Oh Met Iei Mour Soutuk

Riei me pwulopwul kan, kitail kak tepda esehla Koht sang ni kapakap.

Ni Epriel 7, 1829, Oliver Cowdery-mahkier sounpar-22 me tapiada ah doadoahk ong ni soun intingiedi pwuhk sarawi ong ni en Joseph Smith ah mahkier sounpar-23. Ni ara tikitik—duehte komwi. Oliver peidek ong ni men esehla sang rehn Samatail Nanleng me pid koapwurpwurohro oh ni ah doadoahk loale. E ale pasapengo sang nan kaudial pwukat:

“Kilang, ke ese me ke kalelepak rehi oh I kamarainihukehr. …

“Ehi, I ndahieng uhk, pwe ken ese me sohte mehkot pwe Koht me ketin mwahngi ahmw madamadau kan oh audepen ahmw mwohngiong. …

“… Ma ke anahne pil ehu kadehde, tamanda nih pwong me ke likiwerdohng ie nan ahmw mwohngiong. …

“I sou kameleileidi ahmw madmadau … ? Mie pil emen sounkadehde me ke kak ahneki likin Koht?”³

Niamwailkin pwoson kapakap, kumwail kin kehn limpoak en Koht ni Sapwellime Ngehno ah kin mahsendongngenomwailkan. Menda ma kumwail kelekelehpw de peikasal ekei ansou, kumwail sohte kelekelepw nan sampah wet. Koht mwahngi ihskumwail Ni amwail kin kapakap, kumwail kin esehla Ih.

Ni amwail kin sukuhlki iren pwuhk sarawi, kumwail sohte kin kasukuhlkihte duwen Sounkomouro, ahpw kumwail kin kak udahn esehla Sounkomouro.

Nan Epreil 1985, Elder Bruce R. McConkie wia ah padahk nan kapokon lap—rahn te 13 mwohn eh kepinsalehdala. E kaimwsekala ah padahko ki kadehde wet:

“Ngehi emen sapwellime sounkadehde, oh ni ehu rahn kohkohdo I pahn dehm lipwen metehkan nan lime oh ni aluweluwe kan oh pahn kawisekesekehla aluweluwehkan ki pilen mesei ka.

“Ahpw I sohte pahn ese mehkot mwahu ansouo sang ahi ese met me iei Ih Iehros en Koht, me wia atail Sounkomour oh Soundor, oh kitail kin komourla sang ni sapwellime ntahn tomwo oh kaidehn sang ni ehu ahl tohrohr.”⁴

Kitail kan me rong en Elder McConkie padahk rahno saikinte manokehla dahme kitail pehm rahno. Ni eh tapiada ah padahko, e kasalehda kahrepen ah kadehdeo eh inenen kehlail. E mahsani:

“Ni ei padpadahngki ire kaselel pwukat, I pahn doadoahngki pein ahi koasoi, ahpw kumwail pahn kak medemedewe me I wie doadoahngki mahsen kan en pwuhk sarawi. …

“Mehlel pwe ni tapio irail me kalohkihda mepwukat, ahpw met mepwukat wia ahi koasoi , pwe Ngehn Sarawi en Koht ketin kadehde iong ie me mepwukat me mehlel, oh met likamwete Kauno ketin kasalehiong iehier mepwukat nin tapio. Ngehi eri rongehr kepitie oh ese sapwellime mahsan.”⁵

Ni amwail kin onopki oh douloalih iren pwuhk sarawi kan, kumwail pil pahn rong kepitien Koht, esehla Sapwellime mahsan kan, oh esehla Ih. Koht pahn pein ketikihiong kumwail Sapwellime mehlel soutuk kan. Iren kaweid oh padahk pwukat pahn wiahla kisehn amwail mour oh kin pwarada sang palingenamwail.

E inenen kesempwal kumwail oh amwail peneinei en kin patpene oh sukuhlki iren pwuhk sarawi.

Nan aht peneinei, se kin mwahuki nait serihkan en sukuhlki oh esehla rong kepitien Ngehno. Se kamehlele me mwekid wet pweida ni ansou me se kin patpene oh sukuhlki Pwuken Mormon rahn koaros. Aht kadehde kan kehlailla ni aht kin koasoaia me mehlel sarawi kan.

Sukuhlki iren pwuhk sarawi kin elehda en Ngehno eh kak kasukuhli emen emen kitail. Ni amwail kin sukuhlki iren pwuhk sarawi kan rahn koaros, kelehpw de patehng peneinei, kumwail pahn esehla rong kepitien Ngehno oh pahn kak esehla Koht.

Kitail anahne kapatahieng atail kin kapakap oh sukuhlki iren pwuhk sarawi, kitail en pil kin kapwaiada Kupwure.

Sounkomouro iei atail mehn kahlmengi unsek. E mahsani, “I kohdihdo sang nanleng pwe I en kapwaiada kupwure en Ih me ketin kadariehdo, a kaidehn pwe I en wia nsenei.”⁶

Ni en Sounkomour me iasadahro ketin pwarehng mehn Nihpai ko, E mahsani, “Kilang ngehi iei maraino oh komourpen sampah oh I nimasangehr nan kep katiko me Sahmo ketikihongiehier, oh I kelinganadahr Sahmo ni ei alehdahr dipen sampah me I lokolongkiher pwehki kupwuren Sahmo mehkoaros sang ni tepio.”⁷

Kumwail oh ngehi pahn kapwaiahda kupwuren Sahmo ni atail kin wauneki atail inou kan, kolokol kosonned akan, oh papah Koht oh iangatail aramas akan.

En ngehi oh ahi pwoud Rhonda aht pahpa/nohno kan duwehte aramas teikan—ele pil duwehte amwail pahpa/nohno kan, Ahpw ehu kahrepe me I poakpoakehki aht pahpa/nohno kan pwe irail kin papah Koht ki arail mour unsek oh padahkiheng kiht sen wia soahgohte.

Ni en Rhonda eh pahpa/nohno ara pwopwoudkihte sounpar riau, eh pahpao me sounpar 23 malipilipda en wia ah misin. E mweselsang ah pwoud oh neira serepein sounpar riau. Mwuri ah pwoudo pil malipilipda en kohla iang ohlo kanekehla sounpwong isuh me luwehdi nan ah misino—liho eri pil mweselsang neira serepeino me ara peneineiko uhd apwali.

Sounpar malaulau kei mwuri, met neira seri pahmen, irail kosoulahng Missoula, Montana, pwe ah pahpao en iang sukuhl. Ahpw, irail mihmikihte sounpwong kei wasao ni en President Spencer W. Kimball oh Elder Mark E. Peterson ara kadaralahng ohlo ehu malipilip en wia keieun presiden nan stake kapw en Missoula. Ohlo sounparte 34. Pilahn en iang sukuhlo pwilidi pwe ohlo koasonedier en kapwaiahda kupwuren Kauno—kaidehn nsene.

Ahi pahpa/nohnou papahkiher nan tehnpas sarawi daulih sounpar 30—Pahpa wia sounkatengeteng, nohno soun apwalih tiahk sarawi. Ira pil wia ara misin pak limau—nan Riverside, California; Ulaanbaatar, Mongolia; Nairobi, Kenya; Tehnpas Sarawi en Nauvoo Illinois oh Tehnpas Sarawi en Monterry Mexico. Nan Mexico, ira nantieng en esehla lokaiahn wasao, me sohte mengei ni ara sounparehr 80. Ahpw ira koasonehdi ira en kapwaiahda kupwuren Kauno ahpw kaidehn nsenara.

Ong koaros Souleng en Imwin Rahn-akan me poadidi kan nan sampa, I kapwurehieng koasoi kan me Kauno wiahieng soukohp Nihpai, nein Helaman; “Kapai ong komwi. …pwehki soahng kan me ke wiadahr. …sohte pwangada … ,[pweke] sohte raparapahkihte dahme mwahuehng ahmw mour, ahpw kin kapwaiahda nsenei oh kolokol ahi kosonned akan.”⁸

Niatail kin kapwaiada kupwuren Koht ni atail pwoson papah Ih oh aramas akan, kitail kin pehm Sapwellime kupwur mwahu oh esehla Ih.

Sounkomouro mahsaniheng kitail me wiepe keieu mwahu en eseha Ih iei en nantiheng duwehla Ih. E padahngki me: “Eri, soangen aramas dahnge me kumwail en wia? Mehlel I ndahieng kumwail, kumwail en duweiehte.”⁹

E kesempwal kitail en warehng pwehn duwehla Ih. E kangoange, “Kesempwaliki pein kumwail, ehi kamwakelehda mohngiongumwail, oh widen pehmwail kan … pwe I en kamwakelei kumwailda.”¹⁰ Ni atail tapiada kitail en duwehla Ih, kitail koluhla oh ale Sapwellime mahk, oh E pahn kamwakelehda atail mour kan.

Pwehn sewesei kitail ni atail songosong en duwehla Sahmo, Kauno inoukihong kitail me: “Koaros me pwilikihdi dipehkan oh kohdo rehi, oh eker mwarei, oh karonge ngilei, oh kolokol ahi kosonned akan, pahn kilang sihlahngi ohese ie.”¹¹

Pwehki atail pwoson Sapwellime tohnmetei en tomwo, Sounkomouro kamwakelei kitailda, kakehlei kitailda, oh mweidehng kitail enesehla Ih pwehn sewesei kitail duwehla Ih. Mormon padahngki, “Kapakap ong Sahmo sang ni kehl en amwail mohngiong kan. …pwe kumwail en kak wiahla sapwellimen Koht serihkan; pwe ni ansou me e pahn ketin pwarodo, kitail pahn duwehla ih.”¹² Ni atail nannantiong en duwehla Koht, E kak wiahieng kitail dahme kitail sohte kak pein wiahieng kitail.

Pwehn sewesei kitail ni atail wie nannanti, Koht ketikihengehr kitail mehn kahlmengi oh sounkaweid kan. I men ehukihda ahi pepehm duwen emen ahi sounkaweidko, Elder Neal A. Maxwell. Ohlo kin kalap kapwaiada kupwuren Koht ni eh kin songosong en duwehla Koht.

Tohtohsang sounpar 20 samwalahro, e ehukihengie ah pepehm mwurin eh kadierekda me e ahneki soumwahu en kanser. Ohlo nda me, “I men iang pwihn en paliet[sang nanleng] de palio.I sohte men kilkilangete. I men iang mih nan mwadongo.”¹³

Kedekede wihk kei mwuri, ohlo sohte men peki Koht en kamwahuwiala ih, e mwahukihte wia kupwuren Koht. Ah pwoudo, Colleen, kasalehda me en Sises pekipek me e tepin wia nan Mwetuwel en Kedsemeni iei “Ma e kak a komw ketikihweisangie dahl en lokolok wet.” Iei ni ansouo me Sounkomouro mahsani, “Eri soh kaidehn nseneiet, pwe kupwuromwihte.en pweida”¹⁴ Liho kangoange Elder Maxwell en idawehn en Sounkomouro karasaras, pwehn peki kakehlail oh ahpw kasohrala nseneho pwehn kapwaiahda kupwuren Koht, ihme e wia.¹⁵

Ni en ohlo lokolongkiher kerenieng sounpar ehu sang ni wiepen kamwaula soumwahu kanser me kin inenen kamedek, ohlo pwurehng kehlailda oh pwurodo doadoahk. E wie papahki pil sounpar isuh.

Pak kei I iang ohlo doadoahk nan erein sounpar en mwuri kan. I kehn uwen ah kadek, sapan oh limpoak. I kadehde uwen laudlahn ah poadidi ni pali ngehn ni eh kin kohkohwahki lokolok sang ah soumwahuo oh pepeusla ah papah, ni eh nannantiheng en duwehla Sounkomouro.

Inondehn mehn kahlmengi oh sounkaweid me langehng kitail koaros, iei atail Kaun oh Sounkomour Sises Krais, me mahsani, “Ngehi me ahl, ngehi me mehlel, ngehi me mour; sohte me kak kolahng Semei ma soh ngehi.”¹⁶ “Kohdo oh iangiehla.”¹⁷

Kempoakepahi me pwulopwul kan, kumwail nantiheng esehla Koht nan mour wet. “Oh ietmour [sen] eseikomwihla, … komwihte Koht mehlel, oh Sises Krais, me [Sahmo] ketin poaronedohr.”¹⁸

“Kitail sohte pahn iang wia doadoahk lap wet? …Eimah, [kempoakepahi me pwulopwul kan]; oh kohkohwei lao kitail powehdi!”¹⁹

Koht ketin mwahngi kumwail oh lukei kumwail en esehlaIh. Kapakap ong Sahmo, sukuhlki iren pwuhk sarawi kan, kapwaiahda kupwuren Koht, nantiheng en duwehla Sounkomouro, oh idawehn sounkaweid pwung kan. Ni amwail wia metkumwailpahnesehla Koht oh Sises Krais, oh kumwail pahn sohsohki mour soutuk. Met iei ahi luhk ong kumwail ni ei wia emen Sapwellimara sounkadehde me kasarawilahr. Ira ketin ieias. Ira ketin poakehng kumwail. I kadehde ni mwaren Sises Krais, amen.