Yaco Mo Tisaipeli ni Noda Turaga o Jisu Karisito

Na cava na ibalebale mo dua na tisaipeli ni noda Turaga o Jisu Karisito? Na tisaipeli sai koya e dua sa papitaiso ka sa lomana me taura vua na yaca ni iVakabula ka muri Koya. Ena sasagataka o tisaipeli me sa vakataki Koya ena nona maroroya na Nona ivakaro ena bula oqo, me vaka ga e dua e vuli cakacaka me laki vakataki nona qasenivuli.

E vuqa na tamata era rogoca na vosa tisaipeli ka nanuma ni kena ibalebale ga na “dauvakamumuri.” Ia na bula vakatisaipeli dina sai koya na ivakarau ni bula. Oqo e tukuna tiko ni sega walega ni vuli se vakayacora e dua na lisi ni ivakarau ni tamata yadua. Era bula tiko na tisaipeli me rawa ni solega na itovo i Karisito na nodra gacagaca ni bula, me dua na isulu vakayalo.

Rogoca na veisureti oqo nei Pita na iApositolo meda sa dua na tisaipeli ni iVakabula:

“Dou gumatua vakalevu sara kina, mo dou vakaikuritaka na nomudou vakabauta ena ivalavala vinaka; kei na ivalavala vinaka ena vuku;

“Kei na vuku ena ivalavala malua; kei na ivalavala malua ena vosota; kei na vosota ena daulotu;

“Kei na daulotu ena veilomani vakaveitacini; kei na veilomani vakaveitacini ena yalololoma.”¹

Ko ni sa raica tiko, ni culai vata na isulu vakayalo ni nomu bula vakatisaipeli ena sega ni gadrevi kina e dua ga na wa ni culacula. Ena gauna ni iVakabula, e vuqa era sa tukuna tiko ni ra sa bula dodonu ena dua se so tale na ituvaki ni nodra bula. Era cakava tiko na ka au vakatoka me talairawarawa vakaidigidigi. Me ivakaraitaki, era muria na ivakaro me ra kakua ni cakacaka ena Siga ni Vakacecegu ia era vakalewa na iVakabula ni a veivakabulai ena siga tabu o ya.² Era soli loloma vei ira na dravudravua ia era solia ga na kena vo—na ka era sega ni gadreva me nodra.³ Era lolo ia ena vakaveveku mata.⁴ Era masu ia me raici ira ga na tamata.⁵ E kaya o Jisu, “Ni ra sa toro voleka vei au ko ira na tamata oqo e na gusudra, ia na yalodra era sa vakayawataka vei au.”⁶ Ira na tagane kei na yalewa vakaoqo era na rairai raicamatua e dua na ivakarau se ivalavala ia era sega ni yaco me vakataki Koya e yalodra.

Ena ka oqo, a kaya kina o Jisu:

“Era na lewevuqa ena kaya vei au e na siga ko ya, Kemuni na Turaga, na Turaga, keimami a sega li ni vakavuvuli e na yacamuni? Ka vakasevi ira na tevoro e na yacamuni? Ka kitaka na caka mana e vuqa ena yacamuni?

“Ia kau na qai tukuna vei ira, Au sa sega sara ni kilai kemudou: dou lako tani vei au, koi kemudou sa daukitaka na ivalavala ca.”⁷

Na ivakarau ni iVakabula, ni da vakasamataka, era sega ni ivola me vakamuri se lisi me vakacavari yani. Era sa ivakarau vei curumaki, e vakuri ki na dua tale, e tubu tiko e lomada ena sala veisemati eso. Kena ibalebale, eda na sega ni rawa meda rawata e dua na ivakarau sa va-Karisito vakavo ke da rawata ka vakauqeti na kena vo. Ni yaco me qaqaco mai e dua na ivakarau, sa na yaco vakakina e vuqa tale.

Ena 2 Pita vakakina ena wase 4 ni Vunau kei na Veiyalayalati, eda vulica ni vakabauti Jisu Karisito sa kena yavu. Eda na vakarautaka na noda vakabauta ena veika e muataki keda meda cakava—ena noda talairawarawa. “Kevaka dou sa vakabauti au,” a yalataka na Turaga, “dou na rawata na kaukauwa mo dou kitaka kina na ka kecega sa kilikili vei au.”⁸ Na vakabauta e dua na ivurevure. Ni sega na cakacaka, sega kina na bula dodonu, sa na sega na kaukauwa ena noda vakabauta meda bula kina vakatisaipeli. Sa dina sara, sa na mate na vakabauta.⁹

Sa qai, vakamacalataka o Pita, “Vakaikuritaka na nomudou vakabauta enai valavala vinaka.” Na ivalavala dodonu e sega wale ga ni tiko savasava. Sai koya na savasava kei na bula vakalou ena vakasama kei na yago. Na ivalavala dodonu talega sa kaukauwa. Ni da bulataka na kosipeli ena yalodina, sa na tu vei keda na kaukauwa meda valavala dodonu ena noda vakasama, yaloda, kei na ivalavala kecega. Sa yaco na noda vakasama me rogoca vagumatua na veivakauqeti ni Yalo Tabu kei na Rarama i Karisito.¹⁰ Eda sa sulumi Karisito sega walega ena noda vosa kei na cakacaka ia ki na noda ituvaki dina talega.

E tomana o Pita, “Kei na [nomu] ivalavala vinaka, ena vuku.” Ni da bulataka e dua na bula dodonu, eda na kila na Tamada Vakalomalagi kei na Luvena ena sala digitaki. “Kevaka e dua na tamata sa via cakava na loma [i Tamada], ena kila se sa ka mai vua na Kalou na ivakavuvuli.”¹¹ Na kila-ka oqo sa ivakadinadina ni tamata yadua, sucu mai na veika e sotavi. Sai koya na kila-ka e veisautaki keda, me rawa ki na noda “rarama sa sala vata ga kei na [Nona] rarama” kei na noda “ivalavala savasava ena taleitaka ga na [Nona] ivalavala savasava.”¹² Mai na noda bula dodonu tiko, eda lakova yani na ilakolako mai na “Au vakadinata” ki na icavacava lagilagi ni “Au kila.”

Sa vakamasuti keda o Pita meda vakuria “na vuku enai valavala malua; kei na ivalavala malua e na vosota.” Ni da sa tisaipeli dauvosota, eda na bulataka na kosipeli ena sala tuvaki donu ka tudei. Eda na sega ni “cici vakatotolo cake mai na kaukauwa sa tu [vei keda].”¹³ Ena veisiga yadua eda na toso ki liu, ka da sega ni vakataotaki ena ibolebole vovou ni bula oqo.

Ni da vosota ena sala vakaoqo, eda na tauyavutaka kina na yalomalua kei na vakararavi vua na Turaga. Eda sa rawa ni vakararavi ki na Nona ituvatuva ni noda bula, dina ga ni da sega ni raica rawa ena matada vakayago.¹⁴ O koya gona, sa rawa meda “tiko lo [meda] kila ni sa Kalou [o Koya].”¹⁵ Ni da sotava na cagilaba ni veika dredre, eda na taroga, “Na cava beka ko ni vinakata meu vulica mai na ka oqo?” Ni sa tu e yaloda na Nona ituvatuva, eda na toso ki liu sega walega ni da vosota na veika kecega ia meda vosota ena yalomalua kei na vinaka.¹⁶

Na vosota oqo, e vakavulica tiko o Pita, ena muataki keda ki na bula sa vakalou. Me vaka sa dau vosoti keda tikoga na Tamada, oi keda na Luvena, eda na yaco meda yalomalua vei ira na tani kei keda yadua. Eda marautaka na nodra bula galala eso kei na madigi me rawa ni ra tubu cake kina ena “vunau ena vunau,”¹⁷ “ena tubu cake tikoga na nona rarama me yacova na siga uasivi ko ya.”¹⁸

Mai na yalomalua ki na vosota, mai na vosota ki na bula sa vakalou, sa veisau na noda ivakarau. Eda sa rawata na loloma ni veitacini ni sai koya oqo na usutu ni tisaipeli dina taucoko. Me vakataka na kai Samaria Vinaka, eda takoso yani ki gaunisala meda qarava o cei ga sa sotava na leqa, ke ra sega mada ga ni noda itokani.¹⁹ Eda na vakalougatataki ira era vosacataki keda. Eda na caka vinaka kivei ira era sa vakalialiai keda.²⁰ E dua beka na ivakarau e vakalou se va-Karisito cake?

Au vakadinadinataka ni sasaga eda cakava meda tisaipeli kina ni noda iVakabula sa vakuri vakaidina me yacova ni sa “tu vei keda” na Nona loloma.²¹ Na loloma oqo sa ivakarau dina ni tisaipeli i Karisito:

“Ia kevaka kau sa vosataka na nodra dui vosavosa na tamata kei na vosa ni agilosi, ka sega vei au na loloma, au sa vaka walega na kaukamea sa rorogo, se na lali sa tataqiriqiri.

“Ia kevaka kau sa parofisai rawa, ka kila talega na ka kecega sa vuni, kei na vuku kecega, ia kevaka sa tu vei au na vakabauta kecega, meu kauta tani kina na veiulunivanua, ka sega vei au na loloma, au sa ka walega.”²²

Ia na vakabauta, inuinui, kei na loloma sa vakadonui kina meda cakava na cakacaka ni Kalou.²³ “Ia oqo sa tu … a ka tolutolu oqo; a sa uasivi cake vei iratou na loloma.”²⁴

Kemuni na taciqu kei na ganequ, sa gadrevi vakalevu cake sara, meda sa kakua ni “tisaipeli vagauna”! Eda sa sega ni rawa meda tisaipeli ni dua walega na tiki ni vunau se dua tale. Na vakasoqoni vata ni ivakarau e wavolita na vakabauti Karisito—oka kina na kena eda sa veivosakitaka nikua—sa ka yaga sara meda tucake qaqa tiko kina ena iotioti ni gauna oqo.

Ni da sasaga vakaidina tiko meda tisaipeli i Jisu Karisito, ena yaco me semati vata na ivakarau oqo, vakuri, ka na vaqaqacotaki keda vakalomavata. Ena sega na duidui ena mataqali loloma eda vakaraitaka vei ira na noda meca kei na loloma eda cakava vei ira na noda itokani. Eda na dau dina tiko ni sega e dua e raici keda vakakina ni ra raici keda na tamata. Eda na yalodina sara vua na Kalou ena veitikotiko raraba vakakina ena noda loqi vakatikitiki.

Au vakadinadinataka ni da rawa ni tisaipeli kece ni iVakabula. Na bula vakatisaipeli e sega ni yalani ena yabaki ni bula, tagane se yalewa, se yavu ni kawatamata se veikacivi vakalotu. Mai na noda dui bula vakatisaipeli, eda sa tara cake, oi keda na Yalododonu Edaidai, e dua na kaukauwa umanaki vata meda vakalougatataki ira kina na tacida kei na ganeda e vuravura raraba. Oqo na gauna meda yalataki keda tale meda sa Nona tisaipeli ena gugumatua kece.

Kemuni na taciqu kei na ganequ, eda sa kacivi kece meda sa tisaipeli ni noda iVakabula. Me sa yaco na koniferedi oqo me nomuni madigi ni “tekivu me vaka ena gauna e liu ka lako [Vua] na Turaga ena lomamudou taucoko.”²⁵ Oqo na Nona Lotu. Sa noqu ivakadinadina oqo ni sa bula tiko o Koya.” Me sa qai vakalougatataki keda o Koya ena noda vakasaqaqara tawamudu meda yaco kina meda yalodina ka qaqa na noda bula vakatisaipeli. Ena yacai Jisu Karisito, emeni.