Kev Hloov Los Ua tus Pab Coj ntawm Peb tus Tswv Yexus Khetos

Kev ua ib tug pab coj ntawm peb tus Tswv Yexus Khetos txhais li cas? Ib tug pab coj yog ib tug uas tau ua kev cai raus dej thiab txaus siab ris tus Cawm Seej lub npe thiab coj raws li Nws. Ib tug pab coj siv zog hloov los ua neeg zoo li Nws los ntawm kev ua raws li Nws cov lus txib hauv lub neej no, ib yam li ib tug neeg xyaum ua hauj lwm xav hloov los ua neeg zoo li nws tus xib hwb.

Ntau tus neeg hnov lo lus pab coj ces lawv xav tias txhais li ntawd xwb. Tiam sis kev ua ib tug pab coj yeej yog ib yam nyob hauv yus lub siab lub ntsws. Qhov no qhia tias yog yus kawm ntawv thiab coj tej cwj pwm xwb ces ntshe tsis txaus. Cov pab coj yeej ua neej kom Khetos tej cwj pwm nkag rau hauv lawv lub siab lub ntsws, zoo li tau muab tej txoj xov ntos ua ke ua ib daim ntaub ntawm sab ntsuj plig.

Cia li mloog tus Thwj Tim Petus tej lus caw kom ua tus Cawm Seej ib tug pab coj.

“Nej yuav tsum muab siab rau ua tej hauj lwm zoo; nej ua hauj lwm zoo lawm, nej yuav tsum muaj tswv yim;

“Nej muaj tswv yim lawm, nej yuav tsum tswj nej lub siab; nej tswj nej lub siab lawm, nej yuav tsum ua siab ntev; nej ua siab ntev lawm, nej yuav tsum ua nej lub neej kom haum Vajtswv siab;

“Nej ua haum Vajtswv siab lawm, nej yuav tsum sib hlub li kwv tij sib hlub; nej sib hlub li kwv tij sib hlub lawm, nej yuav tsum sib hlub li cov ntseeg sib hlub.”¹

Raws li nej pom, yuav tsum muaj tshaj ib txoj xov xwb yog tias yus xav ntos daim ntaub ntawm sab ntsuj plig los ua ib tug pab coj. Nyob hauv tus Cawm Seej lub caij nyoog, muaj ntau tus uas hais tias lawv ua neej ncaj ncees. Lawv xaiv kom ua raws li ib txhia ntawm Vajtswv cov lus txib xwb. Piv txwv hais tias, lawv ua raws li lo lus txib kom tsis ua hauj lwm thaum Hnub Caiv tiam sis lawv cem tus Cawm Seej vim nws kho neeg mob thaum tib hnub ntawd.² Lawv pub nyiaj txiag rau cov neeg pluag tiam sis pub qhov tshaj xwb—tej yam uas lawv tsis xav tau rau lawv tus kheej.³ Lawv yoo mov tiam sis ua ntsej muag mluas mlob xwb.⁴ Lawv thov Vajtswv tiam sis xav kom tib neeg pom lawv ua xwb.⁵ Yexus hais tias, “Cov neeg no lub qhov ncauj hwm kuv, tiam sis lawv lub siab tsis npuab kuv.”⁶ Cov txiv neej thiab cov poj niam tej zaum tsom ntsoov rau ib tug cwj pwm los yog ib tug yam ntxwv xwb tiam sis lawv tsis hloov los ua neeg zoo li Nws nyob hauv lawv lub siab.

Hais txog cov zoo li no, Yexus hais tias:

“Thaum txog hnub ntawd yuav muaj ntau leej hais rau kuv hais tias, tus Tswv, tus Tswv, peb twb tuav koj lub npe qhia Vajtswv Txoj Lus peb tuav koj lub npe ntiab dab? thiab ua ntau yam txuj ci tseem ceeb?

“Thaum ntawd kuv yuav hais rau lawv hais tias, Cov neeg siab phem, cia li khiav mus, kuv tsis paub nej.”⁷

Tus Cawm Seej tej cwj pwm, raws li peb pom, tsis yog ib zaj uas peb yuav tsum mloog los yog ib daim ntawv uas sau tej yam kom ua tiav. Nws tej cwj pwm yeej yog tej yam uas ntos ua ke, ib tug ntxiv rau ib tug, es ib tug txhawb nqa ib tug. Los yog hais tias, yog peb coj raws li ib tug cwj pwm zoo li Khetos tiag tiag ces peb yeej yuav coj raws li tej cwj pwm ntxiv. Thaum ib tug cwj pwm muaj zog tuaj, ces lwm tus cwj pwm kuj muaj zog tuaj.

Nyob hauv 2 Petus thiab nyob hauv Lus Qhuab Qhia thiab Kev Khi Lus tshooj 4, peb kawm hais tias kev ntseeg tus Tswv Yexus Khetos yog lub hauv paus. Peb ntsuas peb txoj kev ntseeg los ntawm tej uas peb ua—los ntawm peb txoj kev mloog lus. Tus Tswv cog lus hais tias, “Yog nej yuav muaj kev ntseeg kuv nej yuav muaj hwj chim ua tau txhua yam uas kuv xav tias tsim nyog ua.”⁸ Kev ntseeg yog qhov pib. Yog tsis ua dab tsi, yog tsis ua neej coj dawb huv, peb txoj kev ntseeg tsis muaj hwj chim ua ib tug pab coj. Muaj tseeb tiag, kev ntseeg tsis muaj sia.⁹

Yog li ntawd, Petus piav hais tias, “Nej muaj kev ntseeg lawm, nej yuav tsum tsim txiaj.” Kev tsim txiaj tsis yog hais txog kev sib deev xwb. Yog kev coj dawb huv ntawm yus lub siab thiab lub cev. Kev tsim txiaj kuj yog lub hwj chim. Thaum peb rau siab ntseeg ua raws li txoj moo zoo, peb yuav muaj hwj chim ua neeg tsim txiaj ntawm txhua txoj kev xav thiab tej yam peb ua. Peb lub siab yuav haj yam txawj mloog tus Vaj Ntsuj Plig Dawb Huv tej kev tshoov siab thiab Khetos txoj Kev Kaj.¹⁰ Peb coj raws li Khetos tsis yog los ntawm tej yam peb hais xwb tiam sis los ntawm qhov uas peb yog neeg zoo li cas thiab.

Petus hais ntxiv hais tias, “Nej tsim txiaj lawm, nej yuav tsum muaj kev txawj ntse.” Thaum peb ua neej tsim txiaj, peb los paub peb Leej Txiv Saum Ntuj Ceeb Tsheej thiab Nws Leej Tub zoo ntxiv. “Yog leej twg txaus siab ua raws li [Leej Txiv] lub siab nyiam, tus ntawd yuav paub hais tias tej lus uas kuv qhia no yog Vajtswv kom kuv hais.”¹¹ Tej kev txawj ntse no yog ib zaj lus tim khawv, uas yus hais los ntawm yus tus kheej. Yog kev txawj ntse uas hloov peb lub siab xwv kom qhov kaj npuab rau Nws qhov kaj thiab peb txoj kev tsim txiaj nyiam Nws txoj kev tsim txiaj.¹² Thaum peb ua neej tsim txiaj, peb hloov qhov uas peb hais tias, “Kuv ntseeg” rau qhov uas peb hais tias, “Kuv paub.”

Petus ntuas hais tias “nej muaj kev txawj ntse lawm, nej yuav tsum tswj nej lub siab; thiab nej tswj nej lub siab lawm, nej yuav tsum ua siab ntev.” Thaum peb yog cov pab coj uas tswj peb lub siab, peb ua raws li txoj moo zoo ruaj nrees. Peb tsis khiav ceev tshaj peb muaj zog khiav.¹³ Ib hnub dhau ib hnub peb mus tom ntej, tsis cia tej teeb meem ntawm lub neej no tab kaum peb.

Thaum peb tswj peb lub siab li no, peb haj yam ua siab ntev thiab tso siab rau tus Tswv. Peb txawj tso siab rau Nws txoj hau kev rau peb lub neej, txawm yog peb qhov muag ntawm sab cev nqaij daim tawv pom tsis taus.¹⁴ Yog li ntawd, peb nyob ntsiag to thiab paub tias Nws yog Vajtswv.¹⁵ Thaum peb raug kev tsim txom, peb nug hais tias, “Koj xav kom kuv kawm dab tsi los ntawm qhov no?” Thaum peb muaj Nws txoj hau kev thiab tej lub hom phiaj nyob hauv peb lub siab, peb mus tom ntej thiab nyiaj txhua yam thiab txaus siab ua siab ntev nyiaj txhua yam.¹⁶

Kev ua siab ntev, Petus qhia hais tias, ua rau peb ua neeg zoo li Vajtswv. Ib yam li Leej Txiv ua siab ntev rau peb, Nws cov me nyuam, peb ib leeg yuav tsum ua siab ntev rau ib leeg thiab ua siab ntev rau peb tus kheej. Peb zoo siab uas lwm tus muaj kev ywj siab xaiv thiab lub cib fim uas lawv muaj kom loj hlob tuaj ib nqe lus ntxiv rau ib nqe lus,¹⁷ ci loj zuj zus mus txog hnub uas zoo tag nrho.¹⁸

Tswj peb lub siab lawm ces peb ua siab ntev thiab peb ua siab ntev lawm ces peb hloov ua neeg zoo li Vajtswv, ua rau peb lub siab hloov hlo. Peb ua siab zoo li kwv tij ua rau kwv tij uas txhua tus pab coj tseeb ua. Ib yam li tus Neeg Xamalis Zoo, peb hla kev kom pab leej twg xav tau kev pab, txawm yog lawv tsis yog ib tug phooj ywg.¹⁹ Peb foom koob hmoov rau cov uas hais lus phem txog peb. Peb ua zoo rau cov uas txhob txwm siv peb.²⁰ Puas muaj ib tug cwj pwm uas zoo li Vajtswv los yog Khetos li tus cwj pwm no?

Kuv ua tim khawv tias Vajtswv yuav muab ntxiv rau tej yam uas peb ua kom hloov los ua peb tus Cawm Seej cov pab coj mus txog thaum peb “muaj” Nws txoj kev hlub.²¹ Txoj kev hlub yog ib tug cwj pwm tseem ceeb rau tus Khetos ib tug pab coj:

“Txawm yog kuv hais tau txhua haiv neeg tej lus thiab hais tau cov tim tswv ceeb tsheej tej lus los yog kuv tsis muaj kev hlub, ces tej lus uas kuv hais tau ntawd zoo li tej suab tswb tooj tswb hlau uas nrov nrov xwb.

“Txawm yog kuv yuav muaj [lub txiaj ntsim qhia tau tej uas yuav muaj los yav tom ntej]; muaj txhua yam kev txawj ntse, thiab to taub txhua yam uas tsis muaj neeg paub; thiab txawm yog kuv muaj kev ntseeg hais tau kom tej roob txav tau mus rau lwm qhov, tiam sis yog kuv tsis muaj kev siab hlub, ces kuv yeej tsis muaj nqis dab tsi hlo li.”²²

Kev ntseeg, kev cia siab, kev siab hlub ua rau peb tsim nyog ua Vajtswv txoj hauj lwm.²³ Nim no tseem muaj peb yam [no] …; tiam sis kev siab hlub yog yam uas tseem ceeb dua ntais huv tib si.”²⁴

Cov kwv tij thiab cov muam, peb yeej ua tsis tau ib tug “pab coj ib nrab sij hawm xwb”! Peb ua tsis tau ib tug pab coj raws li ib lo lus qhuab qhia xwb. Yog peb xav sawv khov kho hauv lub caij nyoog kawg no peb yuav tsum ua raws li tag nrho tej cwj pwm uas los ntawm kev ntseeg Khetos—tsis hais tej uas peb tau hais txog hnub no.

Thaum peb siv zog ua Yexus Khetos cov pab coj tseeb, ces yuav ntos tej cwj pwm no ua ke, ib tug yuav ntxiv rau ib tug, thiab nyob ua ke yuav ua rau peb muaj zog. Peb yuav ua siab zoo rau peb cov yeeb ncuab ib yam li peb ua siab zoo rau peb cov phooj ywg. Peb yuav ua siab ncaj thaum tsis muaj leeg twg pom ib yam li thaum lwm tus saib peb. Peb yuav muab siab npuab Vajtswv tab meeg txhua tus ib yam li thaum peb nyob peb ib leeg.

Kuv ua tim khawv tias txhua leej txhua tus ua tau ib tug pab coj ntawm tus Cawm Seej. Kev ua ib tug pab coj tsis yog nyob ntawm yus hluas los laus, yus yog poj niam los txiv neej, yus yog haiv neeg twg, los sis yus muaj hauj lwm hauv lub koom txoos twg. Thaum peb txhua tus ua cov pab coj, ces peb uas yog Tsoom Haiv Neeg Ntseeg hauv Hnub Nyoog Kawg, yuav muaj dag zog kom foom koob hmoov rau peb cov kwv tij thiab cov muam nyob thoob plaws lub ntiaj teb. Tam sim no yog lub sij hawm uas peb yuav tsum rov qab cog lus tias peb yuav rau siab ua Nws cov pab coj.

Cov kwv tij thiab cov muam, tus Cawm Seej hu kom peb txhua leej txhua tus ua Nws cov pab coj. Hauv lub rooj sab laj no xav kom nej siv lub cib fim no “pib ib yam li nyob txheej thaum ub, thiab los cuag [Nws] tag nrho nej lub siab.”²⁵ Nov yog Nws lub Koom Txoos. Kuv hais kuv zaj lus tim khawv tshwj xeeb tias Nws muaj txoj sia nyob. Thov kom Nws foom koob hmoov rau peb txoj kev ua Nws cov pab coj uas rau siab heev. Los ntawm Yexus Khetos lub npe, amees.