac soenna muhlkuhnlah lah kuht puhla fuhkah. Ke el muhtwacwacack sramsram lal ah, el ahkkahlwemye lah efuh mwe loh lal ah arlac fokoko. El fahk:

“In sramsramkihn kahs wolacna inge nga ac orekmakihn kahs luhk sifacna tuh kowos ac kuh in nuhnkuh muh elos kahs ke ma suhmuhslah. …

“Pwacye lah elos met sramsramkihnyuck sin kuhtuh sahyac, tuhsruhk elos inge ma luhk, mwen Nguhn Muhtahl luhn God fahkwack loh nuh sihk lah elos pwacye, ac ke pacl se inge oacna Leum lan ahkkahlwemye nuh sihk ke pacl se met. Ke ohiyac sacn nga lohng puhsrwacl ac etuh kahs Lal.”⁵

Ke kom lutlut ac motko ke ma suhmuhslah uh, kom fah lohng pac puhsrwen God, etuh kahs Lal, ac Etwacl. God lac ahkkahlwemye ma pwacye netok Lal nuh sum sifacna. Mwe luti ac ip yohk inge ac eklac ip ke ma kom oasr kac na fah tuhkuh liki nguhnum.

In weacng lutlut luhn kais sie, yohk srihpac in lutlut ke ma suhmuhslah ekihn sucu se.

In lohm sesr ah kuht kena tuhlihk nahtuhsr in luti in akihlen puhsrwen Nguhn. Kuht luhlahlfongi lah ma sacn sikyak ke kuht lutlut ke Puk luhn Mormon kais sie lwen ekihn sie sucu. Luhlahlfongi lasr uh fokokoi ke kuht sramsram ke ma pwacye muhtahl.

Lutlut ke ma suhmuhslah uh eklac inkacnek soko luhn Nguhn in sang nuh sin kais sie sesr luti ma fal. Ke kom lutlut ke ma suhmuhslah kais sie lwen, muhkwena ac wi sucu lom, kom lotwelah in akihlen puhsren Nguhn ac eklac in etuh God.

In weacng pruhe ac lutlut ke ma suhmuhslah, kuht enenuh in oruh ma luhngse Lal.

Mwet Lahngo pa mwet srihkasrak wowo lasr. El fahk, “Nga oatui inkusrao me, tia in oru ma lungse luk sifacna, a ma lungse lal su supweyume.”⁶

Ke Mwet Lahngo sifil moulyak El sikyang nuh sin mwet Nephi ac, El fahk, “Ac liye, Nga pa kahlwem ac moul luhn facluh; ac Nga tuh nihm ke kuhp mohkohl se ma Pahpah El tuh acse nuh sihk, ac tuh kaksakihn Pahpah in eis nuh feik ma koluk luhn facluh, ma Nga kweokihn olwelah luhn Pahpah in ma nuhkwewa e ke na muhtwacwacackiyac ah.”⁷

Kom ac nga oruh luhngse luhn Pahpah ke ahkfuhlwactyeyacn olwelah lasr, liyacacng masap, ac kuhlwacnsuhpuh God ac mwet wiyacsr uh.

Muhtwacn kiyuck, Rhonda, ac nga oasr pahpah ninac kiyac ma oacna mwet nuh kwewa—sahp oacna pahpah ninac kiyowos. Tuh ma se nga luhngse ke pahpah ninac kiyacsr uh pa elos kihsaclah moul lalos in kuhlwacnsuhpuh God, ac elos luti kuht in oruh oacna.

Ke pahpah ninac kiyacl Rhonda ah tuh macruhtlac ke na yac luo, pahpah yac 23 matwac tuhmwacl ah tuh pahng in kuhlwacnsap ke sie misin fohnlah. El som sislah muhtwacn fuhsr kiyacl ac tuhlihk muhtwacn yac luo nahtuhltahl ah. Na muhtwacn kiyacl tuh pahng in weluhl kuhlwacnsap ke mahlwem itkohsr luhlah ke misin lal—sislah tuhlihk muhtwacn se nahtuhltahl ah in karihngihnyuck sin sucu.

Yac ekahsr tohkoh, inge oasr tuhlihk ahkosr, elos kihluck nuh Missoula, Montana, pahpah tuhmwacl ah in muh wi university se. Ohinge, elos oasr we kena mahlwem ekahsr ke Prestuhn Spencer W. Kimball ac Elder Mark E. Petersen sang kunohkohn se nuh sin pahpah se wiyacn ninac kiyuck in pa prestuhn se emet ke Missoula stek ma tuhfahna tuyak. El yac na 34. Nuhnak ke university sac fihliyucki nuh tok ke el suk in oruh luhngse luhn Leum a tiac luhngse—lal sifacna.

Pahpah ninac kiyuck ah tuh orekma ke akwuck ke tempuhl puhs liki yac 30—Pahpah el ekihn mwet in akucl se, Ninac el mwet in orek akwuck se, Elos kuhlwacnsuhpuh pac misin fohnlah limekohsr—ke Riverside, California; Ulaanbaatar, Mongolia; Nairobi, Kenya; Nauvoo Illinois Temple; ac Monterrey Mexico Temple. Fin acn Mexico, eltahl kampare in lotwelah sie kahs sasuc, suc tiac fihsrwacsr nuh sin yac 80 matwac se. Tuhsruhk elos suk in oruh ma luhngse luhn Leum likina in suk kena lalos sifacna ke moul uh.

Nuh selos, ac nuh sin Mwet Luhlahlfongi ke Lwen-sahflah kihsackuhnlah fin facluh nohfohn, nga sifil fahk kahs fwack sin Leum nuh sel Nephi: “Kom insewowo, … ke ma kom orwaclah … tiacna ullac … , tiac suk moul lom sifacna, tuhsruhk suk kena Luhk, ac in liyacacng na masap Luhk.”⁸

Ke kuht suk in oruh ma luhngse luhn God ke oaru in Kuhlwacnsuhpwacl ac mwet wiyacsr uh, kuht puhla insese Lal ac eklac in Etwacl na pwacye.

Mwet Lahngo El fahk nuh sesr lah ohiyac se ma wo emet in etuh God uh pa in eklac oacna El. El luti: “Ke ma inge, ohiyac fuhkah luhn mwet uh kowos enenuh in oacna? Pwacye na Nga fahk nuh suwos, finne in oacna Nga.”⁹

Nwacsnwacs el enenweyuck in eklac oacna El. El sapkihn muh kuht enenuh in ahkmuhtahlye kuht sifacna. Kuht enenuh in ahknwacsnwacsye insiyacsr ac ahknwacsnwacsye pahosr Lan muh kuh in oruh kuht nwacsnwacs.”¹⁰ Muhtwacwacack oruh in eklac oacna El, kuht auliyak, eis nuhnakmuhnahs Sel, ac El ahknwacsnwacsye nguhnasr.

In kahsrwekuht ke kihluck lasr nuh yurin Pahpah, Leum El use nuh sesr olwelah se inge: Mwet nuh kwewa ma fuhlweack ma koluk lal ac tuhkuh nuh Yohrohl, pahngon Inel, ahkos Puhsrwacl, ac liyacacng masap Lal fah liye Muhtahl ac etuh lah El.¹¹

Ke luhlahlfongi lasr ke kihsac in iwaclah Lal, Mwet Lahngo El ahknwacsnwacsye kuht, unwe kuht, ac in kuh kuht in etuh Kacl in kahsrwekuht in eklac oacna El. Mormon el luti, “Pruhe nuh sin Pahpah ke kuhiyacn insiyowos nohfohn, … tuh kowos in kuh in wen [ac acn] nuhtin God; tuh ke Elac fah sikme kuht fah oacna El.”¹² Ke kuht kampare in eklac oacna God, El kuh in oruh kuht in wolac liki na kuht kuh in sifacna oruh uh.

In kahsrwekuht ke kampare lasr, God El use mwet srihkasrak ac mwet in kahsruh. Nga luhngse akacsruhi puhla luhk ke sie ma luhk, Elder Neal A. Maxwell. El pacl nuh kwewa suk in sang luhngse lal nuh ke luhngse luhn Pahpah ke kuhiyacl in eklac oacna God.

Puhs liki yac 20 somlah ah, el akacsruhi puhla lal nuh sihk tukun sukok lah nga cancer. El fahk nuh sihk. “Nga luhngse wi oasr ke u uh, ke lwacyacn inge kuh lwacyacn sahyac ah. Nga tiac ke muhtana inte. Nga ke wi orekma.¹³

Ke wik ekahsr tohkoh ah, el wetok in siyuck sin God in unwacllah, el ke oruh kena luhn God. Muhtwacn kiyacl, Colleen, fahkwacng lah pahng se emet luhn Jisus ke Gethsemane ac pa “Fin kuh, eislah cup in keok se inge likiyuc.” Na Mwet Lahngo El fahk pacna, “Tusruktu in tia ou lungse luk, a in ou lungse lom.”¹⁴ El kwacfel Elder Maxwell in ukwe srihkasrak luhn Mwet Lahngo, in siyuck ke kahsruh ac na sang luhngse lal nuh ke luhngse luhn God, suc el oruh.¹⁵

Tukun kweok ke unweyuck paht, muhnahs lal ke apkuhran in yac se, el wolac ac fohlohk na pwacye kwelac El sulpac kuhlwacnsap ke yac itkohsr.

Oasr kunohkohn puhs luhk el ke kuhtuh yac tukun el kwelac ah. Nga tuh puhla kuhlwacng, pahkomuhta, ac luhngse lal. Nga witnisi yohkwelihkiyacn nwacsnwacslah ke nguhnal ke kweok pacl loes el puhlakihn ac tiac tui in kuhlwacnsap lal ke el kampare in eklac oacna Mwet Lahngo.

Srihkasrak ac kahsruh na sahflah ac, oasr nuh sesr kwewa, pa Leum lasr ac Mwet Lahngo, Jisus Kraist, suc fahk, “Nga pa inkacnek, ac pwaye ac moul: wangin mwet som nu yurin Papa fin tia ke nga.”¹⁶ “Fahsru fahsr tukuk.”¹⁷

Tamuhlwel ac tahmtahel fuhsr wiyuck, etuh God pa sie suk ke sie lusen moul. “Ac pa inge moul ma pahtpat, tuh[kuht] in etuh … God pwacye sefanna, ac Jisus Kraist, suc [Pahpah] el suhpwacma.”¹⁸

Mwet Pahluh Joseph el kwacfe kuht in fahsr na ke srihpac yohk se inge. El fahk muh kuht enenuh in puhlaik, fahsr nuh met in kuhtanglah!”¹⁹

God El etwe kom ac suli kom in Etwacl. Pruhe nuh sel Pahpah, lutlutkihn ma suhmuhslah, suk in oruh luhngse luhn God, kampare in eklac oacna Mwet Lahngo, ac ukwe mwet in kahsruh suwohswohs. Ke kom oruh, kom fah eklac etuh God ac Jisus Kraist, ac kom ac usrui moul ma pahtpaht. Pa inge nguhsr luhk nuh suwos, ekihn mwet loh akmuhsralah se Kwaclos. Ke inen Jisus Kraist, amen.