2010–2019
Teie ho’i te ora mure ’ore
’Ēperēra 2017


Teie ho’i te ora mure ’ore

’Ua ’ite te Atua ia ’outou ’e tē ani nei ’oia ia ’outou ’ia ’ite iāna.

E paraparau atu vau ia ’outou, te u’i ’āpī—te feiā ’āpī ’e te feiā ’āpī pa’ari, te ’ōtahi ’e tei fa’aipoipohia—’o ’outou te feiā fa’atere nō teie ’Ēkālesia a te Fatu ananahi. Nō te ’ino, te ti’arepu, te mata’u ’e te ta’a ’ore e vai nei i roto i te ao i teie mahana, e parau pāpū atu vau ia ’outou nō ni’a i te hanahana ari’i ’e te ha’amaita’ira’a ’ia ’ite i te Atua.

’Ua ha’api’i Iesu Mesia i e rave rahi parau mau e fa’ata’a ra i te fa’anahora’a a te Metua i te Ao ra nō tō tātou ’oa’oa nā reira ato’a tō tātou ti’ara’a i roto. E rōtahi au i ni’a i e piti o te reira nō te tauturu ia ’outou ’ia ta’a i tō ’outou hīro’a ’ei tamari’i nā te Atua ’e ’ia ’ite i tā ’outou i roto i te orara’a.

A tahi : « I aroha mai te Atua i tō te ao, ’e ’ua tae roa i te hōro’a mai i tāna Tamaiti fānau tahi, ’ia ’ore ’ia pohe te fa’aro’o iāna ra, ’ia roa’a rā te ora mure ’ore ».1

Te piti : « ’E teie ho’i te ora mure ’ore, ia ’ite rātou ia ’oe i te Atua mau ra, e ia Iesu i te Mesia i tā ’oe i tono maira ».2

E tāpe’a na i teie mau parau mau i roto i te ferurira’a—’o te ha’api’i nei i te nō te aha’a tāmata ai au i te fa’ata’a atu i te nāhea ’outou, ’e tātou pā’āto’a nei, e nehenehe e ’ite i te Atua.

’Ite iāna nā roto i te pure

E au mau hoa taure’are’a, e nehenehe e ha’amata i te ’ite i te Atua nā roto i te pure.

I te 7 nō ’ēperēra 1829, ’ua ha’amata te ta’ata ra Oliver Cowdery, 22 matahiti, i tāna ’ohipa ’ei pāpa’i parau nā Iosepha Semita, 23 matahiti. E mea ’āpī rāua—mai ia ’outou. ’Ua ani Oliver i te ha’apāpūra’a a te Atua nō ni’a i te Fa’aho’i-fa’ahou-ra’a ’e nō ni’a i tāna ’ohipa i roto. ’Ei pāhonora’a, ’ua fāri’i ’oia i teie heheura’a :

« Inaha, ’ua ’ite ’oe ē ’ua ani mai ’oe iā’u nei ’e ’ua ha’amāramarama vau i tō ’oe ferurira’a…

« ’Oia mau, tē fa’a’ite atu nei au ia ’oe na, ’ia ’ite ’oe ē ’o te Atua ana’e ’e aita atu tei ’ite i tō ’oe mau mana’o ’e te mau ’ōpuara’a o tō ’oe ’ā’au na…

« Mai te mea ’ua hina’aro ’oe i te tahi atu ā ’ite, ’a fa’aho’i i tō ’oe mana’o i te pō tā ’oe i ti’aoro mai iā’u i roto i tō ’oe ’ā’au…

« ’Aore ānei au i parau fa’ahau i tō ’oe ’ā’au… ? E aha atu ā te ’ite hau a’e i tei nō ’ō mai i te Atua ra ? »3

’Ia pure ’outou ma te fa’aro’o, e putapū mai ’outou i te here o te Atua ’a paraparau ai tōna Vārua i tō ’outou vārua. Noa atu tō ’outou mana’o ’ōtahi ’aore rā te mana’o pāpū ’ore i te tahi taime, ’aita ’outou e vai ’ōtahi noa i roto i teie ao. ’Ua ’ite te Atua ia ’outou iho. ’Ia pure ’outou, e riro ’outou i te ’ite iāna.

’Ite iāna nā roto i te tuatāpapara’a pāpa’ira’a mo’a

’Ia tuatāpapa ’outou i te mau pāpa’ira’a mo’a, ’aita ’outou e ha’api’i noa nei nō ni’a i te Fa’aora, e ’ite ato’a rā ’outou iāna.

I te ’āva’e ’ēperēra 1985, ’ua paraparau Elder Bruce R. McConkie i roto i te ’āmuira’a rahi—13 noa mahana hou ’a fa’aru’e mai ’oia i teie ao. Teie tōna ’itera’a pāpū i te hope’a o tāna a’ora’a :

« ’O vau te hō’ē o tāna mau ’ite, ’e i te hō’ē mahana i muri nei e fāfā ïa vau i te mau tāpa’o naelo i roto i tōna nau rima ’e i ni’a i tōna mau ’āvae ’e e fa’arari ïa vau i tōna ra ’āvae i to’u roimata.

« E’ita rā e rahi atu tō’u ’ite i taua taime ra i tō’u ’ite i teienei ē ’o ’oia te Tamaiti mana hope a te Atua, ’e ’o ’oia tō tātou Fa’aora ’e Tāra’ehara, ’e e tae mai te ora nā roto i tōna toto tāra’ehara ’e e’ita rā nā roto i te tahi ’ē atu rāve’a ».4

Rātou tei fa’aro’o ia Elder McConkie i paraparau i terā mahana, ’aita roa i mo’ehia te mana’o i putapū mai. I te ha’amatara’a o tāna a’ora’a, ’ua fa’a’ite mai ’oia nō te aha e mea pūai roa tōna ’itera’a pāpū. ’Ua parau ’oia ē :

« Nō te parau i teie nei mau mea māere, e fa’a’ohipa ïa vau i ta’u iho mau parau, penei a’e e mana’o ’outou ē e mau parau te reira nō te mau pāpa’ira’a mo’a…

« E parau mau ’ua fa’ahiti-mātāmua-hia te reira e vetahi ’ē, e mau parau rā te reira nā’u i teienei, nō te mea ’ua fa’aite mai te Vārua Mo’a o te Atua iā’u ē e parau mau te reira mau parau, ’e i teienei e au ra ē ’ua heheu mai te Fatu i te reira iā’u i te ha’amatara’a. Nō reira ’ua fa’aro’o vau i tōna reo ’e ’ua ’ite au i tāna parau.5

’Ia tuatāpapa ana’e ’outou ’e ’ia feruri ho’i i te mau pāpa’ira’a mo’a, e fa’aro’o ato’a mai ’outou i te reo o te Atua, e ’ite ’outou i tāna parau ’e e ’ite ai ’outou iāna. E fa’a’ite mai te Atua i tāna mau parau mau mure ’ore ia ’outou iho. E riro mai teie mau ha’api’ira’a tumu ’e te mau parau tumu ’ei tuha’a o ’outou ma te ’ana’ana mai mai tō ’outou vārua.

’Āpiti i te tuatāpapara’a a te ta’ata hō’ē, e mea faufa’a rahi te tuatāpapara’a pāpa’ira’a mo’a ’ei ’utuāfare.

I tō māua fare, ’ua hina’aro māua ’ia ha’api’i te mau tamari’i ’ia ’ite i te reo o te Vārua. Tē ti’aturi nei māua ē, ’ua tupu te reira ’a tuatāpapa ai mātou i te Buka a Moromona i te mahana tāta’itahi ’ei ’utuāfare. ’Ua pūai mai tō mātou ’itera’a pāpū ’a paraparau ai mātou nō ni’a i teie mau parau mau mo’a.

’Ua riro te tuatāpapara’a pāpa’ira’a mo’a ’ei rēni nō te Vārua nō te hōro’a mai i te hō’ē ha’api’ira’a ta’a ’ē ia mātou. ’Ia tuatāpapa ’outou i te mau pāpa’ira’a mo’a i te mahana tāta’itahi, ’outou ana’e ’e ’outou ’e te ’utuāfare, e ha’api’i mai ’outou ’ia ’ite i te reo o te Vārua ’e e ’ite mai ’outou i te Atua.

’Ite iāna nā roto i te ravera’a i tōna hina’aro

Ta’a ’ē noa atu te pure ’e te tuatāpapara’a pāpa’ira’a mo’a, tītauhia ’ia rave tātou i te hina’aro o te Atua.

’O te Fa’aora tō tātou hi’ora’a maita’i roa. ’Ua nā ’ō mai ’oia : « I pou mai nei ho’i au mai te ra’i mai e ha’apa’o i tō tei tono mai iā’u nei hina’aro, ’eiaha tō’u iho hina’aro ».6

I te fāra’a te Fa’aora tei ti’a fa’ahou mai i te mau ’āti Nephi, ’ua parau ’oia : « ’E inaha, ’o vau te māramarama ’e te ora o teie nei ao, ’ua oti ta’u inura’a i tā te ’ā’ua ’ava’ava i hōro’ahia mai e te Metua nā’u ra, ’ua fa’ahanahanahia ho’i te Metua nā roto i ta’u ravera’a i te hara o tō te ao nei i ni’a iho iā’u, i rave ai au i tō te Metua hina’aro i te mau mea ato’a mai te mātāmua mai ā ».7

E rave tātou i te hina’aro o te Metua ’a fa’atura ai tātou i tā tātou mau fafaura’a, ’a ha’apa’o ai i te mau fa’auera’a ’e ’a tāvini ai i te Atua ’e tō tātou ta’ata tupu.

Māua ta’u vahine ’o Rhonda, e ’ere tō māua nau metua i te ta’ata ta’a ’ē roa—mai tō ’outou ato’a paha ïa. Hō’ē rā mea tā māua e au nei ia rātou, ’ua fafau rātou i tō rātou ora i te tāvinira’a i te Atua, ’e ’ua ha’api’i mai ho’i ia māua ’ia nā reira ato’a.

I te fa’aipoipora’ahia nā metua o Rhonda, e piti matahiti, ’ua pi’ihia tōna metua tāne, 23 matahiti, ’ia tāvini i te hō’ē misiōni rave tāmau. Fa’aea noa mai nei tāna vahine ’e tā rāua tamāhine 2 matahiti. I muri iho, ’ua pi’ihia tāna vahine ’ia tāvini nā muri iāna nō te hitu ’āva’e toe o tāna misiōni—’ua fa’aea a’era tā rāua tamāhine ’e te tahi fēti’i.

Ma’a matahiti i muri mai, e maha atura ïa tā rāua tamari’i, ’ua haere rātou i Missoula (Montana) e noho ai, ’ia haere tōna metua tāne i te ha’api’ira’a teitei. Ma’a ’āva’e noa rā rātou i reira, tē pi’i mai nei te peresideni Spencer W. Kimball ’e Elder Mark E. Petersen i tō’u metua ho’ovai tāne ’ei peresideni mātāmua nō te titi ’āpī nō Missoula. E 34 matahiti noa tōna. ’Ua vaiihohia te ’ōpuara’a e haere i te ha’api’ira’a teitei ’a ’imi ai ’oia i te rave i te hina’aro o te Fatu—’eiaha rā tōna iho hina’aro.

Hau i te 30 matahiti tō tō’u nā metua tāvinira’a i roto i te hiero—tō’u metua tāne ’ei ta’ata tā’ati, ’e tō’u metua vahine ’ei rave ’ohipa nō te mau ’ōro’a. ’Ua tāvini ato’a rāua ’ei misiōnare rāve tāmau—i Riverside (California); i Ulaanbaatar (Mogolia); i Nairobi (Kenya); i te hiero nō Nauvoo (Illinois) ’e i te hiero nō Monterrey (Mehiko). I Mehiko ’ua rohi rāua nō te ha’api’i i te reo, ’aita i ’ōhie i te 80ra’a o tō rāua matahiti. ’Ua ’imi noa rā rāua i te rave i te hina’aro o te Fatu ’eiaha rā tō rāua iho hina’aro i te orara’a.

Ia rāua ’e i te feiā mo’a itoito ato’a mai ia rāua nā te ao ato’a nei, tē tāvevo nei au i te mau parau a te Fatu i te peropheta Nephi, te tamaiti a Helamana : « E ao tō ’oe… nō taua mau mea tā ’oe i rave ra… ma te itoito tu’utu’u ’ore… [inaha ’aita ’oe] i fa’aherehere i tō ’oe iho ora, ’ua tītau rā i tō’u hina’aro, ’e ’ua rave ho’i i tā’u ra mau fa’aue ».8

’A ’imi ai tātou i te rave i te hina’aro o te Atua ma te tāvini itoito iāna ’e tō tātou ta’ata tupu, e putapū tātou i tōna mana’o fāri’i ’e e ’ite mau tātou iāna.

’Ite iāna nā roto i te rirora’a mai iāna te huru

Tē parau mai nei te Fa’aora ē, te rāve’a maita’i mau nō te ’ite i te Atua, ’o te rirora’a ïa mai iāna te huru. ’Ua ha’api’i ’oia : « Nō reira, e aha tō ’outou huru e au ai ? ’Āmene, e parau atu vau ia ’outou, mai tō’u nei ïa ».9

E mea faufa’a rahi te vai-ti’amā-ra’a nō te riro mai iāna te huru. ’Ua fa’aue ’oia ē : « Ha’amo’a ia ’outou iho ; oia ïa, ’ia tāmā ho’i i tō ’outou mau ’ā’au, ’e ’ia hōroi tāmā ho’i i tō ’outou mau rima… ’ia ti’a iā’u nei ’ia tāmā atu ia ’outou na ».10 I te ha’amatara’a o te ’ē’a nō te rirora’a mai iāna te huru, e tātarahapa tātou ’e e fāri’i tātou i tāna fa’aorera’a hara ’e e tāmā ’oia i tō tātou vārua.

Nō te tauturu ia tātou ’a haere ai tātou i te Metua, ’ua hōro’a mai te Fatu i teie parau fafau : « ’O te mau vārua ato’a ’o te fa’aru’e i tāna mau hara ra ’e ’o te haere mai iā’u nei, ’e ’o te pi’i mai i tō’u nei i’oa, ’e ’o te ha’apa’o i tō’u nei reo, ’e ’o te ha’apa’o ho’i i ta’u mau fa’auera’a, e ’ite mai ïa i tō’u nei mata ’e e ’ite mai ho’i ē tē vai nei au ».11

Nā roto i te fa’aro’o i tāna tusia tāra’ehara, e tāmā te Fa’aora ia tātou, e fa’aora ia tātou ’e e fa’ati’a ho’i ia tātou ’ia ’ite iāna ma te tauturu ia tātou ’ia riro mai iāna te huru. ’Ua ha’api’i Moromona : « E pure atu i te Metua ma te pūai hope o te ’ā’au… ’ia riro ’outou ’ei tamari’i nā te Atua, ’e ’ia fā mai ’oia ra ’ua riro tātou mai iāna ra te huru ».12 ’Ia tūtava tātou i te riro mai te Atua te huru, e rahi atu ā tāna e fa’ariro ia tātou i tā tātou e nehenehe e rave.

’Ite iāna nā roto i te pe’era’a i te mau a’o

Nō te tauturu ia tātou i roto i tā tātou tūtavara’a, ’ua hōro’a mai te Atua i te tahi mau ta’ata ’ei hi’ora’a ’e ’ei a’o. E paraparau atu vau nō te hō’ē tei riro ’ei hi’ora’a ’e ’ei a’o nō’u, ’o Elder Neal A. Maxwell. ’Ua ’imi tāmau noa ’oia e auraro i tōna hina’aro i te hina’aro o te Metua i roto i tāna tauto’ora’a e riro mai te Atua te huru.

Hau i te 20 matahiti i teienei, ’ua parau mai ’oia i tōna mau mana’o, nō ’ite-noa-hia a’enei ē e ma’i mariri ’aita’ata tōna. ’Ua nā ’ō mai ’oia : « ’Ua hina’aro vau e fa’aea i roto i te pupu, i teie pae ānei [o te pāruru] ’aore rā i te tahi. ’Aita vau i hina’aro e fa’aea i te hiti. ’Ua hina’aro vau e ha’uti ».13

I roto i terā mau hepetoma, ’ua ’ōtohe ’oia i te ani i te Atua e fa’aora iāna; tōna hina’aro, ’o te ravera’a ïa i te hina’aro o te Atua. ’Ua fa’aha’amana’o tāna vahine ’o Colleen ē, i roto i te ’ō nō Getesemane, ’ua pi’i nā mua Iesu : « I ti’a ra, e hōpoi ’ē atu i teie nei ’āu’a ». I reira noa te Fa’aora i te paraura’a ē : « ’Ia tupu rā tō ’oe hina’aro, ’eiaha tō’u ».14 I fa’aitoito ai ’oia ia Elder Maxwell ’ia pe’e i te hi’ora’a o te Fa’aora, e ani i te tāmarūra’a ’ei reira e auraro i tōna hina’aro i te hina’aro o te Atua, ’o tāna ïa i rave.15

Fātata hō’ē matahiti ’oia i te māuiuira’a i te rapa’aura’a rahi ’e te ha’aparuparu ē ’ua ora roa mai ’oia e ’ua ho’i roa mai « i roto i te ha’uti ». Hitu fa’ahou matahiti tōna tāvinira’a.

E rave rahi taime au i nā muri iāna i terā mau matahiti nō muri iho. ’Ua putapū vau i tōna maita’i, tōna aumihi ’e tōna here. ’Ua ’ite roa vau i tōna ha’amaita’ira’a pae vārua i roto i tōna mau māuiui tāmau ’e tāna tāvinira’a ’a tūtava noa ai ’oia i te riro mai te Fa’aora te huru.

Te ta’ata rahi hope ’ei hi’ora’a ’e ’ei a’o e vai ra nō tātou pā’āto’a, ’o tō tātou ïa Fatu ’e Fa’aora, ’o Iesu Mesia, tei parau ē : « ’O vau te ’ē’a, ’e te parau mau ’e te ora : ’aore roa e ta’ata e tae i te Metua ra, maori rā, ’ei iā’u ».16 « ’A haere mai ’a pe’e mai iā’u ».17

E au mau taea’e, e au mau tuahine taure’are’a, e ’imira’a nō te orara’a tā’āto’a te ’itera’a i te Atua. « Teie ho’i te ora mure ’ore, ’ia ’ite [tātou]… i te Atua mau ra, e ia Iesu i te Mesia i tā [te Metua] i tono maira ».18

« E ’ere ānei i te mea ti’a ia tātou ’ia haere ā i roto i te hō’ē ’ohipa rahi roa mai teie te huru ? ’A rohi, e au mau [hoa taure’are’a] ; ’a haere ā, ’a haere ā ē tae noa atu i te taime e upo’oti’a ai ra ! »19

’Ua ’ite te Atua ia ’outou ’e tē ani nei ’oia ia ’outou ’ia ’ite iāna. ’A pure i te Metua, ’a tuatāpapa i te mau pāpa’ira’a mo’a, ’a ’imi i te hina’aro o te Atua, ’a tūtava ’ia riro mai te Fa’aora te huru ’e ’a pe’e i te mau ta’ata a’o parau ti’a. ’A nā reira ai ’outou, e riro ’outou i te ’ite i te Atua ’e ia Iesu Mesia, ’e e fāri’i ’outou i te ora mure ’ore. ’O teie ta’u anira’a ia ’outou ’ei ’ite ta’a ’ē fa’atōro’ahia nō rāua. Tē ora nei rāua. ’Ua here rāua ia ’outou. Tē fa’a’ite pāpū nei au i te reira, i te i’oa o Iesu Mesia, ’āmene.