2010–2019
O Le Ola e Faavavau Foi Lenei
Aperila 2017


O Le Ola e Faavavau Foi Lenei

E silafia outou e le Atua, ma valaaulia outou ia iloa o Ia.

Ou te talanoa atu ia te outou, le tupulaga faia’e—le autalavou ma talavou matutua, nofofua pe faaipoipo—o outou o taitai o le lumanai o lenei Ekalesia. Faatasi ai ma amioleaga uma, vevesi, fefe, ma le fenumiai i le lalolagi i le asō, ou te talanoa atu ia te outou ma le manino e uiga i le mamalu ma le faamanuiaga o le iloaina o le Atua.

Sa aoao mai e Iesu Keriso le tele o upumoni na faamatala ai le fuafuaga o le fiafia a le Tama Faalelagi ma lou tulaga i totonu. Ou te taulai i upumoni e lua lea e fesoasoani ia e malamalama ai i lou faasinomaga o se fanau a le Atua ma iloa lou faamoemoega i le olaga.

Muamua: “Aua ua faapea lava ona alofa mai o le Atua i le lalolagi, ua ia aumai mai ai lona Atalii e toatasi, ina ia le fano se tasi e faatuatua ia te ia, ae ia maua le ola e faavavau.”1

Lua: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.”2

Faamolemole ia manatua upumoni nei—la te aoao mai le aiseaa o ou saili e faamatala le pe faapefea ona iloa e outou ma tatou uma le Atua.

Iloa o Ia e ala i le Tatalo

Au uo talavou, e mafai ona tatou amata iloa le Atua e ala i le tatalo.

I le aso 7 Aperila, 1829, sa amata ai e Oliva Kaotui e 22-tausaga le matua ana galuega o se tusiupu mo Iosefa Samita e 23 tausaga le matua. Sa talavou i laua—e pei o outou. Sa ole atu Oliva mo se faamautinoaga mai le Atua e uiga i le Toefuataiga ma lana galuega e fai i ai. I le tali mai, sa ia maua ai faaaliga nei:

“Faauta, ua e iloa na e ole mai ia te aʼu ma sa Ou faapupulaina lou mafaufau. …

“Ioe, ua Ou tau atu ia te oe, ina ia mafai ona e iloa e leai lava se tasi ae ua nao le Atua ua ia silafia ou mafaufauga ma faamoemoega o lou loto. …

“… Afai e te manao i se isi molimau, liliu ane lou mafaufau i le po na e tagi mai ai ia te a’u i lou loto. …

“Ou te lei tautala atu ea le filemu i lou mafaufau … ? O le a se molimau sili atu e mafai ona e maua mai lo lena mai le Atua?”3

A e tatalo ma le faatuatua, o le a e lagona le alofa o le Atua a o talanoa mai Lona Agaga i lou agaga. Po o le a lou tuuatoatasi pe le mautonu e te ono lagona i nisi o taimi, e le o tuuatoatasi oe i lenei lalolagi. E silafia patino oe e le Atua. A e tatalo, o le a oo ina e iloaina o Ia.

Iloa o Ia e ala i le Suesueina o Tusitusiga Paia

A o e suesue i tusitusiga paia, e le gata o le a e aoao ai e uiga i le Faaola, ae e mafai moni ona e iloaina le Faaola.

Ia Aperila 1985, sa saunoa ai Elder Bruce R. McConkie i le konafesi aoao—na o le 13 aso ao le’i maliu ai. Sa ia faaiuina i lana molimau:

“O a’u o se tasi o Ana molimau, ma i se aso a sau o le a ou pa’i atu ai i faailoga o fao i ona lima ma ona vae, ma o le a faasusūina ona vae i o’u loimata.

“E ui i lea, e leai la se isi malamalama pito sili o le a ou iloa i lena taimi, nai lo o le malamalama ua ou iloa nei o Ia o le Alo o le Atua Silisili Ese, o Ia o lo tatou Faaola ma Togiola, ma e oo mai ma ala mai i lona toto togiola le faaolataga, a e le o se isi lava auala.”4

O i tatou sa faalogo o saunoa mai Elder McConkie i lena aso, e lei galo lava le auala na tatou lagonaina ai. A o ia amata lana lauga, sa ia faailoa mai le mafuaaga sa mamana tele ai lana molimau. Sa ia faapea mai:

“I lo’u ta’ua la o nei mea ofoofogia, o le a ou faaaogaina ai a’u lava upu, e ui atonu o le a outou faapea o ni afioga mai tusitusiga paia. …

“E moni sa muai folafolaina mai e isi, ae ua avea nei ma a’u upu, aua ua molimau mai le Agaga Paia o le Atua ia te au e moni, ma e pei lava o lenei ua faailoa mai ia te au e le Alii i le taimi muamua. Sa ou faalogo i lona siufofoga ma iloa lana afioga.”5

A o e suesue ma manatunatu i tusitusiga paia, o le a e faafofoga foi i le siufofoga o le Atua, silafia Ana afioga, ma silafia o Ia. O le a faaali atu patino e le Atua ia te oe Ana upumoni e faavavau. O nei aoaoga ma mataupu faavae o le a avea ma se vaega o lou tagata ma o le a oo mai mai i lou lava agaga.

E faaopoopo i suesuega faaletagata lava ia, o le suesueina faaleaiga o tusitusiga paia e taua.

I lo matou aiga, sa ma mananao i la ma fanau e aoao ia iloa le siufofoga o le Agaga. Sa ma talitonu sa tupu lena mea a o matou suesueina le Tusi a Mamona i aso taitasi o se aiga. Sa faamalolosia a matou molimau a o matou talanoa e uiga i upumoni paia.

E avea le suesueina o tusitusiga paia ma alaleo mo le Agaga e tuu mai ia i tatou taitoatasi se aoaoga faaopoopo e faaleleia. A o e suesueina tusitusiga paia i aso taitasi, na o oe ma faatasi ai ma lou aiga, o le a e aoao e iloa le siufofoga o le Agaga ma o le a silafia le Atua.

Iloa o Ia e ala i le Faia o Lona Finagalo

E faaopoopo i a tatou tatalo ma le suesueina o tusitusiga paia, tatou te manaomia le faia o le finagalo o le Atua.

O le Faaola o lo tatou faaa’oa’o sili lea. Sa Ia fetalai mai, “Ou te le’i alu ifo mai le lagi e fai lo’u lava loto, ao le finagalo o le ua auina mai a’u.”6

Ina ua faaali atu le Faaola toetu i sa Nifae, sa Ia fetalai mai, “Ma faauta, o Au o le malamalama ma le ola o le lalolagi; ma ua ou inu i lena ipu oona lea na tuuina mai e le Tamā ia te au, ma ua ou faamamaluina le Tamā i lou aveina i ou luga o agasala a le lalolagi, o se mea na ou tuu atu ai le finagalo o le Tama i mea uma mai le amataga.”7

E faia e oe ma au le finagalo o le Tama e ala i le faamamaluina o a tatou feagaiga, tausi poloaiga, ma auauna i le Atua ma o tatou uso a tagata.

E ia i maua, ma lou toalua, o Rhonda ni matua o ni tagata masani—masalo e tai pei o tou matua. Ae o le mea e tasi ou te alofa ai i o ma matua e latou te tuuto atu o latou olaga e auauna i le Atua, ma sa latou aoao i maua ia faia le mea e tasi.

Ina ua faatoa faaipoipo matua o Rhonda mo ni nai tausaga, sa valaauina lona tama e 23 tausaga e auauna atu i se misiona talai. Sa ia tuua lona toalua talavou ma le la tama teine e lua tausaga. Ona valaauina lea o lona toalua e auauna faatasi ma ia i le taimi o le fitu masina mulimuli o lana misiona—ma tuua ai lo la tama teine i le tausiga a aiga.

I nai tausaga mulimuli ane, i le taimi nei ma le fanau e to’afa, sa latou masii atu i Missoula, Montana, ina ia mafai ona auai lona tama i le iunivesite. Ae peitai, sa na o ni nai masina sa latou i ai iina ae tuuina atu e Peresitene Spencer W. Kimball ma Elder Mark E. Petersen se valaauga i lo’u tama faaletulafono ina ia avea ma uluai peresitene o le siteki fou faatoa faatuina o Missoula. Sa na o le 34 ona tausaga. O manatu e uiga i le iunivesite sa tuuese, a o ia saili e faia le finagalo o le Alii—e le o lona loto.

Sa auauna atu ou matua i le malumalu mo le silia ma le 30 tausaga—o Tama o se fai faamauga, ma Tina o se tagata faigaluega i sauniga. Sa la auauna foi i ni misiona talai se lima—i Riverside, Kalefonia; Ulaanbaatar, Monokolia; Nairobi, Kenya; le Malumalu o Navu Ilinoi; ma le Malumalu o Monterrey Mekisiko. I Mekisiko, sa la galulue malosi e aoao se gagana fou, lea sa le faigofie i le 80 tausaga o le matua. Ae sa la saili e faia le finagalo o le Alii i lo le mulimuli i o laua lava manaoga i le olaga.

I ia Au Paia uma tuuto o Aso e Gata Ai i le lalolagi atoa, ou te faaleo atu upu na fetalai ai le Alii i le perofeta o Nifae: “Amuia lava oe, … ona o ia mea na e faia … ma le le faavaivai … [ma sa e le] sailia lou lava ola, ae sa e saili lo’u loto, ma ia tausia au poloaiga.”8

A o tatou saili e faia le finagalo o le Atua e ala i le auauna atu ma le faatuatua ia te Ia ma o tatou uso a tagata, tatou te lagona Lona faamautinoaga ma oo moni ina iloa o Ia.

Iloa o Ia e ala i le Avea e Pei o Ia

Ua ta’u mai e le Faaola ia i tatou o le auala sili e iloa ai le Atua o le avea lea e pei o Ia. Sa ia aoao mai: “O lea, o a ituaiga o tagata e tatau ona outou i ai? E moni ou te fai atu ia te outou, e pei lava o au nei.”9

E taua le agavaa ina ia avea ai e pei o Ia. Sa Ia poloai mai, “Faapaia outou lava; ioe, ia faamamā o outou loto, ma faamamā o outou lima … ina ia mafai ona Ou faamamāina outou.”10 O le amataga o le faagasologa e avea e pei o Ia, tatou te salamo, maua Lona faamagaloga, ma Na te faamamāina o tatou agaga.

Ina ia fesoasoani ia i tatou a o tatou alualu i luma i le Tama, na tuu mai ai e le Alii ia i tatou le folafolaga lenei: “O tagata taitoatasi e lafoai ana agasala ma sau ia te a’u, ma valaau mai i lo’u igoa, ma usiusitai i lo’u leo, ma tausi i a’u poloaiga, o le a vaai i o’u mata ma iloa o i ai a’u.”11

E ala i lo tatou faatuatua i Lana taulaga togiola, e faamamāina i tatou e le Faaola, faamalolo i tatou, ma mafai ai e i tatou ona iloa o Ia ma avea e pei o Ia. Sa aoao mai Mamona, “Tatalo atu i le Tama ma le malosi atoa o le loto, … ina ia mafai ona avea o outou atalii [ma afafine] o le Atua; a oo ai ina afio mai o ia o le a tatou faapei o ia.”12 A o tatou taumafai e avea e faapei o le Atua, e mafai ona Ia faia i tatou ia sili atu i lo mea tatou te mafai ona faia mo i tatou lava.

Iloa o Ia e ala i le Mulimuli i Faiaoga

Ina ia fesoasoani ia i tatou i la tatou taumafaiga, ua tuuina mai e le Atua ia i tatou ni faaa’oa’o lelei ma ni faiaoga. Ou te fia faasoa atu ou lagona e uiga i se tasi o a’u [faaa’oa’o] o Elder Neal A. Maxwell. Na te saili pea e tuuina atu lona loto i le finagalo o le Tama i lana taumafaiga e avea e faapei o le Atua.

I le silia ma le 20 tausaga talu ai, sa ia faasoa mai ia te au ona lagona i le aafia ai i le kanesa. Sa ia ta’u mai ia te au, “Ou te fia i ai i le ‘au, i le itu lenei [o le veli] po o le itu le la. Ou te le fia nofo ma matamata. Ou te fia taalo i le taaloga.”13

I ni nai vaiaso na sosoo ai, sa musu e ole atu i le Atua e faamalolo o ia; sa tau lava o lona manao e fai le finagalo o le Atua. Sa ta’ua e lona faletua, o Colleen, o le uluai alaga a Iesu i le Faatoaga o Ketesemane o le, “Afai e mafai, ia ave ese lenei ipu ia te au.” O le taimi lena na fetalai atu ai le Faaola, “A e aua le faia lo’u loto, a olou finagalo.”14 Sa ia uunaia Elder Maxwell e mulimuli i le faataitaiga a le Faaola, ia ole atu mo le toomaga, ona tuuina atu lea o lona loto i le finagalo o le Atua, lea sa ia faia.15

I le mavae ai o le mafatia i togafitiga tuga, faavaivai loto mo le toeitiiti atoa le tausaga, sa ia toe foi mai ma le atoatoa “i le manuia.”Sa ia auauna mo le isi fitu tausaga.

Sa ou maua ni tofiga faatasi ma ia i le taimi o na tausaga mulimuli. Sa ou lagonaina le agalelei, agaalofa, ma le alofa. Sa ou molimauina lona faateleina o le faaleleiga faaleagaga e ala i lona mafatiaga faifai pea ma lana auaunaga e le aunoa, a o ia taumafai e avea e faapei o le Faaola.

O le faaa’oa’o lelei ma le faiaoga silisili ua avanoa mo i tatou uma, o lo tatou Alii ma le Faaola, o Iesu Keriso, o Le na fetalai mai, “O a’u nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au.”16 “Sau, mulimuli mai ia te au.”17

O’u uso e ma tuafafine talavou, o le iloaina o le Atua o le sailiga o le olaga atoa.“O le ola e faavavau foi lenei, ia [tatou] iloa … le Atua moni e toatasi, atoa ma le ua e auina mai [e le Tama], o Iesu Keriso lea.”18

“Tatou te lē o atu ea i lenei savali sili? … Lototele, [a’u uo talavou]; o atu pea, o atu pea i le manumalo!”19

E silafia outou e le Atua, ma valaaulia outou ia iloa o Ia. Tatalo i le Tama, suesue tusitusiga paia, saili e faia le finagalo o le Atua, taumafai e avea e faapei o le Faaola, ma mulimuli i faiaoga amiotonu. A o outou faia, o le a outou iloa le Atua ma Iesu Keriso, ma o le a outou maua le ola e faavavau. O la’u valaaulia lea ia te outou, i le avea ai ma se molimau ua faauuina mo i Laua. O loo soifua i Laua. E alolofa i Laua ia te oe. Ou te molimau atu ai i le suafa o Iesu Keriso, amene.