Blong Kam wan Disaepol blong Lod Jisas Kraes

?I minim wanem blong kam wan disaepol blong Lod Jisas Kraes? Wan disaepol i wan we i bin baptaes mo i glad long hat blong tekem long hemwan nem blong Sevya mo folem Hem. Wan disaepol i traehad blong kam olsem Hem taem hem i obei long ol komanmen blong Hem long laef ia, semmak olsem wan man blong lan we i wantem blong kam olsem masta blong hem.

Plante pipol oli harem toktok ia disaepol mo oli ting se i minim nomo “man blong folem.” Be wan tru disaepol i wan wei blong laef. Hemia i minim moa bitim blong stap stadi mo praktisim wan lis blong ol fasin. Ol disaepol oli laef blong mekem se ol fasin blong Kraes, oli wivim olgeta insaed long ol string blong bodi blong olgeta, mo i olsem wan mat long saed blong spirit.

Lisin long invitesen blong Aposol Pita blong kam wan disaepol blong Sevya:

“Yufala i mas traehad blong mekem fasin blong yufala i kam gud moa. Yufala i gat fasin blong bilif finis, ale yufala i mas soemaot bilif ya long ol fasin we i stret. Mo taem yufala i stap mekem ol fasin we i stret, ale yufala i mas soemaot we yufala i gat save.

“Mo taem yufala i kasem save ya finis, ale yufala i mas soemaot we yufala i save blokem ol samting we yufala nomo i wantem. Mo taem yufala i save mekem olsem, ale yufala i mas soemaot we yufala i gat paoa blong holem wok long taem. Mo taem yufala i gat paoa blong holem wok longtaem, ale yufala i mas soemaot samting ya long fasin ya we yufala i stap mekem ol samting we God i wantem.

“Mo taem yufala i stap mekem ol samting we God i wantem, ale yufala i mas soemaot we yufala i lavem ol brata blong yufala. Mo taem yufala i stap lavem ol brata blong yufala, ale yufala i mas soemaot we yufala i lavem olgeta man.”¹

Olsem we yu save luk, blong wivim mat ia long saed blong spirit blong stap wan disaepol, i nidim moa bitim wan tret. Long ol dei blong Sevya, i gat plante oli talem se oli stret mo gud long wan o nara pat blong laef blong olgeta. Oli bin praktisim wanem we mi singaotem jusum wanem yu wantem obei folem. Eksampol, oli kipim komanmen blong no wok long Sabat, be oli talem nogud Sevya from Hem i hilim man long tabu dei ia.² Oli givim ol [ofring] be i no evriwan long ol pua man—wanem we olgeta oli no nidim.³ Oli livim kaekae wetem ol fes we i nogud.⁴ Oli prea blong man i luk olgeta.⁵ Jisas i talem, “Ol man ya oli stap talem se oli stap mekem wosip long mi, be ol tok ya blong olgeta i blong nating nomo, tingting blong olgeta i stap longwe tumas long mi.”⁶ Ol kaen man o woman olsem oli save lukluk nomo blong kam gud long wan fasin o aksen be insaed long hat blong olgeta, oli no kam nating olsem Kraes.

From ol samting ia, Jisas i talem:

“Long lasdei bambae, plante man oli save singaot long mi se, Masta, Masta. Long nem blong yu, mifala i talemaot ol tok we God i givim long mifala. Mo long nem blong yu mifala i ronemaot plante devel. Mo long nem blong yu, mifala i mekem plante merikel. ?Olsem wanem long mifala?’

“Be bambae mi mi talem stret long fes blong olgeta se, Neva mi mi save yufala. Yufala i man blong mekem ol rabis fasin, yufala i gowe long mi.”⁷

Ol fasin blong Sevya, taem yumi luksave, oli no wan pepa blong rid blong folem o wan lis blong wok blong komplitim. Oli ol impoten fasin, we oli ademap wan afta long narawan, we oli gro insaed long yumi long wan wei we oli joen tugeta. Long nara toktok, yumi no save kasem wan fasin nomo olsem hemia blong Kraes mo no save kasem ol narawan tu. Taem yumi kam gud moa wetem wan fasin, bae yumi save kam gud moa wetem plante narafala wan.

Long Seken Pita mo long Doktrin blong ol Kavenan seksen 4, yumi lanem se fet long Lod Jisas Kraes hem i fandesen. Yumi makem fet blong yumi long wanem i lidim yumi blong mekem—tru long fasin blong yumi blong obei. “Sapos bae yufala i gat fet long mi,” Lod i promes, “bae yufala i gat paoa blong mekem eni samting we i gat nid long plan blong mi.”⁸ Fet i wan rod blong jenis. Sapos i no gat wok, i nogat laef long klin fasin, fet blong yumi i nogat paoa blong wekemap fasin blong stap olsem wan disaepol. I tru, fet i ded.⁹

Mo afta, Pita i eksplenem, “ademap long fet blong yu klin fasin.” Klin fasin ia i moa bitim blong stap klin long saed blong seks. Hem i blong kam klin mo tabu long maen mo bodi. Klin fasin i paoa tu. Taem yumi fetful mo laef folem gospel, bae yumi gat paoa blong stap klin long evri tingting, filing mo aksen. Ol maen blong yumi i kam moa klia long voes blong Tabu Spirit mo long Laet blong Kraes.¹⁰ Yumi no ripresentem Kraes nomo long wanem yumi talem mo mekem be tu long huia yumi.

Pita i gohed, “ademap long klin fasin blong yu, save.” Taem yumi laef long klin fasin, yumi kam blong save Papa blong yumi long Heven mo Pikinini blong Hem long wan spesel wei. “Mo sipos wan man i tingting strong blong mekem ol samting we God i wantem, hem bambae i faenemaot se tok ya blong mi i kamaot long God, no i kamaot long mi nomo.”¹¹ Save ia i testemoni blong wanwan man, we i bin kamaot tru long wan eksperiens. Hem i save ia we i jenisim yumi, blong mekem se “laet i folem laet blong [Hem]” mo “klin fasin blong yumi i lavem klin fasin blong [Hem] .”¹² Tru long laef wetem klin fasin blong yumi, yumi statem rod long “mi biliv” i go long “mi save.”

Pita i askem yumi blong ademap “disiplin long save; mo fasin blong wet longtaem long disiplin.” Olsem wan disaepol wetem disiplin, yumi laef folem gospel long wei we i stret mo i no muvmuv. Yumi no nid “blong ron moa kwik bitim paoa we [yumi gat].”¹³.” Evri dei yumi muv i go fored wetem ol strong jalenj blong wol ia.

Blong blokem ol samting we yumi nomo i wantem olsem, yumi developem fasin blong save wet longtaem mo tras long Lod. Yumi save dipen long plan blong Hem long laef blong yumi, nomata we yumi no save luk wetem ol ae blong yumi wanwan.¹⁴ From samting ia, yumi save “stap kwaet mo save se, [Hem i] God.”¹⁵ Taem yumi stap fesem ol hadtaem, yumi askem, “?Wanem yu wantem mi lanem long eksperiens ia?” Wetem plan mo stamba tingting blong Hem long hat blong yumi, yumi muv fored nomo blong go tru long evri samting be tu blong go tru long olgeta wetem longfala tingting mo go tru gud.¹⁶

Fasin ia blong save wet longtaem, Pita i tijim, se i lidim yumi blong kasem fasin blong God. Olsem Papa we i gat fasin blong save wet longtaem wetem yumi, ol pikinini blong Hem, bae yumi kam blong gat fasin blong save wet longtaem wetem wanwan long yumi mo long yumiwan. Yumi glad long joes blong ol narawan mo long janis we i mekem olgeta blong gro “tijing folem tijing,”¹⁷ “bae i saen gud mo i saen moa gud bakegen kasem dei we i stret gud evriwan i kam.”¹⁸

Long fasin blong blokem ol samting blong yumi wan i go long fasin blong save wet longtaem mo long fasin blong save wet longtaem i go long fasin blong God, i jenisim fasin blong yumi. Yumi kasem bigfala kaen fasin we i wan stret mak blong evri tru disaepol. Olsem man Sameria, yumi krosem rod blong givhan long eniwan we i stap long nid, nomata sapos oli no stap insaed long grup blong ol fren blong yumi.¹⁹ Yumi lavem ol enemi blong yumi mo prea from olgeta we oli stap mekem nogud tumas long yumi.²⁰ ?I gat eni fasin we i moa olsem blong God o moa olsem blong Kraes?

Mi testifae se hadwok we yumi mekem blong kam ol disaepol blong Sevya blong yumi, i tru se oli ademap paoa long hem kasem taem we yumi “gat long yumi” lav blong Hem.²¹ Lav ia i impoten fasin ia nao blong wan disaepol blong Kraes:

“Sipos mi gat paoa blong tok long ol lanwis blong ol man mo blong ol enjel tu, be mi no lavem man, bae mi olsem wan bigfala tamtam o olsem wan bel we i stap krae blong nating.

“Sipos mi gat paoa blong talemaot ol tok we God i givim…mo kasem olgeta save mo olgeta tok we God i haedem, …mo bilif we i naf blong mi save seftem ol bigbigfala hil…mo mi no lavem man, mi olsem nating nomo.”²²

Mo fet, hop, mo bigfala hat mo lav bae i mekem hem i naf long wok ia.²³ “Naoia holemtaet…i gat tri, be [bigfalawan long olgeta i bigfala hat mo lav].”²⁴

Ol brata mo sista. Naoia bitim oltaem, !yumi no save stap olsem wan “disaepol blong smol taem”! Yumi no save stap wan disaepol long wan poen blong doktrin nomo o wan narawan. Grup blong ol fasin we i kamaot long yumi tru long fet long Kraes—wetem olgeta we yumi bin tokbaot tedei—evriwan oli impoten long fasin blong yumi blong stanap strong long ol las dei ia.

Taem yumi traehad blong stap ol tru disaepol blong Jisas Kraes, ol fasin ia bae oli wivim olgeta wanples, oli ademap paoa long olgeta mo oli kam strong insaed long yumi. Bae i no save gat fasin blong stap kaen long ol enemi blong yumi mo defren kaen fasin we yumi gat long ol fren blong yumi. Bae yumi stap ones taem i no gat man i stap lukluk semmak olsem we taem ol narawan oli stap lukluk. Bae yumi stap tru long God long pablik semmak olsem taem yumi stap long praevet rum blong yumi.

Mi testifae se evriwan i save kam wan disaepol blong Sevya. Fasin blong stap disaepol i no folem yia, sapos yu wan man o woman, aedentiti, o koling blong yu. Tru long wanwan fasin blong yumi blong stap disaepol, yumi, olsem ol Lata-dei Sent, yumi bildimap wan joen paoa blong blesem ol brata mo sista blong yumi raon long wol. Naoia i taem blong komitim yumiwan bakegen blong stap ol disaepol blong Hem wetem fasin blong wok strong wetem strong tingting.

Ol brata mo sista, oli singaotem yumi blong stap ol disaepol blong Sevya blong yumi. Mekem konfrens ia i janis blong yu blong “stat semmak olsem bifo, mo kam long [Hem] wetem ful hat blong yu.”²⁵ Hemia i Jos blong Hem. Mi serem spesel witnes blong mi se Hem i stap laef. Bae Hem i blesem yumi long misin blong yumi we i no save finis we hem i blong kam wan disaepol we i givim hem fulwan mo i stap tru. Long nem blong Jisas Kraes, amen.